Siꞌno ya a Cristo
11
Sawanin, sin nayadiꞌ nasarayna nin binibilin ni Jesus a labinrwan tumutumbok na, linmakwan yayna konan sitaw a lugar tan nako ya sa kabaraybay nin bubabali ket itaw nipatandaan tan nipapalaway nayay Mabistan Patandaꞌ konran tutawo.2 Si Juan a Mammawtismo sin sain ket mangkapriso ya. Natandaan nay maipaꞌkaꞌ sa mumilagro nin ginwa-ginwaꞌ na ni Jesus a syay Cristo ket nangibakiꞌ yan tumutumbok na nin mako raya nin tepetan. 3 Wanra kona ni Jesus, “Siꞌkayna paraytaw si nipangakoꞌ nan Dios a rumateꞌ iti nin magꞌadiꞌ, o main et nin sakalakon tagaꞌnan mi?”
4 Niꞌbat na ni Jesus konra, “Sumubliꞌ kamo kona ni Juan ket ibaritaꞌ moyo kona a narngeꞌ moyo maipaꞌkaꞌ sa nibaritaꞌ ko tan say naimatunan moyon ginwaꞌ ko. 5 Ibaritaꞌ moyo kona a saray bulag, makaꞌkit sarayna; saray lupoy, makalalako sarayna; saray main nin dukaꞌ a masakit sa katat, napaandaꞌ sarayna; saray telek, makarngeꞌ sarayna; saray nati, pinasubliꞌ kosaran mabyay; tan konran maidap a byay, manꞌipatandaꞌ koyay Mabistan Patandaꞌ. 6 Ket, makarmaꞌ yay tawon kai gapo nin maglat a pangungunor na kongko.”
7 Kaibwat ran tumutumbok na ni Juan, inmadap ya si Jesus konran abaw a tutawodtaw nin ibaritaꞌ na a maipaꞌkaꞌ kona ni Juan, a wana, “Sin nako kamodtaw sa lugar a amboꞌ nin matawo, ani a inilalwan moyon maꞌkit itaw? Sayay tawo para a say pinanakem na ket kapada nin talaib a manꞌirpa-irpay nan siri? Kai! 8 Ani edet a rabay moyon maꞌkit? Sayay tawon nisket nin mabli tan mapustura? Amboꞌ anaod nin wanin ta saray tawon misket nin mamabli ket miikap sara sa palasyo. 9 Ani edet a rabay moyon maꞌkit? Kai para si sayay prupita nan Dios? Oꞌ baleꞌ ibaritaꞌ ko komoyo a amboꞌ yan basta nin prupita si Juan. 10 Wanti ey wanan Dios sa Masanton Kasuratan maipaꞌkaꞌ kona,
‘Siꞌko, ibakiꞌ koyan muꞌnayna komo a tawo kon
mangipatandaꞌ nin maipaꞌkaꞌ komo ta pigaw nin isadyaꞌ nay dalanan mo.’a
11 Ibaritaꞌ koyti anaod komoyo: Kasa et gapon niyanak nin makakipada kona ni Juan a Mammawtismo. Abirno nin wanin baleꞌ, si sangkaayupaan nin tawon iti sa sirong nin pagꞌaadiꞌ nan si mangibwat sa langit, ket mas ataꞌgay ya et dyan si Juan. 12 Anaod, nangibwat ana sin nitaranaꞌ na ni Juan a mangipatandaꞌ nin maipaꞌkaꞌ konan si tinudoꞌ nan adiꞌ nin Dios angga et sa sayti nin awro, mangkapasuet nin ipadar ana a pagꞌaadiꞌ nin mangibwat sa langit, tan abaw saray tutawo nin manꞌipasuet ray sumrep.b 13 Bilang sa wanin a naꞌteng anan naipatandaꞌ konran tutawo maipaꞌkaꞌ konan magꞌadiꞌ a mangibwat sa langit, nangibwat et kona ni Moises tan saray prupita anggan sa taranaꞌ nin pakatukid sin rinmateꞌ ya si Juan. 14 Ket akuen moyo pa a si Juan ket syay Eliasc a mantagaꞌnan moyon sumubliꞌ. 15 Siꞌkamon manrumngeꞌ, adalen moyoyti nin maong.”
