Say Pisangkinian Maipaꞌkaꞌ sa Awron Painawa
6
Niꞌsan Awron Painawa, manlumabas sara si Jesus sa gagawaꞌ. Saray tumutumbok na, namursing saran rinakay; rinesres ra, miꞌsa ra kinusim. 2 Ket main nin Pariseo nin itaw a wanra konra, “Mayin nin man-gawꞌen moyoy maiyawaꞌ no Awron Painawa?” 3 Ket wanan niꞌbat ni Jesus, “Nalingwanan moyoyna palayi a nabasa moyodtaw sa Masanton Kasuratan maipaꞌkaꞌ sa ginwaꞌ na ni David nin mismo sin nabitilan yayna tan saray kalalamoꞌ na ta kasaynan abasto ra?a 4 Kai para a sinumrep ya sa Bali nan Dios, tan kinalap nay tinapay a nidaꞌton? Kinnan raytaw say saray pupadiꞌ tamoꞌ a magwaꞌ nin mangan.b” 5 Ket wana et konra, “Siꞌkon si Pinaitawo a makapangyayadiꞌ maipaꞌkaꞌ sa Awron Painawa.”Pinaandaꞌ naya ni Jesus a Lalakin Nati yay Sayay Takyay na
6 Sayay Awron Painawa anaet, nako ya si Jesus sa sinaguga tan nangyakay ya. Main itaw nin lalakin nati yay wanan nin takyay na. 7 Saray Pariseo tan Madudunong sa Gugan-gan, manꞌimatunan raya si Jesus no mamaandaꞌ ya kasi mataman no Awron Painawa ta pigaw nin maparsawan rayan sinmubag. 8 Mataman nin tandaꞌ na ni Jesus a manꞌisipen ra, wanan lamang konan lalaki, “Mako kadti sa adapan.” Kanyaꞌ nin nako ya tan inumdeng yadtaw sa adapan.
9 Ket wana ni Jesus konra, “Tepetan katamo: Ani a aburuyan nin Gugan-gan no Awron Painawa, tumulong o mamaidap; mamabyay o mangmati?”
10 Ket pinastang nasara ngaꞌmin, tan wana konan lalaki, “Ipaꞌnat may takyay mo.” Tinmulok ya sa wana ni Jesus ket linmimpyo yay takyay na. 11 Konan siin, sinmager saran maong a itaw, kanyaꞌ nin nagꞌiirgwan ra no ani a gawꞌen ra kona ni Jesus.
Saray Labinrway Apostoles a Sinuyoꞌ na ni Jesus
12 Sin sain a panaon, nuliꞌ ya si Jesus sa sayay talugtog ket nikakayabi yadtaw nin dinmasal konan Dios. 13 Sin buklas ana, kinayaban nasaray tumutumbok na ta namiliꞌ yan labinrwa sara a tinawag na anamaet nin apostoles:
14 si Simon a pinangaranan nan Pedro,
si Andres nin busat na,
si Santiago,
si Juan,
si Felipe,
si Bartolome,
15 si Mateo,
si Tomas,
si Santiago nin anak na ni Alfeo,
tan si Judas Iscariote nin sya liꞌ a magtraidor kona ni Jesus.
Disciples Chosen
Say Ugaliꞌ a Kumanaꞌ sa Pagꞌaadiꞌ nan Dios
17 Kaaram, nanaoy sara si Jesus nin namunta sa sayay lalawak ket itaw sarayna yapoꞌ. Abaw sara a itaw nin tumutumbok na tan tutawon nangibwat sa Judea, pati sa Jerusalem, tan sa babali nin Tiro tan Sidon nin iti sa rigrig nin taaw. 18 Nako saradtaw nin mangrengeꞌ kona ni Jesus tan ta pigaw nin mapaandaꞌ sara sa masakit ra. Napaandaꞌ pati saray nasrepan nin ispiriton dukaꞌ. 19 Ket say sarba, nipamuspusan ran makudit raya si Jesus ta main nin kapangyadian nin mangibwat kona nin mamaandaꞌ konran sarba.
20 Sawanin, inadap nasara ni Jesus a tumutumbok na ket wana,
“Makarmaꞌ kamon siꞌkamon mangalilbiꞌ a main nin mampagkurangan moyo
ta magꞌin nin ikon moyo a say iti sa Pagꞌadian nan Dios.
21 Makarmaꞌ kamon siꞌkamon makaingar sawanin sa pakatkapan moyo konan Dios
ta papdaen nakamo liꞌ.
Makarmaꞌ kamon siꞌkamon man-gumereng sawanin
ta rumiriket kamo liꞌ.
22 Makarmaꞌ kamo no banaꞌ ta mantumbuken rako nin si Pinaitawo ket
guraꞌ rakamon tutawo, ipwira, pagsari-saritaan rakamo
tan ibaritaꞌ ran dukaꞌ kamon tawo!
23 No gawꞌen ra in komoyo, rumiriket kamon maong ta pinasyan andaꞌ nin gun-gunan manꞌisadyaꞌ nan Dios komoyodtaw sa langit. Pakatarigꞌen kamo ta wanin a ginwaꞌ ran pupuon ra konran prupita nan Dios sin nuꞌna.
24 Kadoꞌ kamo liꞌ nin mumayaman
ta nagkunswilo kamoynadti sa lutaꞌ.
25 Kadoꞌ kamon mangkapdaꞌ ana sawanin
ta mabitilan kamo liꞌ.
Kadoꞌ kamon mariga sawanin
ta gumereng tan mangabet-abet kamo liꞌ.
26 Kadoꞌ kamo no raywen rakamon kaꞌbawan
ta wanin a ginwaꞌ ran puon ra konran mibaluꞌ-baloꞌ nin prupita.”
