Ti Jesus Nag̓atag̓aman Ta Tuksu Ni Satanas Ang Para Magpanadili Ra (4:1-13)
4
Taa numanyan,
ti Jesus atiing pagpabënyag na duun tung subang atiang pag̓aningën ang Jordan,
kumus nag̓amanguluan da yang Espiritu Santo,
nagliit da duun ang para mulik da tung banwa na.
Atiing mag̓ulik da rin,
ingkëlan da yang Espiritu Santong ipinaski duun tung banwang palag-palag yang tau na.
Lucas 4:1-13
2 Atiing duun da,
pinalëngtan da ni Satanas ang pinag̓intraan na tuksu tung sëlëd ëpat ang puluk ang kaldaw.
Numanyan tung mga uras ang atii,
ti Jesus andang pisan ay pangan-pangan.
Purisu atiing patapus-tapusun da yang mga kaldaw ang atii,
duru rang kasusubkun na.
3 Mag̓aning ti Satanas tung anya,
“Ta,
kung matuud ang yawa ka man yang pag̓aningën ang Ana Yang Dios,
abir,
lalangan mu ra kanay yang batung atiang magyari rang tinapay,”
mag̓aning.
4 Mag̓aning ka ti Jesus ang nagtuw̓al,
“Aa,
indiaw,
kipurki may bitala yang Dios ang napabtang tung kasulatan ang bëlag̓an ilëm unu pamangan ay impurtaën yang sasang tau ang para ikalayun naa.”
5 Pagkatapus,
dayun dang ingkëlan ni Satanas duun tung rugal ang durug kaabwat.
Ipinaita na tung anyang kinalitan yang tanan ang inadian tung bilug ang kaliw̓utan.
6 Mag̓aning ti Satanas tung anya,
“Yawa ray papgësënu ta kagaëman mu tung tanan ang atiang naita mung durug katitinlu.
Kipurki tia,
luw̓us dang ipinag̓intriga tung yëën.
Purisu numanyan puiding ipakdulu tung kumpurming tinu pay nag̓alëlyag̓anu.
7 Purisu baskin yawa,
basta magtuua ra ilëm tung yëën,
ipakdulu ra tung nuyu yang tanan ang atia,”
mag̓aning.
8 Mag̓aning ti Jesus ang nagtimalës “Aa,
indiaw,
kipurki may bitala tung kasulatan ang anda unu ay dumang luuranung tuuan,
kung indi,
ultimu ra ilëm ti Yawi ang yay Dios ang may kalalangan tung yëën,”
mag̓aningb.
9 Taa numanyan,
dayun sing ingkëlan ni Satanas duun tung Jerusalem,
duun ëngëd tung sagpaw yang pagtuuan ang atiang pinakalusu.
Mag̓aning tung anya,
“Ta,
kung matuud ang yawa ka man yang pag̓aningën ang Ana Yang Dios,
abir,
pabugsua ra kanay asan.
10 Kipurki may bitala yang Dios tung kasulatan ang patuw̓ulana unu anya tung mga angil nang pabantayan.
11 Sarëpëna ka unu nira ug̓ud indi ka matigbak yang kakay mung tëmpa tung kabatuwan,”
ag̓aaningc.
12 Mag̓aning ti Jesus ang minlës,
“Indiaw,
kipurki may dumang bitala tung kasulatan ang dapat unu indiaw magtag̓am ta ingaw̓us tung ni Yawi ang ya unu ay Dios ang may kalalangan tung yëën,”
ag̓aaning.
13 Kapurisu atiing nalw̓usan da ti Satanas ta taktika ang sarang gamitën na tung ni Jesus,
pinaw̓aya-w̓ayaan na ra ilëm kanay asan ang binutwanan ang asta may këtat na si.
Nag̓impisa Ti Jesus Yang Pag̓urubraën Na (4:14-15)
14 Taa numanyan,
ti Jesus,
nagpadayun da yang pagparanawën nang minulik duun tung Galilea.
