Pagpangug̓as Ti Jesus Tung Kakay Yamën Ang Nag̓apangugyatan Na (13:1-20)
13
Taa simanyan,
magdamal pa may mag̓apun pa baklu ra kaw̓utay yang uras ang ipagsilibra yamën ang mga Judio tung pistang pag̓aningën ang Taklib.
Nag̓akdëkan da ni Jesus ang alëngët da ka yang uras ang ipagliit na tung kaliw̓utan ang naa ang magbalik da tung ni Ama na.
Kung tung bag̓ay,
yaming nag̓apangugyatan na,
pirmiami kang lag̓ing nag̓agëgmaan na.
Piru simanyan,
mas pang nagpaita tung yamën yang paggërëgmaën na tung yamën ang bug̓us ang pisan ang maning taa yang pagpaita na.
2 Simanyan atiing pag̓iriapunanami ra na Jesus,
yang aruman yamën ang sam bilug ang ti Judas ang ana ni Simon Iscariote linuyuk dang lag̓i ni Satanas yang isip nang magtraidur da tung ni Jesus.
Jesus washes disciples feet (Juan 13:1-17)
3 Piru ti Jesus,
tanya,
nag̓askëan na rang lag̓i ang yang tanan ang bag̓ay ipinabtang da ni Ama na tung pudir na ig naskëan na ra ka ang tanya nanliit tung Dios ig tung Dios ka magbalik.
4 Purisu atiing pagsararuanami ra,
kumindëng da ti Jesus ang nanluas yang aw̓ël nang atiang langkuy ang pagkatapus nangkël da ta tualya ang ya ray inulambët na tung awa na.
5 Pagkatapus tia,
dayun dang namukbuk ta wai tung palangganang nag̓impisang nagpangug̓as tung mga kakay yamën.
Kada matapus na ta pangug̓as yang mga kakay yamën,
dayun na ra kang tinarapuan yang tualyang atiang inulambët na.
6 Simanyan,
kinaw̓ut na ra ti Simon Pedro.
Mag̓aning ti Pedro tung anyang nagbugnu,
“Ay tia,
Ginuu,
indi ëngëd magkabag̓ay ang yawa pay mangug̓as tung kakayu!”
7 Mag̓aning ti Jesus ang minlës,
“Ta yëën,
kung unu pay lagpakan yang pag̓abuatung naa,
ta yawa,
indi mu ilëm nag̓amarësmësan numanyan.
Piru tung uri,
maintindian mu ra ka.”
8 Mag̓aning ti Pedrong tuminuw̓al,
“Piru yuu indi ra ka ëngëd ipaug̓asu yang kakayu tung nuyu ang asta tung sampa.”
Mag̓aning ti Jesus ang minlës,
“Kung indiaw mangug̓as tung kakay mu,
yang gustu nang ianing,
anda ra kay kalalabtën mu tung yëën.”
9 Mag̓aning ti Pedrong nagtimalës,
“Abaa,
Ginuu,
kung maning tii pala,
bëlag̓an ilëm yang kakayu ay ug̓asan mu,
ang indi,
pati kalimaw pati kuluu!”
10 Mag̓aning ti Jesus ang nagtuw̓al,
“Kung tinu pay baklung napagdig̓u,
limpiu rang pisan yang tinanguni na.
Anda ray ministir nang magdig̓u pang uman,
ang indi,
ya ra ilëm yang kakay nang ipinagpanaw-panaw na ang kaministiran pang ug̓asan.
Katulad tung numyu numanyan,
kuintaamu ra ka ta nagdig̓u ay pinunasanamu rang tanan tung mga kasalanan mi,
sapayan pa taang sam bilug,”
mag̓aning.
11 Naa pala,
naskëan da kang lag̓i ni Jesus kung tinu pay magtraidur tung anya.
Purisu ya ray ipinagpasaplid nang sapayan pa unung taang sam bilug.
12 Simanyan pagkapangug̓as na yang kakay yamën ang tanan,
pagkasuut na yang aw̓ël nang atiang linuas na,
dayun dang nagbalik tung dating puistu na tung lamisaan.
Mag̓aning tung yamën ang nagtalimaan,
“Ta,
nag̓aintindian mi ra yang linagpakan yang binuatung naa tung numyu?
