Yang Nag̓itulduk Ni Jesus Natëtëngëd Tung Pagtaraw̓angën Tung Sasang Taung Nag̓aliwag̓an (6:2-4)
6
“Amlig̓an mi ang yang pagburuatën mi yang matinlu ang tung paita-ita ilëm tung mga tau.
Kipurki kung maning tia ay buatën mi,
anda ra ka ilëm ay ëlatan ming iblës yang Ama mi duun tung langit.
2 “Pariu ra asan tung pagparakdulun mi tung mga maliliwag̓ën.
Kung magpakdulamu ra nganing,
indi mi ra ilëm ipasapët tung duma ang katulad ka tung nag̓abuat yang duma ang pamagpakaayën-ayën ilëm.
Baklu magpakdul kung duun da tung mga pagsaragpunan ubin duun tung mga karsada ang para maita ta durung tau.
Ay yang pag̓asikad nira asan ang para dayawën ilëm tanira ta mga tau.
Manangëramu tung yëën,
yang mga taung mga maning tia,
anda ray dumang ëlatan nirang iblës pa yang Dios tung nira,
kung indi,
asan da ka ilëm nëgka tung pagdarayawën yang mga taung atia tung nira.
3-4 Piru ta yamu,
kung magpakdulamu ra nganing,
buatën mi ang anda ray masiman tung pag̓abuat mi,
maskin pa yang sasang ungkuy ming sëbëk tung numyua.
Ang pagkatapus yang Ama ming atiang nag̓aita yang kumpurming nag̓abuat mi tung taluk,
ya ra kay magbalës tung numyu.
Natëtëngëd Tung Pag̓arampuën (6:5-15)
5 “Dispuis kung mag̓ampuamu ra nganing,
indiamu ra mag̓usuy tung mga taung atiang pamagpakaayën-ayën ilëm.
Kipurki tanira kung mag̓ampu ra nganing,
durung kalëlyag nirang duun da magkërëng tung parada tung pagsaragpunan ubin duun tung mga kantung palanawan ta durung tau ang para maita ilëm tanira ta kadaklan ang pag̓ampu.
Manangëramu tung yëën,
anda ray dumang ëlatan nirang iblës pa yang Dios tung nira,
kung indi,
asan da ka ilëm nëgka tung pagtërëlëngën yang mga taung atia tung nira.
6 Maayën pa ta yamu,
kung mag̓ampuamu ra nganing,
magpalingëw̓amu ra kanay ang mag̓ampu tung ama mi ang indi mi nag̓aita.
Ang pagkatapus yang Ama ming atiang nag̓aita yang kumpurming unu pay nag̓abuat mi tung taluk,
ya ra kay magbalës tung numyu.
7 “Dispuis,
kung mag̓ampuamu ra nganing,
indiamu ra ilëm magbëw̓ëngat ta mga bitalang sari-sari ra ilëm ang indi ka ilëm naluak tung mga pupusukun mi ang katulad ka tung duma ang indi pag̓intindi tung matuud ang Dios.
Ay kalaum nira asan da tanira nga sapëtay yang mga ginuu-ginuu nira tung pag̓arampuën nirang mag̓umpuk da ilëm yang mga bitala nira.
8 Indiamu ra mag̓usuy tung nira.
Tutal nag̓akdëkan dang lag̓i yang Ama mi kung unu pay mga kaministiran mi baklu mi ingalukay tung anya.
9 Purisu mas matinlu maning taa yang pag̓arampuën mi tung Dios:
‘Ama yamën asan tung langit,
taw̓angayami ka ang para yang panggalang yamën tung nuyu mag̓atu tung pagkadios mung durung pisan agkasagradu.
10 Gustu yamën ang tung makali ipabistu mu ra ëngëd ang pisan yang paggaraëmën mu tung tanan.
Taw̓angayami kang magtuman yang mga kalëlyag̓an mu tani tung kaliw̓utan ang nani ang katulad ka tung pagturumanën yang mga angil mu asan tung langit.
11 Pakdulayami ka yang pamangan ang kaministiran yamën numaan ang kaldaw.
12 Dispuis Ama,
patawarayami ka tung mga kasalanan ang nagkarabuat yamën tung nuyu ang katulad ka tung yamën ang nagpatawarami ra ka tung mga kaarumanan yamën ang nagbuat ta kasalanan tung yamën.
