Say Panandaan a Anggawan ana
13
Ket sawanin, sin manlumiwaꞌ ya sa sakop nan Timplo si Jesus, wanan saya nin tumutumbok na kona, “Maistro, kikiten mo! Aninay andaꞌ nin pupaꞌdeng nan siti si Timplo! Aninay kaalalakyan nin sain say bubaton inusar!”2 Ket wana ni Jesus kona, “Mangkiten-kiten mo in say alalakin pupaꞌdeng sawanin! Baleꞌ main liꞌ nin awro a maybaꞌ in, ket kasayna liꞌ gapo ni sayan bato nin isen a maꞌkit nin naitaꞌlen et konan saya.”
3 Kaaram, nuliꞌ sara sa Talugtog nin Olibo ket tinmekreꞌ ya si Jesus nin nakaadap sa Timplo. Sin sain, sara-sara tamoꞌ a si Pedro, si Santiago, si Juan, tan si Andres, ket kinmadani sara kona tan wanra, 4 “Kaꞌno liꞌ nin mangyadiꞌ in si wamoyon maybaꞌ ya a Timplo? Ani liꞌ a panandaan a mangkatukid ana in?”
5 Ket wanan niꞌbat ni Jesus konra, “Pakatalad kamo nin kai kamo nin malingon tepren moyoy bulaꞌ, 6 ta abaw sara liꞌ a mangusar nin ngaran ko a wanra ket sara a Cristo nin nipangakoꞌ nan Dios. Ket abaw sara liꞌ a malingo ra. 7 Marngeꞌ moyo liꞌ a danurdor nin pigigira sa kadani tan marnge-marngeꞌ moyon main nin pigigira sa saka-sakalakon lugar. Baleꞌ andiꞌ kamo nin aburido ta sayti nin bubagay ket matkap nin mangyadiꞌ yapoꞌ. Baleꞌ amboꞌ et nin iyayangga ana nin kapresan a pagꞌuuray iti sa mundo 8 ta milalaban liꞌ a nunasyon sa saya tan saya, tan wanin et a lamang sa pupagꞌurayan. Magkamain liꞌ nin rayon sa abaw nin lulugar. Magkamain anamaet nin bitil. Baleꞌ sain taranaꞌ tamoꞌ in nin rumateꞌ nin dyaꞌdyaꞌ kapadan taranaꞌ nan mangingar nin sayay mangabing.
9 Pakatalad kamo ta siꞌkamo, dakpen rakamo liꞌ tan bistawen rakamo liꞌ tan sanet-saneten rakamo liꞌ sa susinaguga. Iyadap rakamo liꞌ nin usisaen konran magꞌuuray tan uadiꞌ banaꞌ ta tumutumbok katamo. Mangyadiꞌ in ta pigaw nin magkamain kamo nin pagkanawanawan maiparateꞌ moyo konra a maipaꞌkaꞌ kongko. 10 Matkap ya yapoꞌ nin maipatandaꞌ a Mabistan Patandaꞌ sa sarban tawo sa sarban lugar, miꞌsa say iyaangga ana nin kapresan nin pagꞌuuray iti sa mundo. 11 No itaw kamoyna liꞌ nin manꞌusisaen, andiꞌ moyoyna nin kaaburidwan no ani a ibaritaꞌ moyo banaꞌ ta no udas moyoyna liꞌ nin tumnoy ket, ibaritaꞌ nayna liꞌ nin Dios a ibaritaꞌ moyo ta amboꞌ nin siꞌkamo liꞌ a magꞌirgo no kai edet, si Ispirito nan Dios. 12 No saytaw, main liꞌ nin tutawo nin mangipapati nin bubsat ra. Main liꞌ nin uama nin mangipapati nin aꞌnak ra. Main anamaet liꞌ nin aꞌnak a magribildia tan mangipapati konran mangatua ra. 13 Wanin, guraen rakamon sarban tutawo banaꞌ ta mantarigꞌenan moyoy mangkikalamoꞌ kongko. Baleꞌ si siꞌnuman a tumarigꞌen nin tumulok kongko anggan kalaꞌpusan nin dyaꞌdyaꞌ, makarateꞌ ya sa Pagꞌadian nan Dios.”
