3 Anaod, sarba ran Judio, lalo saraynay Pariseo, kai sara nin mangan no kai ra yapoꞌ nin busbusan nin ranom a gamet ra nin sigon sa akay ran pupuon ra. 4 Mataman et nin no ibat sara sa palingki, no kai ra yapoꞌ nin warsikan a sinaliw ra^a kai sara nin mangan. Abaw et a raruman kaugalian nin naimatawan ra konran pupuon ra nin mantumbuken ra bilang sa pangunguyas nin inuman, pangangwan, tan panglutuan.^b

5 Kanyaꞌ nin tinepet ra kona nin saraytin rinmateꞌ a wanra, “Ambaleꞌ a kai ra nin mantumbuken nin saray tumutumbok mo a uakay a naimatawan tamoyna nangibwat et konran pupuon tamo? Basta mangan sarayna nin kai ra tumbuken a manepeg nin pammusbos ranom sa gamet!”

6 Ket niꞌbat na ni Jesus konra, “Kustoy nipadles na ni Prupita Isaias maipaꞌkaꞌ komoyo. Mampisantu-santos kamoynaod nin bilang sa wanti sa nisurat na sa Masanton Kasuratan a wana:

9 Wana et ni Jesus, “Pinasyan andaꞌ nin padalan moyo sa nipangwaꞌ moyon kasan kwinta sa nigan-gan nan Dios sa tanay matumbok moyoy uakay ran pupuon moyo 10 ta wanti e: Si prupita Moises, nisurat na a wana nin Dios, ‘Igalang ma si ama mo tan si ina mo,’^d tan wana, ‘Si siꞌnuman a mamadukaꞌ nin ama o ina na, kasan sapo nin patyen ya.’^e 11 Baleꞌ siꞌkamo, say manꞌiyakay moyo ket sakalako. Bilang konan siti e: Konan sayay tawo, sa magwaꞌ nan ibin tulong konran mangatua na, wamoyo ket ibadaꞌ nayna konra a sayti ket nigagara nayna nin idaꞌton konan Dios^f kanyaꞌ nin kai na anayti nin maibi nin tulong konra. 12 Ket sa sain nin akay moyo kai yayna nin maaburuyan nin ikanaꞌ na in konran mangatua na. 13 Yupaꞌ sa sain nin uugaliꞌ a manꞌiyakay moyo, man-gawꞌen moyon kasan kwinta a Saritaꞌ nan Dios. Anaod, abaw et a wanti nin man-gawꞌe-gawꞌen moyo.”

14 Pinakadani nasara ni Jesus kona a abaw nin tutawon itaw tan wana konra, “Rengꞌen rako ngaꞌmin tan tarusan moyoy ibaritaꞌ ko. 15 Amboꞌ a say sumrep konan sayay tawo a puon nin pagkakasalanan na, no kai say dukaꞌ a mangibwat sa nakem na. 16 Kanyaꞌ anaod nin siꞌkamon mampangrengeꞌ, adalen moyoy pipaꞌkaan nin saytin nibaritaꞌ ko.”^g

17 Linakwanan nasara ni Jesus a tutawo tan linmuob ya sa bali. Tinepet ran tumutumbok na no ani a rabay nan ibaritaꞌ konan sitaw si wana. 18 Ket wana ni Jesus, “Ani, kapada ran raruma ket kai kamo et nin makataros? Kai moyo para nin maamingaw a say sumrep konan sayay tawo ket amboꞌ in a mamagkasalanan kona? 19 Wanin ta say kanen ket kai nin mako sa nakem na no kai edet, sa tyan na ket lumiwaꞌ a lamang.” Konan siin nipatarusan na ni Jesus a sarba ngaꞌmin nin maꞌkan ket kai nin mamagkasalanan no kai edet, magwaꞌ nin kanen.

