2 Napalabas a aꞌnem nin awro, nitagad nasara ni Jesus nin nuliꞌ sa sayay ataꞌgay nin talugtog si Pedro, si Santiago tan si Juan. Sara-sara tamoꞌ itaw. Itaw, nanguman a bakas na ni Jesus nin nabantayan ra. 3 Say seket na ket nagꞌin nin makapulag nin pinasyan putiꞌ a kasan mammiꞌpiꞌ iti sa babon lutaꞌ a makagwaꞌ nin wanti. 4 Kapingmatan pinaipadar sara si Elias tan si Moises^a nin mangkiirgo sara kona ni Jesus. 5 Ket si Pedro nikibbaꞌbat ya a wana kona ni Jesus, “Ay, Ser, mabista ta iti atamoyna! Ket mamaꞌdeng kamin tulo ray abung-abong; saya para komo, saya para kona ni Moises tan saya para kona ni Elias.” 6 Nibaritaꞌ nayti ni Pedro ta kai na nin tandaꞌ no ani a manepeg nan ibaritaꞌ ta nabagyaꞌ saran tuloy.

7 Kaaram, nagkamain nin gunem ket sinirungan sara tan main nin busis nin nangibwat sa gunem a narngeꞌ ra a wana, “Siti a Anak ko nin mangkawa-kawaꞌnanen ko. Rengꞌen moya!” 8 Tampor a kinmikit sara sa libed ra ket kasaynan maꞌkit ran raruman kalamoꞌ ra no kai si Jesus tana.

9 Sin mampanaoy sarayna sa talugtog, nibibilin nan mairot konran tulon tumutumbok na a saytin naꞌkit ra ket andiꞌ ra gapo nin ibari-baritaꞌ abirno siꞌno, anggan syan si Pinaitawo ket pinasubliꞌ yaynan mabyay. 10 Tinumbok raytin bibilin na baleꞌ nagꞌiirgwan ra et no ani a rabay nan irgwen sa wanan pasublien yan mabyay. 11 Ket tinepet ra kona, “Kai para a wanran Madudunong sa Gugan-gan ket matkap a rumateꞌ ya yapoꞌ si prupita Elias miꞌsa sitaw si sayan nipangakoꞌ nan Dios?”

12 Ket wana ni Jesus konra, “Pageꞌ a rumateꞌ ya yapoꞌ si Elias ta pigaw nin isadyaꞌ nay sarba para konan si nipangakoꞌ nan Dios. Ket maipaꞌkaꞌ anamaet baleꞌ kongko nin si Pinaitawo ket main nin naisurat sa Kasuratan a mangirangep akon abaw nin pammadyaꞌdyaꞌ tan maibilang akon kasan kwinta. 13 Baleꞌ ibaritaꞌ ko sawanin komoyo: Say katutuꞌwan, ket si Elias, rinmateꞌ yaynadti, ket bilang sa naisurat maipaꞌkaꞌ kona, ginwaꞌ ran tutawo kona a sarbaynan kadukaan a rabay ra.”

14 Sin mansumubliꞌ saraynadtaw si Jesus konran raruman tumutumbok na, naꞌkit nan naaribungbungan saran abaw nin tutawo. Main et nin Madudunong sa Gugan-gan a mangkidiskusyon konra. 15 Sin naꞌkit ran tutawo a itaw sarayna si Jesus nakaꞌngap saran maong banaꞌ ta kai raya nin manꞌilalwan nin rumateꞌ, ket nalayo saran inmarak kona tan nangigalang sara kona. 16 Ket tinepetan nasara ni Jesus, “Ani a mangkidiskusyunan moyo konra?”