13 Ag̓aningënaw numyung Rabbi mi kag Ginuu mi.
Tama ka tia ay ya ra ka man taang pagkabëtangu.
14 Kapurisu kumus yuu ngani ang Ginuu mi kag Rabbi mi ay nagparanëk yang pagkabëtangu ang nagpangug̓as tung mga kakay mi,
pati yamung nag̓apangugyatanu,
dapatamu kang magpararanëkan ang mag̓urug̓asan tung mga kakay mi.
15 Sipurki pinaitaanamu ra yëën ta mulidu ug̓ud kumpurming unu pay binuatu tung numyu nungayna,
ya kay usuyun mi.
16 Iugtulu tung numyu yang kamatuuran,
yang sasang kirëpën bëlag̓an bag̓ay ang lumandaw pa tung ag̓alën na.
Ya ka yang sasang taung tinuw̓ul,
bëlag̓an kang bag̓ay ang magpaabwat pa tung nagtuw̓ul tung anya.
17 Kung nag̓aintindian mi ra ka yang nag̓adapatan yang nag̓ipag̓aningung atia tung numyu,
intunsis duru amug kasadya kung ya kay usuyun mi.
18 Yang nag̓ipag̓aningung atia bëlag̓an ang mag̓aning ang yamung tanan ay nag̓adapatan na.
Ay sasa may sasa tung numyung pinamiliku,
nag̓aintindianu ra kang lag̓i kung unu pang sistimaay ta tau.
Ug̓aring nagkamaning ilëm tia yang pagpiliku tung numyu sasa may sasa ay ug̓ud asan da magkamatuud yang sasang napabtang tung kasulatan ang mag̓aning,
‘May sasang ungkuyung nagsaruanami pa ka man ang pagkatapus ya pa kay magtraidur tung yëëna.’
Jesus predicts betrayal (Juan 13:18-38)
19 Yang bag̓ay ang atia nag̓ipaskëu rang lag̓i tung numyu numaan ug̓ud kung mainabu ra nganing tung yëën,
padayunan mi ra ka ëngëd yang pagparanangërën mi tung yëën ang yuu ya ka man yang nag̓ipagpailalaw ra kang lag̓ing pirmi tung numyub.
20 Iugtulu tung numyu yang kamatuuran,
kung tinu pay magpauyun tung kumpurming pag̓atuw̓ulung magpakaw̓ut yang bitalaw ang katulad ka tung numyu,
katimbang nang yuu kay nag̓apauyunan na.
Ig kung tinu pay magpauyun tung yëën,
katimbang nang pati yang nagtuw̓ul tung yëën,
ya kay nag̓apauyunan na,”
mag̓aning ti Jesus tung yamën.
Nag̓asambit Ni Jesus Ang Tanya Traidurun Da Yang Sasang Aruman Na (13:21-30)
21 Simanyan,
pagkaaning ni Jesus yang mga bag̓ay ang atia,
naliwag̓an da ta mupia ta pag̓isip.
Purisu indi ra napag̓ëgtëm,
kung indi,
dayun dang nagprangka tung yamën ang mag̓aning,
“Naa w̓ang ianingu ra tung numyu talagang matuud.
May sam bilug tung numyung nag̓apangugyatanu ang yay magtraidur tung yëën,”
mag̓aning.
22 Pagkadngël da yamën tii,
nagtërëlëng-tëlënganami ra ilëm ay andang pisan ay kaliw̓utan yamën kung tinu pa ilëm atiing nag̓ianing na.
23 Simanyan yuung aruman nirang sam bilug ang alëngët ëngëd tung kinaisipan ni Jesus,
yuu kay naampir tung dëbdëb na.
24 Purisu yuu kay sininyatan ni Simon Pedrong inuyaw̓-uyaw̓an ang para magtalimaanaw tung ni Jesus kung tinu pang tauay tiang nag̓ianing na.
25 Kapurisu,
ta yëën,
dayunaw rang napataliling ang minalas tung ni Jesus,
“Ginuu,
tinu pa atiang nag̓aaning mu?”