20 Wanan nituloy ni Jesus, “Say mangibwat sa nakem nan tawo, sayti a mamagkasalanan kona. 21 Wanin banaꞌ ta sayti e ket mangibwat sa kanakman nan tawo: dukaꞌ nin kukaisipan, sarbaynan klasin amboꞌ nin manepeg nin pirararay, pananakaw, pangmamati, 22 pammabayi o kilalaki, kaaguman, pangngawaꞌ nin sarbaynan kadukaan, pananaktika, gawaꞌ-gawaꞌ a kasa gapo nin pagdadangkaꞌ, imbel, pammadukaꞌ, karangasan, mipara-parabulas. 23 Sarba ngaꞌmin nin saytin kadukaan ket mangibwat sa nakem nan tawo tan sayti ket mamagkasalanan kona.”

24 Sawanin nibwat yadtaw si Jesus tan saray tumutumbok na tan nako sara sa sayay lugar nin adani sa syudad nin Tiro tan Sidon. Niikap ya sa sayay balidtaw. Kai na kumon nin rabay a matandaan ran tutawo a itaw ya, baleꞌ natandaan ran lamang. 25 Main itaw nin sayay babayi nin si daiteꞌ et nin anak nan babayi ket nasrepan yan ispiriton dukaꞌ. Sin natandaan nan itaw ya si Jesus ket nako yan tampor itaw kona tan nanalimukod ya sa adapan na 26 tan nikidawat yan ingangaꞌdo a palakwanen nayay ispiriton dukaꞌ konan anak na. Baleꞌ siti nin babayi, amboꞌ yan Judio ta niyanak yadtaw sa lugar nin mangaran Sirofenicia. 27 Kanyaꞌ nin wana ni Jesus a sayay alimbawaꞌ, “Kai baleꞌ nin magwaꞌ. Matkap misarayna yapoꞌ nin pakanen a aꞌnak, ta amboꞌ nin manepeg a kalapen a kanen ran aꞌnak tan ipakan konran tuweꞌ.”

28 Wana anamaet nin niꞌbat “Tutuo in say wamo, Ser, baleꞌ, mataman anamaet nin saray aso sa sirong nin lamisawan ket kanen ray pasiꞌ ran aꞌnak.”

29 Ket wana ni Jesus kona, “Mabista ya in si ubat mo. Ket banaꞌ konan siin, sumubliꞌ kayna sa bali mo. Si ispiriton dukaꞌ ket linmakwan yayna konan anak mo.”

30 Ket nugot yayna sa bali na a babayi, ket naꞌkit nayay anak na nin nakaidaꞌ sa idaan na, tan natarusan nan linmakwan yaynay ispiriton dukaꞌ kona.

31 Nibwat yaynadtaw si Jesus sa Tiro. Linmabas ya sa Sidon tan sa Decapolis. Sin rinmateꞌ ya sa sakop nan Baybay Galilea, 32 main nin tutawon nangiyater kona nin sayay lalakin telek tan umel. Ket dinawat ra kona ni Jesus nin ipababo nay gamet na kona ta pigaw nin paandaen naya. 33 Sin sain ket nikadayoꞌ naya ni Jesus konran tutawo. Ket sinurot nan garamay nay tutulyan nan lalaki, miꞌsa linmudaꞌ ya tan inapros nayay dilaꞌ nan tawo. 34 Kaaram tinmangar ya si Jesus sa langit tan sinmaꞌwet ya tan wana, “Effata,” a say rabay nan irgwen, “Maabryan.”

35 Ket tampor a makarngeꞌ yayna tan makairgo yaynan mapalaway nin amboꞌ yaynan umel taw si tawo. 36 Binibilin nasaran maong ni Jesus a tutawo nin andiꞌ rayti nin ibari-baritaꞌ sa abirno nin siꞌno. Baleꞌ no kaꞌno nasara nin binibilin, lalo rayna edet nin nibari-baritaꞌ. 37 Wanin anan tuloy a nipakaꞌngap ran nakarngeꞌ ket wanra, “Sarba ngaꞌmin nin man-gawꞌen na ket mabista! Mataman nin saray telek ket mapangrengeꞌ nasara tan saray umel ket mapagꞌirgo nasara!”