Pagkuruntraan Da Ti Jesus May Yang Mga Pariseo Natëtëngëd Tung Pagturumanën Yang Sasang Urdinansa Sigun Tung Kaldaw Ang Nag̓ipamaënay (6:1-5)
6
Taa numanyan tung sasang kaldaw ang nag̓ipamaënay yang mga Judio tung pag̓urubraën nira,
ti Jesus napanaw ra tung dalan ang naknga tung katriguan,
kasiraan da ka tanira yang mga taung nag̓apangugyatan na.
Numanyan tung pagparanawën nira,
ya kay aplut-aplut yang mga aruman na yang mga kaluay yang trigu ang nag̓akërëkësë tung palad nirang pag̓adëkëm.
Lucas 6:1-16
2 Numanyan may mga Pariseo asan ang ya ray namag̓istinggir tung nirang mag̓aning,
“Ba tia,
ayw̓at paglampasamu ra tung sasang urdinansa ta ang bawal ang mag̓urubraën ta maning tia tung kaldaw ang nag̓ipamaënay?”
mag̓aning.
3 Numanyan anday dumang nagtuw̓al,
ti Jesus.
Mag̓aning tung nira,
“Ayw̓a,
indi mi pa ka ëngëd nag̓amarësmësan yang sasang nabtang tung kasulatan natëtëngëd tung binuat ni David atiing tanya duru rang suw̓uk na pati yang mga aruman na?
4 Indi w̓a,
nagpaklëd tanya duun tung balay-w̓alay ang atiing pinagtuuan pa rin yang mga tau tung Dios atii kanay ang pagkatapus yang tinapay ang atiing sagradu ang ipinabtang tung katalungaan yang Dios,
ya pay pinisik nang pinangan ag̓ad bawal ang panganën ta duma ang bëlag̓an mga pari?
Piru maskin bawal,
ya pay pinangan na ig ipinapaan na pa ka nganing tung mga aruman na,
piru indi ka ipinakusalak yang Dios tung niraa.
5 Purisu yuung pag̓aningën ang Maninga Tau yuu ray pamala tung mga tauanu kung ya pa ag̓ari yang pagturumanën nira yang katuw̓ulan yang Dios natëtëngëd tung kaldaw ang nag̓ipamaënay,”
ag̓aaning.
Nag̓apakusalak Yang Mga Pariseo Ti Jesus Ang Tanya Unu Ay Naglampas Tung Urdinansa Nira Sigun Tung Kaldaw Ang Nag̓ipamaënay (6:6-11)
6 Taa numanyan,
may duma sing kaldaw ang nag̓ipamaënay ang kuminaw̓ut si.
Ti Jesus tanya,
nagpaklëd da duun tung sasang pagsaragpunan nirang nagparakaw̓utun tung mga taung pamagsaragpun duun.
Duun ka natagbu yang sasang taung napilayan da yang kalima nang tuu.
7 May mga Pariseo kag mga sag̓ad ang pamagpasakëp ka.
Nag̓apaniiran nira ta mupia ti Jesus kung magpamaayën tung kaldaw ang atiang nag̓ipamaënay,
ug̓ud ya ray ipagpakusalak nira tung anyang ipagdimanda tung ustisiab.
8 Piru ti Jesus,
kumus naskëan na rang lag̓i yang nabtang tung mga kinaisipan nira,
purisu dayun dang nagkalalangan tung napilayan yang kalima nang mag̓aning,
“Ala këmdënga ra kanay ang mangay tani tung parada,”
mag̓aning.
Numanyan kumindëng da ka man yang napilayan ang minangay asan tung parada.
9 Pagkatapus dayun dang nagbitala ti Jesus tung mga taung atiang pamagpaniid tung anya ang mag̓aning,
“Yuu may talimaanënu ra rin tung numyu.
Ay pa w̓asu ay magkatamang buwatën tung kaldaw ang nag̓ipamaënay ang ita magbuat ta sasang ikaayën ta sasang masigkatau tang ilibri tung malain u ang ita magbuat ta sasang ikalain ta sasang masigkatau ta ang yay magakdan na ta ikadiadu yang pagkabëtang na?”
mag̓aning.
10 Numanyan pinanëlëng-tëlëngan ni Jesus tanirang tanan.
Pagkatapus dayun na rang inaning yang napilayan ang,
“Ala,
iunat mu ra tiang kalima mu,”
mag̓aning.
