Si Mabistan Patandaꞌ nan Dios Sigon kona ni
LUCAS
Say Maipaꞌkaꞌ konan Sitin Libro
Si nanurat konan sitin libro ket si Lucas. Saya yan Griego tan duktor ya nin mammemper kona ni Jesu-Cristo sin saytaw. Sya tamoꞌ a amboꞌ nin Judio a nanurat nin libro sa Baꞌyon Tistaminto. Amigo tan nakala-kalamoꞌ naya intaw ni Pablo. Syan lamang a nanurat konan libron Say Ginwa-ginwaꞌ ran Apostoles a katuloy nayan siti.
Nisurat nayayti ni Lucas sin angan-anganen a 60 A.D. para konan sayay wanra nin impurtantin tawo sa Roma a say ngaran na ket Teofilo, tan para anan lamang konran amboꞌ nin Judio tan tutawo sa adtiman nin lugar. Say gagara na ket isurat na nin naunong a bubagay a maipaꞌkaꞌ sa byay na ni Jesus sin iti ya sa lutaꞌ nangibwat sin taranaꞌ, nangibwat sa nipangipadles nin pakaiyanak na ni Juan a Mammawtismo angga sin niyuliꞌ ya si Jesus sa langit.
Nipaꞌkit na ni Lucas a si Jesus ket nagꞌin yan sayay peteg nin tawo tan sya a Mangingisalba. Nipatandaan na nin si Jesus a nipangakoꞌ nan Dios nin mangisalba konran Judio tan taman konran sarban tawon mamper kona. Nisurat na nin tinudoꞌ naya nin Dios si Jesus nin mangipatandaꞌ nin Mabistan Patandaꞌ konran pubri (4:18), kanyaꞌ nin abaw a mabasadti nin maipaꞌkaꞌ sa ingangaꞌdo na ni Jesus konran main nin masakit, nasrepan nin ispiriton dukaꞌ tan saraytaw saray muda-mudawen ran raruma. Maꞌkit et iti a imnon pangrarayon mamin ririket tan mambyan saran ataꞌgay nin pangingikit a bubbayi. Miꞌnu-miꞌno na nin nibaritaꞌ iti konan sitin libro a maipaꞌkaꞌ sa rilasyon na ni Jesus konran tutawo, maipaꞌkaꞌ sa dasal, konan Ispirito nan Dios, sa mumilagro, uanghil, pakapirdunan kukasalanan tan pangngisadyaꞌ konran mammemper sa isusubliꞌ na ni Jesu-Cristo.
Say Linaman nan Sitin Libro
Say gagara a nisurat ya (1:1-4)
Say pangngisadyaꞌ ta pigaw nin matukid a gagara nan Dios nin maisalba a tutawo (1:5–4:15)
Say ikaiyanak nan si mangisadyaꞌ nin dalan para konan si Nipangakoꞌ nan Dios (1:5-80)
Say ikaiyanak tan itutuboꞌ nan si Nipangakoꞌ nan Dios (2:1-52)
Say nangibakian nan Dios kona ni Juan a Mammawtismo (3:1-22)
Say pammatutuo nin say maipaꞌkaꞌ konan si Mangingisalba (3:23–4:15)
Naibantog a maipaꞌkaꞌ konan Mangingisalba itaw sa Galilea (4:16–9:50)
Say nipangitaranaꞌ nan nangwaꞌ nin say nakaibakian nan Mangingisalba (4:16-44)
Say nipamiliꞌ nan saray tumutumbok nan Mangingisalba (5:1–6:16)
Say pangngipasal konran tumutumbok nan Mangingisalba (6:17–7:50)
Say pangarigan sa nipamakiꞌ nan Mangingisalba konran tumutumbok na (8:1–9:6)
Say pipaꞌkaan nin mantumbuken yay Mangingisalba (9:7-50)
Nipasaya nayna a nakem nan Mangingisalba nin ilaꞌpos na a nakabakian na (9:51–19:27)
Say pakasubok ran tumutumbok nan Mangingisalba (9:51–11:13)
Say mangidwaꞌdwaꞌ sa pammiliꞌ nan sayay tumutumbok (11:14–19:27)
Si susuyot nin linggo tan say patiti nan Mangingisalba (19:28–24:1)
Say kai nin pangangalilbiꞌ nin pakauray nan Mangingisalba (19:28–21:38)
Say pangmamati konan Karniro para sa pakaisalba ran tutawo (22:1–24:1)
Say pamamin pammatutuo sa pakayadiꞌ nan Dios (24:2-53)