Si Mabistan Patandaꞌ Maipaꞌkaꞌ konan Cristo Sigon kona ni
MATEO
Say Maipaꞌkaꞌ konan Sitin Libro
Sitin libro, nisurat naya ni Mateo, a mantawagen lamang nin Levi. Saya ya konran labinrwan Apostol a kinayaban na ni Jesus. Sin kinayaban naya ni Jesus si Mateo, tampor nin linakwanan na a trabaho na a sayay maniningir nin buis ket tinmumbok ya kona ni Jesus (9:9; Marcos 2:14; Lucas 5:27-28). Saray maniningir nin buis ket mata-matawen rasaran Judio tan manꞌikwinta rasaran makasalanan tan traidor konran kapada ran Judio banaꞌ ta inupaan rasaran Romano tan kasabyan a pinilitan a nalabas nin singiren ran buis.
Nisurat nayaytin Mabistan Patandaꞌ ni Mateo para konran Judio baleꞌ manꞌibaritaꞌ nadtin lamang nin, mataman a saray amboꞌ nin Judio, ket magun-gunawan nan siti (28:19-20). Abaw a mabasa konan sitin libro nin maipaꞌkaꞌ sa pagꞌaadiꞌ nan Dios. Nipatandaan nadti ni Mateo a si Jesus, syay Adiꞌ nin nipangakoꞌ nin mangisalba konran tutawo nan Dios (1:1-17; 2:1-11; 21:5; 25:31-34; 27:37). Nipaꞌkit na a, yupaꞌ kona ni Jesus, ket tinukid nan Dios a nipangakoꞌ na konran tutawo na sa Uꞌnan Tistaminto (1:22-23; 2:14-18,22-23; 4:13-16; 8:16-17; 12:15-21; 13:34-35; 21:1-5; 26:53-56; 27:6-10).
Si Mateo, saya yan tistigos sa abaw nin bubagay a ginwaꞌ tan nibaritaꞌ na ni Jesus ket nisurat nadti a abaw nin mabibistan ginwaꞌ na ni Jesus. Nibaritaꞌ na a maipaꞌkaꞌ sa patiti na ni Jesus para konran tutawo tan say nisubliꞌ na nin mabyay nin main nin pananalo. Nisurat na et iti a maipaꞌkaꞌ sa umnoy alalakin tima nin niyakay na ni Jesus: 1) say kaalagawan nin pagꞌaadiꞌ nan Adiꞌ nin nipangakoꞌ (Sirmon sa Talugtog) (5:1–7:29); 2) say bubibilin konran labinrwa nin piniliꞌ nan ibabakiꞌ nan mangipatandaꞌ nin Mabistan Patandaꞌ (10:5-42); 3) say pangingiyarig nin maipaꞌkaꞌ sa pagꞌaadiꞌ nan Dios (13:1-52); 4) say rabay nin ibaritaꞌ nin magꞌin nin sayay tumutumbok na ni Jesus (kapitulo 18); tan 5) say maipaꞌkaꞌ sa mangya-mangyadiꞌ liꞌ sa isusubliꞌ nan Adiꞌ nin nipangakoꞌ (kapitulo 24–25).
Say Linaman nan Sitin Libro
Si Jesus ket syay Adiꞌ a nipangakoꞌ (1:1–4:11)
Say nakaipatukduan nin kanepegan na nin magꞌadiꞌ tan say pakaiyanak na (1:1–2:23)
Say pammatutuo nin maipaꞌkaꞌ kona a Adiꞌ (3:1–4:11)
Say pakatandaan nin maipaꞌkaꞌ sa Pagꞌadian na a Adiꞌ a nipangakoꞌ (4:12–7:29)
Tumumbok a tutawo konan si syay nipangakoꞌ (4:12-25)
Say maalaga sa Pagꞌadian nan si syay nipangakoꞌ (5:1–7:29)
Say pakayadiꞌ na a Adiꞌ nin nipangakoꞌ (8:1–10:42)
Abaw a pakaꞌkitan a si Jesus ket syay si nipangakoꞌ (8:1–9:34)
Bibilinen nasaran Adiꞌ a labinrwa nin piniliꞌ nan ibakiꞌ (9:35–10:42)
Ipapalaway a maipaꞌkaꞌ sa gawꞌen nan si syay nipangakoꞌ sa Pagꞌadian (11:1–13:52)
Say nakaibakian nan si syay nipangakoꞌ nan Dios (13:53–17:21)
Si Pagꞌadian nan si syay nipangakoꞌ, amboꞌ yan bilang sa pupagꞌadian iti sa mundo (17:22–18:35)
Say piswawian nin Pagꞌadian nan si syay nipangakoꞌ tan say pagꞌadian iti sa mundo (19:1–25:46)
Say pisasangkinian maipaꞌkaꞌ sa no ani a maalaga (19:1–20:34)
Igalang rayan tutawo nin bilang sayay adiꞌ a si syay nipangakoꞌ (21:1-11)
Say maipaꞌkaꞌ sa lamang ran pupangulo ran Judio (21:12–23:39)
Say mangya-mangyadiꞌ liꞌ (24:1–25:46)
Say pangmamati tan say pammasubliꞌ nin mabyay konan si syay nipangakoꞌ nan Dios (26:1–28:15)
Say nipanadyaꞌ sa pananakep konan si syay nipangakoꞌ nan Dios (26:1-46)
Say nipanakep konan si syay nipangakoꞌ nan Dios (26:47–27:44)
Si nati tan pasublien nin mabyay a si nipangakoꞌ nan Dios (27:45–28:15)
Ibatiꞌ na konran tumutumbok na a misyon nin nakaibakian na nin si Adiꞌ a nipangakoꞌ nan Dios (28:16-20)