Pirming nag̓amanguluan yang Espiritu Santo ang yay pagpaktël ta mupia tung anyang pagpalua ta mga pruibang makabëw̓ërëng.
Purisu indi ra ilëm buay nagsarakmu ra yang balita natëtëngëd tung anya duun tung banwang atii pati duun tung mga banwang kakunayungan na.
Lucas 4:14-30
15 Sigi-sigi ka yang pagparakaw̓utun na yang bitala yang Dios tung mga tau ang pamagsaragpun-sagpun tung nira-nirang mga balay ang pagsaragpunan.
Anday dumang dinangat na durung pagdarayawën nira tung anya.
Nag̓apangindian Da Ti Jesus Yang Mga Masigkabanwa Na (4:16-30)
16 Pira pang kaldaw minangay ra ti Jesus duun tung Nazaret ang yay banwang pinagdakulan na.
Pagkaw̓ut yang kaldaw ang nag̓ipamaënay,
nagpakiglakët da duun tung pagsaragpunan nira ay ya ra kang lag̓i ay ug̓ali na.
Numanyan dayun dang kumindëng asan tung parada ang para magbasa tung nira yang bitala yang Dios.
17 Anday dumang ipinarawat tung anyang basaën,
ya ra yang isinulat ni Isaias ang sasang manigpalatay yang bitala yang Dios atiing tukaw.
Taa numanyan,
anday duma,
dayun na rang sinulw̓aran yang kasulatan ang atiang yag lululun ang asta nasagyapan na yang sam bulus ang gustu nang basaën ang maning taa yang napabtang:
18 “Yang Espiritu Santong ipinagpatinir da ni Yawi tung yëën,
ya ray pagmangulu tung yëën ang pagpaktël.
Ay yuu ra kang lag̓i ay pinilik ni Yawing magparakaw̓utun yang Matinlung Balita tung mga taung aranëk ta pagkabëtang ang simpan da ti Yawing magtaw̓ang tung nira.
Tinuw̓ulaw ra ka anyang magpasanag tung mga taung nag̓akëmkëm ta mga tau ang tanira ipampaluas da ni Yawi tung kumpurming unu pay pagpakëmkëman nira.
Pati mga buray,
paintindiënu ra ka ang tanira pamuskarën da ni Yawi yang mga mata nira.
Pati yang mga taung nag̓adëgdëg̓an ta duma,
pasanag̓anu ra ka ang tanira ipampalibri ra ni Yawi.
19 Bilang tinuw̓ulaw ra anyang magbandilyu tung tanan ang mga tau ang kuminaw̓ut da yang uras ipagpaita ni Yawi yang kanëëman na tung nirad,”
ag̓aaning.
20 Numanyan,
pagkatapus ta pagbasa na,
dayun na rang linulun yang kasulatan ang atiang ibinalik tung manig̓ëpët.
Pagkatapus,
kuminarung da ilëm asan ang para magturuldukanën da tung mga tau.
Yang mga mata nirang tanan,
maninga isinamwag da tung anya.
21 Numanyan dayun dang nagbitala tung nirang mag̓aning,
“Numaan ang kaldaw ang naa,
mintras pamatiamu tung yëën ang pagparakaw̓utun,
nag̓aimpisaanu rang agmatuurun yang naulang atiang baklung binasaw,”
mag̓aning.
22 Numanyan yang mga taung atiang pamamati,
pinaninluan dang namagdarayawën tung anya,
ay nabërëngan nira ta mupia yang kinatakwanan nang pamëtang-bëtang ta mga bitala.
Ug̓aring ang naisip da nira yang linagpakan na,
unaw̓is pinaninëkan da.
Dayun dang namag̓araning-aningan ang mag̓aning,
“Bëlag bang yang taung naa ana ni Jose?
Ayw̓a,
tanyang sasang masigkatau ta ka ilëm mag̓ambu pa ta maning tia?”
23 Atii dayun dang nagtimalës ti Jesus ang mag̓aning,
“Muya pasulitanaw pa numyu yang sasang sarabyën ang yang sasa unung manigbulung,
dapat unu ang yang tukawën nang pamaayënën,
ya ra unu yang sadili na mismu.
