Say Nipangibakiꞌ nan Cristo konran Labinrwa
10
Sawanin, kinayaban nasara ni Jesus a labinrwan adanin tumutumbok na tan binyan nasara nin pakayadiꞌ nin mamalakwan nin dukaꞌ nin uispirito a nakasrep sa tutawo, tan mamaandaꞌ nin abaw a bakas nin masakit tan manꞌirangep sa lalaman. 2 Sayti a ngaran ran saraytin labinrwan apostoles na ni Jesus: Muꞌna-muꞌna si Simon a pinangaranan nan Pedro, tan si Andres a busat na ni Pedro; si Santiago tan si busat na a si Juan a aꞌnak na ni Zebedeo; 3 miꞌsa si Felipe, tan si Bartolome, tan si Tomas, tan si Mateo a gindat a maniningir nin buis, tan si Santiago a anak na ni Alfeo, tan si Tadeo, 4 tan si Simon a myimbro nin grupon ribulusyunaryo, tan si Judas Iscariote a syay magtraidor kona ni Jesus.5 Nibakiꞌ nasarayti ni Jesus saray labinrwa tan binibilin nasara a wana, “Andiꞌ kamo nin mako sa bubabali ran amboꞌ nin Judio tan sa bubabali ran Samaritano, 6 no kai, mako kamo tamoꞌ konran Israelita a saray piniliꞌ nan tutawo nan Dios baleꞌ baraꞌmo saran karniro nin pinauryan. 7 Ikaꞌ moyo nin ipatandaꞌ konra a dandani yayna nin magꞌadiꞌ iti sa mundo a Dios. 8 Paandaen moyo saray mampagmasakit, pabyayen moyo saray nunati, paandaena moyo saray mampagmasakit nin dukaꞌ sa katat, tan palakwanen moyo saray uispiriton dukaꞌ a nakasrep sa tutawo. Nangrisibi kamon kasan bayad nangibwat konan Dios, andiꞌ kamo anamaet nin pabayad sa gawꞌen moyo konran tutawo. 9 Andiꞌ kamo nin mibalon nin kwarta, 10 tan andiꞌ kamo nin mibag o mangawit nin pisilyan nin aysing o sapatos, o baston, ta si sayay mampagtrabaho, manepeg a ibi ran pagtrabahwan na a matkap na.
11 No rumateꞌ kamo sa sayay babali o baryo, maningkap kamon maikanaꞌ a tawon mamagtuloy komoyo tan miikap kamo konan siin a pammali leleg nin isen kamo konan siin a lugar. 12 No rumateꞌ kamo sa sayay bali, dawaten moyoy pammindisyon nan Dios konran main nin bali. 13 No maong saran tawo, bindisyunan nasaran Dios, baleꞌ no amboꞌ saran maong nin tawo, babawien moyoy nipamindisyon moyo. 14 Ket no main nin pammali o babali a saray tawodtaw ket kai rakamo nin pagtuluyen o kai ra nin rengꞌen a manꞌiparateꞌ moyo konra, mibwat kamodtaw tan pagpagen moyoy taꞌpok sa ayi moyo nin mangipataros a madusa sara liꞌ sa sain a ginwaꞌ ra. 15 Ibaritaꞌ koyti komoyo a sa Awro liꞌ nin Manintinsya yay Dios, mas mabyat liꞌ a dusan ibi nan Dios konran tutawo nan siin a babali dyan sa dusan ibi na liꞌ konran taga Sodoma tan taga Gomorrab.”
Say Nipamau-pauꞌna nan Cristo konran Labinrwa
16 “Rumngeꞌ kamon maong. Pakandaꞌ kamo ta ibakiꞌ katamon mako konran maraet a tutawo. Baraꞌmo kamo liꞌ nin karniro nin nalibed ran mabayanin atap a uayep. Ket matkap a pagꞌinen moyon matadem a pangingisip moyo a kapada nan ulay, tan pagꞌinen moyon malinis a gugagara moyo a kapada kamo anamaet kaamoꞌ nin kalapati. 17 Pakandaꞌ kamo ta dakpen rakamo liꞌ tan bistawen rakamo liꞌ tan sanet-sanetenc rakamo liꞌ itaw sa susinaguga ra. 18 Ikaꞌ rakamo et liꞌ nin usisaen sa adapan ran magꞌuuray tan uadiꞌ banaꞌ ta mangkikalamoꞌ kamo kongko, ket pagkanawanawa moyoyna in liꞌ nin mangipatandaꞌ nin maipaꞌkaꞌ konan Mabistan Patandaꞌ konra tan konran raruman tawo. 19 No itaw kamoyna liꞌ nin manꞌusisaen nin naiyadap konra, andiꞌ moyo nin kaaburidwan no ani a ibaritaꞌ moyo tan no paꞌnoy pammaritaꞌ moyo. No udas moyoyna liꞌ nin tumnoy, ibaritaꞌ nayna liꞌ nin Dios komoyo a ibaritaꞌ moyo, 20 ta amboꞌ liꞌ nin siꞌkamoy mampagꞌirgo no kai si Ispirito nan Dios a Ama moyo a mampagꞌirgo yupaꞌ komoyo.
