May Nag̓ipananglit Ni Jesus Ang Dapat Pirming Riparasiun Yang Mga Tauan Na Tung Ipaglëkat Na Maskin May Nag̓aaw̓alaan Na (25:1-13)
25
Numanyan mag̓aning ti Jesus ang nagpadayun yang bitala na,
“Kung maglëkataw ra nganing,
yang palaksu yang paggaraëmën yang Dios ay maning taa tung ipananglitung naa.
May sasang kumbira ig may sam puluk nga daralaan ang mamagpasakëp da tung kumbira yang aruman nirang darala.
Anday duma,
namagpanaw ra ang para mamagpakigbag̓as da tung sasang laliing pangasawaa.
Anya-anyang kaas sinag̓ëkël-ëkëlay.
2 Numanyan yang lima lisik yang mga pag̓irisipën nira,
piru yang mga aruman nirang lima ka matandës yang pag̓irintindiën nira.
3 Yang limang naa ya ra ag̓aningayung lisik ay maskin ëkël-ëkël nira yang mga kaas nira piru indi ra nangapagrisirba ta lanab ang ipagkal nira tung mga kaas nira.
4 Yang mga aruman nirang lima ka,
ya ra ag̓aningayung matandës ay bëlag̓an ilëm ang ëkël-ëkël nira yang mga kaas nira,
kung indi,
pati mga parabtangan ang punuk ta lana,
ëkël-ëkël ka nira.
5 Adyus numanyan may naaw̓alaan da yang pangasawa.
Purisu nangapuyat da yang mga darala ta pag̓ëlat ang asta nagkaraalapan da dayun ta ëlëk.
6 Numanyan atiing tënganan da ta law̓ii,
may nagkëndal dang mag̓aning,
‘Alistuamu ra,
tani ra yang pangasawa.
Bag̓asën mi ra!’
7 Atii dayun dang nangapuaw yang mga daralang namaglimpiu yang mga pabilu yang mga kaas nira ang para masig̓aak da.
8 Pagkatapus mag̓aning yang mga daralang naang lisik tung mga aruman nirang matandës,
‘Partiayami ka numyu tiang lana mi.
Tëlëngan mi w̓a,
nag̓aparëngdëngën da yang mga kaas yamën!’
9 Mag̓aning kang nansituw̓al yang mga aruman nirang matandës,
‘Abëë,
maliwag da tia.
Tama-tama ra ka ilëm taa tung mga kaas yamën.
Maayën pa,
mangayamu ra kanay ilëm duun tung tindaan ang mangalang.’
10 Numanyan atiing namagpanaw ra yang mga daralang atiang lisik ang para mamangalang da ta lana,
nasubli ra yang pangasawa.
Naang mga daralang riparasiun dang lag̓i,
ya ray nanganunut tung anyang nangapasakëp tung kumbira.
Numanyan tung pagpaklëd nira tung pagkumbiraan,
dayun dang siniraduan yang purta.
11 Buay-w̓uay ta gësyë,
asan da ka namansikaw̓ut yang limang nga daralaan ang atiang mga lisik.
Sigi ra ilëm yang pagguuy nirang mag̓aning,
‘Duduy,
duduy,
paklërayami ka w̓a!’
12 Mag̓aning yang pangasawang minlës,
‘Iugtulu tung numyu,
indiamu nag̓ailalaw kung nainuamu pa.’”
13 Numanyan pagkatapus yang pananglit ang atia,
dayun dang sinugpatan ni Jesus yang bitala nang mag̓aning,
“Purisu ya ra ka man taang nag̓ipag̓aningu tung numyu ang dapat riparasiunamu ra kang pirmi tung paglëkatu.
Ay indi mi ka man nag̓akdëkan kung unu pang kaldaway ubin kung unu pang urasay yang ipaglëkatu,”
mag̓aning.
