Si Mabistan Patandaꞌ Maipaꞌkaꞌ kona ni Jesu-Cristo Sigon kona ni
JUAN
Si Jesu-Cristo, Syay Kabalikasan nan Dios
1
Sin saytaw sin baꞌyo et nin pinarsa a animan, main yayna a si Kabalikasana nan Dios.Kalamoꞌ naya nin Dios,
tan si syay Kabalikasan, Dios yaynamaet.
2 Baꞌyo et nin pinarsa a animan, kalamoꞌ nayaynan Dios.
3 Pinarsa nan Dios a sarba nin nipadalan kona,
ket kasan animan a pinarsa nin kai nin dinmalan kona.
4 Si syay Kabalikasan, pangibwatan yan byay,
ket syay byay a palaway para konran tutawo.
5 Ket mampalawayan nay dedlem iti konra, baleꞌ kai rayan lamang nin maipurok nin saray iti sa dedlem.
6 Sawanin, main nin sayay tawon nibakiꞌ nan Dios a say ngaran na ket Juanb. 7 Nibakiꞌ nayan Dios nin patutuꞌwan nay maipaꞌkaꞌ konan siti nin palaway ta pigaw nin say sarban tawo, pagmatalkan rayayti banaꞌ sa ipatutuo na ni Juan. 8 Amboꞌ ya si Juan ti si palaway no kai edet, nibakiꞌ ya ta pigaw nin patutuꞌwan nay maipaꞌkaꞌ konan si palaway. 9 Siti si palaway nin tutuo ket syaytaw si nipadles nin rumateꞌ iti sa lutaꞌ nin palawayan nay kaisipan ran sarban tawo.
10 Ket mataman no rinmateꞌ yaynadti sa mundo tan
sya ket pinarsa na a sarban iti sa mundo,
kai ra nin inalilbiꞌ nin tutawo a kinasiꞌno na.
11 Nako ya konran kapada nan Judio sa nasyon nan diri,
baleꞌ kai raya nin inakoꞌ.
12 Wanin man, main a lamang nin nangakoꞌ kona. Ket, konran sarba ran nangakoꞌ kona,
saray mampagmatalek kona,
binyan nasaran kanepegan nin magꞌin nin aꞌnak nan Dios.
13 Nagkamain saran peteg nin byay
mangibwat sa gawaꞌ nan Dios,
amboꞌ nin mangibwat sa urdinaryo nin padalan banaꞌ sa karabayan nin lalaman tan sa kanakman nan sayay lalaki.
14 Ket si syay Kabalikasan, nagꞌin yan tawo tan niikap ya sa busel mi ket naadal mi a kataꞌgayan na nin maikanaꞌ kona nin sya tamoꞌ a kapada na nin Ama, ta kawaꞌnan nan liso a tutawo tan patutuꞌwan nan liso a maipaꞌkaꞌ konan Dios. 15 Pinatutuꞌwan na ni Juan a maipaꞌkaꞌ kona a wanan nipatandaꞌ, “Siti yaytaw si manꞌirgwen ko a wangko, ‘Siin si sumubray kongko, mas ataꞌgay ya dyan siꞌko ta sya, main yayna sin saytaw et nin nuꞌna ya dyan siꞌko.’ ”
16 Say katutuꞌwan, siꞌtamo ngaꞌmin, mangibwat sa main na nin si syay Kabalikasan, mangkagaꞌmuran tamoynan mangkagaꞌmuran a pangangawaꞌnan na 17 ta mataman no nibi nan Dios a Gugan-gan na nin nipadalan kona ni Moises, si Jesu-Cristo baleꞌ a nangipadalanan na a magaꞌmuran tamoy pangangawaꞌnan na tan say katutuꞌwan maipaꞌkaꞌ kona. 18 Oꞌ, mataman no kasa et gapo ni saya nin nakaꞌkit konan Dios abirno ana sa makaꞌnuman, si Anak, a syan diri ket Dios ya tan kalamoꞌ nayan pirmi, syay nangipapalaway nin maipaꞌkaꞌ kona nin Dios.
