Yang Pag̓imbitar Ni Jesus Tung Mga Manig̓ian Ang Para Mamagpaugyat Da Tung Anya (5:1-11)
5
Taa numanyan,
may dumang kaldaw ang ti Jesus yag këkdëng tung binit yang lalagunang atiang pag̓aningën ang Genesaret.
Durug dakël yang mga tau ang pamagsërëksëkan ang pamagpalëngët tung anya ang para mabilug̓an nira yang bitala yang Dios ang nag̓ipagpakaw̓ut na.
Lucas 5:1-16
2 Numanyan may naita nang durua nga balangayan ang yag sasanglad asan tung bakayan.
Ay yang mga manig̓ian,
namansilampud da ang para mamamunlaw yang mga lambat nira.
3 Purisu anday dumang binuat ni Jesus,
dayun dang nagsaay tung sam bilug ang balangay ang yay balangay ni Simon.
Pagkatapus,
dayun na rang inaning,
“Ungkuy,
itulud mu ra kanay taning balangay mu ang ipaabwat-abwat ta gësyë tung bakayan.”
Pagkatapus,
asan da tung abwat-abwat,
dayun dang kuminarung tung balangay ay magpadayun da yang pagparakaw̓utun na tung mga tau.
4 Taa numanyan pagkatapus na ta pagbitala,
dayun dang nagkalalangan tung ni Simon ang mag̓aning,
“Ala,
magsaayita ra kanay ang pakbi.
Ipataktak mu si yang mga lambat ug̓ud maëkëlamu ta ian,”
mag̓aning.
5 Mag̓aning ka ti Simon ang nagtuw̓al,
“Amëëy,
nagdamal yang bëdlay yamën ang nagpapuyat.
Andang pisan ay naëklan yamën may sam bilug.
Piru kumus yaway pagkalalangan,
ipataktaku ra ilëm ug̓ud,”
mag̓aning.
6 Taa numanyan dayun da ka man ang namansisaay tung balangay ang namagpakbi.
Pagkatapus dayun da kang namanaktak yang mga lambat nira.
Numanyan pagguyud nira yang mga lambat,
ya ray nasapulan nira yang mga ian ang panëng.
Sam puntu ilëm nagkarabakbak yang mga lambat natëtëngëd tung kadaramëlën yang mga ian.
7 Purisu anday duma,
dayun dang linambayan nira yang mga aruman nira tung sam bilug ang balangay asan pa tung bakayan ang para mamagtaw̓ang.
Purisu pagkaw̓ut yang mga aruman nira,
tinaraw̓angan da nira yang mga ian ang asta napnuk da yang durua nga balangayan ang sam puntu ra ilëm mansitëgdang.
8 Pagkaita ni Simon Pedro tia,
anday dumang binuat na,
ya ra ngalw̓u tung tuud ni Jesus ang luminuud ang mag̓aning ang pagbitala,
“Ay Ginuu,
maayën pang pablag̓a ra ilëm taa tung yëën.
Indiaw magkabag̓ay tung nuyu,
ay yuu tëlëw̓aw ang pisan ta kasalanan,”
mag̓aning.
9 Napagbitala ta maning tia,
ay nabërëng da ta mupia tung mga ian ang naëklan nirang duru.
Pati yang mga aruman na tung balangay na,
ya ka,
nangabërëng da ka.
10 Asta na Santiago,
durua ni Juan ang mga ana ni Zebedeo tung sam bilug kang balangay ang yay mga kabakas ni Simon,
ya ka,
nangabërëng da ka ta duru tung nainabung atia.
Taa numanyan pagkagngël ni Jesus yang inaning ni Pedrong atia tung anya,
dayun dang nagpaktël tung isip na ang mag̓aning,
“Simon,
india magpaluw̓ay.
Kipurki,
mag̓impisa simanyan,
bëlag da ian yang maëklan mu,
kung indi,
ya ra yang isip yang mga tau ang basi pa ra ilëm mamansisuku ra ka tung yëën ang mamagpaugyat,”
mag̓aning.
11 Taa numanyan,
namamparanëk da tung bakayan.
Pagkasanglad,
dayun da nirang binutwanan yang tanan ang mga bag̓ay ang para mamagpakignunut da tung ni Jesus.