May Nag̓ipananglit Ni Jesus Kung Unu Pay Dapat Ang Impurtaën Yang Mga Tauan Na Mintras Pamag̓ëlat Tung Anyang Maglëkat (25:14-30)
14 Numanyan mag̓aning si ti Jesus ang nagsugpat,
“Kung maglëkataw ra nganing,
yang kaalimbawaan yang mainabu ay maning taa tung pananglit ang naa.
May sasang tau ang magliit da tung banwa na ang para magdistinu duun tung dumang lugar.
Purisu baklu nagliit,
pinampaguuyan na ra kanay yang mga turuw̓ulun na ang pagkatapus ipinamiar na tung nira yang manggad na ang para ipapanaw nira.
15 Yang sam bilug piniaran na ta limang liw̓u,
yang sam bilug duruang liw̓u,
ig yang sam bilug san liw̓u.
Yang pagpiar na tung nira kumpurmi yang abilidad nirang sasa may sasa ang mag̓ërëkëlën.
Numanyan pagkatapus ta piar,
dayun dang nagliit.
16 Numanyan yang turuw̓ulun ang atiang piniaran na ta limang liw̓u,
antimanung ingkëlan na yang kuartang atiang ipinapanaw tung nigusyu.
Yang pinakaw̓ut na,
nag̓umintu ra ta lima pa ka ëngëd ang liw̓u.
17 Maning ka tia yang binuat yang turuw̓ulun ang atiang sam bilug ang piniaran na ta duruang liw̓u.
Yang pinakaw̓ut na durua kang liw̓u yang umintu na.
18 Piru yang turuw̓ulun ang atiang sam bilug ang piniaran na ta san liw̓u,
anday dumang binuat na,
nag̓akad da ilëm tung tanëk ang duun da itampëkay na yang kuarta yang ag̓alën na.
19 Nabuay ra,
baklu naglëkat yang ag̓alën yang mga turuw̓ulun ang atia.
Pagkatapus dayun dang nagrindikuinta tung nira.
20 Pagpalëngët yang sam bilug ang piniaran na ta limang liw̓u,
dayun dang nag̓intriga tung ag̓alën na yang kuartang atia,
pati yang umintu nang lima kang liw̓u.
Mag̓aning tung ag̓alën na,
‘Amëëy,
limang liw̓u yang ipiniar mu tung yëën.
Ia,
pati yang lima kang liw̓u ang tubu na,
atia ra ka.’
21 Mag̓aning ka yang ag̓alën nang minlës,
‘Maayën!
Talagang yaway sasang baling turuw̓ulun ig katalig̓an.
Kumus pagpailalaa rang maskin gësyëng kantidad matalig̓ana,
purisu numanyan piarana si ka yëën ta mas dakulung kantidad.
Magpalg̓ura ra tung kasadyaanung naa.’
22 Pagkatapus yang sam bilug sing atiing piniaran na ta duruang liw̓u,
ya si ay nagpalëngët tung ag̓alën nang mag̓aning,
‘Amëëy,
duruang liw̓u yang ipiniar mu tung yëën.
Ia,
pati yang durua kang liw̓ung tubu na,
atia ra ka.’
23 Mag̓aning ka yang ag̓alën nang minlës tung anya,
‘Maayën!
Talagang yaway sasang baling turuw̓ulun ig katalig̓an.
Kumus pagpailalaa rang maskin gësyëng kantidad matalig̓ana,
purisu numanyan piarana si ka yëën ta mas dakulung kantidad.
Magpalg̓ura ra ka tung kasadyaanung naa.’
24 Pagkatapus yang sam bilug sing atiing piniaran na ta san liw̓u,
ya si kay nagpalëngët tung ag̓alën nang mag̓aning,
‘Amëëy,
yang nag̓askëanu tung nuyu,
yawa sasang durug lëpës ang tau.
Pagpakinaw̓anga tung indi mu pinakabëdlayan.
Pagpakaayëna tung indi mu pinaturukan ta ulas mu.
