3 Niꞌbat na ni Jesus, “Nalingwanan moyoyna palayi a nabasa moyodtaw sa Masanton Kasuratan maipaꞌkaꞌ sa ginwaꞌ na ni David nin mismo sin nabitilan ya tan saray kalalamoꞌ na ta kasaynan ikabyay ra?^a 4 Kai para a sinumrep ya sa Bali nan Dios tan kinalap nay tinapay a nidaꞌton konan Dios? Ket sayti nitatawꞌan ran kinnan ni David tan saray tutawo na. Maiyawaꞌ anaod a mangan nin saytin tinapay ta saray aburuyan tamoꞌ nin mangan ket saray pupadiꞌ.^b

5 Kai moyo para anamaet nin maalilbiꞌ sa mabasa-basa sa Libron Gugan-gan a tepeꞌ nin Awron Painawa, saray pupadiꞌ no itaw sara sa Timplo nan Dios ket mansubagen ray Gugan-gan ta man-gawꞌen ray trabaho ra? Mampagtrabaho saran pageꞌ no Awron Painawa baleꞌ kai sara nin mampagkasalanan.^c 6-7 Wana nin Dios a mabasa sa Masanton Kasuratan, ‘Say mapaingangaꞌdo kamo konran kapada moyon tawo a makapaririket kongko, amboꞌ a say daꞌton moyo.’^d No mataros moyo tamoꞌ kumon a pipaꞌkaan nan siin, kai moyo sara nin sinintinsyawan a kai nin nagkasalanan. Ibaritaꞌ koyti komoyo a iti sawanin komoyo a pagꞌaadiꞌ nin mas makapangyayadiꞌ dyan saytaw say maipaꞌkaꞌ konan Timplo nan Dios. 8 Wanin ta siꞌkon si Pinaitawo, siꞌko a makapangyayadiꞌ maipaꞌkaꞌ sa Awron Painawa.”

9 Linmakwan yadtaw si Jesus tan nako ya sa sinaguga radtaw nin Judio. 10 Main nin sayay lalakidtaw a nati yay sayay takyay na. Main anamaet nin Pariseo nin itaw. Ket, banaꞌ ta mampaningkap saran padalan a maparsawan rayan sinmubag sa Gugan-gan si Jesus, nitepet ra kona, “No paandaen nayan sayay tawo a sayay main nin masakit no Awron Painawa, sinubag na kasi a Gugan-gan?”

11 Niꞌbat na ni Jesus, “No nanaboꞌ ya sa ubot a ayep nan saya komoyo sa Awron Painawa, impusiblin kai naya nin keen arwasen abirno nin Awron Painawa. 12 Ket mabli yan adayoꞌ a sayay tawo dyan ayep. Kanyaꞌ nin kai tamo nin subagen a Gugan-gan no tumulong atamo konan sayay tawo no Awron Painawa.”

13 Kaaram, wana ni Jesus konan lalaki, “Ipaꞌnat may takyay mo.” Ket nipaꞌnat nayan lalaki a takyay na tan sin sain, linmimpyo ya, a kasaynan nidumawan na konan sayay takyay na.

14 Sin sain, linmakwan saraynadtaw a Pariseo tan nagꞌiirgwan ra no paꞌno nin pammapati ra kona ni Jesus.

15 Sin natandaan na ni Jesus a plano ran gawꞌen nin Pariseo, linmakwan ya konan sitaw a lugar. Abaw saray tutawo nin nayi kona tan tinambar nasara ngaꞌmin a main nin masakit. 16 Baleꞌ binibilin nasara nin andiꞌ ra nin ibari-baritaꞌ a ginwaꞌ na. 17 Ket sa wanin, matukid a wana nin Dios a nisurat na ni Prupita Isaias, a wana,

22 Main nin niꞌras ra kona ni Jesus nin lalaki a bulag tan umel ta nasrepan yan ispiriton dukaꞌ. Pinaandaꞌ naya ni Jesus ket makaꞌkit tan makapagꞌirgo yayna. 23 Ket, saray tutawon itaw, nakaꞌngap saran awit a liꞌmo. “Siti na palayi yaytaw si nipangakoꞌ a puri na ni David?” wanra nin nitepetan.