Tamang tamang ag̓iunat na,
naulikan dang pisan yang kalima na.
11 Numanyan yang mga Pariseo,
pagkaita nira tia,
pinanungkukan da yang mga isip nira ta kasisilag̓ën nirang subra tung ni Jesus.
Purisu numanyan,
dayun da nirang pinagkërësënan kung unyën pa nira.
Pagpamilik Ti Jesus Tung Mga Taralig̓an Na, Bilang Mga Apustul Na (6:12-16)
12 Taa numanyan,
may pira pang kaldaw ang nagtaklib,
ti Jesus nagpaëlak-ëlak da duun tung kabukiran ang para mag̓arampuën da tung Dios.
Nagdamal da duun tung pag̓arampuën na.
13 Numanyan atiing kaldaw ra,
yang mga taung nag̓apangugyatan na,
ya ray pinaguuyan nang mamagpalëngët tung anya.
Pagkatapus ya ray pinamilikan na ta sam puluk may durua ang ya ray binuat nang mga taralig̓an na bilang yang pag̓aningën ang mga apustul na.
14 Ya taa yang mga aran nirang pinagpilik na.
Ti Simon ang yay pinapuanggaan na tung ni Pedro,
ti Andres ang ari ni Pedro,
ti Santiago,
ti Juan,
ti Felipe,
ti Bartolome,
15 ti Mateo,
ti Tomas,
ti Santiagong atiang ana ni Alfeo,
may ti Simon ang atiang sam bilug ang kinasakpan da rin yang sasang partidung durug isëg yang pagbaratukun nira tung gubirnu yang mga tag̓a Roma.
16 Magdasun ya ra ti Judas ang atiang ana ni Santiagong sam bilug,
may yang tukayu nang atiang sam bilug ang ti Judas Iscariote ang tung uri ya ra ka man ay nagyaring traidur tung ni Jesus.
Yang Pagpamaayën Ni Jesus Tung Dakëlëng Mga Taung May Mga Laru May Tung Dumang Pag̓aëkël-ëkëlan Ta Mga Dimunyu (6:17-19)
17 Taa numanyan ti Jesus nagparanëk da,
kasiraan da ka yang baklung pinagpilik na.
Mangalënsad da nganing tanira tung datal,
duun da ka kaw̓utay nira yang mga taung buntun.
Yang duma nag̓apangugyatan na kang lag̓i,
yang duma duun mamanliit tung baskin ay pang banwaay tung sakëp yang Judea,
ang yang duma duun mamanliit tung siudad mismu yang Jerusalem.
May duma pang alalawid pa ka ëngëd yang pinanliitan nira ang ya ra yang siudad yang Tiro may yang siudad yang Sidon,
ang yay nabtang tung binit yang bakayan.
Lucas 6:17-36
18 Yang inangay nirang tanan tung ni Jesus,
ay gustu nirang mamagpamati tung anya ig tanira pamaayënën na tung mga laru nira.
Ay may asan ka tung nirang pag̓aëkël-ëkëlan ta mga dimunyu.
Numanyan pagdangëp nira tung anya,
luw̓us dang pinampamaayën na.
19 Dispuis tanirang tanan namag̓impurta ra ang basta madëën ilëm tung anya.
Kipurki may këtël ang pagliit tung tinanguni na ang ya ray pinagmaayënan nirang tanan.
Binaliskad Ni Jesus Yang Ikasadya May Yang Panganugunan (6:20-26)
20 Pagkatapus numanyan,
ti Jesus nanëlëng-tëlëng da tung mga taung nag̓apangugyatan nang atia ang mag̓aning tung nira,
“Ta yamung kumpurming mga maliliwag̓ën ang anda ray magtalig̓an mi tung mga sadili mi,
tëëd mi tia agkatinlu yang nag̓abtangan mi!
Ay yang nag̓ikatinlu na asan,
lug̓uramu ra tung mga taung pamagpagaëm tung Dios.
21 Ta yamung nag̓apasaran da ta pasuw̓uk numanyan natëtëngëd ilëm tung pagpakignunut mi tung yëën,
tëëd mi tia agkatinlu yang nag̓abtangan mi.
Ay sipurki tung uri maning pa tung pabialënamu ra yang Dios tung sasang kaayënan ang indi ëngëd ang pisan mapasiring-siringan.