25 Purisu ya ra kay inlëranu tung nuyu,
ay muya kung unu ray buatën mu tung yëën.
Purisu anday dumang binuatu,
itinaluku ra ilëm yang kuarta mung itinampëk tung tanëk.
Ia,
atia ra ka yang kuarta mu ang indi ka nabuinanu.’
26 Mag̓aning ka yang ag̓alën nang minlës,
‘Abaa,
yawa,
inutilang turuw̓uluna!
Duruag katatamad!
Pag̓aninga ka palang nag̓akdëkan mu ang yuu pagpakinaw̓angaw tung indi pinakabëdlayanu,
maskin yang indi pinaturukanu ta ulasu ya ka.
27 Ig disir yang dapat da rin ang binuat mu,
baskin idinipusitu mu ra ilëm yang kuartaw tung bangku ug̓ud tung pagbaliku,
maëklanu pa ka rin pati tubu na.
Atii ra rin.’
28 Pagkatapus dayun dang nanuw̓ul yang ag̓alën na tung mga turuw̓ulun nang duma ang mag̓aning,
‘Ala,
ëklan mi ra tung anya yang kuartaung atia.
Ipakdul mi ra asan tung aruman nang may sam puluk ang liw̓u.
29 Ay ya pa ag̓ari,
kung tinu pay madërëp ang magpapanaw tung ipiniar tung anya,
piaran pa ka ëngëd ta mas pa ang asta dakulung pisan.
Piru kung tinu pay paw̓aya-w̓ayaën tung ipiniar tung anya,
maski nganing yang gësyëng atiang ipiniar tung anya,
bawiën pa ka ëngëd tung anya.
30 Kung natëtëngëd tung turuw̓ulunung naang sam bilug ang nagluang inutil,
iplëk mi ra tung lua duun tung makiklëp.
Duun da magtarangitën ang magkarëtkët yang isi nang magpapinitinsia,’”
mag̓aning.
Nag̓ipananglit Ni Jesus Natëtëngëd Tung Pagsirintinsiaën Na Tung Uri Ang Yang Mga Tau Papagbëlag̓ën Na Tung Duruang Grupu (25:31-46)
31 Numanyan mag̓aning si ti Jesus ang nagpadayun yang bitala na,
“Ta yëën ang pag̓aningën ang Maninga Tau,
kung maglëkataw ra nganing,
durung pisan agkasulaw yang pagkabëtangu ig yang tanan ang mga angil yay mga arumanu.
Ya ray uras ang ipagkarungu tung puistuung maggaraëmën da.
32 Panuw̓ulunu yang mga angilung mamagpasagpun tung tanan ang mga tau tung bilug ang kaliw̓utan,
maskin unu pang nasyunay ang para ipampatalunga tung yëën.
Pagkatapus papagbëlag̓ënu tung duruang grupu ang katulad ka tung magbuw̓uatën yang sasang manigpastur tung mga kaayëpan na ang yang mga karniru nag̓ipablag na ka tung mga kambing.
33 Yang mga karniru asan da pinig̓ay na tung ampir tung tuu na.
Yang mga kambing asan da pinig̓ay na tung ampir tung wala na.
34 Matapusu ra nganing ta pagpinig tung tanan ang mga tau,
kumus yuu ray paggaraëmën,
panganingënu yang mga taung ampir tung tuuu ta maning taa:
‘Ta yamung pinakaayën da ni Ama,
taniamu.
Mag̓intraamu ra pakinaw̓ang tung tanan ang kaayënan ang ya ra kang lag̓i ay ipinagsimpan na para tung numyu disti pa atiing indi na pa nag̓aimu yang kaliw̓utan.
35 Kipurki atiing pagkasuw̓uku,
pinapaanaw numyu.
Atiing pagkakanalu,
pinainëmaw ka numyu ta wai.
Maskin bëlag̓anaw pang kailala mi,
ingkëlanaw ka numyung pinadayun tung mga balay mi.
