Yang Pagkapangana Tung Ni Jesus (2:1-7)
2
Taa numanyan,
tung uras ang atii,
yang Maginuung Ading Pinakalandaw duun tung Roma ang nag̓aranan tung ni Agosto,
ya ray naglansar ta sasang urdinansa ang yang tanan unung mga kinasakpan na,
maskin ay pang banwaay,
dapat unung mamagpasalista.
Lucas 2:1-24
2 Yay primirung pasalista atiing ti Quirinio yang Gubirnadur duun tung banwang pag̓aningën ang Siriaa.
3 Purisu numanyan anday duma,
yang tanan ang mga tau duun,
kung ay pay dating banwang natauan yang mga kinaampu nira,
duun ka namag̓arangayan ang para mamagpasalista.
4 Asta naang ti Joseng naang binalay ni Maria ya ka.
Kumus tanya sasang kanubli ni Adi David,
anday duma,
nagliit da duun tung lansangan ang Nazaret ang lug̓ud tung sinakëpan yang Galilea ang para magdistinu duun tung sasang lansangan ang paggug̓uuyan ang Betlehem ang lug̓ud tung sinakëpan yang Judea.
Ay yay banwang natauan ni Adi David ang kinaampu na atiing tukaw.
5 Ay duun magpasalista,
durua tanira ni Mariang binalay na ang paranganaën da.
6 Purisu numanyan,
atiing pagkaw̓ut nira duun tung Betlehem,
kinaw̓ut da yang uras ang ipangana ni Maria.
7 Purisu duun da ilëm nangana ta ana nang lalii ang ya ray ana nang pangulu.
Pagkapangana na,
dayun na rang sinaw̓ëd-saw̓ëran ta mga gayg̓ay ang pagkatapus ipinalw̓ug na ra ilëm tung sasang pasungan.
Ay ya pa ag̓ari,
andang pisan ay lugar ang masalëëtan nira tung balay ang darayunan ta mga dayuan ay gëtëk dang pisan ta mga tau.
Natëtëngëd Tung Nag̓ibalita Yang Mga Angil Tung Mga Manigpastur Ang Ipinangana Ra Yang Mananapnay (2:8-21)
8 Taa numanyan,
duun tung banwang atii,
may mga manigpastur ang pagbërëlësan ta pagpulaw tung mga kaayëpan nira duun tung lua yang lansangan.
9 Numanyan limput da tanira ta sasang angil ang tinuw̓ul yang Dios.
Atiang lag̓i nasinggatan da tanira ta durug sulaw ang ya ra yang kasusulawën ang pag̓atiniran yang Dios.
Purisu pinamalayan da ta ëlëd nirang duru.
10 Mag̓aning yang angil ang nagbugnu tung nira,
“Indiamu ra mag̓ëlëd ay yuu may sasang ibalitaw tung numyung durug tinlu ang yay makasasadyang pisan ta mga isip yang tanan ang mga masigkanasyun mi.
11 Kipurki numaan ang law̓ii,
ipinangana ra yang manigpanapnay tung numyu ang ya ra yang pag̓aningën ang Cristong pinilik yang Dios ang maggaraëmën tung numyu.
Duun da ipinangana tung Betlehem ang ya kay pinanganaan ang tukaw tung ni Adi David ang kinaampu na.
12 Para mapruibaan ming matuud yang nag̓ipag̓aningung naa tung numyu,
may mulang maita mi duun ang sinaw̓ëd-saw̓ëran ta mga gayg̓ay ang ya kag lulw̓ug tung sasang pasungan,”
ag̓aaning.
13 Numanyan pagkatapus ta pagbitala yang angil,
nainali rang inugpuan ta mga kaarumanan nang panëng ang pisan ang irigkit yang paglinya-linyaan nira,
ang duun da ka mamansiliit tung langit.
Pamagdayaw tung Dios ang mag̓aning,
14 “Salamat!
Nainabu ra yang sasang ikadëngëg ëngëd yang Dios duun tung kaabwat-abwatan.
Ig yang pakaw̓utun na tung kaliw̓utan,
puidi ra maulikan yang rilasyun yang mga tau tung Dios ang kumpurming magrisibi tung kanëëman na,”
mag̓aning yang mga angil ang atiang namagdarayawën tung Dios.