24 Main nin Pariseo nin itaw tan sin narngeꞌ rayti wanra, “Makapalakwan yan ispiriton dukaꞌ banaꞌ ta si Beelzebul a syay uunuren ran uispiriton dukaꞌ ket binyan nayan pakayadiꞌ.”

25 Nataros na ni Jesus a iti sa kaisipan ra, kanyaꞌ nin wana konra, “No main nin sayay nasyon ket matau-tao tan milalaban saray tutawo na, kai ya nin magnayon. Wanin anamaet, no sa sayay pammali o babali, mapuruk-purok sara nin miaaway a saya tan saya, misisyay liꞌ a piratꞌanan ra. 26 Edet a lamang, no say puon nin pakayadiꞌ ko ket kona ni Satanas, mangkuntrawen nay kadiryan na kanyaꞌ nin paꞌno ey a katutuloy nin pagꞌaadiꞌ na? 27 Wamoyo nin siꞌko ket palakwanen kosaray ispiriton dukaꞌ banaꞌ sa pakayadiꞌ na ni Beelzebul. Sara pa a tumutumbok moyo, mamalakwan sara paran ispiriton dukaꞌ a mangibwat anamaet sa pakayadiꞌ na, o si Dios a mamin pakayadiꞌ konra? Saran mismo a mamatutuo nin abas kamo sa manꞌiparsa moyo kongko! 28 Baleꞌ sawanin, ta say pakayadiꞌ kon mamalakwan nin ispiriton dukaꞌ ket ibat konan Ispirito nan Dios, ipadar anaod nin sayti a rinmateꞌ anay udas nin magꞌadiꞌ yaynadti a Dios.

29 Tutuo in ta si Satanas ket baraꞌmo yan sayay magsen a tawo. Kasan makasrep sa bali na ta pigaw nin kalapen ray kukayadian na no kai raya yapoꞌ nin baruren in a magsen nin tawo. Ket no nabaror rayayna, magwaꞌ rayna nin kalapen ngaꞌmin a rabay ra. 30 Si siꞌnuman a kai nin kipasayan kikalamoꞌ kongko, kuntra ya kongko. Si kai nin tumulong kongko, sambenan nako.

31 Banaꞌ sa sain a pammadukaꞌ moyo sa gawaꞌ nan Ispirito, tandaan moyoyti: Mapirduna saray tutawo sa animan a kasalanan ra, mataman et sa dukaꞌ a irgwen ra konran kapada ran tawo o konan Dios. Baleꞌ si siꞌnuman a mamadukaꞌ nin kabistawan nan Ispirito nan Dios, kai ya gapo nin mapirduna. 32 Mapirduna ya et a siꞌnuman nin magꞌirgo nin kuntra kongko, siꞌkon si Pinaitawo, baleꞌ si siꞌnuman a magꞌirgo nin kuntra konan Ispirito nan Dios, kai ya gapo nin mapirduna anggan makaꞌnuman.”

33 “Rway bagay tamoꞌ a maibaritaꞌ maipaꞌkaꞌ sa sain. No mabistay bunga ket mabista anamaet a ibwatan, o no dukaꞌ a bunga ket dukaꞌ anamaet a ibwatan. Sain a bilang nin matandaan no mabista o makapoy yay kayo a maꞌkit sa bunga na. 34 Ket siꞌkamo, kasan maabig a maibaritaꞌ moyo ta dukaꞌ a pigagawaꞌ moyo. Baraꞌmo kamon masirib a ulay! Lumiwaꞌ nin lumiwaꞌ sa bebey nan tawo no ani a iti sa kanakman na. 35 Si tawon maabig, maabig a ibaritaꞌ na ta maabig a pinanakem na. Baleꞌ si tawon maraet, maraet anamaet a ibaritaꞌ na ta maraet a pinanakem na. 36 Ibaritaꞌ koyti komoyo a no Awro liꞌ nin Manintinsya yay Dios, ubatan nin barang saya a kasan kabalikasan nin susaritaꞌ a inirgo na. 37 Anaod, sigon sa susaritaꞌ a inirgo mo, sintinsyawan naka liꞌ nin Dios no nepeg a dusawen naka o ibaritaꞌ nan mapteg ka.”

