Yang Mga Pari Pamagplanu Ra Kung Ya Pa Ag̓aring Mapadëëp Nira Ti Jesus (26:1-5)
26
Taa numanyan atiing pagtapus ni Jesus tung pagparasanag̓ën nang atia natëtëngëd tung uras ang panalungaan,
dayun na rang sinugpatan yang bitala na tung yamën ang nag̓apangugyatan na ta maning taa:
2 “Nag̓askëan mi ra ka ang tung yaklung kaldaw kumaw̓ut da yang pistang Taklib.
Ya ray uras ang yuung pag̓aningën ang Maninga Tau iintrigaw ra tung pudir yang mga tau ang para ipalansangaw ra nira tung krus,”
mag̓aning.
Pamagparaig̓u Yang Pamag̓ërëkëlën Kung Ya Pa Ag̓aring Mapaimatay Nira Ti Jesus (26:3-5)
3 Simanyan tung uras kang atii duun tung balay ni Caifas ang yay paring pinakalandaw,
pamagsaragpun da yang mga paring atiang arabubwat ta katëngdanan may yang mga pamagpakigmaëpët tung banwa.
4 Pamag̓urunta-untaan da tanira kung unu pay matinlung idyang gamitën ang para mapadëëp nira ti Jesus ang anday durung taung makdëk ang pagkatapus ipaimatay nira dayun.
5 Ag̓aaning tanirang pamagkërësën,
“Indi ta ilëm ituun tung pista.
Muya magkagulu yang mga tau,”
ag̓aaning.
Ti Jesus Nag̓abuw̓ukbukan Yang Sasang Baw̓ay Ta Paamut (26:6-13)
6 Taa numanyan,
ti Jesus tanya duun tung Betania tung balay ni Simon ang yang tukaw may laru na pa rin tung ulit nang makabiw̓iru.
7 Numanyan may sasang baw̓ay ang nagpalëngët tung ni Jesus ang may ëkël nang midyu tung prasku ang yay punuk ta sasang paamut ang durug kamaal.
Pagkatapus ya ray ibinukbuk na tung kulu ni Jesus ang pagpakigsadua.
8 Numanyan pagkaita yamën yang binuat yang baw̓ay ang atia,
ya ra pakulainay yamën.
Ag̓aaningami,
“Abaa,
gasta ra ilëm tia!
9 Kung ya pa rin ipaalangay na tia,
naita pa rin ta dakulung kuarta.
Napamakdul-pakdul pa rin tung mga maliliwag̓ën!”
10 Simanyan pagkasiman ni Jesus,
dayun dang nagbitala tung yamën ang mag̓aning,
“Ayw̓at nag̓apakdulan mi ta pagliw̓ëg̓an yang isip yang baw̓ay ang naa?
Durug tinlu yang binuat nang naa tung yëën.
11 Ay kung natëtëngëd tung mga maliliwag̓ën ang atiang nag̓aisip mi,
maskin unu pang urasay mataw̓angan mi ay taang pirmi.
Piru ta yëën bëlag̓an ang mag̓aning ang maskin unu pang urasay ang taanaw ang pirmi tung numyu.
12 Ay tung pagbukbuk na yang paamut ang naa tung yëën,
yang kaalimbawaanu maning pa tung patayaw rang lag̓i ang pagkatapus sinimpananaw rang lag̓i anyang pinaamutan ang para ilg̓uraw ra tung lëyang.
13 Iugtulu tung numyu yang kamatuuran,
maskin ay pang banwaay tung bilug ang kaliw̓utan ang yang mga tau pampakaw̓utan da yang Matinlung Balita natëtëngëd tung yëën,
yang binuatan yang baw̓ay ang naa tung yëën mabalita ka tung mga tau ug̓ud ya ray madëmdëman nira tung anya,”
mag̓aning.
Pagprisintar Ti Judas Tung Mga Pari Ang Tanya Ray Magpadëëp Tung Ni Jesus (26:14-16)
14 Pagkatapus numanyan ti Judas ang Iscariote ang yay sam bilug tung yamën ang mga tauan ni Jesus ang sam puluk may durua,
anday dumang binuat na,
nag̓angay ra duun tung mga paring atiang arabubwat ta katëngdanan.