15 Taa numanyan,
pagliit da yang mga angil ang atiang namagbalik da duun tung langit,
naang mga manigpastur namag̓araning-aningan dang mag̓aning,
“Amus ta ra,
mangayita ra duun tung Betlehem ang para insapuën ta ra yang nainabung naang ipinakdëk da yang Dios tung yatën,”
mag̓aning.
16 Purisu namag̓apura rang namansiangay duun tung Betlehem ang pagkatapus nasagyapan da ka man nira ti Maria durua ni Jose.
Pati yang mula naita ra ka nira ang asan ka man tung pasungan aglulw̓ug.
17 Atiing pagkaita ra nira yang mulang atia,
dayun dang namagbaw̓alitaën natëtëngëd tung nagngël nira tung mga angil ang natëtëngëd tung anya.
18 Purisu numanyan yang tanan ang nagkarabalita-w̓alitaan da,
nangabërëng da ta mupia natëtëngëd tung ibinalita yang mga manigpastur ang atia.
19 Ug̓aring naang ti Mariang naa,
pinagpanëëm-nëëman na ta maayën yang tanan ang atia ang ya ra kay ipinagkësën-kësën na tung isip na kung unu ra ilëm ay pakaw̓utun na.
20 Numanyan,
yang mga manigpastur ang atia,
namagbalik da ka tung mga kaayëpan nira.
Durung pagdarayawën nira tung Dios natëtëngëd tung tanan ang atiang nagkaragngël nira kag nagkaraita nira ang ya ray nagkatunung pisan tung pinag̓aning yang angil tung nira.
21 Taa numanyan,
kinaw̓ut da yang yawalung kaldaw ang iparanganaën tung mulang atia,
ya ray uras ang ipagbuat ta tanda tung tinanguni na.
Pagkatapus tia,
dayun dang pinaaranan da yang ginikanan na tung ni Jesus.
Ay ya ra kang lag̓i ay aran ang sinambit yang angil tung ni Maria ang ipaaran na tung anya atiing indi pa nag̓imatung nab.
Ti Jesus Nag̓iprisintar Da Yang Ginikanan Na Tung Dios (2:22-38)
22-24 Taa numanyan kinaw̓ut da yang uras ang ipagtuman nirang magkasawa yang sasang urdinansang ibinutwan ni Moises sigun tung sasang baw̓ay ang baklung nangana.
Usuyun nira tia ug̓ud liw̓ianu rang magtuu tung Dios tung pagtuuan ang atiang pinakalusu duun tung Jerusalem.
Kung unu pay magkatamang ipadasag nira duun,
maning taa yang napabtang tung urdinansang atiang ipinakdul yang Dios tung nira:
“Kung bëlag̓an duruang bilug ang kalapati,
maskin duruang bilug ang ladëng mga butu pac.”
Kapurisu numanyan tanirang magkasawa namansiangay ra ka man duun tung Jerusalem ang para mamagtuman da yang katuw̓ulan ang atia.
Pati yang ana nira,
ingkëlan da ka nira duun ug̓ud iintriga ra ka nira dayun tung Dios.
Ay may sasa kang katuw̓ulan yang Dios ang ubligadung tumanën da ka nira ang maning taa yang palaksu na:
“Kung tinu pay mamlak tung tinanguni ni nanay na,
kung lalii,
yay dapat ang ipatug̓ay yang mga ginikanan na tung Dios ang para magamit na sigun tung planu na tung anyad.”
25 Taa numanyan,
duun tung Jerusalem,
may sasang maëpët ang nag̓aranan tung ni Simeon.
Bilug yang isip na tung Dios ig durug katinumanën tung mga katuw̓ulan yang Dios.
Dispuis,
durung pagpakbat na tung pinangakuan yang Dios ang tung uri ta kaldaw,
yang nasyun nirang Israel,
bawiën na rang ipaltaw.
Dispuis pa yang taung naa,
nag̓apasanag̓an yang Espiritu Santo yang painu-inu na.
Lucas 2:25-52
26 Purisu may sasang ipinasanag na tung anya ang baklu ra unu mapatay tanya,
kung nabilug̓an na ra yang pag̓aningën ang Cristong pinilik yang Dios ang magbawi.
27 Naa pala tung uras dang atii,
ti Simeon ang naa pinaisip da yang Espiritu Santo ang magpaklëd tung pagtuuan ang atiang pinakalusu.
