Sin adani sarayna sa bali nan kapitan, nangibakiꞌ ya a kapitan nin umno ray amigo nan ibaritaꞌ rayti kona ni Jesus, “Ser, andiꞌ kayna nin paabaraꞌ nin mako et sa bali mi ta kai ako kumanaꞌ a sumrep ka sa bali mi. 7 Kanyaꞌ anamaet nin kai ako nin nagꞌatribidon nako komo. Sadag anan ibaritaꞌ mo, ‘Oꞌ, limpyo yayna.’ ket lumimpyo yaynay kawaꞌnan kon alilaꞌ ko. 8 Oꞌ, maibaritaꞌ in ta mantumulok akon lamang konan si nangikwa kongkodti, tan main nin susundaloꞌ a iti sa pakauray ko. No ibaritaꞌ ko konan sayay sundaloꞌ ko, ‘Mako kadtaw e,’ ket mako yaynaod; ket konan saya anamaet ibaritaꞌ ko, ‘Mako kadti,’ ket umarak ya kongko. Wanin anamaet a lamang konan aripen ko. No wangko kona, ‘Gawꞌen mayti,’ gawꞌen ta gawꞌen naya anaod.”

9 Nakaꞌngap yan tuloy kona si Jesus sin narngeꞌ nayti. Ket inmadap ya konran kaꞌbawan a mantumumbok kona tan wana, “Ibaritaꞌ koyti komoyo, kasa et gapon narngeꞌ kon main nin wantin pagmamatalek mataman kontamon Israelita!” 10 Ket sin nakarateꞌ saraynadtaw sa bali a nibakiꞌ, naratꞌanan rayan limpyo anay aripen.

11 Amboꞌ nin naꞌteng, nako ya si Jesus sa babali nin Nain. Nayi saray tumutumbok na tan abaw nin tutawo. 12 Sin adani sarayna sa serpan sa babali, nakaꞌkit saran mako manabon. Si nati, lalaki ya nin kapagkapag a anak nan sayay babayin balo. Pinasyan kaꞌbawan ran tutawon ibat sa babali a kipanabon. 13 Sin naꞌkit naya ni Jesus tin babayi, kinaꞌdwan naya ket wana kona, “Andiꞌ ka nin umakis.” 14 Miꞌsa, kinmadani ya si Jesus sa kamiꞌnan nan nati tan ginaꞌgetan nayay mampangawitan ra kona. Ket, tinumgen saray mampamalatay. Sawanin, wana konan nati, “Arikong, ibaritaꞌ koyti komo, mibangon ka!” 15 Nibangon yaynaod a nati tan nagꞌirgo ya. Miꞌsa, wana ni Jesus konan ina na, “Syayna e a anak mo.” 16 Sarba ran itaw, linmiꞌmo saran tuloy ket rinayo rayay Dios nin wanra, “Ay! Rinmateꞌ ya kontamoy sayay makapangyayadiꞌ a prupita nan Dios! Iti ya ta pigaw nin tulungan natamon tutawo nan Dios!” 17 Ket sitin ginwaꞌ na ni Jesus, naibantog ya sa intiron Judea tan sa kalibed-libed nin bubabali.

18 Ket saray tumutumbok na ni Juan, nibaritaꞌ ra konadtaw sa priswan a man-gawꞌen na ni Jesus. Ket kinayaban nasaray rwa ra konra 19 tan nibakiꞌ nasaran keen ra tepeten kona ni Jesus a wanti, “Siꞌkayna paraytaw si nipangakoꞌ nan Dios a rumateꞌ iti nin magꞌadiꞌ, o main et nin sakalakon tagaꞌnan mi?”

20 Ket sin itaw sarayna kona ni Jesus, wanra kona, “Nibakiꞌ nakami ni Juan nin itepet ti komo, ‘Siꞌkayna paraytaw si nipangakoꞌ nan Dios a rumateꞌ iti nin magꞌadiꞌ, o main et nin sakalakon tagaꞌnan mi?’ ” 21 Sin sain, kapresan na ni Jesus a mampamaandaꞌ nin abaw a main nin masakit, mampamalakwan nin ispiriton dukaꞌ, tan mampanambar nin abaw a bulag ta pigaw nin makaꞌkit sara. 22 Kanyaꞌ nin wanti a niꞌbat na konra, “Sumubliꞌ kamo kona ni Juan ket ibaritaꞌ moyo kona a sarban naꞌkit tan narngeꞌ moyo. Makaꞌkit saray bulag; makalalako saray lupoy; napaandaꞌ saray liprusyen; makarngeꞌ saray telek; napasubliꞌ saran mabyay a nati; tan manꞌipatandaꞌ yay Mabistan Patandaꞌ konran pubri. 23 Ket, makarmaꞌ yay tawon kai gapo nin maglat a pangungunor na kongko.”