Ta yamung nag̓ampayan da ta kapupungawën ming duru numanyan ang kung kaisan ya ray nag̓ipanangit mi,
tëëd mi tia agkatinlu yang nag̓abtangan mi.
Ay sipurki tung uri talagang yamu ray patalangkakën ka ëngëd yang Dios natëtëngëd tung kasadyaan ming duru.
22 Dispuis,
kung alimbawa,
pakulainënamu yang mga masigkatau mi natëtëngëd tung pagkërërëngën mi tung yëën ang pag̓aningën ang Maninga Tau,
kung ya ra kay indi ipagsapët nira tung numyu,
ubin ya ra kay ipag̓insultu nira tung numyu ang yamu kaskasën da nirang mag̓ing malain tung pagtërëlëngën nira,
tay tia duru rag tinlu yang mabtangan mi.
23 Purisu kung buatanamu ra nganing nira ta maning tia,
magpakasadyaamu ëngëd ang yamu ag̓alikting-likting.
Yang ikasadya mi asan ay natëtëngëd asan da nga pruibaay ang may iblës ka man yang Dios tung numyung durung pisan agkadakul yang kantidad na ang ya ra kay nag̓ibaratu na tung numyu duun tung langit.
Kipurki pati nganing yang mga manigpalatay yang bitala na atiing tukaw,
pinamuatan ka ta mga aruman nira ta magkapariu ka tung buw̓uatën yang mga kanubli nira tung numyu.
24 Piru ta yamung mga manggaranën ang yang kamanggaran mi yay nag̓apanalig̓an mi,
kanugunamu.
Ay kipurki nag̓apapsawan mi ra yang tanan ang kasadyaan ang tëgka ra ka ilëm asan.
25 Ta yamung nag̓apagpagustu ra numanyan tung tanan ang nag̓alëlyag̓an mi,
kanugunamu.
Ay kipurki tung uri maning pa tung pasubkanamu ka ëngëd yang Dios ay pakapasanamu anya tung sasang kaayënan ang anda ëngëd ang pisan ay katapus-tapusan na.
Ta yamung panalig tung pagkabëtang ming maayën numanyan,
ang ya ra kay nag̓ipagtalangkak-talangkak mi,
kanugunamu.
Ay kipurki tung uri papungawënamu ka ëngëd yang Dios ta duru ay pawaraanamu ka anya tung ultimung kasadyaan ang ya ray pagtangitan mi.
26 Dispuis,
kung dayawënamung pirmi ta kadaklan,
kanugun yang pagkabëtang mi.
Anday dumang panganugunan mi asan,
ay natëtëngëd tung uri,
sasay panampëtan mi yang mga tau ta namagtukaw ang namag̓imu-imu ta bitala ang ya unu ay bitala yang Dios buat.
Kipurki yang mga bitala nira,
ya kay nauyunan ang ipinagdayaw tung nira yang mga masigkabanwa nira ang ya ra kay pinanliitan yang mga irinsia yang mga taung pamagdayaw tung numyu.
Ti Jesus Pagpasanag Ang Bëlag̓an Ilëm Yang Mga Aruman Nira Ay Gëgmaan Nira, Kung Indi, Pati Yang Pagpakigsuay Tung Nira (6:27-38)
27 “Piru tung numyung panangëd da tung yëën,
nani yang pag̓ianingu tung numyu.
Gëgmaan mi yang mga taung pagpakigsuay tung numyu,
asta yang pagdëmët tung numyu,
buatan mi ka ta ikaayën nira.
28 Kung iampuamu ta duma tung Dios ang ituluy tung kalainan,
anday dumang ibalës mi tung anya,
tanya si kay iampu mi tung Dios ang pakaayënën na.
Asta yang mga taung mga manlëlëpës tung numyu,
ya ka,
iampu mi ka tung Dios ang para pakaayënën na.
29 Kung alimbawa may manampaling tung numyu,
italiling mi yang duw̓aling ëmët ming ipatampaling.
Kung alimbawa may magrëg̓ës ang mangalaw yang panlamig mi,
paw̓ayaan mi ra ilëm.
Pati lambung mi,
kung talagang ëklan na ka,
ipatug̓ay mi ra ilëm tung anya ta paluas.