15 Nagpakiksën da tung nirang mag̓aning,
“Pira pa w̓asu yang mapakdul mi tung yëën kung alimbawa mapadëëpu ti Jesus ang para maintriga ra tung pudir mi?”
Purisu binilangan da nira ta tulung puluk ang bilug ang kuartang atiang salapi.
16 Purisu mag̓impisa tung uras ang atii,
ti Judas ang naa pirmi ra ilëm ang pagbantay ta këtat ang para mapadëëp na ti Jesus.
Pagpasimpan Ti Jesus Tung Pagsilibra Nira Tung Pistang Pag̓aningën Ang Taklib (26:17-25)
17 Numanyan tung primirung sug̓ud yang Pistang Nag̓ipagpangan Ta Tinapay Ang Indi Pinaliskag,
yaming nag̓apangugyatan ni Jesus,
nagpalëngëtami ra tung anyang nagtalimaan ang mag̓aning,
“Ariami pa w̓asung balayay magsimpan yang iapun tang para silibraën ta yang pistang naang Taklib?”
18 Mag̓aning ka ti Jesus ang minlës,
“Mag̓angayamu ra kanay duun tung siudad.
May sasang taung sinambitu ra tung numyu.
Yamu ra ag̓aaning tung anya,
‘Yami minangayami ilëm taa,
ay yang tuyun ni Amëëy tang paturuldukanën tung yatën,
kinaw̓ut da unu yang uras ang itinipu yang Dios tung anya.
Gustu na unu ang asan tung balay mu magsilibra yang pistang naang Taklib,
kasiraanami ra ka unung nag̓apangugyatan na,’”
ag̓aaning ti Jesus tung yamën.
19 Atii dayun da ka man ang tinuman yamën yang itinuw̓ul ni Jesus ang atia tung yamën ang nagsimpan da duun ta iapun yamën ang magsilibra tung pista.
20 Numanyan atiing panlikarëm da,
ti Jesus nagpasintar da tung lamisaan ang para magyapun da,
kasiraanami ra kang nag̓apangugyatan nang sam puluk may durua.
21 Atiing pagsararuanami ra,
mag̓aning ti Jesus tung yamën,
“Iugtulu tung numyu,
may sam bilug tung numyu ang ray magtraidur tung yëën,”
ag̓aaning.
22 Pagkagngël yamën tia,
inampayanami ra ta kapungaw yamën ang duru.
Purisu masigtalimaanami tung anyang mag̓aning,
“Bëlag̓an ka siguru yuu,
Ginuu,
anu?”
23 Ag̓aaning ka ti Jesus ang minlës,
“Anday dumang magtraidur tung yëën,
kung indi,
ya ra yang sasang dating kasaduu mismu ang pagpakidëngan ka pa man tung yëën ang pagtëkmë tung sërab.
24 Kung tung bag̓ay,
yuung pag̓aningën ang Maninga Tau,
imatayënaw ra ka man ang katulad ka tung naula natëtëngëd tung yëën ang napabtang ka tung kasulatan.
Piru yang taung naang magtraidur tung yëën,
ya ray nag̓apanganugunanu ta mupia.
Ay kipurki durug lëbat yang talungaën na tung uri.
Mas maayën pa rin ang indi ra ilëm ipinangana,”
mag̓aning.
25 Atii nabnga ra ti Judas ang ya ra ka man mismu yang pagtimang magtraidur tung anya.
Mag̓aning tung ni Jesus,
“Bëlag̓an ka siguru yuu,
Rabbi,
anu?”
Mag̓aning ka ti Jesus ang minlës,
“Yawa ka nganing ay pag̓aning,”
ag̓aaning.
May Sasang Nag̓atukud Ni Jesus Ang Para Yay Ipausuy Na Tung Mga Tauan Nang Mamagdëmdëm Tung Anyang Nagpakugmatay Para Tung Nira (26:26-30)
26 Taa numanyan atiing sigi-sigi ra yang pagsararuan yamën,
ti Jesus namisik da ta tinapay ang ya ray pinasalamatan na tung Dios.
Pagkatapus,
dayun na rang pinagpingas-pingas ang ipinarawat tung yamën ang mag̓aning,
“Ia,
panganën mi ra.
