Yang Pagtalig Yang Kapitan Ang Durug Dakul Yag Dayaway Ni Jesus (7:1-10)
7
Numanyan atiing tapus da yang tanan ang gustu ni Jesus ang ianing tung mga taung atiing pamamati tung anya,
anday duma,
dayun sing minangay tung Capernaum.
Lucas 7:1-10
2 Duun may sasang Kapitan tung sang grupung mga sundalung atiang tag̓a Roma.
Yang Kapitan ang naa,
may turuw̓ulun na ang yay nag̓amaal na ta mupia.
Piru dinalpëtan da ta laru nang matigbak ang pagkatapus tag̓umatayën da.
3 Numanyan yang Kapitan ang naa,
pagkagngël na yang balita natëtëngëd tung mga buat-buat ni Jesus ang durug tinlu,
anday dumang binuat na,
nagpangay ra tung mga pamagpakigmaëpët ang mga Judio ang para mamagpataw̓ang da tung ni Jesus ang kung maimu ilëm paawatan na ra kanay ang angayën yang turuw̓ulun nang pamaayënën.
4 Numanyan,
pagkaw̓ut nira tung ni Jesus,
dayun dang namagpakiildaw tung anyang mag̓aning,
“Naa ti Kapitan,
magkabag̓ay ang pisan ang taw̓angan mu.
5 Kipurki durug kaginëgmaën tung nasyun ta.
Nagpadag̓ën-dag̓ën nganing tung yamën ang nagpakagasta tung pagparakdëngën yang balay ang pagsaragpunan ta,”
ag̓aaning.
6 Kapurisu numanyan ti Jesus dayun da ka man ang nagnunut tung nira.
Numanyan atiing alëngët da rin ilëm tung balay na,
yang Kapitan ang naa,
ya si ay nagpangay tung mga ungkuy nang mamagpakigbag̓as da tung ni Jesus.
Numanyan yang pagbag̓as nira tung anya,
dayun da nirang binalitaan yang bitala ni Kapitan ang mag̓aning,
“Amëëy,
yang bitala ni Kapitan,
anday bali unu,
maskin india ra unu magpakabëdlay ang magpakigkaw̓ut tani tung balay na,
ay tanya unu bëlag̓an unu bag̓ay tung nuyu ang yawa pay magtakwal tung balay na.
7 Ya ra ka man nganing unu tia ang indi ra nagpakigbag̓as tung nuyu.
Kung indi,
maskin magkalalangana ra ilëm unu asan,
atia unu magmaayën da ka man yang turuw̓ulun na.
8 Kipurki maski nganing tanya unu,
anad da ka unung magpalalang tung mas abwat tung anya,
anad da ka unung magkalalangan tung mga sundalu nang mas aranëk tung anya.
Kung lalangan na unu yang sam bilug ang magpanaw,
atiang lag̓i magpanaw ra ka man.
Baskin yang sam bilug unu,
kung guuyan nang magpalëngët tung anya,
atiang lag̓i unu magpalëngët da ka man.
Ang basin pa yang turuw̓ulun na unu,
kung lalangan nang mag̓ubra ta sasang bag̓ay,
atiang lag̓i,
ubraën na ra ka man,”
ag̓aaning.
9 Numanyan pagkagngël ni Jesus yang mga bitalang atia ni Kapitan ang pinag̓ulit nira tung anya,
ya ray nabërëngan na ta mupia tung ni Kapitan.
Dayun dang nagbira ang nanalunga tung mga taung atiang buntun ang pamagpakignunut tung anyang mag̓aning,
“Iugtulu tung numyu,
basin nganing tung numyung mga masigkanasyunu taa tung banwa tang naang Israel,
anda pay nag̓abag̓asung maning takaag dakul yang pagtaralig̓ën na tung yëën,”
mag̓aning.
10 Numanyan yang mga taung atiang pinanuw̓ul ni Kapitan ang mamagpakigbag̓as tung ni Jesus,
dayun dang namansibalik tung balay ni Kapitan.
Pagkaw̓ut nira duun,
maita nira yang turuw̓ulun na,
maayën da ka man.