Muya aningënaw ka numyu ang yang mga pruibang atiang makabëw̓ërëng ang nabalitaan ming ipinagpaluaw duun tung Capernaum,
dapat taa si kay ipalapusayu tung sadiling banwaw,”
mag̓aning.
24 Pagkatapus dayun na rang sinugpatan yang bitala nang mag̓aning,
“Iugtulu tung numyu yang kamatuuran,
anday manigpalatay yang bitala yang Dios ang nag̓agalang tung sadiling banwa na.
25 Isipën mi ra ilëm ta maayën yang ipadëmdëmung naa tung numyu kung indi magkatirnung pisan tung numyu.
Atiing panimpu pa ni Elias atiing inding pisan pinakuran yang Dios yang banwang naa tung sëlëd tulung takun may tënga ang puirti ra yang panuw̓uk ang kuminaw̓ut tung intirung banwa tang naang Israel,
duru kang mga balung mga baw̓ay ang nagkaraliwag̓an ta durue.
26 Ang pagkatapus andang pisan ay pinatuw̓ulan ni Yawi tung ni Elias ang taw̓angan,
kung indi,
suluminti ilëm yang sasang balung baw̓ay ang bëlag̓an ka pa man masigka Judio nira ang pagtinir tung lansangan ang Sarepta duun tung sinakëpan yang Sidon,
ya pay pinatuw̓ulan na tung anyang tabnuyunf.
27 Dispuis pa atiing panimpu ni Eliseo duru kang mga taung may dispirinsia nirang makamamansa tung mga ulit nira taa tung banwa tang naang Israel,
ang pagkatapus,
anday kinuatan na ta dispirinsia nirang atia,
kung indi,
suluminti ilëm ti Naaman ang tag̓a Siriang bëlag̓an ka pa man masigka Judio nag,”
mag̓aning.
28 Numanyan yang mga tau asan tung pagsaragpunan,
pagkagngël da nira yang inaning ni Jesus ang atia,
ang midyu tanira nag̓aliig-liig na,
pinanungkukan da ta kasisilag̓ën nirang duru tung anyah.
29 Anday dumang binuat nira,
diritsyu rang namagkërërëngan ang ipinagtulmun da nira ti Jesus duun tung lua yang lansangan.
Duun da idëldëlay nira tung palda yang bukid ang nabtangan yang lansangan nira ang para duun ëngëd tung napatiplay na ilambëg̓ay nira.
30 Piru naa ti Jesus tanya,
dayun da ilëm ang nagbira ang duun da ilëm tung nira nanëyang-sëyang ang asta pinamutwanan na ra ka ilëm tanira.
Nag̓apamaayën Ni Jesus Yang Taung Dinimunyu Rin (4:31-37)
31 Taa numanyan,
diritsyu rang nanuldak duun tung Capernaum ang sasa kang lansangan ang lug̓ud ka tung sinakëpan yang Galilea.
Pagkaw̓ut yang kaldaw ang nag̓ipamaënay,
dayun dang nagturuldukanën tung mga tau.
Lucas 4:31-44
32 Pagkagngël nira,
nangabërëng ta mupia tung pasais nang nagturuldukun tung nira.
Ay ya pa ag̓ari,
yang pagturuldukun na may builu nang maktël ang yay pagpailala ang tanya may katëngdanan na ka man ang ipinakdul yang Dios tung anya.
33 Taa numanyan duun tung pagsaragpunan ang atii,
may taung agdimunyuwën ang ya ray naglëlpakën ta mupia ang mag̓aning,
34 “Aay,
Jesus ang tag̓a Nazaret,
ayw̓a ag̓apasilabtanami pa nuyu?
Ayw̓a,
yaming mga dimunyu yay katuyuan mu taa ang para diaduënami ra nuyu?
Sampa india mailalaw?
Yawa yang pinilik yang Dios ang magpundar yang paggaraëmën nang baklu!”