Atia ya ra taang tinanguniu,”
mag̓aning.
27 Pagkatapus dayun sing namisik ta sam basung binu ang ya si kay pinasalamatan na tung Dios ang pagkatapus dayun na rang ipinarawat tung yamën ang mag̓aning,
“Ia,
ya ray pagbërëlës-bëlësan ming igmën.
28 Ay kipurki tia ya ra taang dug̓uung ipaturuku ang para ya ray magpabakëd tung sasang pagpakigpaig̓ung tukurun yang Dios ug̓ud asan da nga patawaray na yang dakëlëng mga tau tung mga kasalanan nira.
29 Iugtulu tung numyu,
ultimu ra ilëm taa yang panginëmu ta binung maning taang nag̓ipagsilibra ta tung pistang naa.
Piru kung kaw̓utun da nganing yang uras ang ipagpabistu ra ëngëd ang pisan yang Dios yang paggaraëmën na,
magkasira-siraanita si kang magpakasadya tung tanan ang kaayënan na ang yay maning pa tung sasang igmën ta sing baklu,”
mag̓aning.
30 Pagkatapus ta pag̓iriapunan yamën ang atia,
dayunami rang nagkantang nagdayaw tung Dios.
Pagkatapus tia,
dayunami rang naglampud ang nagpanaw duun tung bukid ang atiang durung mga ayung pag̓aningën ang olibo.
Nag̓aula Ni Jesus Ang Yang Mga Tauan Na Mamamalpas Da Tung Anya, Maskin Pa Ti Pedro, Ya Ka (26:31-35)
31 Numanyan atiing panungulami ra tung bukid ang atia,
mag̓aning ti Jesus ang nagbitala tung yamën,
“Numaan ang law̓ii maplëkanamu ra ta ipagtalig mi tung yëën natëtëngëd tung mainabu tung yëën.
Ayw̓a indiamu ra aningënu ay kipurki magkamatuuranita ra yang sasang ipinananglit yang Dios ang tukaw ang napabtang tung kasulatan ang mag̓aning,
‘Ilug̓utu ra yang manigpastur ang imatayën da ang pagkatapus magkarawasak da ka ilëm yang mga karniru na,’
ag̓aaningc.
32 Piru maskin pang maning tii ay mainabu,
kung pabungkarasënaw ra nganing yang Dios,
magtukawaw ra tung numyu duun tung Galilea.”
33 Mag̓aning ti Pedrong nabnga,
“Maskin yang kadaklan maplëkan da ta ipagtalig nira tung nuyu,
piru ta yëën indiaw ka ëngëd maplëkan!”
mag̓aning.
34 Mag̓aning ti Jesus ang minlës,
“Aa Pedro,
iugtulu tung nuyu,
numaan ang law̓iing naa,
baklu manuluk yang manu,
maklua ra kang mag̓ingwara tung yëën.”
35 Mag̓aning ka ti Pedrong tuminuw̓al,
“Maskin ipaunungaw pa tung nuyung imatayën,
talagang indiaw ra ka ëngëd mag̓ingwara tung nuyu,”
mag̓aning.
Asta yaming kadaklan maning ka tia yang nabitala yamën.
Yang Nag̓ipag̓ampu Ni Jesus Natëtëngëd Tung Pinitinsiang Atiang Nag̓atalunga Na (26:36-46)
36 Taa numanyan ti Jesus dayun dang nag̓angay duun tung lugar ang paggug̓uuyan tung Getsemane,
kasiraanami ra ka.
Mag̓aning ti Jesus tung yamën,
“Taanamu ra ilëm kanay ngarung.
Mangayaw pa kanay tani tung tukaw-tukaw ang para mag̓ampuaw,”
ag̓aaning.
37 Numanyan yang ingkëlan nang pinanunut,
ya ra yang mga aruman yamën ang ti Pedro may yang mga ana ni Zebedeong atiang durua.
Numanyan ti Jesus inampayan da ta kapungaw nang duru ig naliwag̓an da ta mupiang pag̓isip.
38 Mag̓aning tung mga aruman na,
“Ag̓ampayanaw ra ta kapupungawënung duru.
Arus pa ilëm muntuk yang linawaw.
Taanamu ra ilëm kanay mag̓ëlat ang magpakipulaw,”
mag̓aning.