24 Sin nibwat saraynay nibakiꞌ na ni Juan, inmadap ya si Jesus konran abaw a tutawo ta ibaritaꞌ na konray maipaꞌkaꞌ kona ni Juan a wana, “Sin nako kamodtaw sa lugar a amboꞌ nin matawo, ani a inilalwan moyon maꞌkit itaw? Sayay tawo para a say pinanakem na ket kapada nin talaib a manꞌirpa-irpay nan siri? 25 No kai, ani edet a rabay moyon maꞌkit? Sayay tawon nisket nin mabli tan mapustura? Kai, ta saray misket nin mamabli, tan mampipapdaꞌ sa byay, sa palasyo sara nin maꞌkit. 26 Ani edet a rabay moyon maꞌkit? Kai para a si sayay prupita nan Dios? Oꞌ, baleꞌ ibaritaꞌ ko komoyo a amboꞌ yan basta nin prupita. 27 Wanan Dios sa Masanton Kasuratan maipaꞌkaꞌ kona,

28 Ibaritaꞌ koyti komoyo: Anaod, kasa et gapon niyanak nin makakipada kona ni Juan. Mataman baleꞌ nin wanin, si sangkaayupaan nin tawo nin makakibiang sa pagꞌaadiꞌ nan Dios, mas ataꞌgay ya et dyan si Juan. 29 Anaod, abaw sara a inalilbiꞌ ran say manꞌipagwaꞌ nan Dios konra ket kusto, pati saray maniningir nin buis, sin nipabawtismo sara kona ni Juan ta nangrengeꞌ sara kona. 30 Baleꞌ saray Pariseo tan uabugado sa Gugan-gan, kai ra nin inakoꞌ a gagara nan Dios sin andiꞌ saran pabawtismo.”

31 Ket wana et ni Jesus, “Adti kosara nin ipada a tutawo sawanin? Ani anaod a kapada ra? 32 Kapada ray uaꞌnak itaw sa plasa nin miiꞌritan sara:

33 Oꞌ ta, si Juan, nagkula-kulasyon ya tan kai ya nin ninum-ninom nin arak, ket wamoyo, ‘Nasrepan ya nin ispiriton dukaꞌ ket mangkaluang ya!’ 34 Sin rinmateꞌ akon si Pinaitawo nin mampangan tan mampinom ako, ket wamoyo, ‘U! Masibaꞌ tan mainom yan arak! Amigo rayan maniningir nin buis tan saray kai nin mantumumbok sa Gugan-gan nan Dios.’ 35 Taman nin wanin baleꞌ, maꞌkit tamo nin kusto a kadunungan nan Dios no kikiten tamo a gawaꞌ-gawaꞌ ran saray mantumulok kona.”

36 Niꞌsa, sinagyat nayan sayay Pariseo si Jesus nin mangapon itaw konra a say ngaran na Simon. Kanyaꞌ nin nako ya ket nikidungo ya konra. 37 Itaw nin babali, main nin sayay babayin uupaan. Sin natandaan nan itaw yan mampangan si Jesus konra ni Simon, nako yan main nin awit nan mablin banglon si nangwan ket gawaꞌ ya sa baton mantawagen nin alabastro. 38 Inmakis ya sa dani nin ayi na ni Jesus anggan naturuan nan lwaꞌ na. Ket pinunasan nan sabot na miꞌsa na nin inarkan tan inaprusan nin banglo.

39 Sin naꞌkit naytin Pariseo nin nanagyat kona ni Jesus, wana sa nakem na, “No siti ket peteg yan prupita, tandaꞌ na kumon a siti si babayin mampangiyapros nin banglo kona ket saya yan makasalanan.”

40 Ket si Jesus nagꞌirgo ya a wana, “Simon, main pan ibaritaꞌ ko komo.”

Wanan niꞌbat ni Simon, “Oꞌ sigi, Maistro.”

41 Wanti a wana ni Jesus, “Main nin rwa ray tawon main nin utang. Say alagan utang nan saya ket limanyasot nin swildon sayay awron pagtatrabaho tan si saya anamaet ket limampuloꞌ. 42 Sin kai sara nin makabayad, iningangaꞌdo nasaran nibaritaꞌ nan namautang a kai rayayna matkap nin bayadan.” Sinmunor, tinepetan naya si Simon, “Sawanin, siꞌno konran rwa a mas a pangangadoꞌ kona?”

43 “Sa angan-angan ko,” wanan niꞌbat ni Simon, “sitaw si mas abaw a utang.”

“Kustoy ubat mo,” wana ni Jesus kona.

44 Sin sain, inmadap ya si Jesus konan babayi, miꞌsa wana kona ni Simon, “Isipen mo a maipaꞌkaꞌ konan sitin babayi. Siꞌka, sinagyat nakon makodti sa bali moyo baleꞌ kai nako gapo nin binyan nin ranom nin ipanguyas ayi ko. Sya baleꞌ, inuyasan nan lwaꞌ na tan pinunasan na et nin sabot na. 45 Kai nako nin inarkan nin pangrispito mo kongko baleꞌ sya, kai ya gapo nin sinmawaꞌ nin mangarek nin ayi ko nangibwat sin linmuob akodti. 46 Ni kai ma nin nipaaprusan mataman nin ladak a ulo ko baleꞌ sya, banglo et a niyapros na sa ayi ko. 47 Edet, ibaritaꞌ ko komo, napirduna ana a abaw nin kasalanan na kanyaꞌ nin alaki a adoꞌ nan nipaꞌkit na. Baleꞌ anamaet, si napirduna sa daiteꞌ, daiteꞌ anamaet a pangangadoꞌ nin ipaꞌkit na.” 48 Ket wana ni Jesus konan babayi, “Napirduna anay kukasalanan mo.” 49 Ket saray kalalamoꞌ nan mampangan, wanra sa nakem ra, “Ani yaytin tawo a say kasalanan ket kano wadiꞌ mapirduna na?” 50 Sin sain, wana anaet ni Jesus konan babayi, “Banaꞌ sa pagmamatalek mo nalibri kayna sa pakadusa, mako kaynan sititinek a kanakman.”