Muda-mudawen ya si Jesus sa Nazaret
6
Ket sawanin, nibwat ya konan sitaw nin lugar si Jesus tan sinmubliꞌ ya sa Nazaret a syay mismon babali na, kalamoꞌ nasaray tumutumbok na. 2 Sin narateꞌ a Awron Painawa, nangyakay ya sa sinaguga. Abaw saray nakaꞌngap nin nakarngeꞌ kona. Wanra, “Ya, adti ya kano in ket nagꞌadal? Paꞌno ya in nin nagkamain nin wanin a kadunungan? Paꞌno ya nin makagwaꞌ nin wanin a milagro? 3 Amboꞌ ya tamoꞌ paran sayay karpintiro in? Kai para a si Maria a ina nan siin tan kaka raya ni Santiago, Jose, Judas, tan Simon? Kai para a saray ari nan bubbayi ket iti saran gindat nin mampiikap?” Ket kasa gapo nin kwinta na konra tan kai sara nin namper kona.4 Wanan nibaritaꞌ ni Jesus konra, “Rispitado yay sayay prupita abirno nin adti pwira tamoꞌ sa mismon babali na, konran kukanayon na tan mismon konran iti sa pamilya na.”
5 Main tamoꞌ nin umno ra a tutawo nin main nin masakit a nipababo nay gamet na konra ta pigaw nin paandaen nasara. Baleꞌ kai yadtaw nin nakagwaꞌ nin abaw nin milagro 6 ta kai sara nin mamper kona. Makaꞌngap yan tuloy si Jesus ta kai sara nin namper kona a kababalyan na.
Say Nipangibakiꞌ na ni Jesus konran Labinrwa
Kinaꞌ-kinaꞌ na ni Jesus a abaw a bubaryo nin niyakay-akay nasaray tutawo.
7 Kinayaban nasaray labinrwan tumutumbok na ta pigaw nin ibakiꞌ nasaran sirwarwa sa saka-sakalakon lugar. Binyan nasaran pakayadiꞌ nin mamalakwan nin ispiriton dukaꞌ 8 tan binibilin nasara a wana, “Sa saytin pako moyo, andiꞌ kamo nin mangiꞌras nin animan, no kai kal-la baston tamoꞌ. Andiꞌ kamo nin mibalon nin kanen, bag, kwarta 9 o aysing a pisilyan moyo. Baleꞌ misandalyas kamo,” wana. 10 “No sa sayay babali ket sagyaten rakamo sa sayay bali, miikap kamo konan siin nin bali anggan mibwat kamo. 11 Baleꞌ no rumateꞌ kamo sa sayay lugar ket kai rakamo nin pagtuluyen o kai sara nin rumngeꞌ komoyo a tutawo, mibwat kamodtaw tan pagpagen moyoy taꞌpok sa dapa nin ayi moyo nin mangipataros a madusa sara liꞌ sa sain a ginwaꞌ ra.”
12 Ket nako saraynay labinrwan tumutumbok na tan nipatandaꞌ ra konran tutawo a matkap ray magbabawiꞌ tan gurutan raynay pagkakasalanan ra. 13 Pinala-palakwan rasaray uispiriton dukaꞌ konran tutawo nin nasrepan ra tan abaw saray mampagmasakit a inamrisan ran ladak ket pinaandaꞌ rasara.
Say Nipati na ni Juan a Mammawtismo
14 Sin sain, si Gubirnador Herodesa, natandaan nay maipaꞌkaꞌ sa gugawaꞌ na ni Jesus banaꞌ ta bandunado ya banaꞌ sa sayti. Main saray mangibaritaꞌ a wanra, “Sya si Juan a Mammawtismo nin sinmubliꞌ nin mabyay. Ket anaod, main nin pakayadiꞌ nan mangwaꞌ nin mumilagro.”
15 Main anamaet nin wanra, “Sya si Elias a prupita na intaw nin Dios.”
Main et anamaet nin raruma a wanra, “Sayay prupita ya nin bilang konran prupita sin nuꞌnan panaon.”
16 Sin narnge-narngeꞌ na anaod ni Herodes a maipaꞌkaꞌ kona ni Jesus wana, “Piho! Sya in si Juan. Pinutulan koyaynan ulo; sya e baleꞌ nin sinmubliꞌ yan mabyay!”