26 Mag̓aning ti Jesus ang minlës ang ya ra ka ag̓ialasay na tung yëën,
“Ya ra yang kumpurming tinu pay pakdulanu yang tinapay ang naang itëkmëw ra tung sëra,”
mag̓aning.
Simanyan dayun dang namingas ta tinapay ang ya ray itinëkmë na tung sëra.
Pagkatëkmë na,
dayun na rang ipinarawat tung ni Judas ang naang ana ni Simon ang Iscariotëc.
27 Pagkapangan ni Judas yang tinapay ang atia,
ti Satanas ya ray nag̓impisang naggaëm tung anya.
Diritsyung inaning ni Jesus ang,
“Ala,
kung unu pay nag̓aisipan mung buatën,
kaliën mu ra!”
mag̓aning.
28 Simanyan,
tung yamën ang kadaklan ang mga kasadu ni Jesus,
anday nakdëk kung unu pay nag̓adapatan yang inaning ni Jesus ang atia tung anya.
29 Kanisip yang duma,
kumus ti Judas yang manig̓ëpët yang kuarta yamën ang sang kaugpuan,
ya ilëm agtuw̓ulay ni Jesus ang mangalang ta mga kaministiran yamën ang mamista,
u muya kung tinuw̓ul na ilëm ang mamakdul-pakdul ta kuarta tung mga maliliwag̓ën.
30 Simanyan ti Judas ang naa,
pagkapangan na yang tinapay ang atia,
dayun dang luminampud ang nagpanaw.
Law̓ii ra yang kaliw̓utan.
Nag̓apakdulan Ni Jesus Yang Mga Taung Nag̓apangugyatan Na Ta Baklung Katuw̓ulan (13:31-35)
31 Simanyan pagliit ni Judas,
mag̓aning ti Jesus tung yamën ang mga kaarumanan na,
“Simanyan ang mga uras ang naa,
ya ray uras ang ipagpadëngëg ëngëd yang Dios tung yëën ang pag̓aningën ang Maninga Tau natëtëngëd tung pagtalusu tung kalëlyag̓an na ig asanaw ra ka ikadëngëg na.
32 Kapurisu kung ikadëngëg̓aw ra anya,
tanya mismu ay magpadëngëg tung yëën ang indi ra ilëm buay.
33 Yamung mga kaarumananung nag̓amaalu ta mupia,
gësyë ra ilëm yang uras yang tiniru taa tung numyu.
Pagkatapus kung magliitaw ra nganing,
sagyapënaw numyu,
piru katulad tung ipinag̓aningu tung may mga katëngdanand,
ya ra kay nag̓ianingu tung numyu numaan ang kung ariaw pa manganing,
ta yamu indiamu pa maangay.
34 Purisu numaan,
may baklung katuw̓ulan ang ag̓ipakdulu tung numyu ang yamu maggërëgmaanamu ra.
Katulad tung gëgmang naang nag̓ipaitaw tung numyu,
ya ray numyung pausuyan ang maggërëgmaan.
35 Kung maggërëgmaanamu ra ta maning tia,
asan da ngaintindiay yang kadaklan ang mga tau ang yamu talagang mga tauanung pag̓usuy ra tung yëën,”
mag̓aning.
Nag̓aula Ni Jesus Ang Ti Pedro Mag̓ingwara Tung Anya (13:36-38)
36 Atii,
ti Simon Pedro ya ray nabngang nagtalimaan tung anya ang mag̓aning,
“Ginuu,
aria pa manganing?”
Mag̓aning ti Jesus ang minlës,
“Simanyan,
kung ariaw pa manganing,
indi maimung magpakignunuta tung yëën numaan,
kung indi,
tung uria pa manikad.”
37 Mag̓aning ti Pedrong nagtimalës,
“Ginuu,
ayw̓a indi maimung magpakignunutaw rang lag̓i tung nuyu numaan?
Kung tung yëën ilëm,
pakugmatayana yëën!”
38 Mag̓aning ti Jesus ang nagtimalës,
“Unu pa,
pakugmatayanaw pa nuyu?
Naa w̓ang ianingu tung nuyu,
Pedro,
talagang matuud.
Baklu ra manuluk yang manu,
maklua rang mag̓ingwara tung yëën ang indiaw pala nag̓ailala mu,”
mag̓aning.