Yang Pagpabui Si Kang Uman Ni Jesus Tung Ana Yang Sasang Balung Baw̓ay (7:11-17)
11 Pagkatapus tia,
indi ilëm nabuay,
minangay ra ti Jesus duun tung lansangan ang Nain,
kasiraan da ka tanira yang mga taung atiang nag̓apangugyatan na asta yang mga taung buntun.
Lucas 7:11-23
12 Numanyan tamang tamang mag̓aalëngët da tung purtang paraklëran tung lansangan ang atia,
naa pala,
may sasang taung patay ra ang nag̓ipalua nirang para ipalg̓ud da tung lëyang.
Ya pa ka man ay bugtung ang anang lalii yang sasang baw̓ay ang nabalu.
Durug dakël yang mga tag̓a lansangan ang pamagkumpanya tung anya.
13 Numanyan pagkaita ni Ginuu ta tung may ana,
ya ra ngaildaw ang mag̓aning tung anya,
“Inëëy,
ustu ra tiang pagtarangitën mu,”
ag̓aaning.
14 Pagkatapus dayun na rang pinalëngtan yang kabaung ang inawiran ang asta namagtadëng da yang pamagtuang.
Pagtadëng nira,
dayun dang nagbugnu ti Jesus tung patay ang mag̓aning,
“Duduy,
magtuw̓uluna ra yëën ang magbungkarasa ra!”
15 Pagkatapus diritsyu ra ka man ang nagbungkaras yang taung atiang patay ra rin ang nag̓impisa ra kang nagbitala.
Numanyan dayun dang inintriga ni Jesus tung ni nanay na.
16 Purisu numanyan yang mga taung atiang nangaita,
luw̓us dang nangaimakluan da yang pagtërëlëngën nira tung ni Jesus.
Namag̓intra ra dayaw tung Dios ang namag̓araning-aningan dang mag̓aning,
“Kinaw̓utanita ra ta maktël ang manigpalatay yang bitala yang Dios.
Itang mga tauan na,
talagang nag̓apalëngtanita ra anyang para tukuranita ra anya ta kalibrian ta,”
ag̓aaning.
17 Kapurisu yang balita natëtëngëd tung binuat ni Jesus ang atia,
nagsarambung da tung intirung Judea ang asta duun da ka tung mga banwang nagtarambi tung Judea.
Yang Nag̓ituw̓al Ni Jesus Tung Pinanuw̓ul Ni Juan Ang Mamagpasiguru (7:18-23)
18-19 Numanyan ti Juan ang naang manigbënyag ang duun ka man tung kalabus,
binalitaan da ka yang dumang nag̓apangugyatan na natëtëngëd tung tanan ang atiang mga binuat-buat ni Jesus.
Purisu numanyan,
ginuuyan na yang durua tung nirang pinanuw̓ul ang mansiangay ra duun tung ni Ginuung Jesus ang para mamanalimaan tung anya kung tanya ya ra ka man yang pag̓aningën ang Mananapnay ang nag̓apakbat kang lag̓i nira u kung may duma pang dapat ang ëlatan nira.
20 Taa numanyan,
pagkaw̓ut yang durua nga tauan ang atii tung ni Jesus,
mag̓aning tanira tung anya,
“Minangayami ilëm taa,
ay tinuw̓ulami ra ni Juan ang manigbënyag ang para mapasiguruana ra yamën kung yawa ra ka man yang pag̓aningën ang Mananapnay ang nag̓apakbat kang lag̓i yamën u kung may duma pang dapat ang ëlatan yamën,”
ag̓aaning.
21 Taa numanyan,
yang uras dang atiing pag̓angay nira duun,
nagkatuun ang duru-durung mga taung pamaglaru ang nag̓apampamaayën ni Jesus.
Yang duma may mga laru nirang matitigbak,
yang duma agdimunyuwën,
ig duru kang mga buray ang nag̓apampabuskad na yang mga mata nira.
22 Purisu numanyan,
pagkagngël ni Jesus yang bitala yang durua nga tauan ang atiang tinuw̓ul ni Juan,
dayun dang nagtuw̓al ang mag̓aning tung nira,
“Ala,
magbalikamu ra duun tung ni Juan.