Atiing nabuay-w̓uay ra tung kaklëran,
asan da ka magpapaklëd yang ginikanan ni Jesus ang para mamagprisintar da yang ana nirang pangulu tung Dios ang katulad ka tung kinaug̓alian nirang mga Judio ang napabtang tung katuw̓ulan.
28 Numanyan pagkaita ni Simeon yang mula,
diritsyu rang dinawat nang sinapupu,
ang pagkatapus nag̓intra ra dayaw tung Dios ang mag̓aning,
29 “Numanyan Yawi,
ta yëën ang sasang turuw̓ulun mu,
maskin tugtanaw ra nuyung pablag da ay malimëng da yang isipu.
Tutal kindëngan mu ra yang pangaku mu tung yëën.
30-31 Kipurki sinakëp da ta mataw yang Mananapnay.
Pinagsimpan mu ang para tung ikaayën yang tanan ang mga nasyun yang kalibrian ang tukurun na.
32 Tanya maning pa tung sasang kaas ang yay magparasanag̓ën tung mga kinaisipan yang mga tag̓a duma-rumang nasyun ug̓ud matultulana ra ka nira ig ya ra kay magpakdul ta kadëngëg̓an tung nasyun yamën ang naang Israel ang ya ray mga tauan mung sadili,”
ag̓aaning ti Simeon ang nagdarayawën tung Dios.
33 Numanyan,
yang ginikanan yang mula,
nangabërëng da ta mupia tung inaning ang atia ni Simeon natëtëngëd tung ana nira.
34 Numanyan nag̓ampu ra yang maëpët ang tanirang sam pamilya pakaayënën yang Dios ta mupia.
Pagkatapus,
dayun da kang nagbugnu tung ni Maria ang mag̓aning,
“Tëëd mu,
yang ana mung atia,
pinilik yang Dios ang yay pagbëlag̓anan ta kinasipan may kinaisipan yang tanan ang mga masigkanasyun tang mga Israel.
Ay natëtëngëd tung pagpabëtang nira tung anya,
dakëlë ra yang magkaralambëg tung kadiaduan ig dakëlë ra ka yang magkaratapnay.
Tanya maning pa tung sasang pruiba ang ipaita yang Dios ang pagkatapus ya pa kay kuntraën ta kadaklan.
35 Purisu ta yawa,
maning pa tung asan da nga saksakay ta matarëm yang pupusukun mu.
Pinilik man nganing yang Dios yang ana mung magkamaningan da ta maning tia ay ug̓ud yang laksu yang pag̓irisipën yang tanan ang mga taung taluk pa rin,
duun da ngalw̓away,”
ag̓aaning duun yang maëpët.
36-37 Taa simanyan,
may sasang baw̓ay ang nag̓aranan tung ni Anna ang duun da ka nga sakpay tung uras ang atii.
Tanya sasang manigpalatay yang bitala yang Dios ang yay nag̓ipasanag na tung painu-inu na.
Yang tatay na ti Fanuel ang sasang kanubli ni Aser.
Yang baw̓ay ang naa,
masyadu ra yang pagkamaëpët na.
Ay pag̓idaran da ta walung puluk may ëpat ang takun.
Dispuis,
tung tantung kabuay ra yang ibaraluën na,
ay pitung takun ilëm yang pagkasawa nirang magkasawa pagkatapus nabalu ra.
Taa numanyan yang ug̓ali yang baw̓ay ang naa,
muya-muyang pagpaklëd tung pagtuuan ang atia ang para magtuu tung Dios maskin kaldaw maskin law̓ii.
Tung pagturuuën na tung Dios duun,
pirming pag̓ampu ang kung kaisan,
pëlëk yang pagparanganën na natëtëngëd tung kadërërëpën nang pag̓ampu.
38 Taa numanyan tung uras ang atiing pagkaprisintar nira tung ni Jesus,
lumimput da yang maëpët ang naang baw̓ay ang nagpalëngët tung nira.
Pagkaita na yang mula,
ya ray pinasalamatan nang dinayaw tung Dios natëtëngëd yang nag̓aëlatan na kuminaw̓ut da.
Mag̓impisa tung kaldaw ang atii nag̓intra ra baw̓alitaën natëtëngëd tung mulang atiing naita na tung kumpurming pagpakbat tung pag̓aningën ang Cristong magpalibri tung nasyun nirang Israel.
