Ipauꞌna-uꞌna na ni Juan a Maipaꞌkaꞌ konan Cristo
3
Ket sin saytaw, main nin sayay tawo nin mamawtismoa a say ngaran na ket Juan. Nako yadtaw sa lugar a amboꞌ nin matawo sa Judea. Nibari-baritaꞌ na konran saray inmarak itaw kona a 2 wanti: “Pagbabawian tan gurutan moyoynay dukaꞌ a man-gawꞌe-gawꞌen moyo ta dandani yayna nin magꞌadiꞌ iti sa mundo a Dios.” 3 Wanin a ginwaꞌ na ta syayti si manꞌibaritaꞌ na ni Prupita Isaias sin wana,“Marngeꞌ ya liꞌ a sayay mampangitaꞌwa-taꞌway nin mampangipatandaꞌ itaw sa lugar a amboꞌ nin matawo a wana,
‘Siꞌkamon tutawo, sadyaan moyoy irarateꞌ nan Catawan,
patuꞌriren moyoy dalanan na.’ ”b
4 Say aysing na ni Juan ket nagwaꞌ nangibwat sa sabot nin kamilyo tan binarkesan nan katat sa awak.c Say kanen na anamaet ket dudon tan inatip nin ngiwan sa tatalon.
5 Abaw saray tutawon nangibwat sa syudad nin Jerusalem tan sa raruma nin bubabalidtaw sa prubinsyan Judea tan mataman et sa bubabalin adani sa Ilog Jordan a nako nangrengeꞌ-rengeꞌ kona. 6 Ket sin nipatutuo ray kukasalanan ra, binawtismwan nasara sa Ilog Jordan.
7 Sin sain, abaw saray pangulo nin mantawagen nin Pariseo tan Saduseo a mako pabawtismo kona. Sin naꞌkit nasara ni Juan wana konra, “Siꞌkamo a baraꞌmo nin masirib a ulay! Ani a puon a nako kamodti? Wamoyo angangko a mapalꞌisan moyoy alakin sager nan Dios. 8 No talagan disidido kamon pabawtismo, ipaꞌkit moyon mampagbabawian moyoynay kukasalanan moyo yupaꞌ sa pangwaꞌ moyon manepeg a gugawaꞌ. 9 Andiꞌ moyo nin ilalwan a banaꞌ ta puri nakamo ni Abraham ket, matkap nakamon ipwira nin Dios sa panunusa na. Ibaritaꞌ koyti komoyo a magwaꞌ nan Dios a saytin bubato ket gawꞌen na a magꞌin nin puri na ni Abraham nin ibi na konray nipangakoꞌ na. 10 Si Dios, bilang sa sayay mammukan nin kayo a niinsayo nayayna a payakor na nin pukanen ta puuran nay barang kayon amboꞌ nin mabistay bunga, ket nasadyaꞌ yaynan dusawen nakamo.
11 Siꞌko, binawtismwan katamo sawanin nin ranom nin mangipaꞌkit a nagbabawian moyoynay kukasalanan moyo, baleꞌ main liꞌ nin sumubray kongko a sya bawtismwan nakamon Ispirito nan Dios tan nin apoy. Sya, makapangyayadiꞌ ya dyan siꞌko a kai ako gapo nin maikanaꞌ nin mataman tanan mangwarwar nin kurdon nin sandalyas na. 12 Sya a manintinsya sa tutawo nin baraꞌmo yan mangngirik. Ringgasan nayan maong a pangirikan miꞌsa pipuruken nay apa tan irik. Ikwa nasaray paꞌsar irik sa agamang na, baleꞌ puuran nasaray paꞌsar apa itaw sa apoy a kai gapo nin maꞌrep.”
Pabawtismo yay Cristo
13 Ket rinmateꞌ yadtaw sa Ilog Jordan nin nangibwat ya sa prubinsyan Galilea si Jesus ta pigaw nin pabawtismo ya kona ni Juan. 14 Baleꞌ inimaꞌno naya ni Juan a wana, “Kai! Siꞌkoy manepeg nin pabawtismo komo a amboꞌ nin siꞌkay mako pabawtismo kongko.”
15 Baleꞌ wana ni Jesus, “Kai, amboꞌ nin wanin, ta matkap nin gawꞌen tamo a sarba nin manepeg.” Ket inmaburoy ya si Juan tan binawtismwan naya si Jesus.
16 Kayadiꞌ na nin nabawtismwan ni Jesus, nako yaynan tampor sa rigrig. Kaaram-aram niburwang a langit tan naꞌkit naya a Ispirito nan Dios a bilang kalapati nin mangkumayupaꞌ tan dinumpaꞌ ya kona. 17 Ket main nin busis a nangibwat sa langit nin kamiꞌnan nan Dios a narngeꞌ ra. Wana, “Siti a anak kon mangkawa-kawaꞌnanen ko. Sya a pakaririketan kon tuloy.”