Si Pangingiyarig Maipaꞌkaꞌ konran Dukaꞌ a Ingkargado
12
Ket nagꞌirgo ya konra si Jesus nin nangusar yan pangingiyarig. Wana, “Main nin sayay tawon nangmula nin ubas sa lutaꞌ na. Dinarekdek naya tan nangali yan ubot sa sayay bato ta pigaw nin pamespesan yan ubas. Namaꞌdeng yan ataꞌgay nin kamiꞌnan ran bantay. Miꞌsa nipagamet nay pangangalilaꞌ sa mula na konran umno ran padalos tan nibwat yan nako sa adayoꞌ nin lugar. 2 Sin narateꞌ anay panaon nin pammutin bunga, nangibakiꞌ yan sayay tawo na nin kalapen nay tao na. 3 Baleꞌ saray padalos, dinakep raya ket tinasu-taso raya tan pinasubliꞌ rayan kal-la gamet. 4 Ket nangibakiꞌ yaynaet a main nin lutaꞌ nin sakalakon tawo na. Baleꞌ pinekpe-pekpek raya tan pinadi-padingꞌeyan raya. 5 Ket nangibakiꞌ yaynaet nin sakalako. Baleꞌ pinati raya. Abaw sara et a nibakiꞌ na, baleꞌ pinekpe-pekpek rasara tan pinati-pati rasaray raruma. 6 Kalansuyutan, main nin saya tana nin nabatiꞌ nin maibakiꞌ na, si kawaꞌnan nan tuloy nin si anak nan bugtong. Ket anaod, nibakiꞌ naya. Wana sa nakem na, ‘Kai magwaꞌ a kai raya nin kabilangan a anak ko.’7 Baleꞌ saray padalos, sin naꞌkit rayay anak na wanra, ‘Siti liꞌ a manawir. Patyen tamoya ta pigaw nin maikon tamo a tawiren na liꞌ!’ 8 Ket dinakep raya tan pinati raya. Miꞌsa nibantak rayay bangkay na sa rikor nin pukok na nin uubas.
9 Sawanin,” wana ni Jesus, “ani kadiꞌ a gawꞌen nan sitin main nin ikon nin lutaꞌ konran saraytin padalos? Kasan sapo nin mako yadtaw ket patye-patyen nasara. Miꞌsa ipagaꞌgetan naya a lutaꞌ na sa sakalakon padalos.” 10 Wana et ni Jesus, “Kai moyo para gapo nin nabasa-basaytin wana sa Masanton Kasuratan,
‘Sitaw si bato a nibilang ran
kai nin mausar nin saray mammanday,
sitaw nin diri nin bato a nagꞌin nin
sangkaimpurtantiwan sa pammaꞌdeng.
11 Say nipagꞌin nin wanin ket gawaꞌ nan Catawan,
Ket sa pangingikit tamo, peteg a makapakaꞌngap!’a ”
12 Anaod, nataros ran pupangulo ran Judio a sara a mampadaꞌgisan na ni Jesus kanyaꞌ nin dakpen rayayna kumon, baleꞌ maliꞌmo sara konran tutawo kanyaꞌ nin linakwanan raya tana.
Si Tepet Maipaꞌkaꞌ sa Pammayad nin Buis
13 Ket, say ginwaꞌ ran pupangulo, nangibakiꞌ sara kona ni Jesus nin umno ran Pariseo tan umno ran tawon ayon kona ni Adiꞌ Herodes. Ginwaꞌ rayti ta pigaw nin kalꞌuten raya sa pagꞌiirgo na. 14 Ket sin itaw sarayna kona ni Jesus, wanra kona, “Maistro, tandaꞌ mi nin matunong kan tawo. Say pangangakay mo nin no ani a rabay nan Dios nin gawꞌen ran tutawo ket tutuo, tan kasan tawon ikaliꞌmo mo ta mampari-parihwen moy tutawo. Edet anaod, rabay mi pan tepeten komo no sumubag atamo kasi, o kai, sa Gugan-gan tamo no mamayad atamon buis konan Impirador nan Romab? Matkap mi para a mamayad o kai?”
