3 Nako ya si Jesus sa Talugtog nin Olibo tan tinmekreꞌ yadtaw. Nako saradtaw nin sara-sara tamoꞌ a tumutumbok na ta main nin tepeten ra kona. Wanra, “Kaꞌno liꞌ nin mangyadiꞌ in si wamoyon maybaꞌ ya a Timplo? Ani liꞌ a panandaan nin isusubliꞌ moynadti sa lutaꞌ tan say iyayangga nin kapresan a pagꞌuuray iti sa mundo?”

4 Ket wanan niꞌbat ni Jesus konra, “Pakatalad kamo a kai kamo nin malingon tepren moyoy bulaꞌ, 5 ta abaw sara liꞌ a mangusar nin titulo ko a wanra ket sara a Cristo nin nipangakoꞌ nan Dios. Ket abaw sara liꞌ a malingo ra. 6 Marngeꞌ moyo a danurdor nin pigigira tan marnge-marngeꞌ moyon main nin pigigira sa saka-sakalakon lugar. Baleꞌ andiꞌ kamo nin aburido ta saytin bubagay ket matkap nin mangyadiꞌ yapoꞌ. Baleꞌ amboꞌ et nin iyayangga anan kapresan a pagꞌuuray iti sa mundo 7 ta milalaban liꞌ a nunasyon sa saya tan saya, tan wanin et a lamang a pupagꞌurayan. Magkamain liꞌ nin bitil tan rayon sa abaw a lulugar. 8 Baleꞌ sain ket taranaꞌ tamoꞌ et nin rumateꞌ nin dyaꞌdyaꞌ, kapadan taranaꞌ nan mangingar nin sayay mangabing.

9 No saytaw liꞌ nin panaon ket dakpen tan ipagamet rakamo konran saray manusa komoyo, tan patyen rasaray raruma komoyo. Guraen rakamo liꞌ nin tutawo nin mangibwat sa sarban nunasyon banaꞌ ta mantarigꞌenan moyoy mangkikalamoꞌ kongko. 10 No saytaw liꞌ nin panaon ket abaw sara liꞌ a mammemper kongko nin gurutan ra a pammemper ra. Miguraan sara liꞌ a tutawo tan mitraiduran sara liꞌ. 11 Abaw sara liꞌ a magbaluꞌ-baloꞌ a prupita nasaran Dios tan bulaꞌ-bulaꞌ a uakay ra, ket abaw sara liꞌ a malingo ra. 12 Banaꞌ liꞌ ta wanin anay kadukaan iti sa mundo, tumabꞌang liꞌ a pangangadoꞌ ran abaw nin tutawo. 13 Baleꞌ, si tawon tarigꞌenan nay tumulok kongko anggan kalaꞌpusan nin dyaꞌdyaꞌ, makarateꞌ ya sa Pagꞌadian nan Dios. 14 Maipatandaꞌ ya liꞌ a Mabistan Patandaꞌ nin maipaꞌkaꞌ sa pagꞌaadiꞌ nan Dios sa sarban lugar ta pigaw nin matandaan ya nin sarban tutawo, ket no nayadiꞌ ana in liꞌ nin nagwaꞌ, saytaw ana a iyayangga nin kapresan a pagꞌuuray iti sa mundo.

