Ti Jesus Nag̓apakusalak Yang Mga Pariseo Sigun Tung Kaldaw Ang Nag̓ipamaënay (3:1-6)
3
Taa numanyan,
nagpaklëd si ti Jesus tung pagsaragpunan nira.
Duun ka may taung napilayan da yang kalima nang sam bëlak.
2 May duun kang mga Pariseo ang pamagmalung ta maayën tung ni Jesus kung magpamaayën tung napilayan tung kaldaw ang atiang nag̓ipamaënay ug̓ud yang pag̓urubraën nang atia ya ray ipagpakusalak nira tung anyang ipagdimanda tung ustisia.
3 Numanyan,
dayun dang binugnu ni Jesus yang taung atiang napilayan ang inaning,
“Ala,
këmdënga ra kanay ang mangay tani tung parada,”
mag̓aning.
4 Pagkatapus dayun dang nagpaisip tung mga taung atiang pamagmalung tung anya ang mag̓aning,
“Ay pa w̓asu ay magkatamang buatën tung kaldaw ang nag̓ipamaënay ang ita magbuat ta ikaayën ta sasang masigkatau tang ilibri tung malain u ang ita magbuat ta ikalain ta sasang masigkatau ta ang yay magakdan na yang kamatayën na?”
mag̓aning.
Piru indi ra namag̓iw̓ëk-iw̓ëk tanira.
5 Numanyan tung panëlëng-tëlëng na tung nira,
ya ra ngaërëpay ang inampayan da ka dayun ta kapupungawën nang duru natëtëngëd tung katëtëg̓asën yang mga isip nirang imbitarën tung matinlu.
Numanyan dayun na rang inaning yang napilayan ang,
“Ala,
iunat mu ra tiang kalima mu,”
ag̓aaning.
Tamang-tamang ag̓iunat na,
naulikan dang pisan yang kalima na.
6 Atii,
dayun dang namaglua yang mga Pariseong namagpakiksën dang lag̓i tung mga partidu ni Adi Herodes ang duma.
Yang pinag̓unta-untaan nira,
kung ya pa ag̓aring mapaimatay nira ti Jesus.
Durung Taung Pamagdag̓umuk Tung Ni Jesus Duun Tung Bakayan (3:7-12)
7-8 Taa numanyan nagpalikay ra ti Jesus ang minangay duun tung bakayan yang lalaguna,
kasiraan da ka tanira yang mga taung nag̓apangugyatan na.
Buntun ang pisan yang mga taung namagpakignunut tung anya.
May mga tag̓a Galilea,
may mga tag̓a Judea,
may mga tag̓a Jerusalem,
may mga tag̓a Idumea,
may mga tag̓a duw̓ali yang subang atiang pag̓aningën ang Jordan,
may mga taung duun mamansiliit tung kakunayungan yang siudad yang Tiro may Sidon.
Yang inangay yang mga taung atiang durug damël tung anya,
nagkarabalitaan da natëtëngëd tung nagkarabuat na.
9 Kumus namanlag̓ëm da ilëm asan yang mga taung atia,
nanuw̓ul da ti Jesus tung mga taung atiang nag̓apangugyatan na ang tanya simpanan da kanay nira ta balangay ang kung may kaministiran na,
ya ray saayan nang magpadistansia ta gësyë ang para indi makipit yang mga taung atiang buntun ang pamagdarag̓umukan da tung anya.
10 Ay ya pa ag̓ari,
kumus dakëlë ra yang pinampamaayën na,
yang kadaklan ang may mga laru,
sigi ra ilëm yang pagsaragësëg̓an nira tung anya ang basta madëën da ilëm tung anya.
11 Pati yang mga dimunyung pagkëmkëm tung duma,
kada maita nira ti Jesus,
ya rag papadagpa tung katalungaan nang paglëlpakën da ang mag̓aning,
“Talagang yawa ka man yang pag̓aningën ang Ana Yang Dios,”
mag̓aning.
12 Kada mag̓ilala tung anya ta maning tia,
dayun na rang linalangan ang indi ra ëngëd magpaskë natëtëngëd tung anya kung tinu pa.
Yang Pagpilik Ni Jesus Tung Sam Puluk May Durua NGa Tauan Ang Para Mag̓ing Mga Taralig̓an Na Bilang Mga Apustul Na (3:13-19)
13 Taa numanyan,
nanungul da ti Jesus duun tung napabukatud.
Baklu nanungul,
kumpurming tinu pay nalëlyag̓an na,
ya ray inimbitar nang mamagnunut tung anya.
Pagkatapus namagpakignunut da ka man tung anyang namanungul.
14-15 Pagkaw̓ut nira duun,
dayun dang tinulduk nang mag̓ing mga apustul na ang para ya ray mamagpakiugpu rang pirmi tung anya kag yadwa pa ang para panuw̓ulun nang mamagparakaw̓utun yang bitala na tung mga tau.
Ya ra kay pamakdulan na ta kagaëman nirang mamagpalayas tung mga dimunyung namagsuut tung mga tau.
16 Sam puluk may durua nga tauan ang pinamilik na ang ya ra taa yang mga aran nira.
Ti Simon ang ya ray pinapuanggaan na tung ni Pedro.
17 Yang magdasun,
ya ra ti Santiago durua tanirang mag̓ari ni Juan ang yay mga ana ni Zebedeo.
Tanirang mag̓ari ya ray pinapuanggaan ni Jesus tung “Boanerges” ang yang gustu nang ianing mainërëpën ang pagkatau ang maning pa tung duldul ang ya ra ag̓ërëpay ang magbitalaa.
