Nag̓ipananglit Ni Jesus Yang Sadili Na Tung Dalan Ang Panganing Tung Dios (14:1-14)
14
Taa numanyan dayun dang sinugpatan ni Jesus yang nag̓ianing na tung yamën ang nag̓apangugyatan nang mag̓aning,
“Indiamu ra magpakabëgbëg ta kulu,
ang indi,
idayun mi ra ka ëngëd yang pagtaralig̓ën mi tung Dios pati tung yëën.
2 Duun tung pag̓atiniran ni Ama durung pisan agkarugal yang pagparakëënan ig duunaw ra ka mag̓angay ang para masimpananamu ra ka yëën ta mga puistu mi duun.
Kung bëlag̓an matuud tia,
indiamu ra rin pinakdëku.
The only way to God (Juan 14:1-14)
3 Kung duunaw ra,
masimpananamu ra ka yëën ta mga puistu mi,
magbalikaw ra ka taang mag̓ëkël tung numyu ug̓ud kung ariaw pa,
ay duunamu ka.
4 Kidispuis pa kung ariaw pa manganing,
nag̓askëan mi ra ka yang dalan ang panganing duun.”
5 Mag̓aning ti Tomas ang suminublang,
“Ginuu,
indi ngani nag̓askëan yamën kung aria pa manganing.
Ya pa ag̓aring maskëan yamën yang dalan ang panganing duun?”
6 Mag̓aning ka ti Jesus ang nagtimalës,
“Yuu ra taa mismu yang maning pa tung dalan ang kung tinu pay mag̓usuy,
asan da nga tultulay na yang matuud ang pag̓irintindiën tung Dios ay asan da ka nga paëyangayu ta ipagpangabui nang baklu ang uyun tung anya.
Andang pisan ay mapagpalëngët tung ni Ama,
kung indi magtalig yang sadili na tung yëën.
7 Kung nag̓ailalaw ra numyung matuud,
pati ti Ama nag̓ailala mi ra ka.
Mag̓impisa ra numaan mailala mi ra ig naita mi ra ka nganing.”
8 Mag̓aning ti Felipeng minlës,
“Ginuu,
ipaita mu ra ëngëd kanay tung yamën ti Ama mu.
Maita ilëm yamën,
kuntintu ra tung mga isip yamën.”
9 Mag̓aning ti Jesus ang minlës,
“Ta,
kabuayaw ra taa tung numyu,
piru naa pala,
Felipe,
indiaw pa ka ëngëd nag̓ailala mu?
Sipurki kung tinu pay naita tung yëën,
katimbang nang naita na ka ti Ama.
Ya pa ag̓aring pag̓aning mu ang ipaitaw pa tung numyu ti Ama?
10 Ayw̓a,
india pa panangëd ang yami ni Ama paglinukutay?
Yang bitalaw nganing ang nag̓ipagpakaw̓utu tung numyu bëlag̓an sadiling bëët-bëëtu ilëm,
ang indi,
ti Ama ang yay pagpakigsasang pirmi tung yëën yay ultimung may kabuat-buatan tung tanan ang pag̓abuatu.
11 Kaministiran manangëramu ra ëngëd tung yëën ang yami ni Ama paglinukutay.
Piru kung midyu maliwag tung mga isip ming panangdën,
yang mga pruibang atiang ipinagpalapusu,
ya ray ipagpanangëd mi tung yëën.
12 Yang ianingung naa tung numyu talagang matuud.
Kung tinu pay pagtalig tung yëën,
mapagpalua ka ta mga pruibang magkaanggid ka tung nag̓ipagpaluaw.
Mas pa ngani magdakël yang mapalua na ëkël tung yëën ang mangërëngan tung anya duun tung ni Ama,
ay ya ray iangayu duun.
13 Purisu maskin unu pay ingalukun mi natëtëngëd tung pagkinapulitay ta,
talagang yay buatënu ug̓ud asan da nga padëngëg̓ay ti Ama ëkël tung yëën ang pag̓aningën nang Ana Na.
14 Kung unu pay ingalukun mi tung yëën natëtëngëd tung pagkinapulitay ta,
yuu ray magbuat tia para tung numyu.”
Nag̓apangakuan Ni Jesus Yang Mga Taung Nag̓apangugyatan Na Ang Tanira Patiniran Ni Ama Na Ta Sasang Manigpadag̓ën-dag̓ën Tung Nira (14:15-24)
15 Mag̓aning ti Jesus ang nagsugpat,
“Kung nag̓agëgmaanaw ra numyung matuud,
yang nag̓ipanuw̓ulu tung numyu ya ray magtumanën mi.
Jesus talks about the Holy Spirit (Juan 14:15-31)
16 Ig ta yëën,
mag̓ingalukaw tung ni Ama ang patiniranamu ra anya ta sasang manigpadag̓ën-dag̓ën tung numyu ang katulad ka tung yëën ug̓ud ya ray magpakëën tung numyung asta tung sampa.
17 Anday duma,
ya ra yang Espiritu Santo ang yay magpasanag tung numyu ang para matultulan mi yang kamatuuran ang liit tung Dios.