35 Atii,
dayun dang sinambëng ni Jesus ang inaning,
“Ipës!
Maglayasa ra ilëm asan.”
Atii,
yang dimunyu dayun na rang ibinëgsak yang taung atia asan tung pinagtaralungaan nira na Jesus,
baklu nagliit tung anya.
Piru indi ka natigbak yang tau,
ag̓ad ibinëgsak na pa.
36 Pagkaita yang mga tau,
nangabërëng da tanirang tanan.
Namag̓araning-aningan dang mag̓aning,
“Unu pang kalalanganay tia?
May katëngdanan na palang magpalayas tung mga dimunyu.
Sam pabitala na ilëm,
paglayas dang lag̓i!”
mag̓aning.
37 Kapurisu yang balita natëtëngëd tung binuat ni Jesus ang atia,
indi nabuay-w̓uay ang nanlaktëd-laktëd tung mga banwang atiang kakunayungan yang Capernaum.
Dakëlëng Mga Taung Nag̓apampamaayën Ni Jesus (4:38-41)
38 Taa numanyan,
atiing pagliit ni Jesus tung pagsaragpunan ang atii,
minangay ra duun tung balay ni Simon.
Pagkatapus ya ray natakwalan na yang punyangan nang baw̓ay ang pagkinitën ta duru.
Purisu numanyan anday duma,
ya ray ipinataw̓ang nira tung anya ang para pamaayënën na.
39 Purisu pagpalëngët na,
pagsurung na,
diritsyung nagkalalangan dang “Magliita ra asan ang kinita.”
Pagkatapus lag̓i-lag̓ing naumpawan da yang maëpët.
Pagkaumpaw na,
atiang lag̓i nagbangun dang nag̓asikasu tung mga bisita na.
40 Taa numanyan,
atiing pagsantëk da yang kaldaw,
yang tanan ang mga taung pamaglaru ta sari-sari,
ipinampadangëp da asan tung ni Jesus yang mga aruman nira.
Pagkatapus,
anday dumang binuat ni Jesus,
pinandëën-dëënan na sasa may sasa ang pinampamaayën.
41 Dakëlë kang mga taung pinampalayasan na tung mga dimunyu.
Kung maglayas da nganing,
maglëlpakën dang mag̓aning,
“Yawa pala yang pag̓aningën ang Ana Yang Dios!”
mag̓aning.
Namagbitala ta maning tia ay natëtëngëd nag̓askëan da nira ang ti Jesus ya ra yang pinilik yang Dios ang magpundar yang baklung paggaraëmën na tung bilug ang kaliw̓utan.
Piru indi na ra tinugtan ang magbaw̓alitaën natëtëngëd tung katëngdanan na,
kung indi,
sinambëng na rang lag̓i ang inampalar.
Yang Pagliliw̓utun Ni Jesus Ang Pagparakaw̓utun Tung Intirung Kabaw̓anwaan Yang Mga Masigkanasyun Nang Mga Judio (4:42-44)
42 Taa numanyan atiing paminag-binag da yang kaliw̓utan,
luminua ti Jesus tung lansangan ang nagpaag̓ës duun tung lugar ang anday tatau na.
Numanyan anday dumang binuat yang mga tau,
namagsagyap da tung anya ang asta naita ra nira.
Atiing pagkasagyap da nira,
tinag̓aman da rin nirang inawiran ang indi ra ka magliit duun tung banwa nira.
43 Piru mag̓aning ti Jesus ang nagtimalës tung nira,
“Kaministiran mangayaw ra ka tung dumang mga lansangan ug̓ud magparakaw̓utunaw ra ka tung mga tau yang sasang matinlung balita ang yang Dios mag̓impisa rang magtukud yang paggaraëmën nang baklu tung mga tau,”
mag̓aning.
44 Kapurisu numanyan nagliliw̓utun da ka man ti Jesus tung intirung sinakëpan yang Judea.
Nagparakaw̓utun tung mga tau ang kada mamagsaragpun tung nira nirang balay ang pagsaragpunan.