Say Piligro sa Byay nan Cristo
2
Sawanin, niyanak ya si Jesus sa babalin Betlehem sa prubinsyan Judea sin kapresan a si Herodes a adiꞌ. Ket main nin lulalakin madudunonga nin rinmateꞌ itaw sa Jerusalem nin nangibwat sara sa sayay nasyon sa baytan. 2 Nitepet-tepet ra, “Adti yaytaw si Adiꞌ ra nin Judio a naiyanak? Oꞌ a ta naꞌkit miya a bituen nin sinyal a naiyanak yayna sin itaw kami sa baytanb, ket nako kamidti ta pigaw nin pagalangan miya.”3 Sin natandaan nayti ni Adiꞌ Herodes, inmaburido ya tan wanin ra anamaet nin saray tutawodtaw sa Jerusalem. 4 Miniting nasaray Pupangulon Pupadiꞌ tan saray Madudunong sa Gugan-gan tan tinepet na konra, “Adti ya nin wanra maiyanak a Cristo a syay magꞌin nin adiꞌ?”
5 Niꞌbat ra kona, “Sa babalin Betlehem sa Judea; ta sain a wana nin Dios a nisurat nan prupita na. Wana,
6 ‘Si Betlehem, sa prubinsya nan Judea,
Sya a sangkaimpurtantiwan nin babali konran pupangulo nin bubabali sa Judea
ta mangibwat ya liꞌ konran tawo na a pangulon mamaga liꞌ konran tutawo ko nin saray puri na ni Israel.’c ”
7 Sinmunor, sikriton nipakayaban nasara in ni Adiꞌ Herodes a mumadunong nin tawo nin nangibwat sa nasyon sa baytan. Sin kaadap nasarayna, natandaan na sa nipanepet-tepet na no kaꞌno rayan peteg naꞌkit a bituen. 8 Kayadiꞌ, pinaibwat nasaran mako sa Betlehem tan nibibilin na konra, “Mako kamo sa Betlehem tan tandaen moyon maong a maipaꞌkaꞌ konan siin a anak, tan no nadumog moyayna liꞌ, patandaan rako ta pigaw nin mataman nin siꞌko ket makapikaꞌ anamaet nin mangigalang kona.”
9-10 Sin nayadiꞌ nasarayna nin binibilin nin Adiꞌ, nibwat saraynan mako sa Betlehem. Ket sin iti sara sa dalan naꞌkit rayaynaet taw si bituen nin naꞌkit ra intaw sin itaw sara sa baytan. Pinasyan ririket ran nakaꞌkit anamanaet konan sitaw a bituen. Mandumaras yan iti sa temben sa uꞌna ra tan tinumgen ya sa temben nan peteg nin balin kamiꞌnan nan anak a si Jesus.
11 Sinumrep sara konan bali, ket naꞌkit raya a anak sa dani nan ina nan si Maria. Nanalimukod sara ket pinagalangan rayan sayay adiꞌ a anak, miꞌsa inabryan ray nangwan tan niprisinta ray mablin rurigalo ra nin balitok, insinso, tan mira.
12 Sinmunor, nipatandaꞌ nan Dios konra sa taynep a andiꞌ sarayna nin sumubliꞌ kona ni Adiꞌ Herodes. Kanyaꞌ nin sakalakon dalan anay dinalanan ran sinmubliꞌ sa lugar ra.
13 Amboꞌ nin naꞌteng sin nakaibwat sarayna ket, nipaꞌkit ya sa taynep a sayay anghil nan Dios kona ni Jose. Wana kona ni Jose, “Mibangon ka ket ilakwan mosaray mitraina tan ikaꞌ mosara sa Egipto, tan andiꞌ kamo nin lumakwan itaw anggan ibaritaꞌ ko ta ipatingkap nayayna ni Herodes a anak tan ipapati naya.”
14 Ket nibangon ya si Jose tan nilakwan nasara konan siin a yabi a anak tan ina na nin nako sara sa Egipto. 15 Itaw sara niikap angga sin nati ya si Herodes.
Nangyadiꞌ ti ta pigaw nin matukid a wanan Dios a nipaibaritaꞌ na konan prupita na. Wana,
“Nangibwat yadtaw sa Egipto kinayaban koyay anak ko.”d
16 Ket, sin natandaan na ni Adiꞌ Herodes a manlingwen raya sin saytaw nin saraytaw saray mangingipadles, pinasyan sager na. Ket nipapati nasara ngaꞌmin a magtaon rwa tan kumayupaꞌ nin uaꞌnak a lulalaki sa Betlehem tan sa sarban lulugar sa libed na. Binilang nay taon ra nin tinmaranaꞌ sin panaon a naꞌkit rayan mangingipadles nin ibat sa baytan a bituen.
17 Sa wanin natukid a nipadles na ni Prupita Jeremias a wana,
18 “Marngeꞌ mangibwat sa babalin Rama a asisit tan agrem,
ta manꞌabet-abetan nasara ni Raquele a pupuri nan saray Israelita
tan kai ya nin maliwaliwa ta nati sara ngaꞌmin.”f
Isubliꞌ yaynay Cristo sa Nazaret
19 Ket sin nati yayna si Herodes, nipaꞌkit ya sa taynep a sayay anghil nan Dios kona ni Jose itaw sa Egipto. Wanan anghil, 20 “Mibangon ka. Sumubliꞌ kayna tan saray mitraina sa nasyon moyon Israel ta nati sarayna a marabay nin mangmati konan anak.” 21 Nibangon ya si Jose ket nibwat saraynan sumubliꞌ sa Israel.
22 Baleꞌ sin natandaan na ni Jose nin si Arquelao nin anak na ni Herodes a sinmilin adiꞌ sa Judea, linmiꞌmo yan sumubliꞌ itaw. Konan saya anamanaet nin taynep, nibaritaꞌ na anamana nin Dios a gawꞌen na ni Jose, kanyaꞌ nin nako sara sa prubinsya nin Galilea, 23 ket niikap saradtaw sa babalin Nazaret nin abaw a taon. Anaod, natukid a wanran prupita nan Dios maipaꞌkaꞌ kona ni Cristo, a matawag ya liꞌ nin sayay taga Nazaretg tamoꞌ.