Si Rispunsibilidad tamo ket si Ipatunong tamoy Saya tan Saya
17
Wana ni Jesus konran tumutumbok na, “Kai nin mapalꞌisan nin rumateꞌ a puon nin pagkakasalanan sa byay nin tawo, baleꞌ kaudaꞌdwan a kaugutan nan tawon pangibwatan nin pagkakasalanan nan kapada nan tawo. 2 Mas maong et konan sayay tawo a katinan yan mabyat nin bato sa liey tan ibuntok ya sa taaw dyan si magꞌin nin syay puon nin pakasidaꞌ nin pagmamatalek na kongko nin saya konran sarayti nin maayupaꞌ sa pammemper ra.3 Kanyaꞌ nin asikaswen moyon maong a man-gawꞌen moyo! No wadiꞌ ta main nin kapada mon mammemper nin magkasalanan komo, imaꞌnwen ma. Ket no magbabawiꞌ ya, pirdunawen ma. 4 Mataman nin magkasalanan ya komo nin mipito sa sayay awro, no tana ket mipito yan mako komo nin wana, ‘Magbabawiꞌ ako,’ matkap a pirdunawen ma.”
Woe to Those Who Cause Others to Sin
5 Ket wanran saray apostoles kona ni Jesus nin Uunuren, “Punꞌan mo pay pagmamatalek mi!”
6 Ket wanan niꞌbat nin Uunuren, “Mataman no say pagmamatalek moyo ket bilang nin kaalaki sa sangkadaitean a bikoy, magwaꞌ moyon ibaritaꞌ konan sitin alakin kayo a dumutdot ya tan mako yadtaw nin paimula sa taaw, ket tumulok ya.
7 Anamaet a lamang, no si saya komoyo wadiꞌ ket main nin aripen nan mampangadadon lutaꞌ na o mampamastor nin uayep na, ket karateꞌ nan siti nin ibat sa gagawaꞌ, ibaritaꞌ na kasi kona a dumungo yaynan tampor ta mangan yayna? 8 Kai! Ana edet, igan-gan nan amo, ‘Misili ka tan manadyaꞌ kan pangapunan ko, miꞌsa sirbyan nakon mangan tan minom. Ket kayadiꞌ ko nin mangan, mangan kayna.’ 9 Sawanin, kisalamat ya kasi a amo konan sitin aripen banaꞌ ta ginwaꞌ nay namakian na kona? Kai anaod!
10 Wanin a lamang anamaet komoyo. Mataman no nagwaꞌ moyoynay sarban nangibakian nan Dios komoyo, matkap a wamoyo, ‘Uaripen kami tamoꞌ. Kai kami matkap nin raywen ta ginwaꞌ mi tamoꞌ a namakian komi.’ ”
Pinaandaꞌ nasara ni Jesus a Mapuloꞌ a Tawo nin Liprusyen
11 Sa katutuloy ra ni Jesus nin mako sa Jerusalem, iti sara nin dinmalan sa pisaꞌlean nin prubinsyan Samaria tan Galilea. 12 Ket sin nakarateꞌ sara sa sayay baryo, sinumnaꞌ sara kona a mapuloꞌ ra nin tawo nin main nin liprusi. Tinumgen saran nakaꞌdeng sa midyo adayoꞌ 13 tan wanran nitaꞌway, “Jesus, Maistro, kaꞌdwan rakami pa!”
14 Sin naꞌkit nasara ni Jesus wana, “Mako kamo paipadar sa pupadiꞌ.”a Ket nako saraynaod ana.
Ket sin iti sara et a lamang sa dalan, inmandaꞌ sarayna. 15 Si saya konra, sin naasikaso na a inmandaꞌ yayna sa masakit na, sinmubliꞌ yan tampor itaw kona ni Jesus tan nitaꞌwa-taꞌway nay pangrarayo na konan Dios. 16 Nanalimukod yan nignaꞌ a rupa na sa lutaꞌ sa adapan na ni Jesus nin nikisalamat kona. Anta siti nin lalaki ket amboꞌ yan Israelita no kai Samaritano ya.