15 Baleꞌ tandaꞌ na ni Jesus a mampiwadiꞌ-wadiꞌ sara. Kanyaꞌ nin wana konra, “Mayin ta mansubuken moyoko? Byan rako pa nin kwartan plata ta pigaw nin kiten koya.” 16 Ket binyan raya, ket nitepet na konra a wana, “Siꞌno ya in rupa tan ngaran si isen konan plata?”
Ket niꞌbat ra, “Si Impirador nan Roma.”
17 “No wanin edet,” wana ni Jesus konra, “isubliꞌ moyo konan Impirador a ikon na, tan isubliꞌ moyo anamaet konan Dios a ikon na.”
Ket nakaꞌngap saran tuloy sa wantin ubat na.
Si Tepet Maipaꞌkaꞌ sa Isusubliꞌ ran Mabyay nin saray Nati ana
18 Kaaram, main anamaet nin Saduseo nin nako kona ni Jesus. Sarayti saray Saduseo, kai ra nin tepren a mapasubliꞌ sara liꞌ nin mabyay a nunati ana. Ket tinepet ra kona a wanra, 19 “Maistro, nisurat na ni Moises sa Gugan-gan tamo a
no main nin mitraasawa ket nati yay lalaki nin kasan anak ra, manepeg a si busat nan lalaki ket matkap nin ikasal nayay nabalo ta pigaw nin manganak sara nin ikwintan anak nan sitaw si nati.c
20 Ket, main intaw nin pito ray lulalakin mibubsat. Nangasawa yay kaka baleꞌ nati ya nin kasan anak. 21 Ket si aryen na, nikasal nayay babayi. Baleꞌ nati yayti anamaet a lamang nin kasan anak ra. Wanin anamaet a ginwaꞌ nan ikatlo, 22 tan saray sumunor et kona. Sarba ra nin pito, nikasal rayay balo, baleꞌ nati sara ngaꞌmin nin kasan anak. Kalansuyutan, nati yaynamaet a babayi. 23 Ket sawanin, no napasubliꞌ sarayna liꞌ nin mabyay a nunati, siꞌno edet liꞌ a asawa nan babayi, ta saray pito ket nagꞌin nin asawa raya?”
24 Ket wana ni Jesus, “Ipaꞌkit nin sayti a mangkalingo kamoyna! Paꞌno ket kai moyo nin mangkataros a wana sa Kasuratan o say maipaꞌkaꞌ sa pakayadiꞌ na nin Dios! 25 Anaod, no napasubliꞌ sarayna liꞌ nin mabyay a nunati, baraꞌmo sarayna liꞌ nin uanghil itaw sa langit a kai sarayna nin mangasawa o kiasawa. 26 Ket say maipaꞌkaꞌ sa katutuꞌwan nin isusubliꞌ ran mabyay nin nunati, kai moyo para nin nabasa-basayti sa nisurat na ni prupita Moises maipaꞌkaꞌ sa wanan Dios itaw konan si mandumtan kayo? Siti a wanan Dios kona maipaꞌkaꞌ konran pupuon tamo,
‘Siꞌko et a lamang a Dios na ni Abraham, si Dios na ni Isaac, tan si Dios na ni Jacob.’d ”
27 Nituloy na ni Jesus ket wana, “Syimpri a, si sayay nati ana, kai yayna nin makapangrayo konan sayay dios. Kanyaꞌ nin mangkabyay sara in et, saray nibaritaꞌ nan Dios a syay Dios ra. Mangkalingo kamo nin tuloy!”
Si Sangkaimpurtantiwan sa Gugan-gan
28 Main nin saya konran Madudunong sa Gugan-gan ran Judio a rinmateꞌ itaw ket narngeꞌ nayti nin pididiskusyon ra. Ket naꞌkit na nin mapteg a kauubat na ni Jesus. Kanyaꞌ nin tinmepet ya kona a wana, “Aya a sangkaimpurtantiwan nin matkap nin tukiden nin gan-gan?”
29 Ket wana ni Jesus, “Siti a sangkaimpurtantiwan nin matkap nin tukiden nin gan-gan:
‘Siꞌkamon puri na ni Israel, rumngeꞌ kamo. Si Uunuren a Dios tamo, syay bukod nin Dios. 30 Aduen may Uunuren a si Dios mo nin intiron kanakman mo, nin intiron byay mo, nin intiron kaisipan mo tan nin intiron pakababaꞌ mo.’
