Tumaranaꞌ ya 2 sa nikatukid nin nisurat na ni Prupita Isaias sa Masanton Kasuratan a wanan Catawan konan Anak na,

4 Ket si Juan a mantawagen nin Mammawtismo^d, itaw ya anaod sa lugar a amboꞌ nin matawo nin pinata-patandaan nasaray tutawon inmarak a pagbabawian raynay dukaꞌ a gawaꞌ-gawaꞌ ra tan pabawtismo sara ta pigaw nin mapirduna sara. 5 Abaw saray nako nin nangrengeꞌ kona nin nangibwat sa syudad nin Jerusalem tan sa prubinsya nin Judea. Ket sin nipatutuo ray kukasalanan ra, binawtismwan nasara sa Ilog Jordan.

6 Say seket na ni Juan, ginwaꞌ nangibwat sa sabot nin kamilyo tan binarkesan nan katat sa awak. Say kanen na anamaet, dudon tan inatip nin ngiwan sa tatalon. 7 Nibari-baritaꞌ na a wana, “Main nin sayay tawon rumateꞌ iti a sumubray kongko. Sya ket, mas makapangyayadiꞌ ya dyan siꞌko a kai ako gapo nin kumanaꞌ nin mataman tanan mangwarwar nin kurdon nin sandalyas na. 8 Siꞌko, say manꞌipamawtismo ko komoyo ket ranom; baleꞌ sya, say ipamawtismo na komoyo ket si Ispirito nan Dios,” wana.

9 Sin kapresan nan mampamawtismo ni Juan, rinmateꞌ yadtaw si Jesus nin nangibwat sa babalin Nazaret sa prubinsyan Galilea. Binawtismwan naya ni Juan itaw sa Ilog nin Jordan. 10 Ket tampor, sin inmarwas ya si Jesus sa ranom, naꞌkit ran niburwang a langit ket si Ispirito nan Dios a bilang yan kalapati, mangkumayupaꞌ yan mako kona ni Jesus. 11 Ket main anamaet nin busis a nangibwat sa langit nin kamiꞌnan nan Dios a narngeꞌ na. Wana, “Siꞌkay anak kon mangkawa-kawaꞌnanen ko. Napaririketan akon tuloy komo.”

12 Ket tampor si Ispirito nan Dios dinagdag nayan mako si Jesus sa kasan katawu-tawon lugar. 13 Ket itaw yan aꞌpat a puloꞌ a awro tan sugsugen nayan magkasalanan ni Satanas. Main itaw nin atap a uayep. Baleꞌ main anamaet itaw nin uanghil a mampangasikaso kona.

14 Sawanin, sin mangkapriso ya si Juan, si Jesus anamaet ket nako ya sa prubinsyan Galilea nin nipata-patandaꞌ nayay Mabistan Patandaꞌ a nangibwat konan Dios. 15 Wana, “Narateꞌ anay panaon nin piniliꞌ nan Dios. Say pagꞌaadiꞌ na ket dandani ana! Kanyaꞌ nin magbabawiꞌ kamo tan gurutan moyoynay pangwaꞌ nin kasalanan tan akuen moyaytin Mabistan Patandaꞌ!”

16 Sin niꞌsa a manlumalako ya sa rigrig nan Baybay Galilea, naꞌkit nasaray rwan mibsat nin maninilay, sara si Simon tan si Andres. Sin sain ket mampangikatkat saran eket. 17 “Kikalamoꞌ kamo kongko,” wana ni Jesus, “ta gawꞌen katamon maninilay, amboꞌ nin kunaꞌ no kai edet, nin tutawo.” 18 Ket tampor linakwanan ray eket ra tan nikikalamoꞌ sarayna kona.

19 Kai sara et nakakadayoꞌ nin tuloy, naꞌkit nasaray mibsat nin aꞌnak na ni Zebedeo a si Santiago tan si Juan. Itaw sara sa baluto ra a mampangunong saran eket ra. 20 Tampor nin kinayaban nasara anamaet ket linakwanan rayay ama ra tan saray tutawon inupaan ra sa baluto, ket nikikalamoꞌ sara kona ni Jesus.

21 Nako sara sa syudad nin Capernaum. Ket sin narateꞌ anay Awron Painawa ran Judio, tampor nin nako sarayna si Jesus sa sinaguga^e tan nangyakay ya konran kapada nan Judio. 22 Nakaꞌngap saray tutawo sa no paꞌnon pangangakay na ni Jesus banaꞌ ta say pangangakay na ket main nin pakayadiꞌ, amboꞌ nin bilang sa pangangakay ran Madudunong sa Gugan-gan ran Judio.

