4 Ket ibaritaꞌ ko komoyo, siꞌkamon uamigo ko, andiꞌ kamo nin maliꞌmo konran marabay nin mangmati komoyo ta say lalaman moyo tamoꞌ a mapati ra. Mayadiꞌ ket kasaynan raruma et nin magwaꞌ ra. 5 Ipauꞌna-uꞌna koyna komoyo no siꞌnoy manepeg moyon ikaliꞌmo. Si ikaliꞌmo moyo ket si mayadiꞌ ya nin mangmati ket main nin pakayadiꞌ nan mangibantak et sa impyirno. Ibaritaꞌ koyti komoyo, si Dios a manepeg nin ikaliꞌmo moyo!

6 Magwaꞌ saran binting tamoꞌ a liman manuk-manok. Mataman nin wanin baleꞌ, ni saya konra ket kai na nin mampauryan nin Dios. 7 Baluꞌ-baloꞌ kamoyna! Ultimo et a say sabot moyo sa ulo ket nabilang na. Kanyaꞌ anaod nin andiꞌ kamo nin maliꞌmo banaꞌ ta mas mabli kamon adayoꞌ kona dyan saray abaw a manuk-manok.

8 Ket ibaritaꞌ ko komoyo a si siꞌnuman a mangipatutuo konran tutawo a tumutumbok koya, siꞌkon si Pinaitawo ket ipatutuo kon tumutumbok koya sa adapan ran uanghil nan Dios. 9 Baleꞌ si siꞌnuman a mangibudiꞌ konran tutawo a tumutumbok koya, ibudiꞌ ko liꞌ anamaet a tumutumbok koya sa adapan ran uanghil nan Dios. 10 Si siꞌnuman a magꞌirgo nin animan a kuntra kongko a si Pinaitawo, mapirduna ya et. Baleꞌ si tawon mamadukaꞌ nin kabistawan nan Ispirito nan Dios, kai ya gapo nin mapirduna.

11 Sa tyimpo a ikaꞌ rakamo nin iyadap konran mampagꞌuray sa susinaguga, o konran iti sa uray, o konran raruma et nin main nin pakauray ta pigaw nin usisaen rakamo banaꞌ sa pammemper moyo kongko, andiꞌ moyo nin kaaburidwan no ani a ibaritaꞌ moyo, o no paꞌno a iꞌbat moyo 12 banaꞌ ta konan sitaw liꞌ nin udas, si Ispirito nan Dios ket iyakay nakamo no ani a manepeg moyon ibaritaꞌ.”

13 Sawanin, main nin saya konran nididinep nin tutawodtaw a nikiirgo kona ni Jesus a wana, “Maistro, bibilinen moya pay busat ko nin ibi nayna a tao ko sa tawir mi.”

14 Ket wana ni Jesus kona, “Ya! Amigo, amboꞌ in a nakaibakian ko si pagꞌurayan a pitao moyon tawir moyo.” 15 Ket wana et konran tutawodtaw, “Pakailag kamo maipaꞌkaꞌ sa apes-apesen moyo! Andiꞌ kamo kumon nin maagom sa animan ta say byay, amboꞌ nin dipindi sa kaꞌbawan nin kamamain.” 16 Ket namaritaꞌ ya nin sayay pangingiyarig maipaꞌkaꞌ sa sain a wana, “Main nin sayay mayaman nin abaw nin tuloy a nayatab na. 17 Ket wana sa nakem na, ‘Ani kadiꞌ a mabistan gawꞌen ko ta kasaynan mapangaturan ko nin raruman nayatab ko?’ 18 Wana ana et, ‘A, mayaꞌ pa! Yubaen koy agamang ko tan mamaꞌdeng akon mas alalaki nin pangaturan kon yatab tan raruma et nin main ko. 19 Ket wangko liꞌ, “Ay! Abaw ana a nadinep nin niyator kon ikabyay para sa abaw a taon. Painawa akoyna tana, minom, mangan tan mipariga.” ’

20 Baleꞌ wana nin Dios kona, ‘Kalawakaw! Sitin yabi, kalapen koyaynay byay mo. Sawanin, siꞌnoyna a keen nin sain say abaw a nisadyaꞌ mo para sa lalaman mo?’

