4 Sin nayadiꞌ yaynan nangyakay, wana kona ni Simon, “Mako atamo sa mataaw ket ipaꞌleg moyoy eket moyo ta pigaw nin makakalap.”

5 Ket niꞌbat na ni Simon, “Maistro, nikakayabi min nipaꞌleg a eket mi ket kasa anamaet nakalap mi. Baleꞌ ta wamoyo, inaboꞌ mi anaet.” 6 Sin nikatkat raynaod a eket ra, gulpi a nakalap ra a rumisang anay eket! 7 Ket inawesan rasaray kalalamoꞌ ra sa saya et nin baluto a umarak sara ta tulungan rasara. Inmarak saraynaod, ket pinnoꞌ ran kunaꞌ a rway baluto a dandani ana nin lumdeg.

8 Sin naꞌkit nayti ni Simon Pedro, nanalimukod ya sa adapan na ni Jesus ket wana, “Catawan, kadayꞌan rako ta saya akon makasalanan!” 9 Wanti a wana banaꞌ ta pinasyan nipakaꞌngap ra sa kaꞌbawan nin nakalap ran kunaꞌ. 10 Ket pati sara anamaet a katagem na a si Santiago tan si Juan a aꞌnak na ni Zebedeo, nakaꞌngap saran lamang.

Baleꞌ wana ni Jesus, “Simon, andiꞌ ka nin masalak! Mangibwat sawanin ket tawoynay paꞌsar silayen mo.” 11 Sin naiduong raynay baluto ra, linakwanan ray sarba tan nikikalamoꞌ sarayna kona ni Jesus.

12 Sayay awro, sin itaw sara si Jesus sa sayay babali, sukat anan main nin nannaꞌ kona nin sayay lalakin liprusyen. Kaꞌkit na kona ni Jesus, nignaꞌ sa lutaꞌ a rupa nan tinmalimukod sa adapan na ta kidawat yan ingangaꞌdo, ket wana, “Maistro, no rabay moyo, magwaꞌ moyo nin maakoꞌ rako anamanaet nin tutawo a bilang sa gindat^b.”

13 Ket nipababo nayay gamet na konan liprusyen, miꞌsa wana, “Oꞌ, rabay ko. Umandaꞌ kayna!^c” Ket tampor nakasay liprusi na. 14 Ket binibilin naya ni Jesus a wana, “Andiꞌ moyti nin ibaritaꞌ sa siꞌnuman, ana edet mako ka konan padiꞌ ta ipadar moy nikapaandaꞌ mo. Miꞌsa mangipaidaꞌton ka sigon sa Gugan-gan nin nibi na ni Moises^d nin mangipaꞌkit konran tutawo a limpyo kayna.”

15 Wanin man, laloynan naibantog a maipaꞌkaꞌ kona ni Jesus. Mas inmabaw saray tutawon mako mangrengeꞌ kona tan mapaandaꞌ sa masakit ra. 16 Baleꞌ ugaliꞌ na ni Jesus a mako sa lugar a kasan tawo ta pigaw nin dumasal ya.

17 Sin sayay awro anaet, mampangyakay ya si Jesus tan iti kona a pakayadiꞌ nan Dios a makapaandaꞌ yan main nin masakit. Itaw sara anamaet nin mantumekreꞌ a umno ran Pariseo tan mangangakay nin Gugan-gan a nangibwat sa abaw nin lulugar sa Galilea tan Judea, pati sa Jerusalem.

18 Ket rinmateꞌ saray umno ray lulalaki. Awit rayay sayay lupoy nin nakaidaꞌ sa idaan na. Naningkap saran padalan ta pigaw nin maisrep raya ket maikadani raya kona ni Jesus. 19 Sin kai raya nin maisrep banaꞌ ta letletan ran tutawo, niyuliꞌ raya sa bubong tan binutbutan ray atep a tisaꞌ sa temben na ni Jesus, miꞌsa niuyꞌoy raya nin iti sa idaan na a kustu-kusto sa adapan na ni Jesus sa kabutlayan ran abaw nin tawo. 20 Naꞌkit nay kaalakyan nin pagmamatalek ra ket wana konan lupoy, “Amigo, napirduna anay kukasalanan mo.”