Balitaan mi yang kumpurming nagkaraita mi kag nagkaragngël mi taa.
Aningën mi ang yang mga buray pagkaraita ra,
pati mga barik pagkarapanaw ra ka,
pati mga taung may dispirinsia tung mga ulit nirang makamamansa,
nag̓akuatan da ka,
pati mga bëngël pagmaraanting da ka,
pati mga patay pagkarabui ra ka.
Asta yang mga taung aranëk ta pagkabëtang ang kumpurming nakapasan dang pisan ta magtalig̓an nira tung mga sadili nira,
ya ra kay nag̓apampakaw̓utan yang Matinlung Balita ang yang Dios simpan dang magtaw̓ang tung niraa.
23 Kidispuis pa aningën mi ka dayun ang durug tinlu yang nag̓abtangan yang sasang taung indi ëngëd nag̓aplëkan ta ipagtalig na tung yëën,”
mag̓aning ti Jesus duun tung nira.
Yang Pagdayaw Ni Jesus Tung Ni Juan (7:24-28)
24 Taa numanyan,
atiing namagliit da yang duruang atiing pinanuw̓ul ni Juan,
ya ray pagpasanag ni Jesus tung mga taung atiang buntun natëtëngëd tung ni Juan.
Mag̓aning tung nira,
“Ta,
atiing pag̓angay mi tung ni Juan duun tung banwang atiing palag-palag yang tau na,
unu pang klasiay ta tau ang nag̓alaum ming maita mi duun?
Yang kalaum mi w̓asu tanya sasang taung guruyud-guyuran ta tau ang katulad ka tung tigbaw ang kung ëyëpën da nganing ta palët,
pagpanunut-nunut da ilëm?
Lucas 7:24-35
25 Kung bëlag̓an kang ya tii yang katuyuan mi,
unu pa w̓asu ay inangay mi duun?
Gustu mi ilëm basung magtëlëng tung sasang taung pagsuut ta durug tinlung aw̓ël?
Bëlag ka siguru ay kipurki yang mga taung pamagbisti ta matitinlu ig pamagpapsaw tung kumpurming unu pay nag̓alëlyag̓an nira,
duun da ilëm ngaitaay mi tung mga palasiu yang mga adi.
26 Kung bëlag̓an kang ya tii ay inangay mi,
tay unu pa w̓asu yang katuyuan mi duun?
Gustu mi w̓asung magtëlëng tung sasang taung tinuw̓ul yang Dios ang magpalatay yang bitala na tung numyu?
Anday duma,
talagang yaa,
ya ra ka man tii ay naita mi duun.
Piru iugtulu tung numyu,
yang taung atiing naita mi duun,
landaw pa nganing tung mga manigpalatay yang bitala yang Dios ta namagtukaw ang mga panimpu.
27 Kipurki ti Juan ang naa ya ka man ay nag̓adapatan yang sasang inaning yang Dios tung aruman na ang napabtang tung kasulatan ang mag̓aning,
‘May sasang taung tuw̓ulunung magpalatay yang bitalaw tung mga tau ang yay ipatkawu tung nuyu ug̓ud katulad ka tung sasang pagliway ta dalan,
yay maning pa tung magliway tung mga isip nira ug̓ud simpan da tanirang mamampauyun da tung nuyu,’
mag̓aningb.
28 Iugtulu tung numyu,
tung tanan ang mga manigpalatay ta namagtukaw ang mga panimpu,
anda ray lumandaw tung ni Juan ang naa.
Piru maskin pang maning tia,
yang sasang tauanung napalg̓ud da tung palaksu yang paggaraëmën yang Dios,
maskin pag̓atëlëngan ang aranëk ta pagkabëtang,
piru may nalandawan na pa ka ëngëd tung ni Juanc.
May Dumang Namanambing Tung Pinalanu Yang Dios Ang Ikaayën Da Rin Nira (7:29-35)
29 “Dispuis pa,
papagsunairën ta ra kanay yang pagparamatiën yang mga tau tung bitalang ipinagpakaw̓ut ni Juan tung nira.
Yang kadaklan namampauyun da tung iningaluk yang Dios tung nira,
kapin da ëngëd yang mga manigpanukut ta mga balayaran tung gubirnu.