21 Wanin a kapapaꞌsar nan sayay maninep nin kayamanan para sa lalaman na baleꞌ amboꞌ yan mayaman konan Dios.”

22 Sawanin, wana et ni Jesus konran tumutumbok na, “Kanyaꞌ edet nin ibaritaꞌ koyti komoyo: Andiꞌ kamo nin umaburido maipaꞌkaꞌ sa matkap moyo konan sitin byay a bilang sa ikabyay tan sa isket moyo. 23 Anaod, say pipaꞌkaan nin byay moyo ket mas ararem dyan say pangangan tan pisisket. 24 Imatunan moyo saray uwak: Kai sara nin mampangmula ni mampangyatab. Kasan agamang ra o mampangaturan ran kanen ra. Wanin man, mambyan nasaran Dios nin maꞌkan. Anaod, mas mabli kamo konan Dios dyan saray mumanuk-manok! 25 Anamaet, mapaanro moyo kasi a byay moyo mataman nin sayay udas tamoꞌ no umaburido kamo? 26 No kai moya nin magwaꞌ in nin daiteꞌ tamoꞌ nin bagay, mayin a kaaburidwan moyo et a raruma?

27 Imatunan moyo pay kabibista nin buburak nin dikot. Kai nin magtrabaho ni mangabel nin isket ra. Baleꞌ ibaritaꞌ ko komoyo, abirno aninay pupustura nin seket na ni Adiꞌ Solomon ta wanin anay yaman na, kai ya et nakapisket nin kapadan bista nan saya sa sain nin buburak. 28 Ket no mapasketan nan wanin kabista nin Dios a dudikot a isen sawanin baleꞌ dilap ket magwaꞌ a ipuor tamoꞌ sa syang, mas lalo ana a byan nakamon isket moyo! Aninay kababwan nin pagmamatalek moyo! 29 Kanyaꞌ nin andiꞌ moyo tana nin pirmin pipanemtem no ani a kanen o inumen moyo tan andiꞌ moyoyti nin pakaaburidwan. 30 Oꞌ anaod, sain nin bubagay a iti sa nakem ran sarban tutawon kai nin mangalilbiꞌ konan Dios baleꞌ, main ya a Ama moyon itaw sa langit nin magtandaꞌ a matkap moyo in nin bubagay. 31 Ana edet, matkap a say muꞌna-muꞌna nin iti sa kanakman moyo ket si maiyadilanta a maipaꞌkaꞌ sa pagꞌaadiꞌ nan Dios ket ibi na anamaet in nin matkap moyo.

32 Siꞌkamo nin mampagawan ko, umno kamo tamoꞌ. Wanin man, andiꞌ kamo nin maliꞌmo ta maririket yan maong a Ama moyon itaw sa langit nin kiramaꞌ kamo sa Pagꞌadian na. 33 Ilakoꞌ moyoy main moyo, ket mami kamo konran makatkap sa naglakuan moyo. No wanin a gawꞌen moyo, mampaninep kamo itaw sa langit nin kayamanan nin kai nin masidaꞌ tan maꞌpos, nin kai ra maꞌkaꞌ nin mannakaw tan kai ra nin masidaꞌ nin insikto. 34 Anaod, maninep kamodtaw ta no adti a kamiꞌnan nin mabli komoyo, itaw anamaet a nakem moyo.”

35 Wana et ni Jesus, “Sumadyaꞌ kamoynan siꞌkamon magsisirbi. Matkap a baraꞌmo kamon saray ualilaꞌ nin nakasili tan nakapadta a lampadawan nin 36 mantumaꞌgan sa iyuyugot nan amo ran ibat sa bansal. Nakasadyaꞌ sara ta pigaw nin no rumateꞌ ya ket tumuktok ya sa purta, tampor nin maabryan raya. 37 Makarmaꞌ saray wanin a ualilaꞌ a marateꞌ nasaran amo ra nin nakasadyaꞌ. Anaod, ibaritaꞌ koyti komoyo a sitin amo, magpripira yan magsirbi konran ualilaꞌ na 38 mataman no rumateꞌ ya sa kapikngaꞌ nin yabi o no parbangon ana nin padungwen nasaran mangan. Paririketen nasara no nakasadyaꞌ sara!

39 Tandaen moyoyti: No kumon ket tandaꞌ nan main nin bali no kaꞌno ya nin mako a mannakaw, siguradon sadyaan naya, ket si mannakaw kai naya nin masrep a bali na. 40 Kanyaꞌ anaod nin, taman nin siꞌkamo, matkap a sisasadyaꞌ kamo nin lawas ta siꞌkon si Pinaitawo ket bigraꞌ a rumateꞌ ako liꞌ no kaꞌno nin kai moyo ipaꞌkaꞌ.”

