Yang Pagdarayawën Tung Ni Jesus Yang Mga Manigpintu (2:1-12)
2
Taa numanyan ti Jesus duun da ipanganaay tung lansangan ang Betlehem tung sinakëpan yang Judea.
Natuun tung paggaraëmën ni Adi Herodes.
Pagkatapus tung pira pang bulan,
may namagkaw̓ut dang mga t duun tung Jerusalem ang mga manigpintu tung mga sinyalis yang mga dumakël.
Yang banwang pinanliitan nira ampir duun tung mururaan.
2 Pagkaw̓ut nira,
dayun dang namanalimaan-talimaan tung mga tau ang mag̓aning,
“Ay ra kaya ipanganaay yang sasang mula ang yay maggaraëmën tung numyung mga Judio?
Ay naita ra yamën yang sasang dumakël ang tuminla ampir duun tung mururaan ang ya ray sinyalis ang dinëëp yamën ang tanya ipinangana ra.
Purisu ya ra ka man taang inangay yamën taa ang para magluurami tung katalungaan na,”
mag̓aning.
Visit of the Magi (Mateo 2:1-23)
3 Numanyan pagkagngël ni Adi Herodes yang balita natëtëngëd tung itinalimaan yang mga manigpintung atia,
ya ray pinagliwag̓an ta mupia yang isip na pati yang mga isip yang dakëlëng mga tau duun tung Jerusalem.
4 Purisu pinagpaguuyan na yang tanan ang mga paring arabubwat ta katëngdanan tung nasyun ang Israel pati mga sag̓ad tung pinanubli tung mga kinaampu.
Tung pagkasagpun nira,
dayun na rang tinalimaan ang mag̓aning,
“Tung nagkaraula yang mga manig̓ula ming tukaw,
ay pa unung banwaay ipanganaay yang pag̓aningën ang Cristo?”
ag̓aaning.
5 Mag̓aning tanirang namagtimalës,
“Duun unu ipanganaay tung Betlehem tung sinakëpan yang Judea.
Ay maning taa yang bitala yang Dios ang ipinasulat na tung sasang manig̓ula yamën:
6 ‘Yang lansangan ang Betlehem duun tung sinakëpan yang Judea,
maskin gësyëng lansangan ka man kung ikumpalar pa tung kadaklan,
piru ya pay tëlëngan ta abwat natëtëngëd duun manliit yang sasang magmangulu tung mga tauanung mga Israel,’
mag̓aninga.”
7 Pagkagngël ni Adi Herodes tia,
dayun dang nagpaguuy tung mga bisitang atiang mga manigpintu ang para magkërësën tanira ang tanira tanira ra ilëm.
Atiing pagkërësën nira,
pinasadsaran na ta mupia tung nira kung sanu pa ëngëd yang primirung pagtëla yang dumakël ang atiing naita nira.
8 Pagkaintindi na,
dayun na rang ipinaangay tanira duun tung Betlehem ang pinag̓aning,
“Paawatan mi ëngëd ang sagyapën yang mulang atii kung ay ra.
Ug̓aring kung masagyapan mi ra nganing,
magpakdëkamu ka taa tung yëën ug̓ud pati yuu mangayaw ra ka duun tung anyang magluud tung katalungaan na,”
ag̓aaning.
9-10 Pagkagngël nira yang inaning yang Adi,
dayun dang namagliit.
Numanyan tung pagparanawën nira,
duun si ka tuminla yang dumakël ang atiing naita nira atiing primirung pagtëla na duun tung banwa nira ampir tung mururaan.
Pagkatingara nira,
pinangampayan da ta kasadyaan nirang duru.
Ya ra ka man ay pinasikaran nira ang asta napatagbu ra tung pagtiniran yang mula.
11 Numanyan pagpaklëd nira tung balay,
naita ra nira yang mula durua ni Mariang nanay na.
Pagkatapus dayun dang namansiluud tung katalungaan yang mula.
Pagkatapus pag̓abri nira yang mga bëbtangan nira,
ipinampalua ra nirang irinigalu tung anya yang mga bulawan may yang duruang klasi ta paamut ang mga mamaalën ang yang sam bilug magkaanggid-anggid tung kamangyan ang yang sam bilug ka ya ray pag̓aningën nirang mira.
12 Taa numanyan pinagpaamanan yang Dios tung talakinëpën nira ang indi ra tanira mamagbalik tung ni Adi Herodes.
Purisu tung pag̓ulik nira tung banwa nira,
aparti rang dalanay yang pinanawan nira.
