Ti Jesus Nag̓atag̓aman Ta Tuksu Ni Satanas Ang Para Magpanadili Ra (4:1-11)
4
Taa numanyan ti Jesus minanguluan da yang Espiritu Santong pinapanaw duun tung banwang kapas ug̓ud duun da kanay tag̓amay ni Satanas ta tuksu.
2 Numanyan tung sëlëd ëpat ang puluk ang kaldaw,
law̓iig kaldaw,
namlëk da tung pagparanganën na ang para mabilug na yang isip na tung pag̓irintindiën na tung Dios.
Purisu yang pinakaw̓ut na nasuw̓uk da.
3 Atii,
pinalëngtan da yang kanunuksu ang inaning,
“Kung matuud ang yawa ka man yang pag̓aningën ang Ana yang Dios,
abir,
lalangan mu ra yang mga batung atiang mamagyari rang tinapay,”
mag̓aning.
4 Mag̓aning ti Jesus ang nagtuw̓al,
“Aa,
indiaw,
kipurki may sasang bitala yang Dios ang napabtang tung kasulatan ang bëlag̓an ilëm unu pamangan ay impurtaën yang sasang tau ang para tung ikalayun na,
kung indi,
yang mas pa unung impurtaën na ya ra unu yang kumpurming unu pay bitala ang nag̓ianing yang Dios,”
ag̓aaninga.
5 Pagkatapus tia,
ti Jesus ingkëlan da ni Satanas duun tung Jerusalem ang yay pag̓aningën ta mga tau ang siudad ang sagradu.
Duun ëklay na tung sagpaw ëngëd yang pagtuuan tung Dios ang atiang pinakalusu.
6 Mag̓aning si tung anya,
“Kung matuud ang yawa ka man yang pag̓aningën ang Ana yang Dios,
abir,
pabugsua ra asan.
Tutal may sasang bitala tung kasulatan ang patuw̓ulana ra unu yang Dios tung mga angil nang pabantayan.
Sarëpëna ra ka unu nira ug̓ud indi ra ka matigbak yang kakay mung tëmpa tung kabatuwan,”
ag̓aaningb.
7 Mag̓aning ti Jesus ang nagtimalës,
“Ëë,
tama ka rin yang inulit mung atia,
piru may dumang bitala tung kasulatan ang dapat unu indiaw magtag̓am ta ingaw̓us tung ni Yawi ang ya unu ay Dios ang may kalalangan tung yëën,”
ag̓aaningc.
8 Utru si,
dayun dang ingkëlan ni Satanas duun tung bukid ang durug abwat.
Ipinaita na tung anya yang tanan ang inadian tung bilug ang kaliw̓utan pati yang katitinlu nira.
9 Mag̓aning tung anya,
“Yang tanan ang atii luw̓us ang ipakdulu tung nuyu basta magluura ra ilëm taa tung yëën ang magtuu,”
ag̓aaning.
10 Dayun da kang binalësan ni Jesus ang inaning,
“Paaw̓ig̓a ra ilëm taa,
Satanas,
kipurki may bitala tung kasulatan ang anda unu ay dumang luuranung tuuan,
kung indi,
ultimu ilëm ti Yawi ang yay Dios ang may kalalangan tung yëën,”
ag̓aaningd.
11 Pagkatapus tia,
dayun dang nagliit ti Satanas tung anya.
Pagliit na,
asan da namansilput yang mga angil ang namag̓asikasu tung mga kaministiran ni Jesus.
Nag̓aimpisaan Da Ni Jesus Yang Pag̓urubraën Na Duun Tung Galilea (4:12-17)
12 Taa numanyan atiing pagkabalita ni Jesus ang ti Juan ang manigbënyag dinëëp dang ipinakalabus,
dayun dang nagliit ang nanganing duun tung sinakëpan yang Galilea.
13 Pagkaw̓ut na duun tung lansangan ang Nazaret,
indi nagpakëën duun,
kung indi,
tung pagtaklib yang pira pang kaldaw,
nagpadayun da yang pagparanawën na ang para duun da magdistinu tung lansangan ang Capernaum ug̓ud duun da kanay mag̓istar.
Yang lansangan ang atia nabtang tung binit yang lalagunang lug̓ud ka tung banwang ipinagparti-parti atiing tukaw tung mga kanubli ni Zabulon may ni Nëftalie.