30 Kung may mandawat tung numyu,
pakdulan mi.
Kung may mangkël tung mga kasangkapan mi,
indi mi bawiën tung anya,
kung indi,
paw̓ayaan mi ra ilëm.
31 Yang dapat ang buwatën mi tung duma ya ra yang matinlu ang yay nag̓alëlyag̓an ming buwatën nira tung numyu.
32 Ëlat kanay,
kung yang gëgmaan mi,
ya ka ilëm yang nag̓agëgma tung numyu,
unu pa pay dayawën yang Dios tung numyu asan?
Ay napakitablaamu ka ilëm tung mga taung pagpasuag tung anyang pagpakasalak.
Kipurki maski nganing tanira,
yang nag̓agëgmaan nira,
ya ka ilëm yang nag̓agëgma tung nira.
33 Dispuis kung yang taw̓angan mi ya ka ilëm yang mga taung pagtaw̓ang ka tung numyu,
unu pa pay dayawën yang Dios tung numyu asan?
Ay napakitablaamu ka ilëm tung mga taung pagpasuag tung anyang pagpanandili.
Kipurki maski nganing tanira,
yang magtaw̓angan nira ya ka ilëm yang mga aruman nirang pagtaw̓ang tung nira.
34 Kidispuis pa kung yang ag̓apautang mi ya ka ilëm yang mga taung nag̓akumpiansaan ming tagbayad,
unu pa pay dayawën yang Dios tung numyu asan?
Kipurki napakitëpëngamu ka ilëm tung mga taung pagbatuk tung anyang pagpanadili.
Kipurki maski nganing tanira,
yang magpautangën nira,
ya ka ilëm yang mga kaarumanan nirang nag̓akumpiansaan nirang tagbayad.
35 Kung indi,
ta numyu,
gëgmaan mi yang mga taung pagpakigsuay tung numyu,
buatan mi ka ëngëd ta ikaayën nira.
Kung may magministir tung numyung mangutang,
pautangën mi,
maskin anday kumpiansa ming tagbayad.
Ay kung maning tia yang usuyun mi,
tung uri may iblës yang Dios tung numyung durug tinlu.
Kipurki maning tia pagpailalaamu ra ang yamu mga anaamu anyang matuud,
ay pagsug̓utamu tung anya.
Kipurki durug kaayën tung tanan ang mga tau,
maskin tung mga malain ang mga tau ang indi maskëng magdëmdëm yang utang nirang kanëëman tung anya.
36 Kumus tanyang nagyari rang Ama mi,
mainildawën tung tanan ang mga tau,
yamung mga ana na,
dapat kang sakaën mi yang ug̓ali na ang yamu mainildawënamu ka tung mga masigkatau mi,
maskin tung ninu pa.
Nag̓asambit Ni Jesus Yang Mga Pitik Ang Pagpasunairan Na Tung Mga Taung Nag̓apangugyatan Na (6:37-49)
37 “Indiamu ra ëngëd magtag̓am ta sintinsia tung mga aruman mi ug̓ud indiamu ra ka sintinsiaan yang Dios.
Kung may aruman ming nagbuat ta malain,
indiamu ra mag̓aning ang yay dapat ang parusaan ug̓ud indiamu ra ka parusaan yang Dios.
Patawarën mi ra ka yang kumpurming nagbuat ta malain tung numyu.
Atia,
bunayag da kang patawarënamu ra ka yang Dios.
Lucas 6:37-49
38 Magpamakdulamu ka tung mga kaarumanan ming may mga kaministiran.
Atia pakdulanamu ra ka yang Dios yang mga kaministiran mi.
Yang kaalimbawaan yang pagparakdulun na tung numyu maning pa tung gantangan ang magyëkyëkën na pang nag̓idasëk ang pakuw̓ungan na pa ngani baklu pa ibukbukay na tung bëbtangan mi.
Kipurki kung unu pang pitikay ang usuyun ming magpamakdul tung mga kaarumanan mi,
ya kay usuyun yang Dios ang magpamakdul tung numyu,”
ag̓aaning.
39 Taa numanyan nagpagngël da ti Jesus ta sasang pananglit ang mag̓aning,
“Ayw̓a,
tinu pay nag̓aintindian ming buray ang magpangaas pang magguyud tung aruman nang buray?
