Say Pisyay nin Mitraasawa
10
Nibwat saradtaw si Jesus sa Galilea nin nako sa prubinsya nin Judea ket rinmipay sara sa Ilog Jordan. Abaw saraynaet a tutawon inmarak kona ket niyakay nasara a bilang sa ugaliꞌ nan man-gawꞌen.2 Main nin Pariseo nin nako kona ni Jesus. Mampangkit saran puon nin pamarsawan ra kona. Ket wanra, “Aburuyan para nin Gugan-gan a isyay nayan sayay lalaki a asawa na?”
3 Ket wanan niꞌbat ni Jesus, “Ani ket a nisurat na sa Gugan-gan ni prupita Moises nin gawꞌen moyo?”
4 Ket wanra, “Niyaburoy na ni Moises nin isyay nayan sayay lalaki a asawa na mayadiꞌ naya byan nin kasuratan nin pisyayan ra.a”
5 Ket wana ni Jesus, “Banaꞌ ta matibꞌey a ulo moyo, nibi nayayti nin gan-gan komoyo. 6 Baleꞌ sin taranaꞌ, sin pinarsa nan Dios a sarba,
pinarsa nay tawo nin lalaki tan babayi,b 7 ket banaꞌ konan siti nin ginwaꞌ na, si sayay lalaki, lakwanan nasara si ama na tan si ina na ta kipasaya ya konan asawa nac 8 ket saran rwa, magꞌin saran sayan-saya.”d
Wana et ni Jesus, “Kanyaꞌ nin saray mitraasawa amboꞌ saraynan rwa no kai edet, sansaya saraynan lalaman. 9 Edet, banaꞌ ta wanin, saran rwa nin pinipasaya nan Dios, amboꞌ nin manepeg a pisyayen saran tutawo.”
10 Sin itaw sarayna si Jesus sa bali nin kamiꞌnan ra, tinepetan rayan tumutumbok na maipaꞌkaꞌ anamaet konan sitaw si nibaritaꞌ na. 11 Ket wana, “Si lalaki nin mangisyay konan asawa na miꞌsa ya nin mangalamoꞌ nin sakalako, magkasalanan ya konan asawa nan nisyay na ta mampamabayi ya. 12 Wanin anamaet, si babayi nin kisyay konan asawa na miꞌsa ya nin kikalamoꞌ sa sakalako, magkasalanan ya konan asawa nan nisyay na ta mangkilalaki ya.”
Saray Tutawon iti sa Sirong nin Pagꞌuuray nan Dios
13 Niꞌsa, main nin tutawon nangiꞌras nin uaꞌnak kona ni Jesus ta pigaw nin ipababo nay gamet na konra nin bindisyunan nasara. Baleꞌ saray tumutumbok na inimaꞌno rasara. 14 Sin nadlaw nayti ni Jesus, nanager ya konran tumutumbok na ket wana, “Pauryan moyo saran umarak kongko a uaꞌnak. Andiꞌ moyo sara nin imaꞌnwen, ta si tawon say kanakman na ket kapada ran saraytin uaꞌnak, aburuyan nayaynan Dios nin kipagꞌadiꞌ kona. 15 Oꞌ, ibaritaꞌ koyti komoyo, si siꞌnuman a kai nin mipaayupaꞌ nin paisirong sa pagꞌuuray nan Dios nin bilang sa pangangaburoy nan sayay anak, kai ya gapo nin makakiramaꞌ sa pagꞌaadiꞌ nan Dios.” 16 Ket inaruko nasara ni Jesus a uaꞌnak tan binindisyunan nasara nin nipababo nay gamet na konra.
Say Kayamanan
17 Sin mampibwat sarayna si Jesus nin mako sa sayay lugar, main nin sayay lalaki nin pala-palayon inmarak kona. Nanalimukod yayti sa adapan na tan nitepet na kona, “Maistro, maong ka. Ket ani a manepeg nin gawꞌen ko ta pigaw nin magaꞌmuran koy anggan-angga nin byay a iti konan Dios?”