15 Anaod, si Prupita Daniel, nipadles na a maipaꞌkaꞌ konan si ‘Makaparmay nin Bagay a Manidaꞌ.’^a ” (Siꞌkan mampamasa, tarusan maytin maong!) “Saytaw no maꞌkit yaynayti liꞌ nin bagay nin itaw yayna sa Timplo nan Dios, 16 saray itaw nin mampiikap sa Judea malayo saraynan mako nin umadi sa tutalugtog. 17 Si tawon itaw nin mampagprisko sa balkon^b bali ra, andiꞌ yayna nin sumrep et nin mangalap nin animan a agamiren na. 18 Si itaw nin mampagtrabaho sa gagawaꞌ, andiꞌ yayna nin sumubliꞌ et sa bali ra mangalap nin seket na. 19 Kadoꞌ sarayna liꞌ a mabuktot tan saray uinan main nin uaꞌnak ran mampasuswen konan siin a panaon! 20 Kanyaꞌ nin idasal moyo konan Dios a amboꞌ liꞌ kumon nin tyimpon gawat^c o Awron Painawa no mangyadiꞌ in 21 ta say dyaꞌdyaꞌ liꞌ konan sitaw a panaon ket kasa gapo nin kapada, nangibwat et sin naparsa yay mundo anggan sawanin, tan kasa gapo nin kapadan mangyadiꞌ et liꞌ. 22 No kai naya paanteden in nin panaon nin Dios ket kasa liꞌ gapo nin mabatiꞌ nin mabyay iti sa mundo. Baleꞌ paanteden naya in liꞌ nin panaon banaꞌ konran piniliꞌ na nin tutawo na.

23 Ket no saytaw liꞌ ket main nin mamaritaꞌ komoyo a wana, ‘Syayna e a Cristo!’ o wana, ‘Itaw ya e!’ andiꞌ kamo nin mamper 24 ta abaw sara liꞌ a magbaluꞌ-baloꞌ a sara a Cristo o a prupita sara. Mamaꞌki-paꞌkit sara liꞌ nin makapakaꞌngap nin panandaan tan mumilagro ta pigaw nin lingwen rasaray tutawo, a no magwaꞌ ket tagem nin saray piniliꞌ nan Dios nin tutawo na. 25 Ket tandaan moyo ta nibaritaꞌ koyna ngaꞌmin komoyo baꞌyo et nin mangyadiꞌ.

26 Kanyaꞌ nin no main nin mamaritaꞌ komoyo a wanra, ‘Itaw ya si Cristo sa kasan katawu-tawon lugar,’ andiꞌ moya nin keen karapen itaw, o no main nin mamaritaꞌ a wana, ‘Iti ya sa luob nin kwarto,’ andiꞌ kamo nin mamper. 27 Wanin ta, say irarateꞌ ko a siꞌkon si Pinaitawo ket mapatna-patnag a kapaday kimat nin bigraꞌ nin kumidlap, a mamalaway sa langit mangibwat sa baytan anggan sa panrupan.

28 Kapada kasiguradon mangyadiꞌ ti a no adti main nin maangot ran laman nin nati, ket itaw sara nin mididinep a mumanuk-manok a mangan nin laman nin nati.

29 Ket kayadiꞌ liꞌ nin sain a dyaꞌdyaꞌ, si awro, dumedlem ya tan si bulan, kai yayna nin sumlag. Say bubituen, mangaragrag mangibwat sa langit tan say pupakayadiꞌ a mamauksoy sa taꞌgay nin langit ket maguloyna.^d 30 Kaaram, main liꞌ nin maꞌkit sa langit nin panandaan a siꞌkon si Pinaitawo ket sumubliꞌ akoynadti sa lutaꞌ, ket mangabet-abet sara liꞌ ngaꞌmin a tutawodti sa mundo. Maꞌkit rako liꞌ a siꞌkon si Pinaitawo nin manrumateꞌ nin iti sa babon gunem, nin main nin pakayadiꞌ tan kasan kapadan kagalangan. 31 Patnuyen ya liꞌ a alakin trumpita ket ibakiꞌ kosara liꞌ a uanghil ko nin mako sa sangkamundwan, tan dinepen rasara ngaꞌmin a tutawon piniliꞌ nan Dios.^e

32 Kikiten moyay kayon igos ta main nin maadal moyo mangibwat kona. No sumalingsing yayna tan gumulong, masigurado moyon rumateꞌ anay tyimpon rapeg. 33 Wanin anamaet, no maꞌkit moyoyna liꞌ nin mampangyadiꞌ ana in say nibaritaꞌ ko komoyo, matandaan moyoynan rumateꞌ akoynan madaliꞌ. 34 Ibaritaꞌ koyti komoyo a no wanin ana liꞌ anaod a mampangyadiꞌ, baꞌyo kamo et nin mati ngaꞌmin ket matukid ana a sarban nibaritaꞌ ko. 35 Makasa a langit tan lutaꞌ, baleꞌ say ibaritaꞌ ko magnayon nin tutuo anggan-angga.”

