6 Ket, nibwat saraynay apostoles nin nako sara sa bubaryo nin nipata-patandaꞌ rayay Mabistan Patandaꞌ tan namaa-paandaꞌ saran main nin masakit sa adtiman a kinaꞌ ra.

7 Sin sain, natandaan na ni Herodes Antipas^b a sarban mampangyadiꞌ. Nagulo a kaisipan na ta main sara a namaritaꞌ a si Juan ket pinasubliꞌ ya nin mabyay. 8 Wanran raruma ket pinaipaꞌkit ya si Elias a sayay prupita nan Dios sin saytaw, tan wanra anamaet nin raruma ket saya ya si Jesus konran prupita nan Dios sin nuꞌnan panaon a sinmubliꞌ nin mabyay. 9 Baleꞌ wana ni Herodes, “Nipaputol koyaynay ulo na ni Juan a Mammawtismo. Siꞌno ya in si man-gumwaꞌ nin saytin abaw a bubagay a mangkarngeꞌ ko!” Kanyaꞌ nin mapilit yan maꞌkit naya si Jesus.

10 Sinmubliꞌ saraynay apostoles, ket nibaritaꞌ ra kona ni Jesus a sarban nagwaꞌ ra. Sin sain, sinagyat nasaray apostoles na nin mayi kona sa babalin Betsaida nin sara-sara tamoꞌ. 11 Sin natandaan ran saray abaw nin tutawo a nibwat sara si Jesus, tinmumbok sara. Inakoꞌ nasara ni Jesus nin masibulot a nakem na tan niyakay na konray maipaꞌkaꞌ sa pagꞌaadiꞌ nan Dios. Pinaandaꞌ nasara anamaet a main nin masakit.

12 Sin manyumabi ana, kinmadani saray Labinrwa kona tan wanra, “Maistro, sapa no ibakiꞌ mosaray tutawo nin mako sa kalibed-libed nin bubaryo tan babali ta pigaw nin mangkit saran pagtuluyan tan kanen ra banaꞌ ta iti atamo sa lugar a kasa gapo nin bali.”

13 Baleꞌ wana ni Jesus konra, “Siꞌkamoynay mamin maꞌkan ra.”

Ket wanran inumbat, “Lima ray tinapay tan rwa ray kunaꞌ tamoꞌ baleꞌ a main kontamo. Pwira no mako kami nin manaliw nin maꞌkan para konran sarba nin saraytin tutawo.”

14 Wanin a wanra ta saray lulalaki tana ket main nin limanribo sara.

Sin sain, wana ni Jesus nin inumbat, “Patekreen moyo saran nagrupu-grupo nin sililimampuloꞌ a barang saya.” 15 Ket wanin anaod a ginwaꞌ ra, a pinatekreꞌ rasara nin ngaꞌmin. 16 Sinmunor, inagwang na ni Jesus a liman tinapay tan saray rwan kunaꞌ miꞌsa ya tinmangar sa langit tan nikisalamat ya konan Dios. Baꞌyo tinau-tao nayti tan nibi na konran tumutumbok na nin itayak ra konran tutawo. 17 Sarba ra ket nakapangan tan nabsoy sara. Ket say nadinep ra nin natraꞌ, labinrway balyag.

18 Sayay awro, bukud-bukod nan mandumasal ni Jesus. Iti sara sa dani na a tumutumbok na. Kayadiꞌ, tinepetan nasara, “Ani a ibari-baritaꞌ ran tutawo maipaꞌkaꞌ kongko? Siꞌno ako kano a wanra?”

19 Ket niꞌbat ra, “Siꞌka kano si Juan a Mammawtismo, baleꞌ main anamaet nin namaritaꞌ a siꞌka si Elias. Saray raruma et wanra a saya ka kano konran saray prupita nan Dios sin nuꞌnan panaon a sinmubliꞌ nin mabyay.”

20 Ket wana et konra, “Ket siꞌkamo anamaet, siꞌno ako sa wamoyo?”

Niꞌbat na ni Pedro a wana, “Siꞌkay Cristo a nipangakoꞌ nan Dios.”

21 Ket binibilin nasaran maong ni Jesus a andiꞌ ra gapo nin ibaritaꞌ sa siꞌnuman no siꞌno ya 22 ta wana konra, “Siꞌkon si Pinaitawo ket matkap nin mangirangep ako nin abaw nin pammadyaꞌdyaꞌ. Oꞌ ta ipulisay rako nin saray Mangatuntawo tamo, saray Pupangulon Pupadiꞌ, tan saray Madudunong sa Gugan-gan ket patyen ako liꞌ. Baleꞌ sa ikatlon awro ket pasublien nako liꞌ nin mabyay nin Dios.”