Amboꞌ yan Wantaw a Cristo konan si Mantagaꞌnan ran Rumateꞌ
16 “Ani a pangipadawan ko komoyo nin tutawo konan sitin panaon? Aꞌnak. Ipada katamo konran aꞌnak a mampiikap sa plasa. Mangkumaꞌsel saray raruma konran kaikap ra a wanra,
17 ‘Mampanugtog kami baleꞌ kai kamo nin magbayli;
anta mangkibereng kami komoyo ket kai kamo anamaet nin mangabet-abet.’
18 Wanin ta, sin rinmateꞌ ya si Juan, naꞌkit moyon nagkula-kulasyon ya tan kai ya gapo ninom nin arak, ket wamoyo, ‘Ya! Kurang-kurangen! Nasrepan yan ispiriton dukaꞌ!’ 19 Wanin a lamang anamaet sin rinmateꞌ akon si Pinaitawo nin mampangan tan mampinom ako, ket wamoyo, ‘U! Kikiten moyayti e nin tawo! Masibaꞌ ya tan mainom yan arak! Amigo rayan maniningir nin buis tan saray raruma et nin amboꞌ nin rilihyuso.’ Baleꞌ,” wana ni Jesus, “sa kabibyay ran saray mampagmatalek konan Dios, maꞌkit nin kusto a kadunungan na.”
20 Ket binalaw nasara ni Jesus a tutawo sa lulugar a nangwaan nan abaw nin mumilagro ta kai ra et nin nagbabawian a dukaꞌ a gawaꞌ-gawaꞌ ra. 21 “Ay, kadoꞌ kamoyna, siꞌkamon tagadti sa Corazin tan siꞌkamon tagadti sa Betsaida! Oꞌ ta abaw a mumilagron ginwaꞌ kon para komoyo baleꞌ kai moyo nin nagbabawian a kukasalanan moyo. No ginwaꞌ ko in kumon itaw sa Tiro tan Sidon, naꞌteng sarayna kumon nin nisulot nin langgutsi tan tinmekreꞌ sa abunsyang a tutawodtaw nin mangipaꞌkit nin pagbababawiꞌ ra sa kukasalanan ra. 22 Sawanin edet, ibaritaꞌ ko komoyo, sa Awro liꞌ nin Manintinsya yay Dios, mas mabyat liꞌ a dusa nin ibi na komoyo dyan konran taga Tiro tan taga Sidon.
23 Ket siꞌkamo anamaet nin tagadti sa Capernaum, ipaꞌkaꞌ moyo layin raywen rakamo sa langit! Kai anaod! Kasan sapon itampal rakamo sa impyirno! No ginwaꞌ kodtaw kumon sa Sodoma a mumilagro nin ginwaꞌ ko sa lugar moyo, kai naya kumon nin sinidaꞌ nin Dios a Sodoma tan main ya et kumon nin babali anggan sawanin. 24 Sawanin edet, ibaritaꞌ ko komoyo, sa Awro liꞌ nin Manintinsya yay Dios, mas mabyat liꞌ a dusa nin ibi na komoyo dyan say ibi na konran tutawo sa Sodoma.”
Pangibwaten nan Cristo nin Mainawnan a Kabibyay
25 Sin sain, wana ni Jesus, “Ama ko a Uunuren sa langit tan sa lutaꞌ, raywen kata ta kai mo nin nipatandaan konran madudunong tan di-adal nin tutawo a katutuꞌwan, no kai edet, nipatandaan moyti konran saray maayupaꞌ. 26 Oꞌ a ta wanin a makapaririket komo, Ama.”
27 Wana et ni Jesus konran tutawo, “Nipagamet nayna kongko nin Ama ko nin gawꞌen tan tandaen a sarba. Oꞌ, siꞌko a si anak na tan si Ama ko tamoꞌ a mitandaan nin peteg, pati sara et a pilien kon pangipadaran kona.
28 Umarak kamo kongko, siꞌkamo ngaꞌmin nin gawaꞌ ana nin gawaꞌ tan mangkabyatan, ta siꞌkoy painawnan moyo. 29 Tumumbok tan paiyakay kamo kongko ta madaliꞌ akon katarusan tan maayupaꞌ a nakem ko, ket makadumog kamon inawa nin byay. 30 Mainumꞌay a ipasunor ko, tan amboꞌ nin maidap tukiden a ipagwaꞌ ko komoyo.”