Naiduma a Panukatan nan Dios sa Panukatan nin Tawo
20
“Ket,” wana ni Jesus, “say pagꞌaadiꞌ nan Dios, maiyarig sa wanti: Main nin sayay lalakin main nin alawang a lutaꞌ na nin uubas. Sayay awron masakbay et, nako yayna naningkap nin tutawon upaan nan magtrabahodtaw sa uubas na. 2 Konran nuꞌnan naꞌkit na, nikitarusan yan upaan nasara nin say kuston upaꞌ nin sayay awro. Miꞌsa nibakiꞌ nasarayna nin magtrabaho. 3 Sin magꞌalas nwibi nin buklas, nako ya anamanaet naningkap nin upaan nan tutawo. Ket nakaꞌkit yadtaw sa palingki nin kasan man-gawꞌen ra no kai manꞌumdeng tamoꞌ. 4 Wana konra, ‘Mako kamo anamaet nin magtrabaho sa uubas ko tan upaan katamon manepeg.’ 5 Ket nako sara nagtrabaho. Wanin anamaet a lamang a ginwaꞌ na sin ugtiawro ana tan sin magꞌalas tres. 6 Alas singkoyna sin nako yaynamanaet sa palingki naningkap nin trabahador. Nakaꞌkit yadtaw et a lamang nin tutawon kasan man-gawꞌen ra. Wana konra, ‘Ambaleꞌ a iti kamo tamoꞌ nin mampamirdin udas moyo?’7 ‘Oꞌ a ta kasa anamaet nin mangalap komi nin magtrabaho,’ niꞌbat ra kona.
‘Mako kamo anamaet nin magtrabaho sa uubas ko,’ wana konra.
8 Sin patpaapon ana wanan main nin plantasyon konan mampyawen nan tawo na, ‘Kayaban mosaray mampagtrabaho sa uubas ko tan ibi moy upaꞌ ra. Upaan mosaran mangibwat konran suyot nin tinmaranaꞌ angga konran nuꞌnan tinmaranaꞌ.’
9 Ket inupaan nasaran upaꞌ nin sayay awroytaw saray tinmaranaꞌ nin nagtrabaho sin alas singko. 10 Kanyaꞌ nin sin adap ra nin risibyen a upaꞌ ran saraytaw saray sangkauꞌnawan nin nagtrabaho, nipaꞌkaꞌ ra nin mas abaw a upaꞌ ra. Baleꞌ upaꞌ nin sayay awro anamaet a lamang a niyupaꞌ konra. 11 Bere-bere saran nangrisibi nin upaꞌ ra ket kuntra sara konan namagtrabaho konra 12 a wanra, ‘Sarain saray suyot nin tinmaranaꞌ, sayay udas ra tamoꞌ nin nagtrabaho, ket siꞌkami nikakaawro kamin nagawgaw nin nagtrabaho. Ambaleꞌ nin pari-parihoy upaꞌ mi ey?’
13 Ket wanan namagtrabaho konra, ‘Amigo, kai taka nin sinaor. Nagꞌirgwan tamon upaꞌ sa sayay awro a iyupaꞌ ko komoyo ket siin a nibi ko komoyo. 14 Kalapen moy manepeg nin upaꞌ mo tan mako kayna. Karabayan kon upaan saran kapada sa upaꞌ mo a suyot nin nagtrabaho. 15 Magwaꞌ kon gawꞌen a rabay ko sa kayadian ko. Mairod ka para banaꞌ ta mapamami ako?’
16 Konan siti anaod, manꞌibaritaꞌ ko a main liꞌ konran saray masusuyot a uꞌna liꞌ sa kaalagawan, tan main liꞌ konran saray iti anan nuꞌna a maikayupaꞌ liꞌ.”
Ibaritaꞌ naynaet nin Cristo a Patyen rayan saray Magꞌuuray sa Mundo
17 Sawanin, sin tumangkar sara si Jesus tan saray tumutumbok na nin adap sa syudad nin Jerusalem, nipurok nasaray labinrwan tumutumbok na. Sin kapresan ran manlumalako, main nin nibaritaꞌ na konra nin sara-sara tamoꞌ. 18 “Mangrengeꞌ kamo. Adap tamoyna sawanin sa Jerusalem. Ket itaw, siꞌkon si Pinaitawo, maipagamet ako konran Pupangulon Pupadiꞌ tan konran Madudunong sa Gugan-gan tamo. Sintinsyawan rako nin mati, 19 miꞌsa ipagamet rako konran amboꞌ nin Judio, ket tuyaꞌ-tuyaen rako, sanet-saneten rako tan ipasak rako sa kudos. Baleꞌ marateꞌ a ikatlon awro, pasublien nakon mabyay nin Dios.”