17 Ket saya konran tutawo, wana, “Maistro, inawit koyadti nin ikaꞌ kumon komo a anak kon lalaki a nasrepan yan sayay ispiriton dukaꞌ nin namagꞌin umel kona. 18 Tepeꞌ nin serpan naya, tumbawen naya, gumuraꞌ yay bebey na, ngumaretenget a ngipen na, tan kumsir ya. Dinawat ko konran tumutumbok mo a palakwanen rayay ispiriton dukaꞌ baleꞌ kai ra nin nababaan.”

19 Ket wana ni Jesus, “Abagay kamoyna! Ambaleꞌ a kasan pammemper moyo? Anggan kaꞌno ako kadiꞌ nin matkap nin kikalamoꞌ komoyo? Anggan kaꞌno katamo nin anusan sa pigagawaꞌ moyo? Iꞌras madti a anak.” 20 Ket niꞌras raya kona ni Jesus.

Ket si ispirito, sin naꞌkit naya si Jesus, pinangayegkeg nayay anak ket natumba ya, namuluk-pulok ya tan ginmuraꞌ yay bebey na. 21 Ket tinepet na ni Jesus konan ama nan siti, “Kaꞌno ya et nin tinmaranaꞌ nin wanin?”

Ket wana, “Nangibwat et sin daiteꞌ ya. 22 Si ispiriton dukaꞌ, kasabyan nin iraꞌpog naya sa apoy tan irebreb naya sa raranom a anak ko ta pigaw nin patyen naya kumon. No mababaan mo kadiꞌ ket pangingaꞌdo mo pa ta tulungan nakami!”

23 “Sukat a no mababaan mo wamo!” wana ni Jesus. “Konan si magmatalek konan Dios, say sarba ngaꞌmin ket magwaꞌ.”

24 Ket tampor nitaꞌway nan ama a wana, “Tumper ako! Baleꞌ tulungan nako ta kurang et a pagmamatalek ko.”

25 Sin naꞌkit na ni Jesus a manꞌumabaw saray tawo, ginan-gan nayay ispiriton dukaꞌ a wana, “Siꞌkan ispiriton mamatelek tan mamaumel, lumakwan kayna kona tan andiꞌ moyna umanen et a sumrep kona!”

26 Ket si ispirito niyagsit na tan pinangayegkeg naya baꞌyo ya nin linmakwan konan anak. Si anak, nati anay bakas na ket wanran tutawo, “Nati yayna.” 27 Baleꞌ ginaꞌgetan naya ni Jesus sa gamet tan binangon naya. Ket inumdeng yay anak.

28 Sin linmuob sarayna si Jesus sa bali, nitepet ran tumutumbok na a sara-sara tamoꞌ a nakarngeꞌ, “Mayin baleꞌ a kai miya nin napalakwan taw si ispirito?”

29 Ket wanan niꞌbat ni Jesus, “Sa sitin bakas nin ispirito ket yupaꞌ tamoꞌ sa kadadasal konan Dios^b a pammalakwan kona.”

30 Nibwat sara si Jesus konan sitaw nin lugar tan linmabas sara sa Galilea. Kai na nin rabay nin matandaan ran tutawo a kamiꞌnan ra 31 ta manꞌiyakay nasaray tumutumbok na. “Siꞌkon si Pinaitawo, maipagamet ako konran magꞌuray ket patyen rako. Mataman baleꞌ nin napati ako, pasublien akon mabyay sa ikatlon awro,” wana.

32 Kai ra baleꞌ nin natarusan ti nin saray tumutumbok na a nibaritaꞌ na tan maliꞌmo saran manepet kona no ani a rabay nan ibaritaꞌ.

33 Nakarateꞌ saradtaw sa Capernaum. Sin itaw sarayna sa bali tinepetan nasara, “Ansaytaw say nididiskusyunan moyo sa dalan?”

34 Baleꞌ kai raya nin inubatan ta madingꞌey sara, ta sin itaw sara sa dalan ket nididiskusyon sara no siꞌnoy sangkaalakyan konra.