18 Ket wana ni Jesus, “Ambaleꞌ a sabtan nako nin maong? Kasa gapo nin raruma no kai si Dios tamoꞌ a maong. 19 Tandaꞌ moynamaet a Gugan-gan:
Andiꞌ ka nin mangmati. Andiꞌ ka nin mamabayi o kilalaki. Andiꞌ ka nin manakaw. Andiꞌ ka nin magtistigos nin amboꞌ nin tutuo. Andiꞌ ka nin manaor. Igalang mosara si ama mo tan si ina mo.e”
20 Ket wanan lalaki, “Maistro, sarban sain ket mantukiden koyna nangibwat et sin anak ako.”
21 Main nin pangangawaꞌnan nin pinastang naya ni Jesus ket wana kona, “Main et nin saya nin matkap mon gawꞌen. Mako ka tan ilakoꞌ mo a main mo tan say bili, ibi mo konran pubri ket magkamain kan kayamanan itaw sa langit. Kayadiꞌ mo nin gawꞌen ti, sumubliꞌ kadti kongko tan magꞌin kan tumutumbok ko.” 22 Baleꞌ sin narngeꞌ na in nin nibaritaꞌ na ni Jesus, rinmereꞌ ya, tan nibwat ya nin pinasyan bereng. Mainan yan tuloy ket.
23 Pinastang nasara ni Jesus a tumutumbok na miꞌsa wana konra, “Ay, maidap nin maong a ipaisirong ran mumayaman a lalaman ran diri sa pagꞌuuray nan Dios!”
24 Nakaꞌngap saray tumutumbok na sa sain a nibaritaꞌ na. Ket wanan inuman ni Jesus konra, “Kalalamoꞌ, talagan pinasyan idap nin tumulok saray tutawon magmatalek sa kayamanan raf nin pagꞌurayan nasaran Dios. 25 Mas mainumꞌay ya et nin lumbot a kamilyo sa ubot nin kadayem dyan si sayay mayaman ket makakibiang ya sa pagꞌaadiꞌ nan Dios.”
26 Lalo saraynan nakaꞌngap a tumutumbok na konan siti nin nibaritaꞌ na, ket wanra, “Ya! Siꞌno edet no wanin a maisalba?”
27 Pinastang nasaran maong ni Jesus miꞌsa wana, “Peteg a impusiblin makagaꞌmor nin kasan anggawan nin byay a tutawo, baleꞌ amboꞌ nin impusibli konan Dios nin ibi nayti ta say sarban bagay ket magwaꞌ nan Dios.”
28 Ket nagꞌirgo ya si Pedro a wana, “Ket siꞌkami pa edet, pinauryan mi anay sarba ta pigaw nin nikikalamoꞌ kami komo.”
29 Wana ni Jesus, “Oꞌ a, ta ibaritaꞌ koyti komoyo, si siꞌnuman a manglakwan nin pammali na, bubsat na, ina na, ama na, aꞌnak na o binis na banaꞌ kongko tan konan Mabistan Patandaꞌ, 30 magun-gunawan yan misanyasot nin kaꞌbaw dyan say linakwanan na. Magkamain ya nin abaw a bubali, bubsat, uina, uaꞌnak tan binis sawanin sa kapresan anan panaon iti sa lutaꞌ. Mangirangep ya baleꞌ nin idap tan pammadyaꞌdyaꞌ banaꞌ kongko, baleꞌ rumateꞌ liꞌ a awro nin sya ket mabyan ya et nin anggan-angga nin byay a iti konan Dios. 31 Ket konan sitaw liꞌ nin awro, main konran iti anan nuꞌna a maikayupaꞌ liꞌ, tan main konran masusuyot a uꞌnawen liꞌ.”
Say Ikatlon Pangngibaritaꞌ na ni Jesus nin Maipaꞌkaꞌ sa Patiti na
32 Ket sawanin, itaw sara sa dalan nin mantumangkar saran adap sa Jerusalem. Iti ya sa uꞌna si Jesus. Saray tumutumbok na ket makaꞌngap sara kona. Main nin raruman mantumumbok nin sililiꞌmo saraynamaet.
Pinaipurok nasaray labinrwan tumutumbok na tan nibaritaꞌ naynaet konra a mangyadiꞌ ana liꞌ kona. 33 Wana, “Mangrengeꞌ kamo. Adap tamoyna sawanin sa Jerusalem. Ket itaw, siꞌkon si Pinaitawo, maipagamet ako konran Pupangulon Pupadiꞌ tan konran Madudunong sa Gugan-gan tamo. Sintinsyawan rako nin mati, miꞌsa ipagamet rako konran amboꞌ nin Judio; 34 ket tuyaꞌ-tuyaen rako, ludaꞌ-ludaan rako, sanet-saneten rako tan patyen rako. Baleꞌ marateꞌ a ikatlon awro, pasublien nakon mabyay nin Dios.”
