4 Pinasyan kaꞌbawan nin ipatukid ra konran tutawo. Anta sara baleꞌ ket kai sara gapo nin tumulong konra nin manukid sa sayti nin uakay ra. 5 Say gagara ra tamoꞌ nin mangwaꞌ nin bubagay ket say parayo sa tutawo. Pinaagabaꞌ ray madidintek nin kahon a nangwan nin nisurat ran partin Gugan-gan a iberber ra sa waleng tan takyay ra, tan nipaanro ray baruyboy sa saroy nin kapa ra^a ta pigaw nin ibaritaꞌ ran tutawo a masantos sara. 6 Rabay-rabay ray tumekreꞌ sa tekrean para konran impurtantin tutawo sa sinaguga tan sa punsyawan. 7 Rabay-rabay ray pagalangan ran tutawo sa publiko tan say tawagen saran ‘Maistro’.

8 Siꞌkamo baleꞌ, andiꞌ kamo patawag nin ‘Maistro’ ta pari-parihoy butang moyo, mibubsat kamo tan sayan-saya ya tamoꞌ a Maistro moyo. 9 Andiꞌ moyo nin tawagen a kapada moyon tawo iti sa lutaꞌ nin ‘Ama’ a kapadan pannawag moyo konan Dios ta sayan-saya tamoꞌ a ama moyo, si Dios nin itaw sa langit. 10 Wanin anamaet, andiꞌ kamo nin patawag nin ‘Maistro’ ta sayan-saya tamoꞌ a maistro moyo, si sya a Cristo nin nipangakoꞌ nan Dios. 11 Si sangkataꞌgayan komoyo, syay mampagsirbi komoyo. 12 Si mangitaꞌgay nin lalaman nan diri, maikayupaꞌ ya liꞌ, tan si mipaayupaꞌ, maitaꞌgay ya liꞌ.”

13-14 “Kadoꞌ kamoyna, siꞌkamon Madudunong sa Gugan-gan tan siꞌkamon Pariseo! Mampisantu-santos kamo ta mansalabanan moyay purta nan Pagꞌadian nan Dios! Kai kamo anamaet nin sumrep tan awaan moyo sara et a marabay nin sumrep!^b

15 Kadoꞌ kamoyna, siꞌkamon Madudunong sa Gugan-gan tan siꞌkamon Pariseo! Mampisantu-santos kamo ta kayawen moyay intiron mundo sa tanay main nin masagyat moyon mayi sa pammemper moyo, ket si masagyat moyo gawꞌen moyan masakit-sakit dyan siꞌkamo. Ket mas alaki et a rason nan madusa sa impyirno dyan siꞌkamo.

16 Kadoꞌ kamoynan tutawo! Baraꞌmo kamon bulag a mampangyakay sa dalan ta manꞌiyakay moyo a no si sayay tawo ket sinmamba ya maipaꞌkaꞌ sa sayay bagay yupaꞌ konan Timplo nan Dios, magwaꞌ nan kai nin tukiden a nisamba na, baleꞌ no sa balitok sa luob nan Timplo nan Dios a pangisamba na, kai nin magwaꞌ a kai na nin tukiden a nisamba na. 17 Bulag kamon talaga ta mas main nin magwaꞌ na kasin balitok sa luob nan Timplo nan Dios dyan si Timplo nan Dios nin mamasantos konan balitok! Waweng kamo! 18 Manꞌiyakay moyo et a no si sayay tawo ket sinmamba ya maipaꞌkaꞌ sa sayay bagay yupaꞌ konan altar magwaꞌ a kai na nin tukiden a nisamba na, baleꞌ no say daꞌton a sinambawan na kai nin magwaꞌ a kai na nin tukiden a nisamba na. 19 Bulag kamon talaga ta mas main nin magwaꞌ na kasin daꞌton dyan si altar nin mamasantos konan daꞌton? 20 Anaod, no si sayay tawo ket sinmamba ya yupaꞌ sa altar, sinmamba yaynan lamang anamaet sa sarban itaw sa altar. 21 Ket no sa Timplo nan Dios ya nin sinmamba, sinmamba yaynan lamang anamaet konan Dios a syay mampiikap itaw. 22 Wanin anamaet a lamang, no si sayay tawo ket sinmamba ya yupaꞌ sa langit, sinmamba yayna anamaet lamang sa truno nan Dios tan konan Dios nin nakatekreꞌ sa truno na.