41 Sawanin, si Pedro, tinmepet ya kona ni Jesus a wana, “Maistro, siin a pangingiyarig, para ya komin tumutumbok mo o para ya sa sarban tawo?”

42 Ket wanan niꞌbat nin Uunuren a saya yan pangingiyarig, “Edet, siꞌnoy kumanaꞌ nin tawo na? Siꞌnoy sayay manakem tan kapagpyawan a alilaꞌ? Iyintriga na nin amo na kona a pangangasikaso konran kapada nan alilaꞌ tan pammi nin inawru-awron rasyon ran ikabyay. 43 Paririketen naya nin amo a wanin nin ingkargado no sa irarateꞌ na ket wanin a man-gawꞌen na. 44 Anaod, ibaritaꞌ koyti komoyo, pagꞌinen nayan amo na nin ingkargado sa sarban main na. 45 Baleꞌ no siin nin ingkargado ket wana sa nakem na, ‘Maꞌteng ya et nin rumateꞌ a amo ko,’ ket sasakit-sakiten nasaray kapada na nin alilaꞌ, lulalaki man o bubbayi, tan mipapdaꞌ yan mangan tan minom anggan mabok ya, 46 anta main ket, rumateꞌ yay amo na nin kai na gapo nipaꞌkaꞌ nin rumateꞌ ya. Ket kasan sapon dusawen nayan say makapati nin amo na ket itampal nayan ikalamoꞌ konran kai nin kapagpyawan.

47 Ket si ingkargado a magtandaꞌ ana sa karabayan nan amo na, baleꞌ kai ya nin sinmadyaꞌ o kai na nin ginwaꞌ a manꞌipagwaꞌ kona, dusawen nayan maong nin amo na. 48 Baleꞌ si ingkargado a kai nin magtandaꞌ sa karabayan nan amo na, ket nakagwaꞌ yan subag kona, bugaꞌ tamoꞌ a panunusa kona.

Anaod, si sayay binyan nin abaw o nangipyawan nin abaw, mas abaw anamaet a ilalwan kona.”

49 Wana et ni Jesus, “Nako akodti sa lutaꞌ ta pigaw nin ringgasan koyan apoy a mundo. Ket sapa kumon ta kapresan ana. 50 Baleꞌ matkap a mangirangep ako yapoꞌ nin dyaꞌdyaꞌ ket anggan kai et nin nangyadiꞌ, say kaisipan ko ket kai nin makapainawa. 51 Sa wamoyo nako akodti sa lutaꞌ ta pigaw nin mitutuno saray tutawo? Kai! Nako akodti ta pigaw nin mapuruk-purok saray tutawo. 52 Ket mangibwat sawanin, bilang wadiꞌ sa limay katawo sa sayay pamilya, kuntrawen rasara liꞌ nin tulo a rwa tan wanin ra anamaet nin rwa a kuntrawen rasara liꞌ a tulo. 53 Wanin anamaet, saray mitraama, mikuntra sara; saray mitraina, mikuntra saran lamang; si katyangan nin babayi kikuntra ya konan manuyang nan babayi, o si manuyang nin babayi kikuntra ya konan katyangan nan babayi.”

54 Wana anamaet ni Jesus konran abaw nin tutawodtaw, “No maꞌkit moyon mangkumubpal a gunem sa panrupan, tampor a wamoyo, ‘Rumapeg kadiꞌ.’ Ket rinmapeg yan pageꞌ. 55 No maingar moya anamaet a sirin timog wamoyo, ‘Pinasyan amot kadiꞌ.’ Ket pinasyan amot nin pageꞌ. 56 Siꞌkamon mampimaung-maong! Mataros moyoy pipaꞌkaan nin bakas nin lutaꞌ tan nin langit, ket sukat a kai moyo nin mataros a pipaꞌkaan nin mampangyadiꞌ sawanin nin panaon?

57 Edet, magdisisyon kamo no ani a matunong sa adapan nan Dios. 58 Bilang wadiꞌ, no main nin mangidimanda komo ket iꞌras naka sa husgado, kiariglo kaynan tampor mintras nin iti kamo et sa dalan, baꞌyo ka nin maiyadap sa kurti, ta no kai, ipasuet nakan iꞌras konan hwis, miꞌsa ipagamet nakan hwis konran pulis ket ipriso raka. 59 Ibaritaꞌ koyti komoyo, buruken rakadtaw sa tana a mabayadan mo a sangkaultimwan nin sintabos a multa mo.”