Tanya indi ra marisibi yang mga taung kumpurming pagpaguyud tung sistimang pangkaliw̓utan ang naa ay natëtëngëd indi nira nag̓aita ig indi ka nira nag̓ailala.
Piru ta numyu,
nag̓ailala mi ra ay kipurki numaan pagduman da tung numyu ig tung uri,
magtinir da ka tung mga sadili mi mismu.
18 Maskin magliitaw ra taa tung numyu,
indiamu ipaalang-alangung pakapasan ta magpadag̓ën-dag̓ën tung numyu,
kung indi,
balikanamu ka ëngëd yëën.
19 Indi ra ilëm buay,
indiaw ra maitang uman yang kadaklan ang mga tau.
Piru ta numyu,
maitaw si ka ëngëd numyung uman,
sipurki mabuiaw si kang uman,
pati yamung nag̓apangugyatanu mabuiamu si kang uman tung uri.
20 Kaw̓utun da nganing yang uras ang atiang ipagkabuiu si kang uman,
duun mi ra nga bilug̓ay ang yami ni Ama pagsinasaay ig ta yatën pagsarasaanita ra ka.
21 Kung tinu pay pagtuman yang kumpurming nag̓ipanuw̓ulu tung anya,
asan da ka man ta taung paggëgmang matuud tung yëën.
Ig kung tinu pay paggëgma tung yëën,
ya ra kay gëgmaan ni Ama.
Asta yuu,
gëgmaanu kang pagpailalaan.”
22 Simanyan,
ti Judas ang atiing sam bilug ang yay natukayu tung ni Judas Iscariote,
ya ray nabnga ang mag̓aning tung ni Jesus,
“Ginuu,
ayw̓at nagkamaning dang yami ilëm ay pagpailalaan mu,
piru tung kadaklan ang mga tau pala,
india ra ka magpailala?”
23 Mag̓aning ti Jesus ang minlës,
“Kung tinu pay paggëgmang matuud tung yëën,
yang bitalaw yay magtumanën na.
Purisu gëgmaan ka ni Ama,
ig ya ra kay palëngtan yamën ni Ama ang pakëënan.
24 Piru kung tinu pa man ay indi paggëgma tung yëën,
pati mga bitalaw indi na kag tumanën.
Ang pagkatapus yang bitalaung atiang nagkaragngël mi bëlag̓an sadiling bëët-bëëtu ilëm,
ang indi,
liit tung ni Amang nagtuw̓ul tung yëën.
Nag̓apaktël Ni Jesus Yang Isip Yang Mga Taung Nag̓apangugyatan Na Ang Yay Pamutwanan Na (14:25-31)
25 “Yang mga bag̓ay ang atia,
ipinagpakdëku rang lag̓i tung numyu mintras taanaw pa tung numyu.
26 Piru maskin magliitaw ra ka man taa tung numyu,
yang manigpadag̓ën-dag̓ën ang naang nasakuyanu nungayna ang ya ra ka man yang Espiritu Santo,
ya ray paangayën ni Ama tung numyu,
bilang kapakliu.
Ya ray magturuldukanën tung numyu yang tanan ang bag̓ay ang kaministiran ming maintindian.
Ipadëmdëm na nganing tung numyu yang tanan ang ipinagngëlu tung numyu.
27 Kalimëngan yang ibutwanu tung numyu.
Yang kalimëngan ang atia,
ya ra mismu yang kalimëngan yang isipung ipanënaku tung numyu.
Indi ëngëd mapasiring-siringan taa tung kaliw̓utan yang kalimëngan ang naa.
Kapurisu indiamu ra magpakalibëgbëg ta kulu,
indi amu ra ka magpatalaw.
28 Nungayna,
nagngëlaw ra ka numyung pag̓aning ang yuu magliit da ang pagkatapus magbalikaw si ka taa tung numyu.
Kung nag̓agëgmaanaw numyu ta ustu,
yamu ra rin agsadyaay natëtëngëd mangayaw ra tung ni Ama.
Ay ya pa ag̓ari,
numanyan ti Ama mas abwat ta pagkabëtang kay tung yëën.
Piru kung mangayaw ra nganing tung anya,
padëngëg̓anaw ra anyang pabalikën tung dating pagkabëtangung pariung pisan tung pagkabëtang na ang ya ra kay ikaayën mi.
29 Inugtulanamu rang lag̓i yëën numanyan natëtëngëd tung pagliitu baklu ra mainabu ug̓ud kung mainabu ra nganing,
indiamu ra maplëkan ta ipagtalig mi tung yëën.
30 Simanyan gësyë ra ilëm yang uras ang nag̓ipagpaamanu tung numyu ay natëtëngëd ti Satanas ang yay pagmangulu tung sistima yang kaliw̓utan ang naang balaw̓ag ang pisan tung ni Ama,
magkakaw̓ut da.
Tung bag̓ay,
anday pudir nang maggaëm tung yëën.
31 Piru maskin pang maning tiang mainabu tung yëën,
magtumanaw ra ka ëngëd yang itinuw̓ul ni Ama tung yëën ug̓ud asan da ngaintindiay yang mga tau tung kaliw̓utan ang talagang nag̓agëgmaanu ti Ama.
Ala,
amus ta ra.
Këmdëngita rang magliit taa,”
mag̓aning.