Si Pangingiyarig Maipaꞌkaꞌ konan Kayon Igos a Kai nin Gumunga
13
Sin sain, main nin tutawodtaw nin nangibaritaꞌ kona ni Jesus nin maipaꞌkaꞌ konran umno ray taga Galilea a nipapati na ni Pilato leleg ra nin mampangidaꞌton nin pinatin uayep konan Dios ket nailawok a dayaꞌ ra sa dayaꞌ nin daꞌton ra. 2 Ket wana ni Jesus konra, “Manꞌipaꞌkaꞌ moyo para nin mas mabyat a kasalanan ran saraytaw nin pinati dyan saray raruman taga Galilea banaꞌ sa wantaw nin nikapati ra? 3 Ibaritaꞌ ko komoyo a amboꞌ nin wanin! Ket siꞌkamo, no kai moyo nin gurutan a pagkakasalanan moyo, madusa kamo ket mati kamon lamang nin bilang konra. 4 Saya et, saray labinwaloy tawon nati nin nadagꞌanan nan latudi nin itaw sa Siloe, sa wamoyo, mas makasalanan sara dyan saray kapada ran mampiikap sa Jerusalem? 5 Ibaritaꞌ ko komoyo a amboꞌ nin wanin! Ket siꞌkamo, no kai moyo nin gurutan a pagkakasalanan moyo, madusa kamo ket mati kamon wanin lamang konra.”6 Ket wana ni Jesus konra a sayay pangingiyarig, “Si sayay tawo ket main nin mula nan igos sa lutaꞌ na. Niꞌsa, kinaꞌ na nin kinikit no main nin bunga na, ket kasa gapo nin naꞌkit na. 7 Kanyaꞌ nin, wana konan si mangngalilaꞌ, ‘Ya! Tuloy taon koynan mampakodti mangkit nin bunga nan sitin puon, ket anggan sawanin kasa et gapo. Pukanen maynayti ta mangukupa ya tamoꞌ nin lugar.’ 8 Ket wanan sitin mangngalilaꞌ, ‘Ser, palabasen ta yapoꞌ a sayay taon ta sukaden koy libed nin puon na tan kwan yan gwano. 9 No gumunga ya liꞌ no sumunor a taon, maong, ket no kai, saytaw yayna liꞌ nin pukanen.’ ”
Sa Awron Painawa, Pinaandaꞌ naya ni Jesus a Babayin Bukot
10 Sayay Awron Painawa, anamanaet ket mampangyakay ya si Jesus sa sayay sinaguga. 11 Sin sain, main itaw nin sayay babayi nin labinwaloy taon naynan mangkapaidap ta nasrepan yan ispiriton dukaꞌ. Kanyaꞌ nin ginmukot ya tan kai nayayna gapo nin maitarindeg a gurot na. 12 Sin naꞌkit naya ni Jesus, kinayaban naya, miꞌsa wana, “Mangibwat sawanin limpyo kayna.” 13 Nipababo na ni Jesus a gamet na konan si babayi ket, sin sain, tampor nin naitarindeg nay lalaman na kanyaꞌ nin rinayu-rayo nayay Dios.
14 Sawanin, masager yay pangulo sa sinaguga banaꞌ ta sa Awron Painawa na ginwaꞌ in ni Jesus ket wana konran tutawo, “Main nin aꞌnem a awron matkap a magꞌubra. Sa saytaw nin awro kamo makodti nin patambar amboꞌ no Awron Painawa.”
15 Ket wanan niꞌbat ni Jesus nin Uunuren kona, “Maong kamo wadiꞌ! Kai para a say barang saya komoyo mataman no Awron Painawa ket usbagen moyo sara sa nakaipugedan ray ayep moyo ta ikaꞌ moyo sara nin painumen? 16 Siti nin babayi, a nangibwat anaod sa puri na ni Abraham, ket pinagmasakit naya ni Satanas sa luob nin labinwaloy taon. Amboꞌ para nin manepeg a paꞌsar balukasan ya anamaet mangibwat sa masakit na sa Awron Painawa?” 17 Sa sain a nibaritaꞌ na ni Jesus, sarba ran kuntra kona ket napadingꞌeyan sara. Baleꞌ maririket saray raruman tutawodtaw banaꞌ sa sarban bubagay nin makapakaꞌngap a ginwa-ginwaꞌ na.
Healing on the Sabbath
Say Pangangakay nin Maipaꞌkaꞌ sa Iyadilanta nin Pagꞌaadiꞌ nan Dios
18 Ket nituloy na ni Jesus a pangangakay na. Wana, “Paꞌnoy pagꞌaadiꞌ nan Dios? Adti nin maiyarig? 19 Say iyadilanta nin pagꞌaadiꞌ nan Dios ket maiyarig sa sangkadaitean nin bikoy nin mustasa a nikaꞌ na nimula nin sayay tawo sa pukok na. Tinmuboꞌ ya anggan nagꞌin yan kayo ket nipugaran ran mumanuk-manok a susanga na.”