Say Panukatan nan Cristo nin say Kataꞌgayan ket say Pagsisirbi
20 Kinmadani ya kona ni Jesus a asawa na ni Zebedeo nin kalamoꞌ nasaray rwan aꞌnaka na. Nanalimukod ya sa adapan na ta main nin dawaten na kona ni Jesus.
21 “Ani a rabay mo?” nitepet na ni Jesus kona.
Niꞌbat na, “No siꞌkayna liꞌ a adiꞌ, patekreen mosara liꞌ kumon sa dani moyti saray rway aꞌnak ko nin tumutumbok mo, saya sa pawanan mo tan saya sa pawiri mo?”
22 Ket wana ni Jesus konran mibsat, “Kai moyo nin tandaꞌ no ansain say mandawaten moyo. Maakoꞌ moyo paran irangep a dyaꞌdyaꞌ nin adapen ko nin irangep?”
“Oꞌ, maakoꞌ mi,” wanran niꞌbat.
23 “Tutuo,” wana ni Jesus, “mangirangep kamon dyaꞌdyaꞌ nin bilang sa dyaꞌdyaꞌ a irangep ko. Baleꞌ no siꞌnoy tumekreꞌ sa pawanan tan sa pawiri ko, amboꞌ nin iti sa gamet ko. Naigagara ana in nin lugar konran napiliꞌ nan Ama ko nin pangisadyaan.”
24 Ket sin narngeꞌ ran mapuloꞌ nin raruma et nin tumutumbok a maipaꞌkaꞌ sa sayti, masager sara konran mibsat. 25 Kanyaꞌ nin pinakadani nasara ngaꞌmin ni Jesus kona tan wana konra, “Tandaꞌ moyon peteg no paꞌnoy pagꞌuuray ran magꞌuuray iti sa mundo. Aripenen rasaray iti sa sakop ra tan saray iti sa taꞌgay ket masakit-sakit sara konran saray iti sa sirong nin uray ra. 26 Baleꞌ komoyo, matkap a amboꞌ nin wanin. Komoyo, si siꞌnuman a marabay nin magꞌin nin ataꞌgay, matkap a syay magsirbi konran raruma, 27 tan si siꞌnuman komoyo a marabay nin magꞌin syay ulo, matkap a magwaꞌ nay magꞌin nin aripen moyo 28 kapada kongko nin siꞌkon si Pinaitawo. Nako akodti sa lutaꞌ amboꞌ ta pigaw nin pasirbi ako no kai edet, ta pigaw nin magsirbi ako tan ta pigaw nin ibi koy byay ko nin ipambot konran abaw a tutawo.”
Pagsirbyan nasaray Rway Bulag nin Cristo
29 Sin mampibwat sarayna sa syudad nin Jerico, abaw saray nikialuyon konra ni Jesus. 30 Sa dalanan ra ket main nin rwa ray lalakin bulag nin nakatekreꞌ sa rigrig. Sin natandaan ra nin manlumabas ya si Jesus wanra nin nitaꞌway, “Ser, siꞌkan nipangakoꞌ a puri na ni David, kaꞌdwan nakami kadiꞌ!”
31 Masager saray tutawo konra tan inimaꞌno rasaran gumargar. Baleꞌ mas maksaw rayna edet nin nitaꞌway, “Siꞌkan nipangakoꞌ a puri na ni David, kaꞌdwan nakami kadiꞌ!”
32 Tinumgen ya si Jesus ket tinawag nasara. Nitepet na konra, “Ani a rabay moyon gawꞌen ko para komoyo?”
33 Ket niꞌbat ra, “Uunuren ko, rabay mi kumon a makaꞌkit.”
34 Nanaboꞌ a ingangaꞌdo na ni Jesus konra. Inapros nay mata ra ket tampor a makaꞌkit sarayna, tan nikikalamoꞌ sara kona ni Jesus.