Say Maipaꞌkaꞌ konan Babayin Balo nin Nangipasuet a Tulungan ya
18
Sayay awro, niyakay nasaraynaet ni Jesus a tumutumbok na yupaꞌ sa sayay pangingiyarig a matkap nin pirmi saran dumasal konan Dios tan andiꞌ ra nin sawaan ti nin gawꞌen. 2 Wana, “Sa sayay babali, main nin sayay hwis a kai ya nin maliꞌmo konan Dios tan kai ya nin mangasikaso konran kapada nan tawo. 3 Main anamaet itaw nin sayay babayin balo nin pirmin mako kona ta patulong ya maipaꞌkaꞌ sa kaso na konan kakuntra na. 4 Naꞌteng yapoꞌ a kai naya nin manꞌasikaswen nin sitin hwis ket sin susuyot anan lamang wana sa nakem na, ‘Mataman nin kai koya nin ikaliꞌmo a Dios tan kai ako nin mangasikaso konran tutawo, 5 tulungan koya paynaytin babayin balo sa kaso na ta pirmi nako tanan manꞌisturbwen. Bangliꞌ no mapasnep nakoyna banaꞌ sa pako nadtin pirmi kongko.’ ”6 Ket wana ni Jesus nin Uunuren konran tumutumbok na, “Adalen moyo in say nibaritaꞌ nan si luko nin hwis. 7 Edet, no wanin a nagꞌin disisyon na, si Dios et wadiꞌ a kai nin tumulong konran tutawon piniliꞌ na a sa awro tan yabi ket manꞌumayꞌay sara kona? Maong ya ket peteg nin tutuo a kai na nin eteng-etengen a panunulong na konra. 8 Ibaritaꞌ koyti komoyo, ibi na nin tampor nin Dios a manepeg para konra. Anamaet baleꞌ, saytaw liꞌ no siꞌkon si Pinaitawo ket sumubliꞌ akodti sa lutaꞌ, main et liꞌ palayin marateꞌ kon tutawon mampagmatalek kongko?”
Nipatukdoꞌ a Pammirduna sa Kaayupaan nin Nakem
9 Nagꞌirgo ya anamanaet si Jesus yupaꞌ sa sayay pangingiyarig konran saray mampangipaꞌkaꞌ sa lalaman ran diri a matunong saran tutawo baleꞌ mangmuda-muda saran kapada ran tawo. 10 Wana ni Jesus konra, “Main nin rwa ran katawo a linmuob sa sakop nan Timplo ta pigaw nin dumasal sara. Si saya, Pariseo ya ket si saya anamaet, maniningir yan buis. 11 Si Pariseo, nakaꞌdeng yan pinaipurok nin dinmasal nin sititinek a wana, ‘Kisalamat ako komo, o Dios, ta amboꞌ akon bilang konran raruman tutawo a maagom sara, amboꞌ saran mapteg, tan mamabayi sara, tan laloyna a amboꞌ akon bilang konan siin si maniningir nin buis. 12 Mampagkulasyon ako nin mirwa sa manglinggo tan manꞌibi ko et komo a kakapuloꞌ nin sarban mangkatingkapan ko.’
13 Si maniningir nin buis anamaet, itaw yan manꞌumdeng sa midyo adayoꞌ nin kai na tana gapo nin maitangar a rupa na sa langit tan mangkabug-kabugen nayay kerep na sa pagbababawiꞌ na tan mandumasal ya a wana, ‘O Dios, kaꞌdwan nako ta saya akon makasalanan.’ ” 14 Ket wana et ni Jesus, “Ibaritaꞌ koyti komoyo, sitaw si maniningir nin buis a napirduna. Kanyaꞌ nin sinmubliꞌ ya sa bali ra nin nikwintan kai nagkasalanan. Si Pariseo baleꞌ kai ya nin pinirduna. Sawanin, si siꞌnuman a mangitaꞌgay nin lalaman nan diri, maikayupaꞌ ya liꞌ, baleꞌ si mipaayupaꞌ, maitaꞌgay ya liꞌ.”
Parable of the Pharisee and Tax Collector
Saray Tutawon iti sa Sirong nin Pagꞌaadiꞌ nan Dios
15 Sawanin, main saray tutawon niꞌras rasara pati saray abing kona ni Jesus, ta pigaw nin ipababo nay gamet na konra nin bindisyunan nasara. Baleꞌ sin naꞌkit raytin tumutumbok na ni Jesus, inimaꞌno rasaray tutawo. 16 Baleꞌ pinakadani nasara ni Jesus a uaꞌnak kona tan wana konran tumutumbok na, “Pauryan moyo saray uaꞌnak nin umarak kongko. Andiꞌ moyo sara nin imaꞌnwen ta si tawon say kanakman na ket kapada nin konran saraytin uaꞌnak, aburuyan nayan Dios nin kipagꞌadiꞌ kona. 17 Oꞌ, ibaritaꞌ koyti komoyo, si siꞌnuman a kai nin mipaayupaꞌ nin paisirong sa pagꞌuuray nan Dios nin bilang sa pangangaburoy nan sayay anak, kai ya gapo nin makakiramaꞌ sa pagꞌaadiꞌ nan Dios.”
Say Kayamanan tan say Anggan-angga nin Byay a iti konan Dios
18 Sawanin, main nin sayay lalaki a saya ya konran pupangulo ran Judio. Tinepetan naya si Jesus a wana, “Maistro, maong ka. Ket ani a manepeg nin gawꞌen ko ta pigaw nin magaꞌmuran koy anggan-angga nin byay a iti konan Dios?”