39 Numanyan pagpatukaw-tukaw ni Jesus ta gësyë,
ya rag papadagpa tung tanëk ang pag̓ampu ang mag̓aning,
“Amaw,
kung maimu ilëm tung nuyu,
ipataklib mu ra ilëm tung yëën yang pinitinsiang naang nag̓atalungaw.
Piru maskin pang nag̓apagbitalaw ta maning tii,
bëlag̓an yang yëën ang kalëlyag̓an ay matuman,
kung indi,
yang nuyu,”
ag̓aaning.
40 Numanyan pagbalik na tung mga aruman yamën ang atiang tulu,
kaw̓utan na,
naa pala mga ëlëk da.
Purisu dayun na rang inaning ti Pedro ang “Abaw,
ba tia Pedro,
maskin sang uras da ilëm indiamu ra nasarang ang nagpakipulaw tung yëën ang para mapakiununganaw ra rin numyu tung kaliwag̓anung naa?
41 Magpulawamu ra ta ustung mag̓ampu ug̓ud indiamu ra madëëg̓an ta tuksu.
Tung bag̓ay nag̓askëanu ang durung gustu ming manguntiël tung tuksu,
piru nusias ilëm dërëëg̓ënamu pa yang kaluluw̓ayën mi,”
mag̓aning.
42 Utru si,
nagpaalawid-lawid si ti Jesus tung nira ang nag̓arampuën sing uman ang mag̓aning,
“Amaw,
kung talagang indi ka ëngëd maimu ang indiaw pasaran yang pinitinsiang naang nag̓atalungaw,
tay yang kalëlyag̓an mu yay matuman,”
mag̓aning.
43 Pagkatapus pagbalik na si tung mga aruman yamën ang atiang tulu,
kaw̓utan na,
mga ëlëk si ka ëngëd ay dërëëg̓ën da yang puyat nirang duru.
44 Utru si binutwanan na sing nagpalawid-lawid ang nag̓arampuën si ta yaklung bisis ang maning ka tia yang ipinag̓ampu na.
45 Pagkatapus pagbalik na si tung mga tauan nang atia,
dayun na rang inaning,
“Ba tia,
ëlëk mi rang ëlëk!
Ustu tiang pamaënay mi!
Kinaw̓ut da yang uras ang yuung pag̓aningën ang Maninga Tau iintrigaw ra tung pudir yang mga taung malalain.
46 Ala,
magbungkarasamura,
ay magpanawita ra.
Uay,
naa ra yang pagtraidur tung yëën,”
mag̓aning.
Yang Pagpadëëp Ni Judas Tung Ni Jesus (26:47-56)
47 Numanyan,
atiing indi pa nganing nag̓atapus ta pagbitala ti Jesus,
asan da ka man nakaw̓ut ti Judas ang sasa ka pa man tung yamën ang sam puluk may durua ang nag̓apangugyatan na.
Sam paluyug̓an da tanira yang mga taung buntun ang pamag̓ëkël-ëkël ta mga gëëd may mga palu.
Ay pinanuw̓ul da yang mga paring arabubwat ta katëngdanan kasiraan da ka yang mga pamagpakigmaëpët tung banwa.
48 Atii pala,
yang pagtraidur ang naa,
may sasang sinyas ang ipinaskë na rang lag̓i tung mga kaarumanan na ang mag̓aning,
“Kung kumaw̓utita ra nganing duun,
yang taung ara-araanu,
mag̓aningamu ya ra tia.
Dëëpën mi rang lag̓i,”
ag̓aaning.
49 Purisu pagkaw̓ut ni Judas duun,
diritsyu rang nagpalëngët tung ni Jesus ang nagbugnu tung anyang mag̓aning,
“Mupiang law̓ii asan,
Rabbi!”
Pagkatapus dayun na ra ka man ang inara-araan.
50 Mag̓aning ti Jesus ang minlës,
“Aay ungkuy,
ya ra taa yang inangay mud?”
mag̓aning.
Numanyan pagkaara-ara ni Judas tung anya,
diritsyung pinalëngtan yang mga kaarumanan nang dinëëp.