Si Makaparmay nin Bagay a Manidaꞌ
14 “Marateꞌ liꞌ a awro a main liꞌ nin sitaw si ‘Makaparmay nin Bagay a Manidaꞌ’ nin itaw ya sa Timplo mataman nin amboꞌ nan kanepegan a itaw ya. (Siꞌkan mampamasa, tarusan maytin maong!) No maꞌkit yaynayti liꞌ nin bagay nin itaw yayna, saray mampiikap itaw sa Judea ket matkap a malayo saraynan mako nin umadi sa tutalugtog. 15 Si tawon itaw nin mampagprisko sa balkon nin bali ra, andiꞌ yayna nin lumuob et sa bali nin mangalap nin animan a agamiren na. 16 Wanin anamaet konan si itaw nin mampagtrabaho sa gagawaꞌ, andiꞌ yayna nin sumubliꞌ et sa bali ra ta pigaw nin mangalap yan seket na. 17 Kadoꞌ sarayna liꞌ a mabuktot tan saray uinan main nin uaꞌnak ran mampasuswen konan siin a panaon! 18 Kanyaꞌ nin idasal moyo konan Dios a amboꞌ liꞌ kumon nin tyimpon gawatb no mangyadiꞌ in 19 ta say dyaꞌdyaꞌ liꞌ konan sitaw a panaon ket kasa gapo et nin kapadan nangyadiꞌ ana nangibwat et sin naparsa yay mundo anggan sawanin, tan kasa gapo nin kapadan mangyadiꞌ et liꞌ. 20 No kai na nin idisisyon nin Dios nin paanteden naya in nin panaon ket kasa liꞌ gapo nin mabatiꞌ nin mabyay iti sa mundo. Baleꞌ banaꞌ konran piniliꞌ nan Dios nin tutawo na, paanteden naya anadtaw liꞌ in nin panaon.
21 Kanyaꞌ nin no saytaw liꞌ ket main nin mamaritaꞌ komoyo a wana, ‘Syayna e a Cristo!’ o no wana, ‘Itaw ya e!’ andiꞌ kamo nin mamper 22 ta abaw sara liꞌ a mibaluꞌ-baloꞌ nin sara a Cristo o a prupita sara. Mamaꞌki-paꞌkit sara liꞌ nin makapakaꞌngap nin panandaan tan mumilagro ta pigaw nin lingwen rasaray tutawo, a no magwaꞌ ket tagem nin saray piniliꞌ nan Dios nin tutawo na. 23 Kanyaꞌ nin pakatalad kamo! Nibaritaꞌ koyna a sarba ngaꞌmin komoyo baꞌyo et nin mangyadiꞌ.”
Say Isusubliꞌ na liꞌ nin si Pinaitawo
24 “Ket tampor kayadiꞌ liꞌ nin siin a panaon nin dyaꞌdyaꞌ,
si awro ket dumedlem ya, tan si bulan ket kai yayna nin sumlag.
25 Say bubituen ket mangaragrag mangibwat sa langit, tan say pupakayadiꞌ a mamauksoy nin say itaw sa taꞌgay nin langit ket maguloyna.
26 Kaaram, maꞌkit rako liꞌ nin sarban tutawo, siꞌkon si Pinaitawo nin manrumateꞌ nin iti sa gunem nin main nin alakin pakayadiꞌ tan kasan kapadan kagalangan. 27 Ket ibakiꞌ kosara liꞌ a uanghil ko nin mako sa sangkamundwan tan dinepen rasara ngaꞌmin a tutawon piniliꞌ nan Dios.c
28 Kikiten moyay kayon igos ta main nin maadal moyo mangibwat kona. No sumalingsing yaynan gumulong, masigurado moyon rumateꞌ anay tyimpon rapeg. 29 Wanin anamaet, no maꞌkit moyoyna liꞌ nin mampangyadiꞌ ana in say nibaritaꞌ ko komoyo, matandaan moyoynan rumateꞌ akoynan madaliꞌ. 30 Ibaritaꞌ koyti komoyo, no wanin ana liꞌ anaod a mampangyadiꞌ, baꞌyo kamo et nin mati ngaꞌmin ket matukid ana a sarban nibaritaꞌ ko. 31 Makasa a langit tan lutaꞌ, baleꞌ say ibaritaꞌ ko magnayon nin tutuo anggan-angga.
32 Baleꞌ no kaꞌnon peteg nin mangyadiꞌ, kasa gapo nin makatandaꞌ, ni saray uanghil, o siꞌkon si Anak nan Dios. Kal-la si Ama ko tamoꞌ a makatandaꞌ. 33 Kanyaꞌ anaod nin pakatalad kamo! Sumadyaꞌ kamon pirmi ta kai moyo nin tandaꞌ no kaꞌno nin mangyadiꞌ ti.
34 Say isusubliꞌ ko nin siꞌkon si Pinaitawo ket maiyarig sa isusubliꞌ nan sayay tawon kinmadayoꞌ. Miꞌsa ya nin nibwat sa bali na, binyan nasaran pakayadiꞌ a tutawo na sa kayadian na. Nibibilin na sa barang saya a trabaho na tan ginan-gan nayay gwardya nin sibabantay ya sa isusubliꞌ na. 35 Wanin anamaet, kai moyo nin tandaꞌ no kaꞌno ako nin sumubliꞌ a bilang sa isusubliꞌ nan si main nin bali, sa patpaapon man, sa kapikngaꞌ nin yabi man, sa parbangon man o sa kabubuklas man. Kanyaꞌ nin sumadyaꞌ kamo 36 ta saliꞌ no rumateꞌ akon bigraꞌ ket maratꞌanan katamo nin bilang sa sayay gwardya a mampaꞌlek sa udas nin paggagwardya na. 37 Si ibaritaꞌ ko komoyo tan konran sarban tutawo ket: ‘Sumadyaꞌ kamo!’ ”