Nag̓apamaayën Ni Jesus Yang Taung May Dispirinsiang Tung Ulit Nang Makamamansa Tung Pagkatau Na (5:12-16)
12 Numanyan may dumang kaldaw ang ti Jesus duun tung sasang lansangan.
May tau asan ang may dispirinsia tung ulit nang makamamansa ang lëëp da yang intirung tinanguni na.
Pagkaita na tung ni Jesus,
dayun dang nagluud tung pinagtalungaan nira ang nagpakiluuy tung anyang mag̓aning,
“Amëëy,
kung malëlyag̓a ilëm,
ag̓askëanung sarangan mung kuatën yang dispirinsiaung naa ang yay pagpamansa tung pagkatauu,”
mag̓aning.
13 Pagkatapus ti Jesus,
tanya,
dayun dang nagdëën tung tinanguni na ang mag̓aning,
“Ag̓alëlyag̓aw ka,
kuatana ra yëën,”
mag̓aning.
Pagkatapus lag̓i-lag̓ing nakuatan da ka man tung dispirinsia nang atia.
14 Atii nagkalalangan da ti Jesus tung anya ang mag̓aning,
“Kuidaw,
india ra ëngëd magbaw̓alitaën baskin tung ninu pa natëtëngëd tung binuatung atia tung nuyu.
Anday dumang buwatën mu,
mangaya ra kanay duun tung sasang pari ang magpatëlëng ang yawa limpiu ra.
Pagkatapus magpadasag̓a ra ka dayun tung anya ta sasang ayëp ang iprisintar na tung Dios ang katulad ka tung sasang urdinansang ibinutwan ni Moises ang tukawa ug̓ud asan da nga kumpurmiay yang mga tau ang anda ray dapat ang likayan nira tung nuyu,”
mag̓aning.
15 Piru naa pala,
ang ay pa tiing sinambëng ni Jesus,
duun da nagsarambung yang balita ang asta kuminaw̓ut da tung mga banwang alalawid.
Kapurisu anday dumang dinangat na,
nangiklëp da ilëm yang mga tau ang namagsaragpun ang para mamagpamati tung anya.
Yang may mga laru tung nira,
namagdangëp da dayun tung anya ang para pamaayënën na.
16 Ug̓aring ti Jesus,
kung kaisan,
yang pag̓abuat na,
pagpalikay-likay ang pagpaëlak-ëlak duun tung banwang palag-palag yang tau na,
ang para mabug̓us na yang isip na tung pag̓arampuën na.
Nag̓apapruibaan Da Ni Jesus Ang May Katëngdanan Nang Magpamunas Ta Mga Kasalanan (5:17-26)
17 Taa numanyan may dumang kaldaw ang ti Jesus pagturuldukanën tung mga taung nagkarasagpun tung balay.
May duun kang mga Pariseo ang kumarungan asan,
kasiraan da ka tanira yang mga sag̓ad.
Duun mamanliit tung maskin ay pang baryuay ang lug̓ud tung sinakëpan yang Galilea pati Judea.
Yang duma duun mamanliit tung siudad ang Jerusalem mismu.
Taa numanyan ti Jesus nag̓apaktël da yang Dios ang para mapagpamaayën tung mga taung may mga masiit nira.
Lucas 5:17-28
18 Naa pala may sasang taung namamilay ra yang mga tinanguni na ang ya ra ilëm ag̓idangëpay yang mga aruman na duun tung ni Jesus.
Numanyan pagkaw̓ut nira duun tung balay,
tinag̓aman da rin nirang ipaklëd ang para ipakaw̓ut tung ni Jesus.
19 Piru indi ra ka ëngëd nangasëlsël ay natëtëngëd yang balay gëtëk ang pisan ta tau.
Purisu anday dumang rimidyu ang binuat nira,
namansitakwal da ilëm duun tung aldan ang panganing tung sagpaw yang balayb.
Pagkatapus ya ray pinangukab nirang inabrian ang duun ka ipapanaway nirang ituntunay yang aruman nirang yag lulw̓ug tung papag ang asta nadasën da tung kakngaan yang pagtaralungaan na Jesus may yang mga tau.