51 Atii may sasang aruman yamëne ang ya ray napanlaw̓ut yang gëëd nang napanibat tung sasang turuw̓ulun yang paring pinakaabwat ang pagkatapus yang talinga na ra ka ilëm ay nalampung.
52 Pagkatapus dayun dang sinambëng ni Jesus ang inaning,
“Ëëy,
itag̓ëb mu ra tiang gëëd mu.
Kipurki yang kumpurming paggamit ta matarëm,
matarëm ka yang mapatayan na.
53 Ayw̓a,
indi mu nag̓askëan ang kung magpataw̓angaw ilëm tung ni Ama,
antimanung patuw̓ulanaw ra anya tung mga angil ang liniw̓u-liw̓u ang para mamagdipindir da tung yëën?
54 Ug̓aring kung magpataw̓angaw tung anya,
ya pa ag̓aaring magkamatuud da yang sasang napabtang tung kasulatan natëtëngëd tung yëën ang yuu unu dapat ang pasaran ta maning ka taa?”
ag̓aaning.
55 Numanyan dayun dang nagbitala tung mga taung atiang buntun ang mag̓aning,
“Ayw̓a yuu sasang ribildi ang yuu rag sulungay mi ta mga gëëd may mga palu ang para madëëpaw numyu?
Kaldaw-kaldaw duunaug kakarung tung palayas yang pagtuuan ang pinakalusung pagturuldukanën tung mga tau ang pagkatapus indiaw pa ka dinëëp mi?
56 Piru nag̓askëanu ang nagkamaninganaw ra ta maning taa ay ug̓ud magkamatuud da yang nagkarasulat yang mga manig̓ula ang tukaw natëtëngëd tung yëën,”
mag̓aning.
Atii,
yaming tanan ang nag̓apangugyatan na,
dayunami rang namutwan tung anyang nagpalibrif.
Magbistaën Da Ti Jesus (26:57-68)
57 Taa numanyan,
ti Jesus ingkëlan da yang mga taung atiang namagdëëp tung anya duun tung balay ni Caifas ang yay paring pinakalandaw.
Duun da kang lag̓i pamagsaragpun yang mga sag̓ad may yang mga pamagpakigmaëpët.
58 Numanyan ti Pedro tanya,
ya ra ilëm manikad tung ni Jesus,
piru atii ra tung kauri-urian da ilëm ang pisan.
Numanyan pagkaw̓ut na duun tung balay ang atia,
dayun dang nagpaklëd tung plasa-plasa na ang nagpakigkarung da tung mga guardia ug̓ud mapaniiran na kung unu pay buatën tung ni Jesus.
59 Numanyan duun tung kaklëran,
yang mga paring arabubwat ta katëngdanan may yang intirung grupu yang mga usgadung pinakalandaw,
ya ray pamagdilëm ta mga taung magpëtël ta malain tung ni Jesus ang para ya ray padatëlan nirang mamagsintinsia tung anya ang dapat ang ipaimatay.
60-61 Maskin duru ra ka man ang mga taung namagsistigus ta kabuklian ang kuntra tung ni Jesus,
piru anda pa ka ëngëd ay pruibang bastanting naita nira ang para ya ra rin ay patiëlan nira.
Pagkatapus atiing patapus-tapusun da yang pagsiristigusun,
may durua nga tauan ang namanalunga ang mag̓aning,
“Yang taung atia nagngël da yamën ang pagbitala ang kayanan na unung gëw̓aën yang pagtuuan ta tung Dios ang pinakalusu ang pagkatapus tung sëlëd ilëm tulung kaldaw,
kayanan na ka unung mapakdëngan si ta baklu,”
ag̓aaningg.
62 Numanyan dayun dang kumindëng yang paring pinakalandaw ang nagtalimaan tung ni Jesus ang mag̓aning,
“Ta,
unu pay matuw̓al mu tung nag̓ibangdan tung nuyu yang duruang atia?”
63 Piru ti Jesus indi nagliing-liing.
Purisu dayun sing inaning yang pari ang “Buinu,
papanumpaëna ra kanay yëën tung aran yang Dios ang makagag̓aëm.
Iugtul mu tung yamën kung yawa ka man yang pag̓aningën ang Cristo,
bilang yang Ana Yang Dios ang pag̓aningën.”
