Yang Pagparakaw̓utun Yang Palaskaw Tung Mga Tau (3:1-20)
3
1-2 Taa numanyan,
ilaktëd ta ra kanay tung kapanawan ni Juan ang atiang ana ni Zacarias.
Atiing duun dag pagpaluyu-luyu tung banwang atiing palag-palag yang tau na,
duun da intrigaay yang Dios yang bitala na ang nunut da ka ta pagpaktël na ang para simpan dang magparakaw̓utun tung mga tau.
Yang uras dang atii,
ya taa yang mga taung pamangatëngdanan.
Yang pinakalandaw ang adi ang paggaëm tung intirung sinakëpan yang nasyun ang Roma,
ya ra ti Adi Tiberio.
Tung uras ang atii,
pagpanaw ra ta sam puluk may limang takun yang paggaraëmën na.
Yang gubirnadur duun tung Judea,
ya ra ti Poncio Pilato.
Yang gubirnadur tung Galilea,
ya ra ti Herodes.
Yang gubirnadur tung Iturea may tung Traconite,
ya ra ti Felipe ang putul ni Herodes.
Yang gubirnadur tung Abilinia,
ya ra ti Lisanias.
Dispuis duun tung Jerusalem,
yang mga paring pinakalandaw ta katëngdanan ya ra ti Anas duruang magminag̓ad ni Caifasa.
Lucas 3:1-20
3 Purisu numanyan ti Juan ang naa,
kumus pag̓atuw̓ul da yang Dios,
anday duma,
nandanëk da duun tung kakunayungan yang subang pag̓aningën nirang Jordan.
Nagparakaw̓utun da tung mga taung pamag̓arangayan tung anyang mag̓aning,
“Kaministiran manlignaamu ra tung mga kasalanan ming magbalik tung Dios ang pagkatapus ya ra kay papruibaan ming magpabënyag ang para patawarënamu ra anya,”
ag̓aaning.
4 Naang pagparakaw̓utun ni Juan ang maning tia,
naula kang lag̓i ni Isaias ang sasang manigpalatay yang bitala yang Dios ang tukaw ang mag̓aning,
“May sasang taung magparakaw̓utun tung mga tau duun tung banwang kapas ta maning taa:
‘Katulad ka tung pagsirimpanën tung sasang dalan ang panawan ta sasang Adi ang yag tadlëngay,
kaministiran kang simpanën mi ra ka ta mupiang tadlëngën yang mga kinaisipan mi ang para magpauyunamu ra tung ni Ginuu tang magkakaw̓ut da.
5 Purisu kung ay pay nagdalëman,
kaministiran ang yay panampëkan.
Kung ay pay napabukid u napabukatud,
kaministiran kang yay pamantag̓ën.
Kung ay pay napakilu,
kaministiran kang yay panadlëngën.
Kung ay pay napalëbëng-lëbëng,
kaministiran kang yay pamantayën ang asta magdalanu.
6 Kumpurming tinu pay magsimpan yang isip na ta maning tia,
anday dumang mabilug̓an na,
ya ra yang kalibrian ang pag̓iparawat yang Dios tung anya,’
mag̓aning.”
Atia yay naula ni Isaias natëtëngëd tung ni Juan ang naang nagparakaw̓utunb.
7 Kapurisu simanyan duru-durung mga tau ang namagdarag̓umukan duun tung ni Juan ang para masigpabënyag da ka rin tung anya.
Ang pagkatapus,
ya ra ag̓aningay nang,
“Yang kaalimbawaan mi maningamu ra ilëm tung mga iraw ang pamagpalibri tung kirib ang nag̓asiruk.
Tinu pa kayay nagpaëtad tung numyu ang basta magpabënyag̓amu ra ilëm,
indiamu ra sakpën yang sintinsiang ipadangat yang Dios?
Talagang bëlag̓an yuu.
8 Kaministiran bakluamu ra nga bënyag̓ayu kung may pruibang ipinaita mi ra tung mga ubra-ubra mi ang talagang panlignaamu ra ka man ang matuud tung mga kasalanan mi.
Muya maglaumamu ra ilëm ang kumus yamu mga kanubli ni Abraham,
indiamu ra sakpën yang sintinsia ang atia.