13 Ig indiami ka ilug̓ut mu tung mga maliliwag ang sukda ang muya indi masarangan yamën,
kung indi,
ipalibriayami kang pirmi tung taktika ni Satanas ang yay pinangapunglan ta tanan ang malalain ang pag̓urubraënb.
Tung maning tiang palaksu ipausuyay mi yang pag̓arampuën mi tung Dios.
14 “Talagang impurtanti tiang pagparatawarën mi tung mga aruman mi ay kipurki kung patawarën mi tung mga kasalanan ang binuat nira tung numyu,
atia patawarënamu ra ka yang Ama mi duun tung langit.
15 Piru kung indiamu magpatawad tung mga aruman mi,
tay indiamu ka mapatawad yang Ama mi duun tung langit tung mga pagburuatën ming malalain tung pagtërëlëngën na.
Natëtëngëd Tung Pamlëk Tung Pagparanganën (6:16-18)
16 “Kidispuis pa,
tung uras ang ipamlëk mi tung pagparanganën mi ang para bilug yang mga isip mi tung pag̓irintindiën mi tung Dios,
indiamu ra mag̓usuy tung ug̓ali yang mga taung atiang pamagpakaayën-ayën ilëm.
Kipurki yang mga ityura nira ya ray papungawën nirang nunut da ka ta lëg̓ëd ta kaw̓u ug̓ud makali rang masapët ta mga tau ang tanira pamlëk da tung pagparanganën nira.
Manangëramu tung yëën,
anda ray dumang ëlatan nirang iblës pa yang Dios tung nira,
kung indi,
asan da ilëm nëgka tung pagsarapëtën yang mga taung atia tung nira.
17-18 Maayën pa ta yamu,
kung mamlëkamu ra nganing tung pagparanganën mi,
damusan mi yang mga ityura mi ig salyangën mi ka yang mga bua mi ug̓ud indi masiman ta mga tau ang yamu pamlëk da tung pagparanganën mi,
kung indi,
yang sulaminting maskë tia ultimu ilëm yang Ama ming indi mi nag̓aita.
Ang pagkatapus yang Ama ming atiang nag̓aita yang kumpurming unu pay nag̓abuat mi tung taluk,
ya ra kay magbalës tung numyu.”
Natëtëngëd Tung Pagturuw̓urun Ta Manggad (6:19-21)
19 Mag̓aning ti Jesus ang nagpadayun yang pagwaraswasën na,
“Indiamu ra magtaluk ta manggad taa tung katanëkan.
Kipurki kung taa yang manggad mi,
puiding tëktëkën ubin baktaën ta andap ubin takawën ta mga taung ansianung magpamangbang tung mga balay.
20 Maayën pa ang yang padërëpan mi ang yamu mag̓usuy tung nag̓auyunan yang Dios ang yang kaalimbawaan na maning pa tung ya ray manggad ang nag̓italuk mi duun tung langit.
Ay kung duun italukay mi,
indi ra tëktëkën,
indi ra ka panganën ta andap,
indi ra ka takawën.
21 Duunamu magtaluk ta manggad mi ay kipurki kung ariamu pa magmanggad,
ay duun da ka nga gamën yang mga isip mi.
Nag̓apaaman Da Tanira Ni Jesus Ang Pirming Bilug Yang Mga Isip Nira Tung Dios Ang Indi Magtënakan (6:22-24)
22 “Kung ya ipananglitayu yang nag̓aaningung atia,
ay maning taa.
Yang maning pa tung kaas ang pagpakdul ta masadlaw tung tinanguni mi ya ra yang mga mata mi.
Kung masadlaw,
pati intirung tinanguni mi damay ra ka tung masadlaw.
23 Piru kung makiklëp,
tay pati intirung tinanguni mi umid da ka tung makiklëp.
Ig disir pati yang isip ming yay maning pa ka tung kaas tung mga sadili mi,
maskin kalaum ming bilug tung kalëlyag̓an yang Dios,
piru kung tung pagkamatuud pagtënakan da,
tëëd mi tiag kakiklëp yang nag̓abtangan mi!
24 “Nani pa yang sam bilug ang pananglit.
Yang sasang tau indi ëngëd maimung magbilug yang isip na kung duruay pangag̓alënan na.
Ay kung durua,
anday dumang mainabu,
yang sam bilug ya ray maalën nang panirbian ta ustu,
piru yang sam bilug,
ya ray silag̓an nang duminarën.
Purisu asan da ngaintindiay mi ang kung manggad yang nag̓apagamënan mi,
indi ëngëd maimu ang yang Dios ya pay mapanirbian mi.