17 Wanin a nibaritaꞌ na ni Herodes ta intaw ket nipadakep naya si Juan tan nipapriso tan nipakadinawan naya banaꞌ kona ni Herodias. Siti si Herodias ket asawa naya ni Felipe a ari na ni Herodes ket sawanin asawa nayayna ni Herodes. 18 Wana intaw nin nibari-baritaꞌ ni Juan kona ni Herodes, “Abas a iꞌyan may aydo mo.”
19 Kanyaꞌ nin sinmakit a nakem na ni Herodias kona ni Juan tan rabay nayan patyen. Baleꞌ kai na nin magawaꞌ-gawaꞌ 20 ta si Herodes ket manꞌigalang naya si Juan ket mamprutiktawan naya ta tandaꞌ nan matunong tan makaDios yan tawo. Magulo a kaisipan na no marngeꞌ nay papalaway na ni Juan baleꞌ rabay-rabay naya et a lamang nin rengꞌen.
21 Baleꞌ rinmateꞌ a pagkanawanawa na ni Herodias sin awron nikaiyanak na ni Herodes ket namapunsya ya, tan sinagyat nasaray atataꞌgay nin upisyal nin gubyirno tan saray atataꞌgay nin upisyal nin sundaloꞌ tan saray atataꞌgay nin tutawo sa Galilea. 22 Si anak nan balasang, a say ngaran nan lamang ket Herodias, sinumrepb ya tan dinmukdok yadtaw sa kamiꞌnan na ni Herodes tan saray bubisita na. Ket napagustwan ya si Herodes tan saray bubisita na. Kanyaꞌ nin wana kona, “Dawaten mo kongko a animan a rabay mo ket ibi ko komo.” 23 Wana et a sinambawan na, “Animan a dawaten mo kongko, ibi ko komo; mataman et say kapikngaꞌ nin say main ko.”
24 Ket linmiwaꞌ yay balasang nin nako ya tinmepet konan ina na, “Ani ey a dawaten ko?”
Ket, “Si ulo na ni Juan a Mammawtismo,” wanan ina na.
25 Ket tampor nin sinmubliꞌ ya a balasang kona ni Herodes ket wana, “Rabay kon ibi ma kongko sawanin ana nin mismo nin naikwa sa plato a ulo na ni Juan a Mammawtismo.”
26 Nagbabawian nan maong ni Herodes a nipangakoꞌ na, baleꞌ matkap nan tukiden banaꞌ ta say nipagpangakoꞌ nan sinambawan na ket narngeꞌ ran bubisita na. 27 Ket tampor a nibakiꞌ nayay sayay bantay a ginan-gan nayan awiten naya kona a ulo na ni Juan. Sinunor nayan sundaloꞌ ket pinutol nayay ulo na ni Juan itaw sa priswan. 28 Miꞌsa nikwa nayay ulo sa plato baꞌyo nibi naya konan balasang. Nibi nayaynamaet nin balasang konan ina na.
29 Sin saray tumutumbok na ni Juan ket natandaan rayti nin nangyadiꞌ, kinaꞌ raya nin kinalap a bangkay na tan nitabon raya.
Say Nipamakan konran Masuruk-surok a Limanribo
30 Sawanin, saraytaw saray apostoles nin nibakiꞌ na ni Jesus nin mangyakay, sinmubliꞌ sarayna tan nibaritaꞌ ra kona ni Jesus a ngaꞌmin nin nagwaꞌ tan naiyakay ra. 31 Misusubray saraynaod nin rumateꞌ tan mibwat a abaw a tawo nin mako konra kanyaꞌ nin kasaynan tyimpo ran mangan. Ket wana ni Jesus konran labinrwa, “Mako atamoyna sa sayay lugar a kasan tawo ta pigaw nin painawa kamo nin bugaꞌ.” 32 Kanyaꞌ nin nibwat saran rinmuran sa baluto nin sara-sara tamoꞌ a mako sara sa sayay lugar a kasan tawo.
33 Baleꞌ abaw saray nakaꞌkit konra nin nibwat tan naalilbiꞌ rasara. Kanyaꞌ nin saray tutawo sa sarban bubabalidtaw ket palayo ran nako sa keen ra ni Jesus ket nakarateꞌ saradtaw nin nuꞌna. 34 Sin nakaabay sarayna si Jesus, naꞌkit nasara a itaw nin abaw nin tawo. Makaꞌdwan yan tuloy konra ta baraꞌmo saran karniro nin kasan mangipastor konra. Ket niyakay nasaran maipaꞌkaꞌ sa abaw a bubagay. 35 Sin dumedlem ana ket kinmadani saray tumutumbok na kona a wanra, “Mandumedlem ana ket kasa pa et nin bubalidti, 36 kanyaꞌ nin paibwaten mosara nin mako sa kabaraybay nin bubaryo ket makasaliw saran kanen ra.”