14 Nagkamaningan da ta maning tia ug̓ud asan da magkamatuud yang sasang ipinaula yang Dios ang tukaw tung ni Isaias ang sasang manigpalatay na ang mag̓aning,
15-16 “Yang mga taung pamag̓istar duun tung banwang ipinagparti-parti atiing tukaw tung mga kanubli ni Zabulon may ni Neftali ampir duun tung lalaguna pati duun tung duw̓ali yang subang Jordan,
asta duun tung Galilea ang yay nag̓aistaran yang mga taung bëlag̓an mga Israel,
maskin nag̓akiklëpan ka man yang mga kinaisipan nira,
piru may maita nirang maning pa tung sasang kaas ang durug sadlaw.
Maskin alalawid ka man tanira tung Dios ang maning pa tung patay tung pagtërëlëngën na,
piru magkaratingkalan da ka ëngëd yang sadlaw yang maning pa tung kaas ang atia,”
mag̓aningf.
17 Taa numanyan,
mag̓impisa pa tung pagpakalabus tung ni Juan,
ti Jesus ya si kay nagparakaw̓utun tung mga tau ang maning taa:
“Manlignaamu ra tung mga kasalanan mi,
ay kinaw̓ut da yang uras ang ipagpundar yang Dios yang paggarëmën nang baklu tung numyu,”
mag̓aning.
Yang Pag̓imbitar Ni Jesus Tung Ëpat Ang Mga Manig̓ian Ang Para Mamagpaugyat Da Tung Anya (4:18-22)
18 Taa numanyan atiing pagbakay ni Jesus tung lalagunang atiang lug̓ud tung sinakëpan yang Galilea,
naita na ti Simon duruang mag̓ari ni Andres ang pamanlaman ta ian ay tanira mga manig̓ian.
19 Mag̓aning ti Jesus tung nira,
“Magpakignunutamu ra tung yëën ang magpaugyat.
Dati-rati yang mag̓aëklan mi ian.
Piru numanyan ugyatanamu ra ka yëën kung ay pa ag̓aring maëklan mi yang mga kinaisipan yang mga tau ang basi pa ra ilëm malëlyag da kang magpaugyat tung yëën,”
ag̓aaning.
20 Numanyan lag̓i-lag̓ing binutwanan da nira yang mga laman nira ang namagpakignunut tung anya.
21 Numanyan matukaw-tukaw tanira na Jesus ta gësyë,
naita na ti Santiago duruang mag̓ari ni Juan ang yay mga ana ni Zebedeo.
Asan tanira tung balangay nirang pamag̓ëët yang mga laman nira,
kasiraan da ka tanira ni tatay nira.
Pagkaita ni Jesus tung nirang durua,
dayun na rang inimbitar ang mamagpakignunut da tung anyang mamagpaugyat.
22 Atii,
lag̓i-lag̓ing binutwanan da nira yang balangay nira may ti tatay nira ang namagpakignunut da ka tung anya.
Yang Pagliliw̓utun Ni Jesus Tung Intirung Sinakëpan Yang Galilea (4:23-25)
23 Taa numanyan nagliliw̓utun da ti Jesus tung intirung sinakëpan yang Galilea.
Nag̓intra ra pagturuldukanën tung mga tau ang kada mamagsaragpun-sagpun tung nira nirang mga pagsaragpunan.
Nagparakaw̓utun da dayun tung nira yang sasang matinlung balita ang yang Dios mag̓impisa rang magtukud yang paggaraëmën nang baklu tung mga tau.
Pati yang mga taung may mga laru nira,
pinampamaayën na ra ka,
maskin unu pang laruay.
24 Purisu nagsarambung da yang balita tung intirung banwang atii ang asta duun tung sinakëpan yang Siriag.
Anday dumang dinangat na,
duru-durung mga taung ipinagpadangëp da tung anyang sari-sari ra ilëm yang nag̓asinti nirang mga masiit.
Yang duma magsisiitan da ta duru,
yang duma magdimunyuwën,
yang duma may mga kërë,
yang duma pamamatay ra yang mga tinanguni nira.
Numanyan tanirang tanan,
luw̓us dang pinampamaayën na.
25 Purisu buntun dang pisan yang mga taung namagpakignunut da tung anya.
May asan dang mga tag̓a Galilea,
may asan da kang mga tag̓a Sampuluk NGa Lansanganan,
may asan da kang mga tag̓a siudad ang Jerusalem,
may asan da kang mga tag̓a Judea,
may asan da kang mga tag̓a duw̓ali yang subang Jordan.