23 Kadoꞌ kamoyna, siꞌkamon Madudunong sa Gugan-gan tan siꞌkamon Pariseo! Mampisantu-santos kamo! Manꞌibi moyo konan Dios pati kakapuloꞌ nin mula moyon pangrikado moyo tamoꞌ sa lutoꞌ moyo a bilang say anis, paminta tan lakaꞌ, baleꞌ manluktawan moyon gawꞌen a mas maalaga nin ipagwaꞌ nin Gugan-gan a bilang say pangwaꞌ moyon mapteg sa kapada moyon tawo, say pagꞌin moyon mapaingangaꞌdo, tan say pagꞌin moyon mapagmatalkan. Sayti a manepeg nin gawꞌen moyo baleꞌ andiꞌ moyo anamaet nin luktawan nin gawꞌen a raruma. 24 Siꞌkamo, baraꞌmo kamon bulag nin mampangyakay sa dalan. Baraꞌmo kamon sayay tawo nin sapiten nayay kutakti sa inumen na baleꞌ ikiarebꞌeb nayan lamang a masibulot nin kamilyo.

25 Kadoꞌ kamoyna, siꞌkamon Madudunong sa Gugan-gan tan siꞌkamon Pariseo! Mampisantu-santos kamo! Man-gawꞌen moyon maong a kaugalian moyo bilang say pangriringgas moyon rikor nin tagayan tan plato baleꞌ say laman ket nangibwat sa kukanakman tan pigagawaꞌ moyon napnoꞌ nin kasauran tan kaaguman. 26 Siꞌkamon Pariseo, bulag kamo! Ringgasan moyo yapoꞌ a laman nan tagayan ket maringgas liꞌ anamaet a rikor na.

27 Kadoꞌ kamoyna, siꞌkamon Madudunong sa Gugan-gan tan siꞌkamon Pariseo! Mampisantu-santos kamo ta baraꞌmo kamon pantyon nin maputiꞌ tan maringgas sa rikor, baleꞌ sa luob ket napnoꞌ nin butꞌol tan naumok nin laman nin tawo. 28 Wanin moyon peteg, ta no mangimey kamo say wamoyo ket matunong kamo, baleꞌ say katutuꞌwan ket pulos nin piwadiꞌ-wadiꞌ tan kadukaan a iti sa kukaisipan moyo.”

29 “Kadoꞌ kamoyna, siꞌkamon Madudunong sa Gugan-gan tan siꞌkamon Pariseo! Mampisantu-santos kamo tamoꞌ. Namagwaꞌ kamon pantyon ran saray prupita nin pinati-pati ran puon moyo tan dikurasyunan moyon pabistawen a nanabunan konran tutawon nagkabyay nin matunong 30 tan wamoyon piwadiꞌ-wadiꞌ, ‘No sibibyay kami ana kumon sin panaon ran puon mi, kai kami nin nikiranod sa ginwaꞌ ra a pinati-pati rasaray prupita.’ 31 No wanin edet, manꞌipatutuo moyo a puri rakamon saray nangmati konran prupita sin saytaw. 32 Kanyaꞌ nin sigi! Ilaꞌpos moyoy kadukaan a nitaranaꞌ ran puon moyo! 33 Baraꞌmo kamon masirib a ulay, baleꞌ makapalꞌis kamo kasi nin madusa sa impyirno? Kai gapo! 34 Anaod, ibaritaꞌ ko komoyo, mangibakiꞌ ako komoyo nin saray mangipatandaꞌ tan saray main nin kadunungan nin nangibwat konan Dios, tan saray mangangakay. Ket saray raruma konra, patyen moyo sara o ikaꞌ moyo saran ipasak sa kudos, ket saray raruma et, sanet-saneten moyo sara sa sinaguga moyo tan kamat-kamaten moyo saran duksa-duksaen sa adtiman nin lugar a palaywan ra. 35 Ket konan siin, siꞌkamoy mapuluan nin madusa banaꞌ sa nipangmati konran sarba ran matunong a tutawo mangibwat ana kona ni Abel a kasan pakabalawan angga kona ni Zacarias nin anak na ni Baraquias a pinati moyo sa pisaꞌlean nan Sangkasantusan nin Lugar sa Timplo nan Dios tan si altar. 36 Ibaritaꞌ koyti komoyo, siꞌkamon tutawo konan sitin panaon a umbat liꞌ sa patiti ran sarain a tutawo.”

37 “O siꞌkamon taga Jerusalem, patye-patyen moyo saray prupita tan kudas-kudasen moyo saran patyen a tutawo nan Dios a ibakiꞌ na komoyo! Niꞌno koyna nin sinariꞌ nin dinepen katamon bilang sa pananayakop na sa sirong nin pakpak nan inan manok konran siwsiw na. Baleꞌ siꞌkamo, andiꞌ kamo! 38 Anaod, pauryan nayayna nin Dios a lugar moyo! 39 Oꞌ ibaritaꞌ ko komoyo, kai rakoyna nin maꞌkit anggan kai et nin rinmateꞌ a panaon a maibaritaꞌ moyoy wanti: ‘Binindisyunan nayan Dios a nibakiꞌ na nin manrumateꞌ anadti sawanin kontamo!’^c ”