Uay,
maski nganing yang mga batung atia,
iugtulu tung numyu,
sarangan ang papag̓ingtauën yang Dios ang para buatën nang mga kanubli ni Abraham.
9 Yang sintinsia nang atia,
maskin nganing simanyan,
yang kaalimbawaan na,
maning pa tung parakul ang nabiw̓at dang ipatpa ra ilëm tung kapungul yang sasang ayu.
Kumpurming unu pang ayuay ang bëlag̓an matinlu yang burak na,
ya ray pëlarën ang sirukun tung apuy,”
mag̓aning ti Juan tung nira.
10 Atii muya-muyang mamagtalimaan yang mga tau tung anya ang mag̓aning,
“Tay kung maning tii yang bitala mu,
unu pa w̓asu ay dapat ang buwatën yamën ang para indiami ka magkamaningan?”
11 Mag̓aning ti Juan ang nagtimalës,
“Maning taa yang dapat ang buwatën mi.
Kung tinu pay nagduruay lambung na,
yang sam bilug itunggal na tung aruman nang anday lambung na.
Kung tinu pay may pamangan,
kaministiran mamarti tung aruman nang andang pisan ay mapangan na,”
mag̓aning.
12 Taa numanyan,
may mga tau asan ang pamamati ang yang pangabui nira mga manigpanukut ta mga balayaran tung gubirnu.
Yang inangay nira asan,
mampabënyag da ka rin tung ni Juan.
Ya si kay namagtalimaan tung anyang mag̓aning,
“Ay yami w̓asu,
Amëëy,
unu pay dapat ang buwatën yamën?”
13 Mag̓aning ka ti Juan ang nagtimalës,
“Indi mi ra pagsukutun yang mga taung subra ra tung urdinansang ipinakdul tung numyu,”
mag̓aning.
14 Taa numanyan may mga sundalu ka asan ang pamamati ang ya si kay namagdasun ang namagtalimaan tung anyang mag̓aning,
“Maskin yami pa rin,
kung puidiami ka rin nuyung mapainunukuan,
unu pa w̓asu ay dapat ang buwatën yamën ang para indiami ka magkamaningan ang katulad ka tung inaning mu nungayna?”
Mag̓aning ti Juan ang minlës,
“Tabtaw̓ën mi ra atiang panlëpës mi tung mga tau ang yang duma ya rag palëg̓ay mi ang para mamakdul ta kuarta tung numyu,
ang yang duma kung indi mamakdul,
ya ra ilëg dataay mi ta kasalanan ang para ipakaw̓ut tung abwat.
Dispuis yang magkatama,
kumpurmi ra ilëm yang nag̓isuildu tung numyu,
ya ra ilëm ay pasalamatan ming risibiën,”
mag̓aning ti Juan tung nira.
15 Taa numanyan,
yang pinakaw̓ut yang pagparakaw̓utun ni Juan ta maning tia,
ya ray pinanlatayan yang mga isip yang mga tau tung pag̓aningën ang Cristo ang ya kang lag̓i ay pag̓aëlatan nira.
Ti Juan ya ray nag̓apagkësën-kësënan yang mga isip nira kung nusias ya ra.
16 Purisu inag̓apan ang lag̓i ni Juan yang mga paglaum nirang maning tii ang inaning,
“Tung bag̓ay may katëngdananu ka man ang magpamënyag tung numyu taa tung waing naa.
Piru may sasang taung nag̓auri pa tung yëën ang mas abwat ta katëngdanan tung yëën.
Indiaw ang pisan magkabag̓ay tung anya,
basin nganing tung pag̓uw̓ad da ilëm yang lakgëng yang sandalyas nac.
Yang anyang katëngdanan maning pa tung magbërënyag̓ën ka tung numyu ëkël tung pagpatinir na tung numyu yang Espiritu Santo u kung indi,
apuy ra yang gamitën na.
17 Yang kaalimbawaan na,
maning pa tung sasang taung pag̓ëkël ta linung magkaap yang paray ang ginëyëk na.
Yang timlat ya ray ipabtang na tung tambuw̓u na.