23 Main nin sayay lalakidtaw a nasrepan yan ispiriton dukaꞌ. Kapingmatan anan ginmuryaw ya a 24 wana, “Ah! Siꞌka Jesus a taga Nazaret, ani ket a kabiangan mo komi? Nako kadti para ta pigaw nin sidaen nakami ana? Tandaꞌ ko no siꞌno ka. Siꞌkay si Masantos nin nibakiꞌ nan Dios!”

25 Baleꞌ ginan-gan naya ni Jesus a ispiriton dukaꞌ a wana, “Misasaet ka! Lumakwan ka kona!”

26 Si ispiriton dukaꞌ ket pinamuluk-pulok nayay tawo, inmagsit yan maksaw miꞌsa linmakwan yayna kona. 27 Nakaꞌngap saray sarban itaw ket miirgu-irgo sara a wanra, “Peteg a naiduma yaytin baꞌyon akay! Sitin tawo, main nin kapangyadian na mataman konran ispiriton dukaꞌ ta tumulok sara sa igan-gan na.”

28 Ket tampor, naibandu-bando a maipaꞌkaꞌ kona ni Jesus sa intiron prubinsya nin Galilea.

29 Nangibwat sa sinaguga, tinmuloy yan tampor si Jesus tan saray tumutumbok na sa bali ra ni Simon tan Andres. Kalamoꞌ rasara si Santiago tan si Juan. 30 Sin sain, si katyangan nan babayi ni Simon nakaidaꞌ yan mangkaꞌmot, ket nibaritaꞌ rayti nin tampor kona ni Jesus. 31 Kinadanyan naya ket ginaꞌgetan nay gamet na tan binangon naya. Say amot na, kinumpaꞌ nin tampor. Ket nagsirbi yaynay babayi konra.

32-33 Sin sinumrep yaynay awro, nadinep sara sa ugsuran nan bali a sarba ran tutawo konan sitin babali. Inawit-awit rasara ngaꞌmin kona ni Jesus a main nin masakit tan saray nasrepan nin ispiriton dukaꞌ. 34 Ket abaw saray pinaandaꞌ nan main nin nagsikabarang nin sakit, tan abaw sara anamaet a pinalakwan nan ispiriton dukaꞌ. Kai nasara nin inaburuyan ni Jesus nin magꞌirgo a ispiriton dukaꞌ ta pigaw nin kai ra nin maipatandaꞌ no siꞌno ya.

35 Parbangon nin ararem et a lamang, nibangon yayna si Jesus tan nibwat yadtaw sa babali ket nako ya sa sayay lugar a matinek ket itaw dinmasal ya. 36 Ket si Simon tan saray kalalamoꞌ na kinrap raya. 37 Sin nadumog raya, wanra kona, “Mantingkapen rakan tutawo!”

38 Ket wana, “Anaod. Baleꞌ mako atamoyna sa kabaraybay nin bubabali ta pigaw nin itaw ket mangipatandaꞌ ako anamaet, banaꞌ ta sa sayti nin gagara a nako akodti.”

39 Ket naku-nako sara sa susinaguga ran Judio sa intiro nan prubinsyan Galilea nin nangipata-patandaꞌ tan namalakwan yan uispiriton dukaꞌ konran tutawo.

40 Niꞌsa, main nin sayay tawon mampagmasakit nin dukaꞌ sa katat a mantawagen nin liprusi a kinmadani kona ni Jesus. Nanalimukod yayti sa adapan na tan nipaingangaꞌdo na, “No rabay moyo,” wana, “magwaꞌ moyo nin maakoꞌ rako anamanaet nin tutawo a bilang sa gindat^f.”

41 Banaꞌ sa ingangaꞌdo na ni Jesus, nipababo nayay gamet na konan lipruso tan wana, “Oꞌ, rabay ko. Umandaꞌ^g kayna.” 42 Ket sin sain anan lamang inmandaꞌ yay tawo a rinminggas anay katat na. 43 Ket pinaibwat nayan tampor ni Jesus a tawo nin binibilin nayan maong 44 a wana, “Mangrengeꞌ kan maong. Andiꞌ mo nin ibari-baritaꞌ ti nin nangyadiꞌ sa siꞌnuman, no kai, dumiritso kan mako konan padiꞌ ta ipadar mon inmandaꞌ kayna. Ket banaꞌ sa nikapaandaꞌ mo, mangidaꞌton ka sigon sa Gugan-gan nin nibi na ni Moises^h ta pigaw nin ipaꞌkit mo konra a man-gawꞌen ko.”

45 Wanin man, si tawo, nibwat ya tan nibari-baritaꞌ nayna edet sa tutawo a ginwaꞌ na ni Jesus kona. Ket banaꞌ konan siti, abaw saray tutawon inmarak kona kanyaꞌ nin kai yayna nin basta-basta makapikaꞌ si Jesus sa nagsikabarang a babali, no kai edet, itaw ya sa lulugar a amboꞌ nin matawo. Wanin man, nako saran lamang a tutawo kona a nangibwat sa nagsikabarang a lulugar.