Si Mabistan Patandaꞌ Maipaꞌkaꞌ konan Cristo Sigon kona ni
MATEO
Say Nikasunur-sunor ran Puon na nin Sya a Cristo
1
Si Jesus a sya a Cristoa ket puri naya ni Adiꞌ Davidb a puri na ni Abrahamc. Siti a nikasunur-sunor ran puon na ni Jesus.2 Si Abraham ama naya ni Isaac; si Isaac ama naya ni Jacob, tan si Jacob ama raya ni Juda tan saray bubsat na. 3 Si Juda ama raya ni Fares tan Zara, si Tamar a ina ra.d Si Fares ama naya ni Esrom, tan si Esrom ama naya ni Aram. 4 Si Aram ama naya ni Aminadab, si Aminadab ama naya ni Naason, tan si Naason ama naya ni Salmon. 5 Si Salmon ama naya ni Boaz, tan si Rahabe a ina na. Si Boaz ama naya ni Obed, tan si Ruthf a ina na. Si Obed a ama ni Jesse. 6 Si Jesse a ama na ni Adiꞌ David.
Si David, sya a ama na ni Solomon ket si ina na ni Solomon si gindat a asawa na ni Urias.g 7 Si Solomon ama naya ni Roboam; si Roboam ama naya ni Abias, tan si Abias ama naya ni Asa. 8 Si Asa ama naya ni Josafat; si Josafat ama naya ni Joram, tan si Joram ama naya ni Ozias. 9 Si Ozias ama naya ni Jotam; si Jotam ama naya ni Acaz, tan si Acaz a ama na ni Ezequias. 10 Si Ezequias ama naya ni Manases; si Manases ama naya ni Amos, tan si Amos ama naya ni Josias. 11 Si Josias ama raya ni Jeconias tan saray bubsat na. Panaon intaw nin nikatalo ran Israelita konran taga Babilonia ket naiꞌras sara sa nasyon nin Babiloniah.
12 Sin naiꞌras sarayna sa Babilonia, wanti et a nikasunur-sunor ra;
Si Jeconias ama naya ni Salatiel, tan si Salatiel ama naya ni Zorobabel. 13 Si Zorobabel ama naya ni Abiud; si Abiud ama naya ni Eliaquim, tan si Eliaquim ama naya ni Azor. 14 Si Azor ama naya ni Sadoc; si Sadoc ama naya ni Aquim, tan si Aquim ama naya ni Eliud. 15 Si Eliud ama naya ni Eleazar; si Eleazar ama naya ni Matan; si Matan ama naya ni Jacob, 16 tan si Jacob ama naya ni Jose nin asawa na ni Maria nin si nangiyanak kona ni Jesus a mantawagen nin Cristo.
17 Ngaꞌmi-ngaꞌmin, mangibwat kona ni Abraham angga kona ni David, labinꞌaꞌpat a nisusunor a kapamilyawan; labinꞌaꞌpat anamaet mangibwat kona ni David anggan sa nikaiꞌras ran Israelita sa Babilonia, tan labinꞌaꞌpat a lamang anamaet mangibwat sin naiꞌras sarayna sa Babilonia angga sin naiyanak ya a Cristo.
Maiyanak ya a Cristo
18 Wanti ey isturya nin nikaiyanak na ni Jesus a syay Cristo: Si Maria a syay ina na, naitaratoi yaynan kikasal kona ni Jose. Baleꞌ baꞌyo sara nin nikalamoꞌ, natandaan a mabuktot ya. Ginmuktot ya nangibwat sa pakayadiꞌ nan Ispirito nan Dios.
19 Ket si Jose a asawa na, banaꞌ ta maong yan tawo tan kai na rabay a maikwa ya sa kadingꞌeyan si Maria, nidisisyon na nin isyayj nayayna nin matinek. 20 Baleꞌ sin manꞌisip-isipen nayti, nanaynep ya ket sa taynep na pinaꞌkit yay sayay anghil nan Dios tan wana kona, “Jose a puri na ni David, andiꞌ ka magꞌalangan nin mangikasal kona ni Maria. Wanin ta si buktot na ket nangibwat ya sa pakayadiꞌ nan Ispirito nan Dios. 21 Manganak ya nin lalaki ket pangaranan ma liꞌ nin Jesusk, ta sya a mangisalba konran tutawo na sa pakadusa sa kukasalanan ra.”
22 Sain ket mangyadiꞌ ta pigaw nin matukid a nipaibaritaꞌ naynan naꞌteng nin Dios konan prupita na a wana,
23 “Ket si sayay birhin a balasang, gumuktot ya liꞌ!
Lalaki ya liꞌ a anak na tan tawagen ya liꞌ nin Emmanuel.”l
Say rabay nan irgwen ket “Kalamoꞌ tamoyay Dios.”