20 Numanyan pagkasiman ni Jesus ang tanira may pagtalig nira tung anya,
dayun na rang binugnu yang aruman nirang paglaru ang inaning,
“Putulu,
nag̓apatawara ra yëën tung mga kasalanan mu,”
mag̓aning.
21 Numanyan yang mga sag̓ad may yang mga Pariseo,
pagkagngël nira yang inaning ni Jesus tung taung atia ang maning tii,
ya ray ipinagkësën-kësën nira tung mga isip nira ang maning taa:
“Abaa yang tau kang naa ka!
Unu ray pagpabëtang na tung sadili na ang yang pagkadios yang Dios ya rag pagtiwakaway na?
Ayw̓a,
tinu pa pay sarang ang magpatawad tung mga tau tung mga kasalanan nira kung bëlag̓an ultimu ilëm yang Dios?”
22 Kumus nag̓adëëp da ni Jesus kung unu pay palaksu yang mga pag̓irisipën nira,
dayun na rang binugnu ang inaning,
“Ayw̓at maning da tia yang nag̓ipagkësën-kësën mi tung mga isip mi?
23 Kanisip mi ang sungaw ra ilëm yang inaningu tung taung naa ang pinatawaru ra tung mga kasalanan na?
Piru kung aningënu si ang magbangun dang magpanaw,
asan da ngaskëay mi kung yang bitalaw sungaw ra ilëm u kung may kamatuuran na.
24 Purisu papruibaanu ra numanyan tung numyu ang yuung pag̓aningën ang Maninga Tau,
may katëngdananu ka man taa tung katanëkan ang magpatawad tung mga tau tung mga kasalanan nira,”
mag̓aning.
Pagkatapus diritsyu rang pinag̓aning na yang taung atiang pamamilay yang mga tinanguni na,
“Ala,
magbanguna ra.
Ëklan mu ra tiang lulubgan mung mulik,”
mag̓aning.
25 Pagkatapus yang taung atia,
pagkagngël na yang inaning ni Jesus tung anya,
lag̓i-lag̓ing nagbungkaras da tung pinagtaralungaan nirang tanan ang pagkatapus dayun na rang ingkëlan yang limbug̓an nang minulik.
Yang pag̓ulik na,
ya kay pagdarayawën na tung Dios ta duru.
26 Numanyan yang mga taung atiang nangaita,
pinangampayan da ta pagkabërëng nirang duru ang nunut da ka ta pagdarayawën nira tung Dios.
Nangaimakluan da tanira tung pagtërëlëngën nira tung ni Jesus natëtëngëd tung binuat nang atia.
Namag̓araning-aningan da,
“Durung pisan agkabëw̓ërëng yang naita ta numaan ang kaldaw ang naa,”
mag̓aning.
Natëtëngëd Tung Inangay Ni Jesus Tung Kaliw̓utan Ang Naa (5:27-32)
27 Pagkatapus tia,
ti Jesus,
dayun dang naglampud tung balay ang nagpanaw ang asta luminua ra tung lansangan.
Duun may naita nang sasang manigpanukut ta mga balayaran tung gubirnu ang yay nag̓aranan tung ni Levi.
Yag kakarung tung upisina nang pagpanukut tung mga tau.
Mag̓aning ti Jesus ang nagbugnu tung anya,
“Amus,
magpakignunuta ra tung yëën ang magpaugyat,”
ag̓aaning.
28 Numanyan ti Leving naa,
anday dumang binuat na,
dayun dang kumindëng ang nagpakignunut tung ni Jesus.
Andang pisan ay binalikid na,
kung indi,
luw̓us na rang binutwanan ang para tanya magpakignunut da tung ni Jesus.
29 Pagkatapus ti Leving naa,
anday dumang nabtang tung isip na,
nagtukud da ta punsiun ang dakulu asan tung balay na ang para tung ni Jesus.
Numanyan duru rang mga kaarumanan ni Leving mga manigpanukut asta yang duma pang mga tau ang namagpakigsaru ra ka tung na Jesus.
Lucas 5:29-39
30 Numanyan atiing pamagsararu ra tanira,
may mga Pariseo kang pamagpaniid,
kasiraan da ka tanira yang mga kaarumanan nirang mga sag̓ad.