The Kingdom of God as a Mustard Seed
20 Wana et ni Jesus, “Ani et a pangiyarigan ko sa pagꞌaadiꞌ nan Dios? 21 Say pakaitayak nin akay maipaꞌkaꞌ sa pagꞌaadiꞌ nan Dios ket maiyarig et sa pammakbo. Nilawok nan sayay babayi a daiteꞌ nin pammakbo sa rwampuloꞌ a salop nin arina ket kinumbo yay intiron minasa na.”
Si Akipot a Purtan Mako konan Dios
22 Nituloy ra ni Jesus a pako ra sa Jerusalem ket sa nadalanan ran bubabali tan bubaryo, tinumge-tumgen saran nangyakay. 23 Sawanin, main nin nanepet kona ni Jesus a wana, “Ser, umno sara tamoꞌ para a maisalba nan Dios?”
Ket wanan niꞌbat ni Jesus konran tutawo, 24 “Gawꞌen moyoynay anggawan nin mababaꞌ moyon makasrep sa akipot nin purta nin mako sa anggan-angga nin byay. Ibaritaꞌ koyti komoyo: Rumateꞌ liꞌ a panaon nin abaw saray masuet nin sumrep baleꞌ kai sara nin makasrep. 25 Nisadaꞌ nayayna liꞌ a purta nin main nin bali ket, siꞌkamo itaw kamo tana sa rikor, mantumuktok kamon mampangumbinsi a wamoyo, ‘Ser, pasrepen rakami pa.’
Ket si ubat na komoyo, ‘Andyak ta kai katamo nin katandaꞌ tan kai ko nin tandaꞌ no adti a ibwatan moyo.’
26 Ket wamoyo, ‘Nakadungo rakamin nangan tan ninom, tan nangyakay kadtaw et sa lugar mi.’
27 Baleꞌ iꞌbat na, ‘Kai kamo nin makakibiang iti, siꞌkamon sarba nin gumu-gumwaꞌ nin dukaꞌ! Kumadayoꞌ kamo kongko!’
28 Ket umasisit kamo tan ngumaretenget a ngipen moyo banaꞌ sa pakapaidap. Anaod, maꞌkit moyo saradtaw si Abraham, si Isaac, si Jacob tan sarba ran prupita nan Dios sa Pagꞌadian na, ket siꞌkamo baleꞌ, mampalakwanen kamo ket kai kamoyna gapo nin makasrep. 29 Main anamaet nin tutawon kipunsyadtaw sa Pagꞌadian nan Dios nin mangibwat sa panrupan tan sa baytan, wanin et sa bagatanan tan sa amyanan. 30 Anaod, main saray tutawon mipaayupaꞌ sara sawanin ket maitaꞌgay sara liꞌ, tan main sara anamaet a mipataꞌgay sara sawanin ket maikayupaꞌ sara liꞌ.”
Say Pangangadoꞌ na ni Jesus konran Taga Jerusalem
31 Konan siin et a lamang a udas, main nin Pariseo nin nako kona ni Jesus a wanra, “Mibwat kaynadti yapoꞌ ta rabay naka kano nin ipapati ni Adiꞌ Herodes Antipas.”
32 Ket wanan niꞌbat ni Jesus, “Mako kamo konan siin nin tawon baraꞌmon alimutang a mataktika tan ibaritaꞌ moyo kona a wangko a sawanin tan no dilap ket ituloy ko et a lamang a mamalakwan nin ispiriton dukaꞌ konran nasrepan ra tan mamaandaꞌ nin main nin masakit. Ket sa ikatlon awro, mayadiꞌ koyna a gawaꞌ ko. 33 Oꞌ a, kanyaꞌ nin ituloy koy pako ko sa keen ko sawanin, no dilap tan angga et no kamakarwa banaꞌ ta adti et anaod a lugar nin pangmatyan konan sayay prupita nan Dios no kai itaw sa Jerusalem?
34 O siꞌkamon taga Jerusalem, patye-patyen moyo saray prupita tan kudas-kudasen moyo saran patyen a tutawo nan Dios a ibakiꞌ na komoyo! Niꞌno koyna sinariꞌ nin dinepen katamon bilang sa pananayakop na sa sirong nin pakpak nan inan manok konran siwsiw na. Baleꞌ, siꞌkamo, andiꞌ kamo! 35 Anaod, pauryan nayayna nin Dios a lugar moyo! Oꞌ ibaritaꞌ koyti komoyo, kai rakoyna nin maꞌkit angga nin rinmateꞌ ana a panaon nin maibaritaꞌ moyo a wanti, ‘Binindisyunan nayan Dios a nibakiꞌ na nin manrumateꞌ anadti sawanin kontamo!’a ”