36 “Baleꞌ no kaꞌnon peteg nin mangyadiꞌ a nibaritaꞌ ko, kasa gapo nin makatandaꞌ, ni saray uanghil o siꞌkon si Anak nan Dios^f. Kal-la si Ama ko tamoꞌ a makatandaꞌ. 37 Sa panaon nin isusubliꞌ kodti liꞌ sa lutaꞌ nin siꞌkon si Pinaitawo, say kararateꞌ ko liꞌ ket bilang sa nangyadiꞌ sin panaon na ni Noe 38-39 ta sin saytaw nin panaon a adapen nin malanip a intiron mundo, kai ra gapo nin nipaꞌkaꞌ nin tutawo a main nin dukaꞌ a mangyadiꞌ. Kanyaꞌ nin nangan saran maong, ninom sara, tan nangasawa tan nikiasawa sara angga sin mismon awron linmuob ya si Noe sa alakin baluto.^g Kapingmatan, linmanip yan bigraꞌ ket naanor sara ngaꞌmin. Wanin anamaet liꞌ a lamang no sumubliꞌ akoyna a siꞌkon si Pinaitawo. 40 Ket, no saytaw liꞌ nin panaon, bilang wadiꞌ main nin rwa ray lalakin mampagtrabaho sa gagawaꞌ, si saya awiten raya liꞌ nin uanghil ko tan ibatiꞌ raya liꞌ a saya. 41 No main liꞌ nin rwa ray bubbayin mampangiling, si saya awiten raya liꞌ nin uanghil ko tan ibatiꞌ raya liꞌ a saya.

42 Sumadyaꞌ kamon pirmi ta kai moyo nin tandaꞌ no kaꞌnoy awron sumubliꞌ ako, siꞌkon si Uunuren moyo. 43 Kapada nan sayay main nin ikon nin bali, no tandaꞌ na kumon no kaꞌno ya nin mako a mannakaw, siguradon sadyaan naya, ket si mannakaw kai ya nin makasrep. 44 Kanyaꞌ anaod nin, matkap a sisasadyaꞌ kamon lawas ta siꞌkon si Pinaitawo ket bigraꞌ nin rumateꞌ ako liꞌ no kaꞌno moyo kai nin ipaꞌkaꞌ.”

45 “Si sayay manakem tan kapagpyawan a alilaꞌ, ket pyawen nayan amo na nin mangasikaso konran kapada nan alilaꞌ, nin mamin kanen ra sa kuston udas. 46 Paririketen naya nin amo a wanin nin alilaꞌ no sa irarateꞌ na ket wanin a man-gawꞌen nan sitin alilaꞌ. 47 Anaod, ibaritaꞌ koyti komoyo a pagꞌinen naya nin ingkargado sa sarban main na nin amo na. 48 Baleꞌ no dukaꞌ ya wadiꞌ taw nin alilaꞌ a say wana sa nakem na ket, ‘Maꞌteng ya et nin rumateꞌ a amo ko.’ 49 Ket sasakit-sakiten nasaray kapada nan alilaꞌ tan kipangan tan kiinuman ya konran mabubok. 50 Ket kapingmatan, rinmateꞌ yay amo na nin kai na gapo nipaꞌkaꞌ nin rumateꞌ ya. 51 Ket kasan sapon dusawen nayan say makapati nin sitin amo na ket itampal nayadtaw nin ikalamoꞌ konran misantu-santos ket itaw main nin umasisit tan umagrem tan ngumaretenget a ngipen ra banaꞌ sa pakapaidap tan bereng.