Natëtëngëd Tung Bitalang Nag̓ipagpakaw̓ut Ni Juan Ang Manigbënyag Tung Mga Tau (3:1-12)
3
1-2 Taa numanyan may pira rang takun baklu ra naglua ti Juan ang manigbënyag tung banwang palag-palag yang tau na duun tung sinakëpan yang Judea.
Duun da nagparakaw̓utun tung mga tau ang mag̓aning,
“Manlignaamu ra tung mga kasalanan mi,
ay kinaw̓ut da yang uras ang ipagpundar yang Dios yang paggaraëmën nang baklu tung yatën,”
mag̓aning.
3 Ay ti Juan ang naa ya ra yang ipinaula yang Dios tung ni Isaias ang tukaw ang mag̓aning,
“May sasang taung magparakaw̓utun tung mga tau duun tung banwang kapas ta maning taa:
‘Katulad ka tung pagsirimpanën tung sasang dalan ang panawan ta sasang Adi ang yag tadlëngay,
kaministiran kang simpanën mi ra ka ta mupiang tadlëngën yang mga kinaisipan mi ang para magpauyunamu ra tung ni Ginuu tang magkakaw̓ut da,’
mag̓aninga.”
4 Ti Juan ang naa yang aw̓ël nab balayw̓u ta pag̓aningën ang kamilyu ang inubra tung tiral.
Yang akës na ulit ta sasang ayëp.
Yang pamangan na apan ang maglutukun may lanaw.
5 Taa numanyan yang mga tau sigi-siging pamag̓arangayan duun tung ni Juan.
May mga tag̓a Jerusalem,
may mga tag̓a maskin ay pang lugaray tung sinakëpan yang Judea,
may mga tag̓a subang atiang pag̓aningën ang Jordan ang magtirimbang tung tindak may tindak.
6 Numanyan kumpurming tinu pay nangamin yang mga kasalanan na tung Dios,
ya ra kay binënyag̓an na duun tung subang atia.
7 Numanyan pagkaita ni Juan tung mga pamagmangulung nag̓aguuyan tung mga Pariseo may tung mga Saduseo ang duru rang pamansiangay tung anya ang para mampabënyag da ka rin,
diritsyu rang pinag̓aning na ang,
“Yang kaalimbawaan mi maningamu ra ilëm tung mga iraw ang pamagpalibri tung kirib ang nag̓asiruk.
Naa pala,
pati yamu nag̓aisipamu ra kang magpalibri tung sintinsiang ipadangat yang Dios!
8 Kaministiran bakluamu ra nga bënyag̓ayu kung may pruibang ipinaita mi tung mga ubra-ubra mi ang talagang nanlignaamu ra ka man ang matuud tung mga kasalanan mi.
9 Indiamu ra ka maglaum ang kumus yamu mga kanubli ni Abraham,
indiamu siguru sakpën yang sintinsia nang atia.
Uay,
maski yang mga batung atia,
iugtulu tung numyu,
sarangan ang papag̓ingtauën yang Dios ang para buatën nang mga kanubli ni Abraham.
10 Yang sintinsia nang atia,
maski nganing simanyan,
yang kaalimbawaan na maning pa tung sasang parakul ang nabiw̓at dang ipatpa ra ilëm tung kapungul yang sasang ayu.
Kumpurming unu pang ayuay ang bëlag̓an matinlu yang burak na,
ya ray pëlarën ang sirukun tung apuy.
11 Tung bag̓ay may katëngdananu ka man ang magpamënyag tung numyu taa tung wai ang naa ang para asan da nga papruibaay mi ang nanlignaamu ra ka man ang matuud tung mga kasalanan mi.
Piru may sasang taung nag̓auri pa tung yëën ang mas abwat ta katëngdanan tung yëën,
ang basin nganing tung pamitbit da ilëm yang sandalyas nac,
indiaw pa ka ëngëd magkabag̓ay.
Yang anyang katëngdanan maning pa tung magbërënyag̓ën ka tung numyu ëkël tung pagpatinir na tung numyu yang Espiritu Santo u kung indi,
apuy ra yang gamitën na.
12 Yang kaalimbawaan na maning pa tung sasang taung pag̓ëkël ta linung magkaap yang paray ang ginëyëk na.
Yang timlat ya ray ipabtang na tung tambuw̓u na.
Piru yang kaap ya ray sirukun na tung apuy ang anda ëngëd ay kapugdaw-pugdawan na,”
ag̓aaning duun ti Juan.
Yang Pagpabënyag Ni Jesus Tung Ni Juan (3:13-17)
13 Taa numanyan,
ti Jesus nagliit da tung Galilea ang minangay duun tung ni Juan ug̓ud magpabënyag da ka tung anya duun tung subang atiang pag̓aningën ang Jordand.
14 Piru tung pagkaw̓ut na tung ni Juan,
tinag̓aman da rin ni Juan ang sambëngën.
Mag̓aning tung anya,
“Abaa yuuy may kaministiranung magpabënyag tung nuyu,
piru yawa pa pala ay magpabënyag tung yëën?”
ag̓aaning.
15 Mag̓aning ti Jesus ang minlës,
“Kung tung bag̓ay,
Juan,
tama ka rin tiang nuyu.
Piru simanyan ang mga uras ang naa,
kaministiran ang magpauyuna ra ilëm tung yëën.
Ay tung maning tia,
matuman ta ra yang kumpurming unu pay nag̓ipatuman yang Dios tung yatën,”
ag̓aaning.
Atii baklu pa nagpauyun ti Juan ang nagbënyag tung anya.
16 Atiing nagpabënyag da ti Jesus,
dayun dang nagpatakas.
Pagkatakas na,
ya ray natingara na yang langit ang gulpi ra ilëm ang nag̓abri tung tagbu na ang pagkatapus ya ray naita na yang Espiritu Santong napapariu ra tung kuari kalapati ang paparanëk da ang asta nangapun da tung anya.
17 Pagkatapus may busis ang liit tung langit ang mag̓aning,
“Atia ra yang pag̓aningënung anaw ang nag̓apabuyukanu ta gëgmaw ay ya ra kang lag̓i ay nag̓auyunanu ta mupia,”
mag̓aning.