38 Kaaram, saray Madudunong sa Gugan-gan tan saray Pariseo nin itaw wanra kona ni Jesus, “Maistro, mangwaꞌ ka pa edet nin pakaꞌkitan ta pigaw nin maꞌkit min si Dios a ibwatan nin pakayadiꞌ mo.”

39 Wana ni Jesus konra, “Siꞌkamoynan tutawo sawanin a dukaꞌ tan malamang konan Dios! Sukat a kidawat kamo kongko nin pakaꞌkitan! Kasan pakaꞌkitan a ibat ako sa langit a ipaꞌkit komoyo no kai kal-la tamoꞌ sitaw si naꞌkit a nangyadiꞌ kona ni Prupita Jonas, 40 a itaw yan tuloy awro tan yabi sa rarem nin tyan nan alakin kunaꞌ^f. Wanin anamaet liꞌ kongko, siꞌkon si Pinaitawo, tuloy awro tan yabi ko liꞌ nin iti sa rarem nin lutaꞌ nin naitabon.^g 41 No Awro liꞌ nin Manintinsya yay Dios, umadap sara liꞌ a taga Ninive ket ibaritaꞌ ra liꞌ a manepeg nin dusawen kamo, ta sara, sin narngeꞌ ray nipata-patandaꞌ na ni Jonas, nagbabawiꞌ sara tan ginurutan raynay dukaꞌ a pigagawaꞌ ra.^h Siꞌkamo baleꞌ, iti ya sawanin komoyo a mas ataꞌgay et a pakataros dyan si Jonas baleꞌ kai moyo nin manꞌakuen a akay na. 42 No Awro liꞌ nin Manintinsya yay Dios, umadap tan magtistigos ya liꞌ anamaet a Rina nin taga Shebaⁱ a manepeg nin dusawen kamo, ta sya, abirno nin aninay kadayꞌan nin ibwatan na, nako ya nin nangrengeꞌ sa madudunong nin akay na ni Adiꞌ Solomon. Siꞌkamo baleꞌ, iti ya sawanin komoyo a mas ataꞌgay et a kadunungan dyan si Solomon baleꞌ kai moyo nin akuen a akay na.”

43 “Wanti et e: No napalakwan yaynay ispiriton dukaꞌ a nakasrep sa sayay tawo, mako ya nin mikadaw sa makrang nin lugar maningkap nin piikapan na. No kasan maꞌkit na 44 ket wana sa nakem na, ‘Sumubliꞌ akodtaw pa sa ibwatan kon niikapan.’ Ket sumubliꞌ ya tan marateꞌ nayan kasan mampiikap; naringgasan tan nasider ya. 45 Edet, mako ya managyat nin pito ra et nin ispiriton mas dukaꞌ et dyan sya miꞌsa sumrep saran miikap konan sitaw a tawon ibwatan na. Anaod, mas grabi et liꞌ a kapapaꞌsar nan sitaw a tawo dyan sin nuꞌna.

Wanin a mangyadiꞌ komoyon dukaꞌ a tutawo konan sitin panaon.”

46 Ket kapresan nan mampagꞌirgo ni Jesus konran tutawo sin rinmateꞌ ya si nanay na tan saray bubsat na. Mantumaꞌgan saradtaw kona sa rikor ta rabay ray kiirgo kona. 47 Main nin nangipatandaꞌ kona a wana, “Maistro, si nanay mo tan saray bubsat mo ket itaw sara sa rikor. Rabay ray kiirgo komo.”^j

48 Ket wana ni Jesus kona, “Oꞌ, tutuo. Itaw sara. Baleꞌ saray ina tan bubsat kon talaga ket sakalako sara.” 49 Nitudoꞌ nasaray tumutumbok na ket wana, “Sarayti a ina tan bubsat ko. 50 Ibaritaꞌ koy wanin ta si siꞌnuman a man-gumwaꞌ nin karabayan nan Ama ko sa langit, syay ina o busat ko.”