Purisu namanligna rang lag̓i tung mga kasalanan nira ang pagkatapus ya ra kay pinapruibaan nirang namampabënyag tung ni Juan.
30 Piru naang mga Pariseo may naang mga sag̓ad tung pinanubli,
pagkapamati nira tung bitalang ipinagpakaw̓ut ni Juan,
bëlag da ya mamagpauyun,
ya ra mamagpasuag tung kalëlyag̓an yang Dios para tung nira ang ya ra ka rin ay ikaayën nira.
Ay indi ra namanligna tung mga ubra-ubra nirang makalalaway ta isip na,
indi ra ka namampabënyag tung ni Juan.
31 Purisu yang mga tau numanyan,
unu pa pay mapananglitanu tung nira?
Unu pa ëngëd ay mapapariuu tung nira?
32 Anday duma,
tanira maning pa tung mga mamulang pamagkarayam tung plasa ang yang duma maskin unyën pa ta paiwan-iwan yang mga kakayam nira,
indi ka ëngëd mapatunu-tunuan yang kalëlyag̓an nira.
Ya ra ag̓aningay yang mga kaarumanan nirang,
‘Uay,
duruamug kaduruma!
Ang magtarangit-tangitënaming mag̓urulimëngmëng-ulimëngmëngën,
indiamu malëlyag ang magpakiintra.
Utru si,
ang patikanamu yamën,
indiamu si ka ëngëd malëlyag ang magtaralëkan.’
33 Talagang yay magkatamang mapananglitanu tung mga taung atiang indi ra pamagpauyun ay kipurki atiing paglua ra ni Juan ang manigbënyag,
maita nira yang ug̓ali nang pamlëk ang kaisan tung pagparanganën na ig indi ka panginëm ta binu,
indi ra nauyunan nira,
kung indi,
ya ra ag̓aningay nirang pag̓aëkël-ëkëlan ta dimunyu.
34 Utru si ang tung yëën dang pag̓aningën ang Maninga Tau,
tung pagluaw tung mga tau,
maita ra nganing nira yang ug̓aliu ang indiaw pamlëk tung pagparanganënu kag panginëmaw kang kaisan ta binu,
indiaw ra ka nauyunan nira,
kung indi,
yuu ka ag̓aningay nirang takaw̓aw ig bulatsiruaw pa kumus pagpakibarkadaw tung mga manigpanukut may tung duma ay ya ra kang lag̓i ay nag̓alamku nirang mga tëlëb ta kasalanan.
35 Piru yang planu yang Dios ang atiang nag̓apasuag̓an nira,
duun da nga pruibaay tung kumpurming pagpauyun tung yamën ni Juan ang talagang durug tinlung planu sigun tung pinakaw̓ut na tung nira,”
ag̓aaning ti Jesus duun tung nira.
Yang Pinatawad Ta Dakulung Kantidad Yay Mas Ang Magëgma Tung Nagpatawad Tung Anya Kay Tung Pinatawad Ta Gësyë (7:36-50)
36 Numanyan may sasang kinasakpan yang mga Pariseo ang napag̓imbitar da tung ni Jesus ang magpakigsaru tung balay na.
Purisu ti Jesus nagnunut da tung anyang nagpakigsaru.
Lucas 7:36-50
37 Duun tung lansangan ang atii,
may sasang baw̓ay ang ilaladung makinasalananën.
Numanyan pagkagngël na yang balita ang ti Jesus unu duun da tung balay yang Pariseo agpagpakigsaru,
anday dumang binuat na,
dayun dang minangay ang may ëkël nang midyu tung praskungd punuk ta paamut ang durug maal.
38 Numanyan pagpaklëd na tung balay,
dayun dang nagpasagpi tung kakaye ni Jesus ang yang mga luuk na duun da ka ilëm nagkarapatak.
Pagkatapus nag̓atarapuan na yang bua na ang nunut da ka ta pag̓ara-ara na tung kakay na ta muya-muyaf.
Ang pakatapus binukbukan na yang paamut ang atiang durug maal.
