Pinaandaꞌ naya ni Jesus a Sayay Lupoy
2
Napalabas a umnoy awro, sinmubliꞌ ya si Jesus sa Capernaum. Naibari-baritaꞌ a itaw ya sa balin mampiikapan na. 2 Ket sin sain, pinasyan kaꞌbawan ran tawon nadinep itaw a mataman sa liwaꞌ nan purta ket kai nin makaseksek. Sin kapresan na ni Jesus nin manꞌipapalaway konra a minsahi nin nangibwat konan Dios 3 main nin nirateꞌ ran tutawo nin sayay lalakin lupoy a awit rayan aꞌpat nin katawo. 4 Ket sin kai sara nin makakadani kona ni Jesus banaꞌ ta letletan ran tutawo, niyuliꞌ raya sa bubong nin binutbot ray atep sa temben na ni Jesus, miꞌsa raya nin niuyꞌoy nin nakaidaꞌ sa undayon na itaw sa adapan na ni Jesus. 5 Ket sin naꞌkit na a pagmamatalek ra kona, wana konan lupoy, “Amigo, napirduna anay kukasalanan mo.”6 Sin sain, main itaw nin nakatekreꞌ nin umno ran Madudunong sa Gugan-gan ran Judio. Mampangisip-isip sara a wanra sa nakem ra, 7 “Mayin ket a sitin tawo ket magꞌirgo yan wanin! Manꞌuꞌna-uꞌnawan nayay Dios! Anta si Dios tamoꞌ nin bukod a makapamirdunan kukasalanan!”
8 Baleꞌ tandaꞌ na in ni Jesus nin iti sa nakem ra ket wana konra, “Mayin nin wanin a kaisipan moyo? 9 Wamoyo tana kumon ket mas magwaꞌ et nin ibaritaꞌ konan lupoy a ‘Mibangon ka, awiten may undayon mo tan lumalako ka,’ dyan si ‘Napirduna ana a kukasalanan mo!’ 10 Ket, ta pigaw nin matandaan moyo a siꞌkon si Pinaitawo ket main nin pakayadiꞌ kon mamirdunan kukasalanan iti sa lutaꞌ,” ket wana ni Jesus konan lupoy, 11 “Ibaritaꞌ ko komo: Mibangon ka. Awiten ma in si idaan mo ta sumubliꞌ kayna komoyo.”
12 Ket nibangon yay tawo tan inawit nayaynay idaan na tan nibwat yayna nin nabantayan ra ngaꞌmin. Ket nakaꞌngap saran maong a tutawo ket rinayo rayay Dios a wanra, “Ni kaꞌnuman, kai kami et gapo nin nakaꞌkit nin bilang sa wanti!”
Kinayaban naya ni Jesus si Levi
13 Ket sayay sakalakon awro, nako ya anamanaet si Jesus sa rigrig nin baybay. Abaw saray tutawo nin inmarak-arak kona, ket nangipapala-palaway yan minsahi nan Dios konra. 14 Ket niꞌsa sin manlumalako ya, naꞌkit naya si Levi a anak na ni Alfeo nin nakatekreꞌ itaw sa upisinan pammayadan nin buis. Wana ni Jesus kona, “Magꞌin kan tumutumbok ko.” Inumdeng ya si Levi tan nayi ya kona ni Jesus.
15 Ket sin nangan yadtaw si Jesus tan saray tumutumbok na sa bali na ni Levi, abaw saray maniningir nin buis tan amboꞌ nin rilihyuso a kadungo ra. Wanin ta abaw saray mantumumbok kona ni Jesus. 16 Main itaw nin Madudunong sa Gugan-gan a myimbron dupong ran Pariseo a naꞌkit raya si Jesus nin mangkidungon mangan konran amboꞌ nin rilihyuso tan maniningir nin buis, ket wanra konran tumutumbok na, “Ambaleꞌ a mangkidungo ya konran wanin a tutawo?”
17 Narngeꞌ nayti ni Jesus ket inubatan nasaran sayay alimbawaꞌ a Pariseo. Wana, “Amboꞌ nin saray marigsa a makatkap nin duktor, no kai edet, saray main nin masakit. Kapada konan siin, nako akodti sa lutaꞌ nin mamagbabawiꞌ konran makasalanan, amboꞌ nin konra nin kano ket matunong sara!”
Say Maipaꞌkaꞌ sa Pagkukulasyon
18 Main nin niꞌsa, saray tumutumbok na ni Juan tan saray tumutumbok ran Pariseo ket kai sara nin mampangan ta saya ya in nin kaugalian ran Judio si magkulasyona. Ket main nin tutawo nin nako kona ni Jesus ket wanra, “Saray tumutumbok na ni Juan tan saray tumutumbok ran Pariseo ket magkulasyon sara. Ket ambaleꞌ nin saray tumutumbok mo, kai sara gapo nin mampagkulasyon?”
19 Wanan niꞌbat ni Jesus konra nin sayay alimbawaꞌ, “No main nin kasal, kasan sapo nin saray kumbidado sa bansal ket kidungo saran mangan legꞌan nan iti et nin nubyo konra. Kai gapo nin magwaꞌ a magkulasyon sara. 20 Baleꞌ rumateꞌ liꞌ a panaon a maikadayoꞌ ya ket no saytaw liꞌ, magkulasyon sarayna.”
21 Wana et ni Jesus maipaꞌkaꞌ sa baꞌyon akay na, “Kasan tawon manaliꞌneb nin baꞌyon abel sa maꞌran a aysing. No gawꞌen a wanin, si baꞌyon abel kumsen ya liꞌ ket guruyen naya a maꞌran ket maluod yay bisang na. 22 Wanin anamaet, kasan mangikwa nin mampibaliw nin arak sa maꞌran a katat nin supot a pangangwan, ta no gawꞌen in, si mampibaliw nin arak tubraken naya, ket masidaꞌ yay supot tan mapirdin maꞌmet a arak. Matkap a say baꞌyon arak ket ikwa sa baꞌyon pangwan.”
Makapangyayadiꞌ ya si Jesus Maipaꞌkaꞌ sa Awron Painawa
23 Sayay awron Sabado a syay Awron Painawa ran Judio, manlumabas sara si Jesus sa gagawaꞌ. Ket namursi-pursing saran rinakay nin trigo a tumutumbok na. 24 Ket main nin Pariseo a wanra kona ni Jesus, “Oy, kiten mosaray tumutumbok mo! Man-gawꞌen ra in, anta maiyawaꞌ nin mangyatab no Awron Painawa.”
25-26 Ket wana yapoꞌ ni Jesus, “Nalingwanan moyoyna palayi a nabasa moyodtaw sa Masanton Kasuratan maipaꞌkaꞌ sa ginwaꞌ na ni David nin mismo sin panaon a si Abiatar a Sangkataꞌgayan nin Padiꞌ?b Sin saytaw, nabitilan ya tan saray kalalamoꞌ na ta kasaynan ikabyay ra, ket sinumrep ya sa Bali nan Dios tan kinnan nay tinapay a nidaꞌton konan Dios. Maiyawaꞌ anaod a mangan nin saytin tinapay ta saray aburuyan tamoꞌ nin mangan ket saray pupadiꞌ.c Baleꞌ naaburuyan ya si David nin nangan tan binyan nasara anamaet a lamang a kalalamoꞌ na.”