31 Ket siti a ikarwan sangkaimpurtantiwan:
‘Aduen moy kapada mon tawo nin kapada nin pangangadoꞌ mo sa lalaman mon diri.’e
Kasaynan gan-gan nin mas impurtanti et dyan saraytin rwa.”
32 Ket wanan sitin Madunong sa Gugan-gan kona, “Kusto, Maistro. Tutuo in si wamoyo a si Dios ket sayan-saya ya tan kasan raruman Dios no kai sya tamoꞌ. 33 Ket say aduen yay Dios nin intiron kanakman tan nin intiron kaisipan tan nin intiron pakababaꞌ, tan aduen saray kapadan tawo nin kapadan pangangadoꞌ sa lalaman nin diri, ket mas impurtanti et dyan si mangidaꞌton nin uayep a puuran tan raruma et nin dudaꞌton konan Dios.”
34 Naꞌkit na ni Jesus nin maong a kauubat na ket wana kona, “Dandani kayna nin iti sa sirong nin pagꞌuuray nan Dios.”
Ket nangibwat ana sin sain, kasaynan nakaitpel nin manepet kona.
Si Uunuren na ni Adiꞌ David
35 Sin mampangyakay yadtaw si Jesus sa sakop nan Timplo, wana, “Mayin baleꞌ a manꞌibaritaꞌ ran saray Madudunong sa Gugan-gan, a si syay Cristo nin nipangakoꞌ nan Dios, ket puri naya ni Adiꞌ David? 36 Ket si Adiꞌ David a mismo, yupaꞌ sa nipaninreg nan Ispirito nan Dios ket nibaritaꞌ na nin wana,
‘Wanan Dios konan Uunuren ko:
Tumekreꞌ kadti sa pawanan ko
mintras nin mampasukuen kosara komo a sarba ran kukalaban mo.’f
37 Si Adiꞌ David nin mismo, tinawag naya nin Uunuren a Cristo nin nipangakoꞌ kona, ket paꞌno edet a sya ket puri naya ey?”
Say Kunsaba Maipaꞌkaꞌ sa Pigagawaꞌ nin Paipadar-padar
Saray abaw nin tawo, lalon maririket saran nangrengeꞌ kona ni Jesus. 38 Sin mampangyakay ya konra wana, “Pakandaꞌ kamo nin kai kamo magꞌin nin bilang konran Madudunong sa Gugan-gan a rabay-rabay ray magpasyar nin anununro a aysing ra tan say pagalangan rasaran tutawo sa publiko. 39 Rabay-rabay ray tumekreꞌ sa tekrean para konran impurtantin tutawo sa sinaguga. Wanin et a lamang no mako sara sa punsya. 40 Kitkiten ray kabyayan ran bubbayin balo, ket paanunrwen ray dasal ra nin panismula nin maraet a gawaꞌ ra. Ket anaod pinasyan byat liꞌ nin dusa nan Dios konra.”
Say Daꞌton nan Sayay Balo
41 Nainsanan nin bugaꞌ, nako ya nin tinmekreꞌ si Jesus sa temben nan pangnanabuan nin kwartan daꞌton sa Timplo. Binanta-bantayan nay nipanginaboꞌ ran tutawo. Malalaem a ninaboꞌ ran mayayaman. 42 Ket main anamaet nin sayay pubrin babayin balo nin rinmateꞌ itaw. Nanginaboꞌ yan rwa ran plata nin sangkadaitean a alaga. 43 Pinakadani nasara ni Jesus a tumutumbok na kona tan wana konra, “Ibaritaꞌ koyti komoyo, sitin pubrin balon babayi, mas abaw a ninaboꞌ na dyan say sarban ninaboꞌ ra nin saray raruma et nin nanginaboꞌ 44 ta say subra-subra tamoꞌ konra a nibi ra. Si balo baleꞌ, sa busel nin kaidapan na, nibi na a sarba ngaꞌmin nin pagkabyayan na.”