Beatitudes
Say Pigagawaꞌ a Kumanaꞌ sa Pagꞌaadiꞌ nan Dios
27 Wana et ni Jesus, “Baleꞌ wanti et a ibaritaꞌ ko komoyon siꞌkamon mampangrengeꞌ: Aduen moyo saray kalaban moyo. Gawꞌan moyo saran maabig a mampanguraꞌ komoyo. 28 Dawaten moyon bindisyunan nasaran Dios a mangisamba komoyo. Idasalan moyo saray mangrumiꞌ komoyo. 29 No main nin manuꞌpak komoyo, ipatuꞌpak moyo et a rubariꞌ nin rupa moyo. No main nin mangalap nin para rayꞌep moyo, pauryan moyan kalapen naya et a aysing moyo. 30 Mami kamo konran kidawat; tan no main wadiꞌ nin mangalap nin no ani a main moyo, andiꞌ moyo nin bawien.
31 Say rabay moyon gawꞌen ra komoyo nin kapada moyon tawo, wanin anamaet a gawꞌen moyo konra. 32 No sara tamoꞌ a mampangawaꞌnan komoyo a kawaꞌnanen moyo, kai nakamo gun-gunawan nin Dios ta taman nin saray makasalanan ket aduen rasaray mangadoꞌ konra. 33 No sara tamoꞌ a gumwaꞌ nin maabig komoyoy gawꞌan moyon maabig, kai nakamo gun-gunawan nin Dios; wanin a lamang a ugaliꞌ ran makasalanan. 34 No saray paꞌdaman moyo tamoꞌ ket saray tandaꞌ moyon makabayad, kai nakamo gun-gunawan nin Dios; ni saray makasalanan ket paꞌdaman rasaray kapada ran makasalanan no tandaꞌ ran makabayad sara konra.
35 Ana edet, aduen tan gawꞌan moyo saran maabig a kalaban moyo. Mamaꞌdam kamon andiꞌ nin milalo sa bayad. No gawꞌen moyo in ket gun-gunawan kamon alaki tan maalilbiꞌ a aꞌnak nakamon si Sangkataꞌgayan nin Dios. Anaod, si Dios, maong ya taman konran dukaꞌ tan malamang kona. 36 Matkap a mapaingangaꞌdo kamo kapada nan Ama moyo a mapaingangaꞌdo ya.”
Sermon on the Mount
Say Maipaꞌkaꞌ sa Pangungukom
37 “Andiꞌ kamo nin mangukom tan manintinsya ta pigaw nin kai kamo anamaet nin sintinsyawan tan ukumen. Manispinsa kamo ta pigaw nin dispinsawen kamo anamaet. 38 Mami kamo ket byan kamo anamaet. Anaod, no paꞌno kamon mami sa kapada moyon tawo, wanin kamo anamaet nin tubaleen; malaem, sinedsed tan pinnoꞌ anggan milapwas.”
39 Ket nibaritaꞌ nayayti et e ni Jesus nin pangingiyarig: “Matabin naya kasin bulag a kapada nan bulag? Kai, ta pariho saran maikuraꞌbot. 40 Si mampagꞌadal anamaet amboꞌ yan mas ataꞌgay dyan si maistro na, baleꞌ si sayan nakuston maong a nipagꞌadal na, makakipada ya konan maistro na. 41 Ambaleꞌ a say kasalanan ran kapada mon tawon baraꞌmon puling tamoꞌ tana a maꞌkit mo, baleꞌ kai mo nin mangkaasikaso a baraꞌmon truson nakasalimbeng ana sa mata mon diri? 42 Paꞌno mon maibaritaꞌ kona, ‘Busat, galten tayay puling mo,’ ni kai ma mangkaasikaso nin galten a baraꞌmon truson nakasalimbeng sa mata mo? Maong ka wadiꞌ! Galten mo yapoꞌ a kadukaan sa kanakman mo ta pigaw nin makapanita kan kapada mon tawo. 43 Wanin ta say mabistan klasin kayo kai nin gumungan dukaꞌ a klasi. Say amboꞌ nin mabistan klasin kayo anamaet, kai nin gumungan mabista. 44 Anaod, si sayay kayo, maalilbiꞌ ya sa klasin bunga na. Kai makaputin igos sa kayon arumasc, o ubas sa kayo nin didiwi. 45 Kapada sa sain a tawo. Si tawon maabig, maabig a bunga na ta maabig a pinanakem na. Baleꞌ si tawon maraet, maraet anamaet a bunga na ta maraet a pinanakem na. Say iti anaod sa kanakman ket syay lumiwaꞌ sa bebey.”
Say Rway Klasin Mangrerengeꞌ sa Saritaꞌ na ni Jesus
46 Ket nitepet na ni Jesus, “Mayin a tawagen moyokon ‘Uunuren’ no kai kamon lamang nin tumulok sa susaritaꞌ ko? 47 Ibaritaꞌ ko komoyoy kapada nan sayay kumadani kongko nin rumngeꞌ ya sa susaritaꞌ ko tan tumulok ya sa sayti. 48 Kapada nay sayay namaꞌdeng nin bali a nangali ya anggan narateꞌ nay bato miꞌsa itaw na nipatukdoꞌ a pundasyon. Ket sin bigraꞌ nin linmayos nin maksaw a agos, kai ya gapo nin nategeꞌ a bali ta magsen a nikapaꞌdeng na. 49 Sawanin anamaet, si tawon mangrengeꞌ tamoꞌ nin kai nayti tukiden, kapada nayay sayay tawon namaꞌdeng nin bali nin kai kinwan nin pundasyon. Ket sin linmayos nin maksaw a agos, tampor nin naybaꞌ ya, kanyaꞌ nin nasidaꞌ yan liso.”