36 Atiing alang-alang da yang pag̓araw̓ëlënu,
pinakdulanaw ka numyu ta aw̓ëlu.
Atiing paglaruu,
inasikasuaw ka numyu.
Atiing pagkakalabusu,
binisitaanaw ka numyung pinaiwan-iwanan,’
maningaw tung nira.
37 Pagkatapus yang mga tauanung kumpurming nagtuman yang kalëlyag̓an yang Dios,
ya ra mamanalimaan tung yëën ang mag̓aning,
‘Abëë,
Ginuu,
sanua pa ngaita yamën ang nasuw̓uka ang pagkatapus pinapaana yamën ubin naitaa yamën ang kinanala ang pagkatapus pinainëma ka yamën ta wai?
38 Sanua pa ngaita yamën ang anday natiniran mu ang pagkatapus pinadayuna ka yamën tung balay yamën ubin naitaa yamën ang naalang-alanga ta pag̓aw̓ël mu ang pagkatapus pinakdulana ka yamën ta aw̓ël mu?
39 Sanua pa ngaita yamën ang naglaru ubin nakalabus ang pagkatapus binisitaana ka yamën ang pinaiwan-iwanan?’
mag̓aning.
40 Pagkatapus yang matuw̓alu tung nira maning taa:
‘Iugtulu tung numyu yang kamatuuran,
atiing kada binuatan mi ta mga maning tia yang mga putulung naning pagtalig ka tung yëën,
maskin aranëk ang pisan ta pagkabëtang,
katimbang nang yuu ra kay binuatan mi,’
maningaw.
41 “Pagkatapus panganingënu ra ka yang mga taung ampir tung walaw ang maning taa:
‘Ta yamung nag̓asintinsiaan da yang Dios tung kalainan,
paaw̓ig̓amu ra taa tung yëën.
Duunamu ra manalunga tung apuy ang anda ëngëd ang pisan ay kapugdaw-pugdawan nang asta tung sampa ang ya kang lag̓i ay ipinagsimpan yang Dios para tung ni Satanas may tung mga angil ang namagpaturuw̓ulun tung anya.
42 Kipurki atiing pagkasuw̓uku,
indiaw pinapaan mi.
Atiing pagkakanalu,
indiaw ra ka pinainëm mi ta wai.
43 Atiing anda ray naistaranu,
indiaw ka pinadayun mi tung mga balay mi.
Atiing naalang-alangaw ra ta pag̓araw̓ëlënu,
indiaw ra ka pinakdulan mi ta aw̓ëlu.
Atiing paglaruu,
ubin atiing pag̓akalabusu,
indiaw ka binisitaan ming pinaiwan-iwanan,’
maningaw.
44 Pagkatapus ya mamanalimaan tung yëën ang mag̓aning,
‘Abëë,
Ginuu,
sanua pa ngaita yamën ang nasuw̓uka ubin kinanala ubin anday ray nadayunan mung balay,
ubin naalang-alanga ra ta pag̓aw̓ël mu ubin naglarua ubin nakalabusa ang india ra ka tinabnuy yamën?’
ag̓aaning.
45 Pagkatapus yang matuw̓alu tung nira,
maning taa:
‘Iugtulu tung numyu yang kamatuuran,
atiing kada indi mi tinaw̓angan yang mga tauanung nani ang yay pinaglamku ming aranëk ang pisan ta pagkabëtang,
katimbang nang yuu ra kay indi mi tinaw̓angan,’
maningaw tung nira.
46 Pagkatapus yang mga taung atia,
lalangan da yang Dios ang duun da ëngëd mamanalunga tung parusa ang anda ëngëd ang pisan ay katapus-tapusan na.
Piru yang mga taung kumpurming nagtuman yang kalëlyag̓an na,
ya ray tugtan nang mamagpakigsapën tung anya ang asta tung sampa ang anda ka ëngëd ang pisan ay katapus-tapusan na,”
mag̓aning.