Say Pammatutuo na ni Juan a Mammawtismo a Amboꞌ yay Cristo
19 Sawanin, wanti e a pammatutuo na ni Juan: Main nin pupadiꞌ tan kukatulunganc ra nin nako kona ni Juan. Nibakiꞌ rasarayti nin pupangulo ran Judio itaw sa syudad nin Jerusalem nin mako mangusisaꞌ kona a wanra, “Ani a nakaibakian mo?” 20 Kai na nin nibudiꞌ ni Juan a katutuꞌwan no kai edet, mapala-palaway nan nibaritaꞌ a wana, “Amboꞌ ako a Cristod.”
21 Ket wanra kona, “Siꞌno ka edet? Siꞌka para si Eliase a wanran sumubliꞌ iti?”
Ket wana, “Kai, amboꞌ ako.”
“Siꞌka para edet taw si Prupitaf a manꞌirgwen na ni Moises?” nitepet ra anamaet kona.
“Kai,” wana nin inumbat.
22 Wanra anamaet kona, “Siꞌno ka edet anaod? Ibaritaꞌ mo pa ta matkap a main nin ibaritaꞌ mi konran saray namakiꞌ komi. Ani a magwaꞌ min maibaritaꞌ maipaꞌkaꞌ sa kinasiꞌno mo?”
23 Niꞌbat na ni Juan,
“Siꞌkoy pakatukidan nin say nipadles na ni Prupita Isaias a
‘Marngeꞌ ya liꞌ a sayay mampangitaꞌwa-taꞌway nin mampangipatandaꞌ itaw sa lugar a amboꞌ nin matawo a wana,
Patuꞌriren moyoy dalanan nan Catawan.’g ”
24 Main nin Pariseoh konran sarayti saray nibakiꞌ. Ket konan siin, wanra, 25 “No wanin a amboꞌ ka a Cristo tan amboꞌ ka anamaet si Elias o si Prupita nin inirgo na ni Moises, mayin edet a mampamawtismoi ka?”
26 Inumbat ya si Juan a wana, “Siꞌko, main nin kanepegan kon mamawtismo sa ranom. Main anamaet nin iti sa busel moyo nin, siꞌkamo, kai moya nin mangkaalilbiꞌ. 27 Rumateꞌ yaynan kasunor ko ket banaꞌ sa kataꞌgayan na, kai ako gapo nin maikanaꞌ nin mataman tanan mangwarwar nin kurdon nin sandalyas na.”
28 Sayti, nangyadiꞌ sa Betania sa rubariꞌ nan Ilog Jordan nin mampamawtismwan na ni Juan.
Say Nipamatutuo na ni Juan a si Jesus, Sya a Piniliꞌ nan Dios
29 Sin sumunor nin awro, naꞌkit naya ni Juan si Jesus nin manꞌumarak kona ket wana, “Sya e a paꞌsar karniro nin nibi nan Dios a maidaꞌton ta pigaw nin maglat a kasalanan ran tutawo! 30 Syaytaw si manꞌirgwen ko sin wangko a si rumateꞌ nin kasunor ko ket mas ataꞌgay ya dyan siꞌko ta main yayna sin saytaw et nin nuꞌna ya dyan siꞌko. 31 Mataman nin siꞌko nin diri, kai ko tandaꞌ a sya anayti sin saytaw. Wanin man, nako akodti nin lamang nin mamawtismo sa ranom ta pigaw nin matandaan ko no siꞌno ya ket maipatandaan koya komoyo nin puri na ni Israel.”
32 Sawanin, sayti a nipamatutuo na ni Juan. “Siꞌkon diri, naꞌkit koya anaod a Ispirito nan Dios nin mangkumayupaꞌ nin ibat sa langit nin bilang sayay kalapati tan nisyon ya konan siti. 33 Kai koya kumon nin tandaꞌ, baleꞌ si nangibakiꞌ kongko nin mamawtismo sa ranom, wana kongko, ‘Si maꞌkit mo nin dupaan na nin Ispirito tan pisyunan naya, sya a mamawtismo sa Ispirito.’j 34 Ket siꞌko, naꞌkit koyti anaod kanyaꞌ nin mampatutuꞌwan ko komoyo a sya a Piniliꞌ nan Diosk.”