18 Yang magdarasun,
ya ra ti Andres,
ti Felipe,
ti Bartolome,
ti Mateo,
ti Tomas,
ti Santiagong atiang sam bilug ang yay ana ni Alfeo,
ti Tadeo,
may ti Simon ang atiang sam bilug ang kinasakpan da rin yang sasang partidung durug isëg yang pagbaratukun nira tung gubirnu yang mga tag̓a Roma.
19 Yang magdasun pa,
ya ra ti Judas Iscariote ang tung uri,
ya ra ka man ay nagtraidur tung ni Jesus.
Ti Jesus Nag̓alauman Yang Pamilya Na Ang Nag̓abariadu-bariadu Ra (3:20-21)
20 Taa numanyan,
ti Jesus,
nagbalik da duun tung balay ang pag̓atiniran na,
kasiraan da ka tanira yang mga tauan na.
Numanyan dinag̓umukan si ta mga taung buntun ang asta anda ray lugar na Jesus ang mamamangan.
21 Numanyan pagkabalita ni nanay na may yang mga putul na duun tung Nazaret ang maning da tii yang pagkabëtang na,
ya ra ag̓aningay nirang nag̓abariadu-bariadu ra.
Purisu ya ray ipinanuldak nira tung lansangan ang para ëklan nirang ipaulik.
Yang Nag̓ituw̓al Ni Jesus Tung Nag̓ibangdan Tung Anya Ang Ti Satanas Unu Yay Pagpaktël Tung Anya (3:22-30)
22 Taa numanyan,
may mga sag̓ad ang nangakaw̓ut da ang duun mamanliit tung siudad ang Jerusalem.
Pamagbangdan kang lag̓i tung ni Jesus ang mag̓aning “Nag̓aëkël-ëkëlan ni Satanasb yang taung atia!
Bilang yang pagpamangulu tung mga dimunyu yay pagpakdul tung anya ta kagaëman nang magpalayas tung nira,”
mag̓aning.
23 Kapurisu pinaguuyan da ni Jesus yang mga sag̓ad ang atiang pinagngëlan ta mga pananglit ang mag̓aning,
“Ayw̓a,
magkatama w̓asu ang yang sasang taung nag̓apaktël ni Satanas,
tung anya pa ipampalayasay na yang mga dimunyung yay mga kinasakpan na?
24 Dispuis kung may sasang inadian ang mamagkuruntraan dang mamagbaratukan yang mga kinasakpan na,
indi ra ka ilëm magdayun yang inadian ang atia.
25 Maskin tung sam pamilya,
kung magdarapig-dapig̓an da tanirang magsuruay-suayan,
diadu ra ka yang pagsarasaan nira.
26 Pariu ka tung ni Satanas.
Kung ya pag batukay na yang mga dimunyung atiang nag̓amanguluan na ang asta magsuruag-suag̓an da tanira,
ig disir,
indi ra rin magdayun yang paggaraëmën na,
kung indi,
ya ra nga tapus da rin.
27 Kung indi,
yang pagkinuntraay yamën ni Satanas,
ay maning taa tung pananglit ang naa.
Kung may sasang mupiang lalii,
anday maklëd tung balay na ang para mag̓akwat da rin tung mga ëkël-ëkël na,
kung indi,
dapat ang gapusun na ra kanay yang may balay.
Atia,
pagustu ra ta pag̓akwat na tung mga ëkël-ëkël na.
28 Tandaan mi ta maayën yang bitalaw.
Kung tung bag̓ay,
maskin unu pang kasalananay ang pag̓abuat yang mga tau,
maskin magduminar pa tung Dios,
maimung mapatawad da.
29 Piru kung tinu pay magduminar tung Espiritu Santo ang yang pag̓urubraën na ya ray sawayën na,
indi ra ka ëngëd mapatawad yang Dios ang asta tung sampa,”
mag̓aning.
30 Pinagpaamanan da ni Jesus ta maning tia ay natëtëngëd namansianing da yang mga sag̓ad ang atia ang yang pag̓ërëkëlën unu tung ni Jesus ang pagpaktël ya ra unu ti Satanas.
Pagpailala Ti Jesus Kung Tinu Pa Ëngëd Ay Kaw̓ig̓ën Nang May Kaampiran Tung Anya (3:31-35)
31 Taa numanyan,
asan da namansikaw̓ut ti nanay ni Jesus may yang mga putul na.
Asan da ilëm këmdëngan tung lua yang balay ang namagpaguuy tung anya.
32 Numanyan duun tung kaklëran,
durung taung kumarungan tung paliw̓ut ni Jesus ang ya ray namagpakdëk tung anyang mag̓aning,
“Amëëy,
nakaa ra pala tung lua ti nanay mu may yang mga putul mu.
Nag̓ipaguuya ra nira.”
33 Mag̓aning ti Jesus ang nagtimalës,
“Ayw̓a,
tung numyung pag̓intindi,
tinu pa w̓asu ay nanayu?
Tinu pa w̓asu ay mga putulu?”
34 Pagkatapus dayun dang nanëlëng-tëlëng tung mga taung atiang kumarungan tung paliw̓ut na ang nunut da ka ta pasanag na tung nirang mag̓aning,
“Naa ra yang nanayu may yang mga putulu.
35 Ay kipurki kumpurming tinu pay pagtuman yang kalëlyag̓an yang Dios,
yay magkaw̓ig̓ënung putulung lalii ubin putulung baw̓ay ubin nanayu,”
mag̓aning duun ti Jesus.