Pamag̓istinggir tung mga taung pamagpaugyat tung ni Jesus ang mag̓aning,
“Ba tia,
ayw̓a asanamu rag pagpakigsaru tung mga manigpanukut ang atiang mga mandaraya may tung mga ugpu nirang atiang mga tëlëb ang pisan ta kasalananc?”
ag̓aaning.
31 Numanyan ti Jesus ya ray nagtuw̓al ang asan da ipapanaway na tung sasang pananglit ang mag̓aning,
“Yang mga taung makëktël anday kaministiran nira yang manigbulung,
kung indi,
ya ra ilëm yang may mga laru.
32 Katulad ka tung yëën,
ay yang inangayung mag̓imbitarën bëlag̓an yang mga taung pagtalig tung sadili nira ang tanira maayën tung pagtërëlëngën yang Dios,
kung indi,
ya ra ilëm yang mga taung nag̓askëan nira ang tanira talagang makinasalananën ka man ang para manligna ra tung mga kasalanan nira,”
mag̓aning.
Yang Dating Nag̓apgësan Ta Mga Tau May Yang Nag̓ipatuman Ni Jesus Ang Baklu Indi Ëngëd Magkatunuan (5:33-39)
33 Taa numanyan may mga tau asan ang nagriklamu tung ni Jesus ang mag̓aning,
“Yang mga taung nag̓apangugyatan ni Juan ang manigbënyag muya-muyang pamamlëk tung pagparanganën nira ang nunut da ka ta pag̓arampuën nira,
pati yami kang nag̓apangugyatan yang mga Pariseo ya kay nag̓usuyun yamën.
Piru yang mga tauan mu pala,
anda ra tung pag̓intindi nira yang riglamintung atia!”
ag̓aaning.
34 Yang tuw̓al ni Jesus tung nira,
yang sadili na ipinananglit na tung laliing pangasawa.
Ag̓aaning tung nira,
“Ayw̓a,
kung may kumbira,
kanisip mi ang yang mga laliing pamagkumpanya tung aruman nirang pangasawa,
bag̓ay w̓asung ampalarën tung pagsararuan nira ang ya pag tëparay nira yang aruman nira?
35 Ug̓aring may uras ang kaw̓utun ang yang aruman nirang atia lag̓unutun dang ëklan tung tëpad nira.
Atia ya ray uras ang magkabag̓ay rang pisan ang ipamlëk nira tung mga pagparanganën nira natëtëngëd tung kapupungawën da nirang duru,”
mag̓aning.
36 Pagkatapus nagpananglit si ti Jesus ang mag̓aning,
“Ayw̓a,
tinu pay nag̓aintindian ming tau ang may aw̓ël nang baklu ang ya pay lasikën nang pangkëlan ta itambël na tung aw̓ël nang lag̓i-lag̓i ra?
Kipurki kung ya pay buwatën na tia,
bëlag̓an ilëm ang marangga ra yang aw̓ël nang baklu,
kung indi,
pati yang lag̓i-lag̓ing tinambëlan na may yang baklung itinambël na,
indi ra ka ëngëd magtirnuan.
37 Dispuis,
tinu pay nag̓aintindian ming tau ang yang binung baklung ingkëlan tung saralug̓an,
asan da ilëm papagbaalay na tung parabtangan ang lag̓i-lag̓i ra?
Kipurki kung maning tia ya pay buwatën na,
kung mabaal da nganing tia,
manlëskag da yang parabtangan ang asta mablak.
Anday duma,
mailas da ka ilëm yang binu,
pati yang parabtangan,
diadu ra kad.
38 Kung indi,
yang dapat ang buwatën,
yang binung baklu asan da ibukbukay tung parabtangan ang baklu ka.
39 Dispuis pa,
tinu pay nag̓aintindian ming tau ang malëlyag pang manginëm ta binung baklung sinaruk ang atiing naanad da tung binung baal da?
Ay yang binung baal da yay pag̓aningën nang mas masabur.
Pariung pisan tung mga taung anad da tung pag̓urusuyun tung dating nag̓apgësan nira.
Indi ra ka malëlyag ang mag̓usuy tung baklung sistimang naang nag̓itulduku,”
ag̓aaning ti Jesus.