Pinatutuꞌwan ran Tumutumbok na ni Juan a si Jesus, Syay Cristo
35 Sin sinmunor nin awro, itaw ya anamanaet si Juan tan rwa ran tumutumbok na. 36 Naꞌkit nayan manlumabas si Jesus ket wana, “Sya in e a karniro a nibi nan Dios!” 37 Narngeꞌ ra nin rway tumutumbok a wana ni Juan ket tinmumbok sara kona ni Jesus.
38 Ket nibring ya si Jesus tan sin naꞌkit nasaran mantumumbok wana konra, “Ani a rabay moyo?”
Ket wanran niꞌbat kona, “Adti kamo nin mampiikap, Rabbi?” (Say katarusan nan saritaꞌ a “Rabbi” ket Maistro.)
39 “Para, ta kikiten moyo,” wana. Kanyaꞌ nin nayi sara kona tan naꞌkit ra a mampiikapan na, ket nikipagtuloy saradtaw ta magꞌalas kwatro ana.
40 Si saya konran sarayti saray rwan nakarngeꞌ kona ni Juan tan tinmumbok kona ni Jesus ket si Andres. Main nin angkay na a si Simon Pedro. 41 Ket kinaꞌ naya yapoꞌ nin tiningkap a busat nan si Simon tan wana kona, “Nadumog miya a Mesias.” (Say rabay nan irgwen nin Mesias ket Si Sinuyoꞌ nin Magadiꞌ.) 42 Ket, niꞌras naya si Simon kona ni Jesus.
Pinastang nayan maong ni Jesus miꞌsa wana, “Siꞌka si Simon a anak na ni Juanl, ngaranan kata nin Cefas.” (Sitin ngaran sa Griego ket Pedro tan say katarusan na ket bato.)
Pinatutuꞌwan ra ni Felipe tan ni Natanael a si Jesus, syay Adiꞌ
43-44 Sin sumunor nin awro, nidisisyon na ni Jesus a mako sa Galilea. Naꞌkit naya si Felipe a taga Betsaida a kababalyan ra ni Andres tan ni Pedro ket wana kona, “Kikalamoꞌ ka kongko.”m
45 Sawanin si Felipe, kinaꞌ naya nin tiningkap si Natanael tan wana kona, “Nadumog miya! Syaytaw si manꞌirgwen na ni Moises sa nisurat na tan say nisurat ra et nin prupita. Sya si Jesus a taga Nazaret nin anak na ni Jose.”
46 Konan siin, wana ni Natanael, “Nazaret! Main para nin maabig a mangibwat itaw?”
“Para, kikiten mo,” wana ni Felipe.
47 Sin naꞌkit naya ni Jesus nin manꞌumarak kona si Natanael, wana maipaꞌkaꞌ kona, “Sya e a tutuon puri na ni Israel. Kasa gapo nin sinisirib kona.”
48 Tinepetan naya ni Natanael si Jesus a wana, “Paꞌno rako nin nakatandaꞌ?”
Ket wana nin niꞌbat ni Jesus, “Naꞌkit kata sa sirong nin kayon igos sin baꞌyo naka nin tinawag ni Felipe.”
49 Konan siin wana ni Natanael, “Maistro, siꞌkan pageꞌ a Anak nan Dios! Siꞌkay Adiꞌ nan Israel!”
50 Wana nin niꞌbat ni Jesus, “Kai para a magmatalek ka kongko banaꞌ ta wangko ket naꞌkit kata sa sirong nan kayon igos? Makaꞌkit ka liꞌ nin mas makapakaꞌngap et nin mangyadiꞌ dyan siin.” 51 Miꞌsa wana konra, “Isipen moyoyti nin maong: Maꞌkit moyo liꞌ nin miabri a langit tan saray uanghil nan Dios ket muliꞌ-manaoyn sara nin mako kongko a siꞌkon si Pinaitawo.”