Piru yang kaap ya ray pagkalan na ta apuy ang anda ëngëd ay kapugdaw-pugdawan na,”
ag̓aaning duun ti Juan.
18 Kapurisu tung pagparakaw̓utun ni Juan yang matinlung balita tung mga tau natëtëngëd tung pag̓aningën ang Cristo,
sari-saring papanaw nang nagpaktël tung mga isip nirang mamanangëd da.
19 Maski ti Herodes ang atiang Gubirnadur tung Galilea,
tung kauri-urian da yang pagparakaw̓utun ni Juan,
pinaintindi na ka natëtëngëd tung kasalanan nang nangasawa tung ni Herodias ang ya ra rin ay kasawa yang putul nang ti Felipe.
Pati yang kadaklan ang nagkarabuat-buat yang Gubirnadur ang mga malalain tung pagtërëlëngën yang Dios,
ya kay ipinatalunga ni Juan tung anyang ipinagpaaman.
20 Ang pagkatapus ti Herodes ang atia,
inunung mas pang nagdulang yang kasalanan na,
ang ti Juan ya ra ipakalabusay na.
Yang Pagpabënyag Ni Jesus Tung Ni Juan (3:21-22)
21-22 Taa numanyan,
balikan ta ra kanay yang kapanawan ni Juan ang indi pa rin nag̓akalabus.
Atiing duru-durung mga taung namampabënyag da tung anya,
pati ti Jesus nagpabënyag da ka.
Pagkatapus ta pagpabënyag na,
dayun dang nag̓ampu.
Mintras pag̓arampuën,
yang langit maning pa tung inaling nag̓abri ra ang duun da manliit yang Espiritu Santo.
Diritsyung nagparanëk ang nangapun tung ni Jesus ang nagpapariu ra tung kuari kalapati.
Pagkatapus may busis dang nagngël ang liit tung langit ang mag̓aning,
“Yaway pag̓aningënung anaw ang nag̓apabuyukanu ta gëgmaw ay yawa ra kang lag̓i ay nag̓auyunanu ta mupia,”
mag̓aning.
Lucas 3:21-38
Yang Listaan Yang Pinanliit-liitan Ni Jesus (3:23-28)
23 Naa ti Jesus,
atiing pagpabënyag na ang ya ra kay paglua na tung mga tau,
yang idad na mga tulung puluk dang takun.
Yang pagtërëlëngën yang mga tau tung anya,
tanya unu ana ni Jose.
Piru kung usu-usuën ta yang pinanliit-liitan na,
duun da impisaay ta tung apu na ang yay ama ni nanay nang nag̓aranan tung ni Eli.
24-38 Kung ya ipabalikay tang pag̓usu-usu tung mga ginikanan nirang nagdarasun-dasun ya ra taa yang listaan yang mga aran nira.
Ti Eli,
ti Matat,
ti Levi,
ti Melqui,
ti Jana,
ti Jose,
ti Matatias,
ti Amos,
ti Nahum,
ti Esli,
ti Nagai,
ti Mahat,
ti Matatias,
ti Simi,
ti Josek,
ti Juda,
ti Yohanan,
ti Resa,
ti Zorobabel,
ti Sealtiel,
ti Neri,
ti Melqui,
ti Adi,
ti Cosam,
ti Elmadam,
ti Er,
ti Josue,
ti Eliezer,
ti Jorim,
ti Matat,
ti Levi,
ti Simeon,
ti Juda,
ti Jose,
ti Jonan,
ti Eliakim,
ti Melea,
ti Mena,
ti Matata,
ti Natan,
ti Adi David,
ti Jesse,
ti Obed,
ti Boaz,
ti Salmon,
ti Naason,
ti Aminadab,
ti Admin,
ti Arni,
ti Hesron,
ti Perez,
ti Juda,
ti Jacob,
ti Isaac,
ti Abraham,
ti Tera,
ti Nahor,
ti Serug,
ti Reu,
ti Peleg,
ti Eber,
ti Sela,
ti Cainan,
ti Arpaksad,
ti Sem,
ti Noe,
ti Lamek,
ti Metusela,
ti Enoc,
ti Jared,
ti Cainan,
ti Enos,
ti Set,
may ti Adan mismu ang yay primirung taung inimu yang Dios.