64 Mag̓aning ka ti Jesus ang minlës,
“Yawa ra ka nganing ay pag̓aning.
Tung dumang uras,
yuung pag̓aningën ang Maninga Tau,
maitaaw ra numyung tanan ang yuug kakarung tung tëpad yang Dios ampir tung tuu na ang pagkatapus kung maglëkataw ra nganing taa,
maitaaw ra ka numyung yuug sasaay tung panganud ang liit tung langith.”
65 Pagkagngël yang paring pinakalandaw tia,
anday dumang binuat na,
ya ra bakbakay na yang aw̓ël ang pag̓asuut na ay nasilag da ta duru tung itinuw̓al ni Jesus ang atia.
Mag̓aning tung mga kaarumanan na,
“Ta,
tëlëngan mi,
ya rag pagtiwakaway na yang pagkadios yang Dios!
Ministir pang magdilëmita pa ta sistigus?
Nagngël mi ra ka mismu yang pagtiwakaw na.
66 Ta,
ya pa ag̓ari yang disisiun mi tung taung naa?”
Mag̓aning ka tanirang namansituw̓al,
“Bag̓ay ang pisan tung anyang ipaimatay ra ilëm,”
ag̓aaning.
67-68 Numanyan ti Jesus dayun dang linawayan yang duma tung ityura na ang pagkatapus pinagtaraw̓angan da ka yang duma ta suntuk.
Inintraan da ka yang duma ta dapal ang nunut da ka ta pagpapintu nira tung anyang mag̓aning,
“Ta,
atiing bantug da ang yawa unu yang pag̓aningën ang Cristo,
abir,
pintuën mu kung tinu pa tiang nagtigbak tung nuyu!”
mag̓aning.
Pag̓ingwara Ni Pedro Tung Ni Jesus (26:69-75)
69 Balikan ta ra kanay ti Pedro asan tung lua ang ya pag kakarung tung plasa-plasa yang balay.
Numanyan pinalëngtan da yang sasang turuw̓ulun ang baw̓ay ang binugnu ang,
“Ëëy,
midyu yaway sasang aruman ni Jesus ang nakaang tag̓a Galilea!”
70 Piru ya ra mag̓ingwara ti Pedro duun ka pa man mismu tung pagtaralungaan nirang tanan.
Mag̓aning,
“Indi ilëm nag̓aintindianu kung unu pay gustu mung ianing!”
71 Pagkatapus dayun dang nagpauman ang nagpaampir duun tung may purtang magluluaan tung karsada.
Numanyan may duma sing turuw̓ulun ang baw̓ay ang ya si ay naita tung anya ang pagkatapus nag̓ugtul da tung mga aruman na ang “Uay,
yang taung atia yay sasang aruman ni Jesus ang nakaang tag̓a Nazaret!”
72 Atii nag̓ingwara si ti Pedro ang pinaugtunan na pa ta panumpa ang mag̓aning,
“Agsumpaanu pa tung aran yang Dios,
talagang indi nag̓ailalaw yang taung nakaang nag̓aaning mu kung tinu pa!”
73 Buay-w̓uay ta gësyë,
yang dumang atiang këmdëngan asan,
ya si ay namagpalëngët tung ni Pedrong namagbugnu ang mag̓aning,
“Ëëy,
kamatuuran ka man ang yaway sasang aruman na.
Anday dumang nag̓adëëp yamën tung nuyu ya ra yang puntu yang pamitala mu.”
74 Numanyan ti Pedro dayun sing nanumpang uman ang mag̓aning,
“Sistigus tung pagkamatuud yang Dios ang yang taung nakaang nag̓aaning mi talagang indi nag̓ailalaw.
Parusaanaw pa yang Dios kung bëlag̓an matuud yang nag̓ianingung atia.”
Pagkaaning na tia,
may manung nanuluk da.
75 Baklu ra nga dëmdëmay na yang inaning ni Jesus tung anya ta nungayna ang mag̓aning,
“Baklu manuluk yang manu,
Pedro,
maklua rang mag̓ingwara tung yëën ang yuu pala indiaw nag̓ailala mu.”
Numanyan pagkadëmdëm ni Pedro tii,
diritsyu rang luminua ang nag̓intra ra tarangitën ang duru ra kang pagsurug̓atën nai.