23 Sawanin, wana ni Jesus konran sarba, “Si sayay marabay nin magꞌin nin tumutumbok ko, matkap a galten nayna sa kaisipan na a karabayan nan bukod. Oꞌ a, matkap nayan balatayen a kudos na nin ipulisay nay lalaman nan diri nin inawru-awro ket tumbuken nako. 24 Wanin ta si siꞌnuman a say byay nadti tana a mampagawan na, mati ya liꞌ et a lamang, baleꞌ si tawo nin gurutan nay byay nadti banaꞌ sa pammabli na kongko, mabyay ya nin iti konan Dios. 25 Ani wadiꞌ a magun-guna nan sayay tawo no maikon nay intiron kayamanan sa babon lutaꞌ, baleꞌ si byay na a nibayad na sa sain? Kasa gapo! 26 Si siꞌnuman nin mangidingꞌey a tumutumbok koya nin siꞌkon si Pinaitawo tan sa akay ko, idingꞌey koya liꞌ anamaet no sumubliꞌ akoyna sa kataꞌgayan ko a syay kataꞌgayan nan Ama ko tan saray uanghil nin naitalaga kona. 27 Ket tandaan moyoyti: Main komoyodti sawanin a sibibyay et liꞌ no si Dios ket ipaꞌkit nayna a pagꞌaadiꞌ na.”

28 Sawanin, napalabas a nanglinggo kayadiꞌ na nin nibaritaꞌ taw ni Jesus, nitagad nasara si Pedro, si Juan tan si Santiago nin mako dumasal itaw sa sayay talugtog. 29 Sin kapresan na a mandumasal ni Jesus, nanguman a bakas nin rupa na, tan say seket na ket nagꞌin nin makapulag sa putiꞌ. 30-31 Kapingmatan, main anan rwa ray tawon kapada na kaslag ni Jesus nin mangkiirgo kona; sara si Moises tan si Elias. Mampagꞌirgwan ra a maipaꞌkaꞌ sa patiti na nin syay plano nan Dios a matkap nin tukiden nadtaw sa Jerusalem. 32 Sin sain, sabtan andaꞌ nin elek ra ni Pedro. Ket, sin nakaaram sara, naꞌkit ray salag na ni Jesus tan saray rway lulalaki a kalamoꞌ nan nakaꞌdeng. 33 Sin manlakwanan rayayna si Jesus nin saraytin rway lulalaki, basta ya tana nin nagꞌirgo nin kai ya yapoꞌ nin nangisip si Pedro a wana, “Ay, Maistro, mabista ta iti atamoyna; mamaꞌdeng kamin tulo ray abung-abong; saya para komo, saya para kona ni Moises tan saya para kona ni Elias.”

34 Ket sin mampagꞌirgo ya et si Pedro, bigraꞌ anan main nin gunem nin nanirong konra. Sinakban sara nin sitin gunem ket linmiꞌmo saray tulo. 35 Ket main nin busis nin nangibwat sa gunem a narngeꞌ ra a wana, “Siti a Anak ko a syay Sinuyoꞌ ko. Rengꞌen moya!”

36 Kayadiꞌ na nin nagꞌirgo nin busis, naꞌkit ran tulo a bukod na tana ni Jesus. Leleg a kalamoꞌ raya et si Jesus, kasa gapo nin siꞌnuman a namaritaan ran naꞌkit ra.

37 Sin sumunor a awro, sin linmusong sara si Jesus nin nangibwat sa talugtog, sinnaꞌ rasaran abaw a tutawo. 38 Kapingmatan, main nin sayay lalakidtaw konran abaw nin tutawo a tinmaꞌway nin wana, “Maistro, kaꞌdwan ma payti si anak kon lalaki ta kapagkapag na! 39 Anaod, main nin ispiriton dukaꞌ a subli-subliꞌ nin sumrep kona ket tepeꞌ nin serpan naya, bigraꞌ yan umagrang tan mangaridatdat anggan gumuraꞌ a bebey na. Paidapen naya tan dandani naya kai ana nin lakwanan. 40 Nikidawat akon ingangaꞌdo konran tumutumbok mo a palakwanen raya, baleꞌ kai ra nin nababaan.”

41 Ket niꞌbat na ni Jesus konra, “Abagay kamoyna! Ambaleꞌ nin kasan pammemper moyo tan matikoꞌ a pangingisip moyo? Anggan kaꞌno ako kadiꞌ nin matkap nin kikalamoꞌ tan umanos komoyo?” Miꞌsa wana konan lalaki, “Iꞌras madti a anak mo.”

42 Sin mangkumadani yay anak kona ni Jesus, tinumba nayan ispiriton dukaꞌ ket pinangimamater naya. Baleꞌ ginan-gan naya ni Jesus a ispiriton dukaꞌ nin lumakwan ya konan anak. Ket pinaandaꞌ naya ni Jesus a anak, miꞌsa niparisibi nayayna konan ama na. 43 Edet, sarba ran tutawo ket nakaꞌngap sa sangkaalakyan a pakayadiꞌ nan Dios.