Say Dawat ra ni Santiago tan Juan
35 Sawanin, kinmadani sara kona ni Jesus si Santiago tan si Juan a saray aꞌnak na ni Zebedeo. Wanra, “Maistro, main pa nin rabay min dawaten komo.”
36 Ket wana, “Ani ngaran?”
37 Ket wanra, “Saytaw no siꞌkayna liꞌ a mampagꞌuray nin main nin ataꞌgay a kagalangan, patekreen rakami liꞌ pa sa abay mo, saya sa pawanan mo tan si saya sa pawiri mo.”
38 Wana ni Jesus konra, “Kai moyo nin tandaꞌ no ansain say mandawaten moyo. Maakoꞌ moyo paran irangep a dyaꞌdyaꞌ a adapen ko nin irangep? Maitpel moyo para a mati nin bilang sa patiti ko?”
39 “Oꞌ, maakoꞌ mi,” wanra.
Ket wana ni Jesus konra, “Pageꞌ a mangirangep kamo nin dyaꞌdyaꞌ nin bilang sa dyaꞌdyaꞌ a irangep ko tan mati kamo nin bilang sa patiti ko. 40 Baleꞌ no siꞌnoy tumekreꞌ sa pawanan tan sa pawiri ko, amboꞌ nin iti sa gamet ko. Naigagara ana in nin lugar konran napiliꞌ nan Dios nin pangisadyaan.”
41 Ket sin narngeꞌ ran mapuloꞌ nin raruma et nin tumutumbok na a maipaꞌkaꞌ sa sayti, masager sara konra ni Santiago tan Juan. 42 Kanyaꞌ nin pinakadani nasara ngaꞌmin ni Jesus kona tan wana konra, “Tandaꞌ moyon peteg no paꞌnoy pagꞌuuray ran magꞌuuray iti sa mundo. Aripenen rasaray iti sa sakop ra tan saray iti sa taꞌgay ket masakit-sakit sara konran saray iti sa sirong nin uray ra. 43 Baleꞌ komoyo, matkap a amboꞌ nin wanin. Komoyo, si siꞌnuman a marabay nin magꞌin nin ataꞌgay ket matkap a syay magsirbi konran raruma, 44 tan si siꞌnuman komoyo a marabay nin magꞌin nin syay ulo, matkap a magwaꞌ nay magꞌin nin aripen nin sarba. 45 Arigen moyoy gawaꞌ ko, siꞌkon si Pinaitawo, a nako akodti sa lutaꞌ amboꞌ ta pigaw nin pasirbi ako no kai edet, ta pigaw nin magsirbi ako tan ta pigaw nin ibi koy byay ko nin ipambot konran abaw a tutawo.”
Nakaꞌkit yan Uman a Bulag a si Bartimeo
46 Rinmateꞌ yadtaw sa Jerico si Jesus tan saray tumutumbok na. Ket sin mampibwat saraynadtaw, abaw saray tutawon nikialuyon konra. Ket, main nin kipayabor a nakatekreꞌ itaw sa rigrig. Bulag ya. Say ngaran na ket Bartimeo a anak na ni Timeo. 47 Ket sin narngeꞌ na nin si Jesus a taga Nazaret ket itaw ya, kapingmatan anan tinmaꞌway ya a wana, “Jesus a puri na ni Adiꞌ David, kaꞌdwan nako kadiꞌ!”
48 Abaw saray masager kona a inimaꞌno rayan gumargar. Baleꞌ mas maksaw nayna edet nin nitaꞌway, “Siꞌkan nipangakoꞌ a puri na ni Adiꞌ David, kaꞌdwan nako kadiꞌ!”
49 Tinumgen ya si Jesus ket wana, “Tawagen moyadti.”
Ket tinawag rayay bulag a wanra kona, “Paksawen moy nakem mo. Umdeng ka ta manꞌipakayaban naka.”
50 Apuradon ginlat nayay kapa na; maliksi yan inumdeng tan inmarak ya kona ni Jesus.
51 “Ani a rabay mon gawꞌen ko para komo?” nitepet na ni Jesus kona.
Ket wanan bulag, “Maistro, rabay ko kumon a makaꞌkit akon uman!”
52 Ket wana ni Jesus kona, “Sigi, mako kayna. Banaꞌ sa pagmamatalek mo, inmandaꞌ kayna.”
Ket tampor a makaꞌkit yayna. Nikikalamoꞌ ya kona ni Jesus.