Yang Pag̓ulik Nirang Sam Pamilya Tung Nazaret (2:39-40)
39 Taa numanyan pagtuman yang ginikanan yang mula yang tanan ang atiang napabtang tung katuw̓ulan yang Dios,
namansiulik da tanirang sam pamilya duun tung Nazaret ang lug̓ud tung sinakëpan yang Galilea.
40 Yang mula tanya sigi-sigi yang pagdakul na.
Pati yang pag̓irisipën na,
pagdakul da kang pagdakul ang asta nagwayang ang pisan yang pag̓irintindiën na.
Ay tanya nag̓apadag̓ën-dag̓ënan ta mupia yang Dios.
Yang Pagpabutwan Ni Jesus Duun Tung Pagtuuan Ang Pinakalusu (2:41-52)
41 Taa numanyan yang ug̓ali yang mga ginikanan ni Jesus,
takun-takun pansiangay duun tung Jerusalem ang para mamagpasakëp tung pistang pag̓aningën ang Taklib.
42 Kapurisu atiing ti Jesus pag̓idaran da ta sam puluk may duruang takun,
sigun tung ug̓ali nirang atia,
namanungul-tungul da tanira duun tung Jerusalem ang para mamagpasakëp tung pistang atia.
43 Atiing tapus da yang pista,
namag̓urulikan da yang mga tau.
Piru yang mula tanya,
nagpabutwan da ilëm duun tung Jerusalem ang indi ilëm nangaskë yang ginikanan na.
44 Kanisip nira takaa ka ilëm tung mga kaarumanan nirang pamagpaluyug.
Purisu sigi ra ilëm yang pagparanawën nira ang asta naapunan da ilëm.
Atiing apun dang pisan ang namagtadëng da tanirang sam paluyug̓an,
baklu pa ngainsapuay nira yang mula kung asan tung may mga kaampiran tung nira ubin tung mga kailala nira.
45 Tay kumus indi nira naita,
pangayag yang kaliw̓utan,
diritsyu sing nansibalik duun tung Jerusalem ang para mamagdilëm tung anya.
46 Tung yaklung kaldaw,
baklu pa nga sagyapay nira yang mula duun tung pagtuuan ang atiang pinakalusu.
Yag kakarung asan tung kakngaan yang mga manigtulduk ang pamati tung nirang pamagkërësën natëtëngëd tung pag̓irintindiën nira tung Dios.
Ang kaisan may nag̓atalimaan na ka tung nira.
47 Yang kumpurming nagngël tung anya,
nabërëng da ta duru natëtëngëd tung isip nang durug tarëm ig tung nag̓ipanuw̓al nang asintadu tung nag̓ipanalimaan nira tung anya.
48 Numanyan,
atiing pagkaita yang mga ginikanan na tung anya,
nangabërëng dang pisan tung anya.
Purisu ti nanay na dayun dang nagbasul tung anya ang mag̓aning,
“Duduy,
ayw̓a binuatanami ra nuyu ta maning tia?
Duru rag kaaburidu yang mga kulu yamën ni ama mung pinapagsagyapami nuyu ang aria ra ilëm agbëbtang!”
49 Mag̓aning ka ti Jesus ang tuminuw̓al,
“Ayw̓a nanay,
indi mi naskëan ang ariaw pa sagyapay mi?
Indi mi pala siguru naintindian ang kung ay pay pagkërësënan yang nag̓adapat tung ni Ama,
kaministiran ang duunaw ka,”
ag̓aaning.
50 Piru indi ra namarësmësan nira ta mupia kung unu pay linagpakan yang itinuw̓al nang atia.
51 Taa numanyan ti Jesus nagpakignunut da ilëm tung nirang namanuldak-tuldak duun tung Nazaret.
Ay maskin unu pang bag̓ayay mapinanangërën tung ginikanan na.
Piru naang ti nanay na,
yang tanan ang atiang nainabu,
luw̓us ang nag̓ipagkësën-kësën na tung isip na.
52 Numanyan,
mintras pagdakul da ti Jesus,
pagwayang da ka yang pag̓irintindiën na.
Ig mintras nag̓abuay rang nag̓abuay,
mas pang nag̓auyunan ang nag̓auyunan yang Dios pati yang mga masigkatau na.