Ket leleg nin mampakaꞌngapan ran tutawo a sarban ginwa-ginwaꞌ na ni Jesus, wana konran tumutumbok na, 44 “Rengꞌen moyon maong a ibaritaꞌ ko komoyo. Siꞌkon si Pinaitawo, maipagamet ako konran magꞌuray.” 45 Kai raya baleꞌ nin natarusan ti a nibaritaꞌ na ta kai na nin inaburuyan nin Dios a mataros raya. Ket maliꞌmo saran manepet kona ni Jesus no ani a rabay nan ibaritaꞌ konan sitin inirgo na.

46 Sawanin, nididiskusyunan ran tumutumbok na ni Jesus no siꞌno konra a ibilang nin sangkataꞌgayan. 47 Baleꞌ tandaꞌ na ni Jesus a iti sa nakem ra, kanyaꞌ nin pinakadani nayay sayay anak kona. 48 Miꞌsa wana konra, “Si siꞌnuman a mampangilalaman kongko ket akuen nayaytin maayupaꞌ nin anak, siꞌkoyna a inakoꞌ nan lamang. Ket si mangakoꞌ kongko, inakoꞌ naya anamaet a Dios Ama a namakiꞌ kongko. Kanyaꞌ nin si siꞌnuman komoyo a maayupaꞌ a nakem sya a ibilang nin sangkataꞌgayan.”

49 Wana baleꞌ ni Juan kona ni Jesus, “Maistro, main nin naꞌkit mi nin sayay lalakin manꞌusaren nayay ngaran mo ta pigaw nin palakwanen nasaray ispiriton dukaꞌ sa nasrepan ran tawo ket pinaed miya banaꞌ ta amboꞌ tamoyan kalamoꞌ.”

50 Ket wana ni Jesus kona, “Andiꞌ moya awaan ta si kai nin kumuntra kontamo ket kiayon ya kontamo.”

51 Sin adani anay tyimpo nin iyuliꞌ yayna si Jesus sa langit, nipasaya nayna a nakem na nin mako sa Jerusalem. 52 Kanyaꞌ nin nangibakiꞌ yan saray nuꞌnayna nin nako sa sayay babali sa prubinsyan Samaria ta pigaw nin mangisadyaꞌ sara nin kamiꞌnan nan mikakayabi. 53 Nuꞌna sarayna anaod, baleꞌ saray tutawodtaw kai raya rabay nin pagtuluyen sa lugar ra si Jesus banaꞌ ta nipasaya nayna a nakem na nin mako sa Jerusalem nin itaw a pangraywan ran Judio. 54 Sin natandaan ra nin tumutumbok nan si Santiago tan si Juan nin kasan mamagtuloy kona ni Jesus, wanra, “Ser, rabay mo para nin igan-gan min main nin manaboꞌ nin apoy a mangibwat sa langit ta pigaw nin mapuuran sarayna?” 55 Ket inadap nasara ni Jesus tan inimaꞌno nasara. 9:55-56 nasara. 56 Ket - Sa raruman nikaisurat nan siti sa Griego ket nailamoꞌ a wanti: nasara. Wana, “Kai moyo nin manꞌamingawen no ani ya in si iti sa rarem moyo! 56 Anaod, kai ako nin nakodti ta pigaw nin sidaen a byay ran tawo no kai edet, ta pigaw nin isalba sara.” Ket. 56 Ket say ginwaꞌ ra, nako sara tana sa raruman babali.

57 Sin sain a iti sarayna sa dalan, main nin sayay lalakin nikiirgo kona ni Jesus a wana, “Mayi ako komo adtiman a keen mo.”

58 Ket wana ni Jesus kona, “Mas maong sarayna edet a uayep sa tatalon ta main nin piikapan ran diri tan sara et a manuk-manok ta main nin apunan ran diri ta, siꞌkon si Pinaitawo, kasa nin bali kon diri a magwaꞌ nin painawnan.”

59 Miꞌsa wana anamaet ni Jesus konan saya et itaw, “Mayi ka kongko.”

Ket wanan niꞌbat, “Ser, no miꞌsayna liꞌ ta itabon koya yapoꞌ si tatay mi.”

60 Baleꞌ wana ni Jesus kona, “Pauryan mon saray kasa sa sirong nin pagꞌaadiꞌ nan Dios a mangitabon konran nati ra. Baleꞌ siꞌka, mako ka nin ipatandaan moy maipaꞌkaꞌ sa pagꞌaadiꞌ nan Dios.”

61 Sawanin, wana anamaet nin saya et itaw, “Maistro, tumumbok ako komo baleꞌ sumubliꞌ ako yapoꞌ nin patanid itaw komi.”

62 Wana ni Jesus kona, “Si tawon bilang sa sayay mampangadado nin lingay anan lingay, kai ya maibagay nin magsirbi sa Pagꞌadian nan Dios.”