17 Sawanin, wana ni Jesus kona, “Mapuloꞌ sara katawo a pinaandaꞌ ko. Adti sara edet a syam? 18 Ani, kasaynan raruman sinmubliꞌ ta pigaw nin raywen nayay Dios no kai kal-la siti si sayay sanꞌili?” 19 Sinmunor, wana ni Jesus kona, “Umdeng ka ta mako kayna sa keen mo. Banaꞌ sa pagmamatalek mo, inmandaꞌ kayna.”
Say Itataranaꞌ nin Pagꞌaadiꞌ nan Dios
20 Sayay awro, main saray Pariseo nin nanepet kona ni Jesus no kaꞌno nin tumaranaꞌ a pagꞌaadiꞌ nan Dios. Wanan niꞌbat konra, “Say itataranaꞌ nin pagꞌaadiꞌ nan Dios ket kasan sinyalis nin pakaꞌkitan. 21 Iti ya komoyo nin mampagꞌadiꞌ ket kai nin maꞌkit kanyaꞌ nin kasan makapamaritaꞌ a ‘Iti ana!’ o ‘Itaw ana!’ ”
22 Sumunor, wana ni Jesus konran tumutumbok na, “Main liꞌ nin panaon a mailiw kamon magꞌuray akoynadti, siꞌkon si Pinaitawo, baleꞌ kai nin magwaꞌ in. 23 Anaod, main liꞌ nin mangibaritaꞌ komoyo a wanra, ‘Iti ya!’ o ‘Itaw ya!’, baleꞌ andiꞌ kamo nin sumunor konra. 24 Wanin ta, say irarateꞌ ko nin siꞌkon si Pinaitawo ket mapatna-patnag a kapaday kimat nin bigraꞌ nin kumidlap nin mamalaway sa intiron kalangitan. 25 Anta, matkap a dumalan ako yapoꞌ sa pangingirangep nin abaw a pammadyaꞌdyaꞌ tan kai rako nin alilbien nin saray tutawo konan sitin panaon.
26 Sa panaon nin isusubliꞌ kodti sa lutaꞌ nin siꞌkon si Pinaitawo, say kapapaꞌsar ran tutawo ket kapada konran tutawo sin panaon na ni Noe. 27 Sin saytaw, nagkabyay saran bilang kasan rumateꞌ nin pakadusa ket mangan sara, minom tan sumrep sara sa istado angga sin mismon awron linmuob sara si Noe sa alakin baluto.b Ket sin lanip ana, nati saray sarban tawo.
28 Wanin lamang anamaet a nangyadiꞌ sin panaon na ni Lot. Ukupado saray tutawo nin mangan, minom, magkumirsyo, mangmula tan mamaꞌdeng nin bali. 29 Baleꞌ sin awron linmakwan ya si Lot sa syudad nin Sodoma, pinarapeg naya nin Dios nin apoy tan asupri kanyaꞌ nin napuuran saray sarba ngaꞌmin itaw. 30 Wanin anamaet liꞌ a lamang a mangyadiꞌ sa awron isusubliꞌ ko nin siꞌkon si Pinaitawo nin paipadar akoyna.
31 Konan sitaw liꞌ nin panaon, si siꞌnuman nin itaw sa balkon nin bali na, andiꞌ yayna nin lumuob ta pigaw nin kalapen nay main nadtaw. Wanin anamaet konan si itaw nin mampagtrabaho sa gagawaꞌ, andiꞌ yayna nin sumubliꞌ et sa bali ra. 32 Panemtemen moyo a nangyadiꞌ konan asawa na ni Lot.c 33 Si siꞌnuman a say byay nadti tana a kawaꞌnanen na ket mati ya liꞌ et a lamang, baleꞌ si tawo nin gurutan nay byay nadti, tumuloy yan mabyay nin iti konan Dios. 34 Ibaritaꞌ koyti komoyo, no wadiꞌ ta yabi liꞌ a isusubliꞌ kodti sa lutaꞌ, konran rwa ray tawon mampaꞌlek sa sayay idaan, si saya, makalap ya ket si saya, mabatiꞌ ya. 35-36 Konran rwa ray bubbayin mampangiling, si saya, makalap ya ket si saya, mabatiꞌ ya.d”
37 Sin sain, tinmepet saray tumutumbok na ni Jesus kona, “Catawan, adti liꞌ ti nin mangyadiꞌ?”
Wanan niꞌbat ni Jesus, “No adti main nin maangot ran laman ran nati, itaw sara nin mididinep a mumanuk-manok a mangan nin laman ran nati.”