Kipurki kung ya pay buwatën na,
anday duma,
matukaw-tukaw ra nganing,
pariu ra ka ilëm tanirang mangabugsu tung lungasug.
40 Yang sasang taung pagpaugyat bëlag̓an ang yay landaw tung pag̓ugyat tung anya.
Piru kung makumplitu na ra nganing yang pagpaugyat na,
asan da magluang magkapariu ra ka ta ug̓ali yang nag̓ugyat tung anyac.
41 “Ta yamung naanad dang magtag̓am ta sintinsia tung duma,
ayw̓a kaya ang yang maning pa tung lëtëk ka ilëm tung mata yang putul mi,
atii pala yay nag̓apadëkdëkan mi ang pagkatapus atia ngani tung mata mi may mag̓abatang ang yag këkëtëg ang indi mi pala nag̓adipara?
42 Ayw̓a palangaasan mi pa ka ëngëd yang putul ming aningën ang ‘Maimu ilëm putulu,
kuatën ta ra tiang lëtëk tung mata mu?’
Ang pagkatapus atia ngani tung mata mi may sasang mag̓abatang ang yag këkëtëg ang indi mi pala nag̓adipara?
Abaa,
yamu ilëm agpagpakaayën-ayën!
Kaministiran ya ra kanay ay tukawën mi rang kuatën yang mag̓abatang ang atiang yag këkëtëg tung mata mi.
Atia manadlaw ra yang panëlëng mi ang para tung matinlu yang panguat mi tung lëtëk ang atia tung mata yang putul mu.
Asan Da NGa Pruibaay Yang Sasang Tau Tung Nag̓ibitala Na Kung Matinlu Yang Pagkatau Na U Kung Malain (6:43-45)
43 “Ag̓aningënamu ra yëën ta maning tia ay tëlëngan mi ra ilëm yang mga ayu.
Anday ayung matinlu ang sayud yang nag̓ipamurak na.
Anda kay ayung sayud ang matinlu yang nag̓ipamurak na.
44 Kipurki yang sasang ayu,
tung burak na nga pruibaay kung matinlu u kung sayud.
Simpri yang mga sapinit indi pamurak ta pumangga ig yang aruma indi ka pamurak ta langkad.
45 Yang taung maayën,
maayën ka yang nag̓ipalua na,
ay natëtëngëd ang ya kang lag̓i ay nag̓ipabalay na tung isip na.
Pati yang taung malain,
malain ka yang nag̓ipalua na ay natëtëngëd ang ya ra kang lag̓i ay nag̓ipabalay na tung isip na.
Ay simpri,
kumpurming unu pay nag̓ipabalay yang sasang tau tung isip na,
indi maimu ang indi na ipalua ang ibitala.
Duruang Klasi Yang Pagparamatiën Yang Mga Tau Tung Bitala Ni Jesus (6:46-49)
46 “Ayw̓a,
magkatama w̓asu ang aningënaw numyung Ginuu mi ang pagkatapus indi mi kag tumanën yang nag̓ipanuw̓ulu tung numyu?
47 Kung tinu pay pagpalëngët tung yëën ang para magpamati tung nag̓itulduku ang pagkatapus ya ra kay tumanën na,
yang kaalimbawaan yang taung atia maning taa.
48 Tanya maning pa tung sasang taung pagpakdëng yang balay na,
ang yang akad na,
durug dalëm.
Sinangkad na yang kabatuwan ang ya kay pinamugsuan na yang mga adili na.
Numanyan pagkatapus ta pagpakdëng yang balay na,
kinaw̓utan da ta palëmpan,
pati yang balay na binungsaran da ka yang bëëk.
Piru indi ka ëngëd naunu pa ay durug bakëd yang pagparakdëngën yang may balay.
49 Piru kung tinu pay pamati tung bitalaw ang pagkatapus indi na ra ka ilëm tumanën,
ya si kay nag̓ipananglitu tung sasang tau ang tung pagpakdëng na yang balay na,
ya ra ilëm ag̓iakarakaray na tung ulit yang tanëk.
Duun da ka ilëm ipalg̓uray na yang mga adili na.
Pagkaw̓ut yang balyu,
pati yang balay na binungsaran da ka yang bëëk,
gulpi ra ilëm ang nagkalipuat.
Gëw̓a rang pisan yang balay ang atii,”
ag̓aaning ti Jesus duun tung nira.