Yang Pagpalibri Na Jose Duun Tung Egipto (2:13-15)
13 Taa numanyan atiing namagliit da yang mga manigpintung atia,
naa pala may angil si ang tinuw̓ul yang Dios ang ya ray nagpaita tung ni Jose tung talakinëpën na ang mag̓aning,
“Jose,
bangun da!
Ëklan mu ra yang mulang mag̓ina ang palibriamu ra duun tung Egipto.
Duunamu ra kanay magtinir mintras indi pag kaw̓utun yang uras ang ipagpaskëu tung nuyu.
Ay yang mula talagang ipasagyap da ni Adi Herodes ug̓ud ipaimatay na,”
mag̓aning.
14 Purisu anday duma,
pagbangun ni Jose,
dayun na rang ingkëlan yang mulang mag̓ina ang namagliit dang lag̓i atiing law̓iing atii ang para mamagdistinu ra duun tung Egipto.
15 Pagkaw̓ut nira duun,
duun da kanay namagtinir ang asta napatay ra ilëm ti Adi Herodes.
Nagkamaningan da ta maning tia ug̓ud asan da magkamatuud yang sasang ipinaula yang Dios tung sasang manigpalatay yang bitala na atiing tukaw ang mag̓aning,
“Guuyanu yang pag̓aningënung anaw ang magliit da duun tung Egipto,”
mag̓aningb.
Natëtëngëd Tung Pagpaimatay Ni Adi Herodes Tung Mga Mamulang Gëg̓ësyëng Mga Lalii (2:16-18)
16 Ibaliku ra kanay tung ni Adi Herodes atiing indi ra binalikan yang mga manigpintuc.
Pagkaintindi na ang tanya pala linuku ra ilëm nira,
duru rang kasisilag̓ën na.
Anday dumang binuat na,
nagkalalangan da ang pangimatayën da ilëm yang tanan ang mga mamulang mga lalii duun tung Betlehem pati tung intirung paliw̓ut na ang kumpurming duruang takun yang idad nira ang asta paranëk.
Ay inusuy na ra ilëm yang pinasadsaran na tung mga manigpintung atia kung sanu pa ëngëd tuminlang primiru yang dumakël.
17 Duun da nagkamatuud yang sasang ibinitala ni Jeremias ang yay sasang manigpalatay yang bitala yang Dios ang tukaw ang mag̓aning,
18 “May tinangit dang nag̓agngël duun tung lansangan ang Rama.
May pamagtarangitën dang pamag̓urulimëngmëngën.
Kuari nagbangun da ti dipunta Raqueld ang pagpakigtangit da ka natëtëngëd tung mga kanubli na.
Indi ra ka ëngëd magpalinga-linga tia,
ay anda ra tanira,”
ag̓aaninge.
Yang Pagbalik Na Jose Tung Baw̓anwaan Nirang Israel Ang Duun Namanliit Tung Egipto (2:19-23)
19 Taa numanyan,
atiing napatay ra ti Adi Herodes,
yang angil ang atiing nagpaaman tung ni Joseng magpalibri,
ya si ay tinuw̓ul yang Dios ang magpaita tung anya tung talakinëpën na duun tung Egipto.
20 Mag̓aning tung anya,
“Jose,
bangun da!
Ëklan mu ra yang mulang mag̓ina ang mulikamu ra duun tung baw̓anwaan ming Israel,
ay patay ra yang nagbalak ang magpaimatay ra rin tung mula,”
ag̓aaning.
21 Purisu anday duma,
pagbangun ni Jose,
dayun na rang ingkëlan yang mulang mag̓ina ang nansiulik da ka man duun tung baw̓anwaan nirang Israel.
22 Piru atiing nabalitaan na ra ang ti Arquelao ya ray nagsubli tung pagkaadi ni tatay nang ti dipuntu Adi Herodes duun tung sinakëpan yang Judea,
inlëran dang mag̓istar duun.
Numanyan dayun sing pinapanalakinëp ang uman yang Dios ang pinaskë kung unu pay dapat ang buatën na.
Purisu dayun dang lag̓ing nagliit ang minangay duun tung sinakëpan yang Galilea.
23 Duun da nagtinir tung sasang lansangan ang maggug̓uuyan ang Nazaret.
Nagkamaningan da ta maning tia ug̓ud asan da magkamatuud yang sasang naula yang mga manigpalatay yang bitala yang Dios atiing tukaw natëtëngëd tung pag̓aningën ang Cristo ang tanya unu mag̓ing tag̓a Nazaretf.