21 No saytaw, main liꞌ nin tutawo nin mangipapati nin bubsat ra. Main liꞌ nin uama nin mangipapati nin aꞌnak ra, tan main anamaet liꞌ nin aꞌnak a magribildid tan mangipapati konran mangatua ra. 22 Wanin ta guraen rakamon sarban tutawo banaꞌ ta mantarigꞌenan moyoy mangkikalamoꞌ kongko. Baleꞌ si tawon tarigꞌenan nay tumulok kongko anggan kalaꞌpusan nin dyaꞌdyaꞌ, makarateꞌ ya sa Pagꞌadian nan Dios. 23 No padyaꞌdyaen rakamo sa sayay babali lumakwan kamon mako sa sakalako. Ibaritaꞌ koyti komoyo a kai moyo et liꞌ nin nakkaꞌ nin nangipatandaan a sarban bubabali nan Israel, siꞌkon si Pinaitawo ket sumubliꞌ akoyna.”
24 “Kasan siꞌnuman nin mampagꞌadal a mas ataꞌgay dyan si maistro na. Wanin anamaet, kasan alilaꞌ a mas ataꞌgay dyan si amo na. 25 Ket makuntinto yayna a sayay mampagꞌadal no sa kapapaꞌsar ket makakipada ya konan maistro na, o si sayay alilaꞌ no makakipada ya konan amo na. Ket siꞌkoyna anaod, nin baraꞌmon ulo nin pamilya, ket tinawag rakon Beelzebul a uunuren ran dudimunyo, laloynan kasan sapo a siꞌkamo nin tawo ko, ket pangaranan rakamo anamaet nin maraet.
26 Anaod, ta siꞌkoy amo moyo, andiꞌ moyo sara nin ikaliꞌmo a tutawo ta sarban bubagay a adi sawanin ket maipadar liꞌ no marateꞌ a udas, ta kasan sikrito nin kai nin matandaan. 27 Say bubagay a siꞌkamo tamoꞌ a namaritaan ko, ipatandaan moyo liꞌ sa sarban tutawo. 28 Andiꞌ moyo sara nin ikaliꞌmo a makapangmati konan sitin lalaman baleꞌ kai nin makapamaꞌno konan kararwa moyo, no kai si Dios a ikaliꞌmo moyo a syay makapangmati nin lalaman tan kararwa moyo itaw sa impyirno. 29 Magwaꞌ saran kalapsing a rway manuk-manok. Mataman wanin baleꞌ, ni saya konra kasan maragrag nin mati no kai na aburuyan nin Dios a Ama sa langit. 30 Wanin anamaet a lamang komoyo, ni say sabot moyo sa ulo ket nabilang na et. 31 Kanyaꞌ anaod nin andiꞌ kamo nin maliꞌmo ta mabli kamon adayoꞌ kona dyan saray abaw a manuk-manok.
32 Sawanin anaod ibaritaꞌ ko, si siꞌnuman a mangipatutuo konra nin tutawo a tumutumbok koya, ipatutuo ko liꞌ anamaet nin tumutumbok koya kona ni Ama ko nin itaw sa langit. 33 Baleꞌ si siꞌnuman a mangibudiꞌ konran tutawo a tumutumbok koya, ibudiꞌ ko liꞌ anamaet kona nin Ama ko nin itaw sa langit a tumutumbok koya.”
Say Matkap a Katatarigꞌen ran Tumutumbok nan Cristo
34 “Andiꞌ moyo nin ipaꞌkaꞌ a nako akodti sa lutaꞌ ta pigaw nin main nin pitutuno. Kai ako nin nakodti ta pigaw nin main nin pitutuno no kai edet, ta pigaw nin main nin pilalaban. 35 Banaꞌ sa gagara nin nipako kodti sa lutaꞌ kuntrawen naya liꞌ nin anak nin lalaki a ama na, si anak nin babayi si ina na, tan si manuyang nin babayi si katyangan nan babayi. 36 Saray mairot a kakuntra na liꞌ nin sayay tawo ket saray dirin kalamanan na.e
37 No muꞌna-muꞌna sara konan sayay tawo a mangatua na dyan siꞌko, kai ya maikanaꞌ nin tumutumbok ko. Oꞌ no saray muꞌna-muꞌna konan sayay tawo ket saray aꞌnak na, kai yan lamang anamaet maikanaꞌ nin tumutumbok ko. 38 Oꞌ ta si tawo a kai ya nin mamalatay nin kudos na nin kai na ipulisay a wanin nin mabli kona, kai ya nin kumanaꞌ nin tumutumbok ko. 39 Si siꞌnuman a pablyen nay byay nadti sa mundo, mati ya liꞌ a lamang, baleꞌ si siꞌnuman a gurutan nay byay nadti banaꞌ sa pammabli na kongko, madumog na a tutuon byay.”
40 “Saray tutawon mangakoꞌ komoyo, siꞌkoy inakoꞌ ra tan saray mangakoꞌ kongko, si Ama ko nin namakiꞌ kongko a inakoꞌ ra. 41 Si tawon mangakoꞌ nin sayay ibabakiꞌ nan Dios banaꞌ ta tandaꞌ nan ibabakiꞌ nayayti nin Dios, mabyan ya liꞌ nin gun-gunan kapada nin gun-guna nan ibabakiꞌ nan Dios tan si tawon mangakoꞌ konan sayay matunong a tawo banaꞌ ta sitin tawon akuen na ket matunong ya, mabyan ya liꞌ nin gun-gunan kapada nin gun-guna nan matunong a tawo. 42 Ibaritaꞌ koyti komoyo a mataman nin si sangkadaitean a pagsisirbi, alimbawaꞌ say pamainom tana konan sayay ayupaꞌ a tumutumbok ko, a pagsirbyan raya banaꞌ ta tumutumbok koya, si mangwaꞌ nin wanin kasan sapon mabyan ya liꞌ nin gun-guna.”