21 Konan siin, wanra sa nakem ran saray Pariseo tan Madudunong sa Gugan-gan ran Judio, “Siꞌno yayti ket a manꞌuꞌna-uꞌnawan nayay Dios? Anta si Dios tamoꞌ a makapirdunan kukasalanan!” 22 Baleꞌ tandaꞌ na ni Jesus a iti sa kaisipan ra, ket wana konra, “Mayin nin wanin a kaisipan moyo? 23 Kumon ket ‘Mas magwaꞌ nin ibaritaꞌ a makalalako kayna, dyan si mapirduna anay kukasalanan mo!’ 24 Ket ta pigaw nin matandaan moyo a siꞌkon si Pinaitawo ket main nin pakayadiꞌ kon mamirdunan kukasalanan iti sa lutaꞌ,” wana konan lupoy, “Mibangon ka. Awiten may idaan mo tan sumubliꞌ kayna komoyo.” 25 Ket tampor, nibangon yan nabantayan nin sarba tan kinalap nayay idaan na tan nugot ya sa bali ran manraywen nayay Dios. 26 Say sarba ket nakaꞌngap nin tuloy ket rinayo rayay Dios. Awit a liꞌmo, wanra, “Talagan makapakaꞌngap ti nin nangyadiꞌ a naꞌkit tamo konan sitin awro.”

27 Kayadiꞌ, rinmikor ya si Jesus. Ket naꞌkit nayay maniningir nin buis a mangaran Levi nin nakatekreꞌ sa upisina na. Wana kona, “Magꞌin kan tumutumbok ko.” 28 Ket linakwanan nay sarba tan nayi yayna kona ni Jesus. 29 Nanadyaꞌ yan alakin pakan si Levi sa bali na para kona ni Jesus. Ket abaw saray maniningir nin buis tan raruma et nin tawo a kadungo ran nangan. 30 Binalaw-balaw rasara nin saray Pariseo tan saray Madudunong sa Gugan-gan nin kalalamoꞌ ra a tumutumbok na ni Jesus. Wanra, “Mayin a kidungo kamo konran maniningir nin buis tan konran raruman makasalanan?” 31 Baleꞌ si Jesus a inumbat konra nin wana, “Amboꞌ nin saray marigsa a makatkap nin duktor, no kai edet, saray main nin masakit. 32 Nako akodti sa lutaꞌ nin mamagbabawiꞌ konran makasalanan, amboꞌ nin konra nin kano ket matunong sara!”

33 Sawanin, main nin saray wanra kona ni Jesus, “Saray tumutumbok na ni Juan a Mammawtismo, wanin sara anamaet a tumutumbok ran Pariseo, pirmi saran magkulasyon tan dumasal, baleꞌ saray tumutumbok mo, mangan tan minom sara tanan pirmi!”

34 Inubatan nasara ni Jesus nin sayay alimbawaꞌ a wana, “Bilang wadiꞌ, saray kumbidado nin bisita sa sayay bansal, kidungo saran mangan legꞌan nan iti et nin nubyo konra. 35 Baleꞌ rumateꞌ liꞌ a panaon a maikadayoꞌ ya ket no saytaw liꞌ, magkulasyon sarayna.” 36 Ket wanan lamang ni Jesus a sayay pangingiyarig, “Kasan mamisang nin baꞌyon aysing ta pigaw nin italiꞌneb ya sa maꞌran. No gawꞌen in, si baꞌyon aysing masidaꞌ ya tan si baꞌyo nin italiꞌneb ket kai ya nin maibagay sa maꞌran. 37 Wanin lamang, kasan mangikwa nin mampibaliw nin arak sa maꞌran nin katat nin supot a pangangwan ta no gawꞌen a wanin, matubrak ya, ket mapirdi a arak tan si katat a pangwan, masidaꞌ ya. 38 Matkap a say baꞌyon arak ket ikwa sa baꞌyon pangwan. 39 Anamaet, kasan mangrabay sa baꞌyon arak no mangnginom saran maꞌran nin arak ta wanra, ‘Mas mataway a maꞌran.’ ”