19 Wanan niꞌbat ni Jesus kona, “Ambaleꞌ a sabtan nako nin maong? Kasa gapo nin raruma no kai si Dios tamoꞌ a maong. 20 Tandaꞌ moynamaet a Gugan-gan:
Andiꞌ ka nin mamabayi o kilalaki. Andiꞌ ka nin mangmati. Andiꞌ ka nin manakaw. Andiꞌ ka nin magtistigos nin amboꞌ nin tutuo. Igalang mosara si ama tan si ina mo.”a
21 Ket wanan lalaki, “Sarban sain ket mantukiden koyna nangibwat et sin anak ako.”
22 Sin narngeꞌ na in ni Jesus, wana kona, “Main et nin sayay matkap mon gawꞌen. Ilakoꞌ mo ngaꞌmin a kamamain mo ket say naglakuan, ibi mo konran pubri ket magkamain kan kayamanan itaw sa langit. Kayadiꞌ mo in nin gawꞌen, sumubliꞌ kadti kongko tan magꞌin kan tumutumbok ko.” 23 Ket sin narngeꞌ na in nin lalaki, ginmereng ya banaꞌ ta sabtan nin yaman na.
24 Sin naꞌkit na ni Jesus a pinasyan bereng na, wana, “Ay, maidap nin tuloy a ipaisirong ran mumayaman a lalaman ran diri sa pagꞌuuray nan Dios! 25 Anaod, mas mainumꞌay ya et nin lumbot a kamilyo sa ubot nin kadayem dyan si sayay mayaman ket makakibiang ya sa pagꞌaadiꞌ nan Dios.”
26 Saray nakarngeꞌ sa sain a wana ni Jesus wanra, “Ya! Siꞌno edet no wanin a maisalba?”
27 Wana ni Jesus, “Say kai nin magwaꞌ sa tawo, magwaꞌ konan Dios.”
28 Ket wana ni Pedro, “Ket siꞌkami pa edet? Pinauryan mi anay pammali mi ta pigaw nin nikikalamoꞌ kami komo.”
29 Wana ni Jesus konra, “Oꞌ a, ibaritaꞌ koyti komoyo, si siꞌnuman a manglakwan nin pammali na o mangatua na o asawa na o bubsat na o uaꞌnak na banaꞌ sa pagꞌaadiꞌ nan Dios, 30 tubaleen naya sa sawanin ana nin byay nin mas abaw et dyan saytaw say linakwanan na tan magaꞌmuran na et liꞌ a anggan-angga nin byay a iti konan Dios sa adapen nin panaon.”
Say Ikatlon Nipamaritaꞌ na ni Jesus nin Patiti na
31 Sawanin, pinaipurok nasara ni Jesus a labinrwan tumutumbok na miꞌsa wana konra, “Mangrengeꞌ kamo. Adap tamoyna sawanin sa Jerusalem. Ket itaw, matukid ana a sarban nisurat ran prupita nan Dios maipaꞌkaꞌ kongko a siꞌkon si Pinaitawo. 32 Ipagamet rako konran amboꞌ nin Judio ket tuyaꞌ-tuyaen, kakaꞌlisan tan ludaꞌ-ludaan rako. 33 Miꞌsa, sanet-saneten rako baꞌyo rako nin patyen, baleꞌ marateꞌ a ikatlon awro, pasublien nakon mabyay nin Dios.”
34 Baleꞌ kai ra nin natarusan nin saray labinrwa a rabay nan ibaritaꞌ ni Jesus, banaꞌ ta say kabalikasan, naiyadi sa pakataros ra.
Jesus Predicts His Death and Resurrection
Napaandaꞌ yay Bulag banaꞌ sa Nipagmatalek na
35 Dandani sarayna nin makarateꞌ si Jesus sa babali nin Jerico ket main nin sayay lalakin bulag a nakatekreꞌ sa rigrig nin dalan ta mangkipayabor yadtaw. 36 Sin narngeꞌ nay gargar ran abaw nin tutawon manlumabas, tinepet na, “Ani a mampangyadiꞌ?”
37 Wanran tutawo kona, “Manlumabas sara si Jesus a taga Nazaret.”
38 Kanyaꞌ nin tinmaꞌway ya a wana, “Jesus a puri na ni Adiꞌ David, kaꞌdwan nako kadiꞌ!”
39 Ket saray tutawodtaw sa uꞌna na ni Jesus, inimaꞌno rayan gumargar baleꞌ, mas nipaksaw nayna edet nin nitaꞌway, “Siꞌkan nipangakoꞌ a puri na ni Adiꞌ David,” wana, “kaꞌdwan nako kadiꞌ!”
40 Kanyaꞌ nin tinumgen ya si Jesus tan nigan-gan nan ikadani raya kona a lalakin bulag. Sin itaw yayna sa dani na, tinepet na ni Jesus kona, 41 “Ani a rabay mon gawꞌen ko para komo?”
“Uunuren ko,” wana, “rabay ko kumon a makaꞌkit akon uman!”
42 Kanyaꞌ nin wana ni Jesus kona, “Makaꞌkit kayna. Banaꞌ sa pagmamatalek mo, inmandaꞌ kayna.”
43 Ket tampor, makaꞌkit yayna tan nikikalamoꞌ ya konra ni Jesus, nin manraywe-raywen nayay Dios. Sarba ra nin tutawodtaw nin nakaimaton sa nipamaandaꞌ na ni Jesus kona rinayo raya anamaet a Dios.
Healing of Bartimaeus