35 Tinmekreꞌ ya tan pinakadani nasara konay labinrwan tumutumbok na. Wana, “Si sayay tawo no apes na a maipataꞌgay, matkap na a mipaayupaꞌ nin bilang sayan mampagsirbi konran sarba.” 36 Ket pinakadani nayay sayay anak sa adapan ra. Ket inaruko naya tan wana konra, 37 “Si siꞌnuman a mampangilalaman kongko a mangakoꞌ konan sayay wantin anak, siꞌkoyna a inakoꞌ nan lamang. Ket saray mangakoꞌ kongko, amboꞌ ako tamoꞌ a inakoꞌ ra, no kai pati anamaet nin si namakiꞌ kongko.”

38 Wana ni Juan kona, “Maistro, main nin naꞌkit mi nin sayay lalakin manꞌusaren nayay ngaran mo ta pigaw nin palakwanen nasaray ispiriton dukaꞌ sa nasrepan ran tawo ket pinaed miya banaꞌ ta amboꞌ tamoyan kalamoꞌ.”

39 Wana anamaet ni Jesus, “Andiꞌ moya awaan ta si siꞌnuman a mangusar nin ngaran ko ta pigaw nin makagwaꞌ yan milagro, ket kai yayna nin makapagꞌirgo nin dukaꞌ maipaꞌkaꞌ kongko. 40 Anaod, si kai nin kumuntra kontamo ket kiayon ya kontamo. 41 Ibaritaꞌ koyti komoyo, si siꞌnuman a mamainom nin abirno tana sambaso nin ranom komoyo banaꞌ ta tandaꞌ ra a tumutumbok katamo nin siꞌko a si Cristo, si mangwaꞌ nin wanin kasan sapo a mabyan ya liꞌ nin gun-guna.”

42 Wana et, “Maong et konan sayay tawo a katinan yan mabyat nin bato sa liey tan ibuntok ya sa taaw dyan si magꞌin syay puon nin pakasidaꞌ nin pagmamatalek na kongko nin saya konran sarayti nin maayupaꞌ sa pammemper ra. 43-44 Ket no si gamet mo a puon nin pakasidaꞌ nin pagmamatalek mo, putulen ma. Maong anay pukol ka baleꞌ magkamain kan byay a iti konan Dios dyan si rwa ran pageꞌ a gamet mo, baleꞌ maikaꞌ ka sa impyirno, sa apoy a kai gapo nin maꞌrep.^c 45-46 No si ayi mo anamaet a puon nin pakasidaꞌ nin pagmamatalek mo, putulen ma. Maong anay pilay ka baleꞌ magkamain kan byay a iti konan Dios dyan si rwa ran pageꞌ a ayi mo baleꞌ maikaꞌ ka sa impyirno, sa apoy a kai gapo nin maꞌrep. 47 No si mata mo anamaet a puon nin pakasidaꞌ nin pagmamatalek mo, sukiten ma. Maong anay saya tamoꞌ a mata mo baleꞌ makapikaꞌ ka sa Pagꞌadian nan Dios, dyan si rwa ran pageꞌ a mata mo baleꞌ maikaꞌ kadtaw nin madusa sa apoy nin impyirno. 48 Itaw ket main nin uurer a kai nin mati a mampangan nin laman nin tutawo tan main nin apoy a kai gapo nin maꞌrep.

49 ‘Sarba ran saray tumumbok kongko ket mangitpel sara nin dyaꞌdyaꞌ a bilang nin mampuuran sara ta pigaw nin gumsen a pammemper ra kapada a say kanen ket mas tumaway no asinan.

50 Say asin, maalaga. Baleꞌ no maꞌmet anay maꞌsin nin taway, kai ana gapo nin maisubliꞌ.

Kapada a say asin ket mamin mabistan taway sa kanen, wanin anamaet, siꞌkamo, magkabyay kamon mabistay pakikalamoꞌ moyo sa saya tan saya ket mitutuno kamo.’ ”