37 Baleꞌ wana ni Jesus konra, “Siꞌkamoynay mamin maꞌkan ra.”
Ket wanra, “Adti kami kadiꞌ nin makasaliw nin tinapay a gumli ana nin ribu-riboc ta pigaw nin ipakan konra?”
38 Ket nitepet na ni Jesus, “Umno ray tinapay a main? Keen moyo pa nin kikiten,” wana.
Sin ibat rayna nin kinikit ket wanra, “Lima ray tinapay tan rwa ray kunaꞌ tamoꞌ.”
39 Nigan-gan na konra a patekreen rasara ngaꞌmin a tutawo nin nagrupu-grupo sa rarabot. 40 Kanyaꞌ nin tinmekreꞌ sara nin sisaꞌsanyasot tan sililimampuloꞌ. 41 Inagwang na ni Jesus a liman tinapay tan saray rwan kunaꞌ miꞌsa ya tinmangar sa langit ket nikisalamat ya konan Dios. Miꞌsa tinau-tao nayti tan nibi na konran tumutumbok na nin itayak ra konran tutawo. Tinau-tao nasara anamaet a rwan kunaꞌ para konran sarban tutawo. 42 Ket nakapangan sara ngaꞌmin a tutawo tan nabsoy sara. 43 Dininep ran tumutumbok a taraꞌ nin tinapay tan kunaꞌ, ket main nin labinrwan balyag. 44 Saraytaw saray nangan, limanribo sarayna, saray lulalaki tamoꞌ et.
Lumalako ya si Jesus sa Babon Ranom
45 Kaaram, pinaruran nasarayna ni Jesus a tumutumbok na sa baluto tan pinauꞌna nasaraynan mako sa rubariꞌ sa babali nin Betsaida legꞌan nasaran pinaibwat a tutawo. 46 Ket sin napaibwat nasarayna, nako ya sa sayay talugtog ta pigaw nin dumasal yadtaw. 47 Sin narateꞌ anay yabi, itaw yaynay baluto a manruranan ran tumutumbok na sa butlay nin taaw ket si Jesus, itaw ya et nin bukud-bukod sa tangkar. 48 Naꞌkit na ni Jesus a mangkapaidap saran mansumaki ta sungsong yay siri. Sin bandan parbangon, tinmumbok ya konra nin manlumalako ya sa babon ranom. Ampadan nasarayna kumon ta pigaw nin mayi yayna konra. 49 Baleꞌ naꞌkit ra ngaꞌmin a main nin manlumalako sa babon ranom ket nitaꞌway ra banaꞌ ta nipaꞌkaꞌ ran lampong ya. 50 Pinasyan liꞌmo ra.
Tampor nin nagꞌirgo ya si Jesus konra a wana, “Andiꞌ kamo nin maliꞌmo! Siꞌkoyti. Paksawen moyoy nakem moyo!” 51 Rinmuran ya sa baluto ket linumteng. Ket nakaꞌngap saran maong a tumutumbok na 52 ta kai ra gapo nin natarusan a pipaꞌkaan nin nipamakaꞌbaw na intaw ni Jesus sa saytaw say tinapay tan kunaꞌ. Wanti banaꞌ ta kai ti et maabot nin pakataros ra.
Pinaandaꞌ nasara ni Jesus a Mampagmasakit itaw sa Genesaret
53 Sin nakaripay sarayna nin nakarateꞌ itaw sa lugar nin Genesaret, niyabay rayay baluto. 54 Sin nakaarawas sarayna, saray tutawodtaw, naalilbiꞌ rayan tampor si Jesus. 55 Ket apurado sara nin naku-nako sa intiro nan sitaw nin lugar. Ket inawit-awit rasaray mampagmasakit nin nakaidaꞌ sa apay ra sa adtiman a narngeꞌ ran kamiꞌnan na. 56 Ket adtiman a kamiꞌnan na ni Jesus, sa bubabali man, o sa bubaryo o sa lulugar a basta main nin bubali, saray main nin masakit ket ipai-paidaꞌ rasara nin tutawo sa puplasa, tan ipaingangaꞌdo ra kona a mataman no ipakudit na tana konran main nin masakit a saroy nin seket na. Ket sarba ran nakakudit kona, inmandaꞌ sara.