39 Numanyan naang Pariseong naang nag̓imbitar tung ni Jesus,
pagkaita na tia,
ya ray ipinagkësën-kësën na tung isip nang mag̓aning,
“Yang taung naa,
kung talagang matuud ang prupita,
maskëan na ra ka rin kung unu pang klasiay ta baw̓ay ang pagdëën tung anya ang tëlëb ta kasalanan.”
40 Atii,
nagbugnu ra ti Jesus tung anyang mag̓aning,
“Simon,
kung maimu ilëm,
may sasang iksënu rin tung nuyu.”
Ag̓aaning ka ti Simon ang nagtimalës,
“Ala,
Amëëy,
magbitalaa ra ilëm asan ug̓ud!”
41 Numanyan,
dayun dang nagpakdul ti Jesus ta sasang pananglit ang mag̓aning,
“May durua nga tauan ang nagkarautangan tung sasang taung manigpautang.
Yang sam bilug may utang nang kinintus,
yang sam bilug singkuinta.
42 Numanyan,
yang duruang naa,
kumus indi ra mangabayad yang mga utang nira,
pariu ra ilëm tanirang pinatawad yang pinangutangan nirang inimpas.
Ta,
tung nuyung pag̓intindi,
tinu pa w̓asu tung nirang durua ay mas ang magëgma tung nagpatawad tung nira?”
43 Ag̓aaning ka ti Simon ang minlës,
“Tung yëën ilëm ang pag̓intindi,
siguru yang pinatawad na ta dakulung kantidad.”
Ag̓aaning ka ti Jesus ang minlës,
“Tama,
ya ka man tia.”
44 Numanyan diritsyu rang minalyëd ti Jesus tung baw̓ay ang sigi kang pakigkësën na tung ni Simon ang mag̓aning,
“Ta,
Simon,
tëlëngan mu yang baw̓ay ang naa w̓a.
Ta nungaynang pagpaklëru taa tung balay mu,
indiaw ra ka pinatuw̓ulan mu tung turuw̓ulun mung mangug̓as yang kakayu,
ag̓ad yuu sasang imbitasiun mu.
Piru yang baw̓ay ang naa,
lumismu yang luuk na ya pay ipinangug̓as na tung kakayu,
pati yang bua na,
ya pay ipinagtrapu na.
45 Pagpaklëru taa,
indiaw ra ka inistimar mung inara-araan ag̓ad imbitasiunaw nuyu.
Piru tanya,
yuu ilëm ngaklëd,
anday katadëng-tadëngan yang pag̓iristimarën na tung yëën ang basin kakayu ra ilëm,
ya ray pirming nag̓ara-araan na.
46 Pagpaklëru taa,
indiaw ra ka ginalang mung linangisan tung kuluu,
ag̓ad bisitaw nuyu.
Piru yang panggalang na tung yëën,
mismung paamut ang durug maal,
ya pay ilinangis na ang baskin tung kakayu ra ilëm.
47 Kapurisu Simon,
iugtulu tung nuyu,
yang baw̓ay ang naa,
yang paggëgma nang naang durug kalutuk ang nag̓ipaita na,
ya ray pagpailala tung pagkamatuud ang tanya napatawad da tung mga kasalanan nang duru.
Piru yang tau man ang pinatawad ka ilëm ta gësyë,
gësyë ka ilëm yang gëgmang mapaita na,”
ag̓aaning.
48 Pagkatapus,
dayun dang nagbugnu ti Jesus tung baw̓ay ang mag̓aning,
“Ipag,
pinatawad da ka man ang matuud yang mga kasalanan mu,”
ag̓aaning.
49 Numanyan pagkagngël yang dumang pamagsararu asan,
ya ray ipinagkësën-kësën nira tung mga isip nirang mag̓aning,
“Abaa,
tinu pa taang palangaasënay ang buat na pa pagpatawad ta mga kasalanan?”
50 Piru ti Jesus,
bëlag ya mag̓intindi tung nira,
ya magsugpat tung baw̓ay ang mag̓aning,
“Ipag,
tan taa pang pagtalig mu tung yëën yang mga kasalanan mu,
tinapnaya rang lag̓i yang Dios.
Purisu numanyan,
ala mulika ra,
may pagbakëran da yang isip mu,”
mag̓aning.