Natëtëngëd Tung Pagpakabëgbëg Ta Kulu (6:25-34)
25 “Purisu ya ra ka man taang nag̓ipag̓aningu tung numyu.
Indiamu ra magpakabëgbëg ta mga kulu mi natëtëngëd tung pagpangabui mi kung ariamu pa mangkël ta mapangan mi u kung ariamu pa mangkël ta aw̓ël ang masuut mi tung mga tinanguni mi.
Pinakdulanamu ra nganing yang Dios yang mga linawa mi.
Ya pang pamangan mi ilëm,
indiamu ka sarangan nang pakdulan?
Pati mga tinanguni mi,
pinakdulanamu ra ka nganing anya.
Ya pang aw̓ël mi ilëm,
indiamu ka sarangan nang pakdulan?
26 Tëlëngan mi ra ilëm yang mga lamlam ang pamaglayug-layug tung pamilat-pilatan.
Tanira indi pamagtugda,
indi ka pamangayëg,
indi ka pamagpatakwal yang mga paray nira tung tambuw̓u nira,
piru ag̓asikasuën ka yang Ama mi duun tung langit.
Pagkatapus yamung mas maal tung anya kay tung nira,
indiamu ka w̓asu asikasuën na?
27 Abir,
tinu pa w̓asu asan tung numyu ay sarang ang mapagpalagway tung kabui nac ta maskin sang uras da ilëm ëkël tung pagpakabëgbëg na tung kulu na?
28 “Dispuis ayw̓a nag̓apabëgbëg̓an mi ta mga kulu mi yang mga aw̓ël ang kaministiran mi?
Tëlëngan mi ra ilëm yang mga talay ang atia tung paliw̓ut ta.
Indi ka tanira pamagpakabëdlay ang pamagpangabui,
indi ka pamagbuat ta mga aw̓ël nira tung tiral.
29 Piru iugtulu tung numyu,
maskin nganing ti Adi Solomon ang bantug ang pinakamanggaranën atiing tukaw pa,
piru yang katitinlu yang mga bisti na indi pa ka ëngëd tëmëpëng tung katitinlu yang mga talay ang atia.
30 Dispuis kung yang ilamunun ka ilëm nganing ya pay nag̓apasadyaan yang Dios ta mga talay ang mga maning tiag katitinlu,
ang simanyan ya pag dawalay ta,
ang pagkatapus andamal ilëm,
palalaw̓an da ilëm ta apuy,
ya pa w̓asu yamu,
indiamu pa kayanan nang paiwan-iwanan ang pakdulan ta aw̓ël?
Kung isip-isipënu,
midyu tung maluw̓ay pa ka ëngëd yang pagtaralig̓ën mi tung anya.
31 Purisu indiamu ra magpakaliw̓ëg ta mga kulu mi kung ariamu pa w̓asu mangkël ta mapangan mi u kung ariamu pa w̓asu maita ta matinlung mainëm mi u kung ariamu pa w̓asu mangkël ta ablën mi.
32 Ay muya ya ray mausuy mi yang ug̓ali yang mga taung indi pa ag̓aëyangan ta ipagtalig nirang ustu tung Dios ang kaldaw-kaldaw alus pa ilëm ya ra ilëm yang mga maning tia ay nag̓apabilug̓an ta mga isip nira.
Yang indi mi ipagpakaliw̓ëg ta mga kulu mi asan,
ay yang Ama mi duun tung langit,
ya kang lag̓i ay nag̓askë ang yay kaministiran mi yang tanan ang atia.
33 Kung indi,
yang ipalusu ming sikarën,
ang yamu pirming magparanëk ang magpagaëm tung Dios ang yang magkatama tung pagtërëlëngën na,
ya ray ipalandaw ming tumanën.
Atia kung yay sikarën mi,
tay puis tanya ray balang mag̓arasikasuën tung tanan ang mga kaministiran mi ang ya ra rin ay nag̓aliw̓ëg̓an ta mga kulu mid.
34 Purisu indi mi ra ëngëd pabëgbëg̓an ta mga kulu mi kung unu pang mga kaliwag̓anay ang mapasaran mi andamal.
Ay bala ra tung ni Andamal ang magpakabëgbëg ay natëtëngëd yang Dios tanya,
simpan dang lag̓ing magpakdul.
Tutal bastanti ra yang mga kaliwag̓an ang magsasampët tung numyung kaldaw-kaldaw.
Ministir pang dulangan mi pa ta indi pa nag̓ainabu?”