Si Mabistan Patandaꞌ nan Dios Sigon kona ni
LUCAS
1
Mapagalang a Teofiloa:Abaw sarayna a inasirta ran nisurat a bubagay nin tinukid nan ginwaꞌ nin Dios iti komin mammemper kona ni Jesus. 2 Say nisurat ra ket saytaw say nibaritaꞌ ra komi nin saray mismon nakaꞌkit sa ginwa-ginwaꞌ nan Dios nangibwat sin kataranaꞌ, ket nipata-patandaꞌ ra anamaet a minsahi nin nangibwat konan Dios. 3 Ket banaꞌ anaod ta inusisaꞌ kon maong a sarban saytin nangyadiꞌ nangibwat sin taranaꞌ, edet naisip kon mabista anamaet nin isurat ko nin naunong para komoyo 4 ta pigaw nin matandaan moyon peteg a say niyakay komoyo ket tutuo.b
The Beginning
Nipatandaꞌ a Pakaiyanak na ni Juan a Mammawtismo
5 Itaranaꞌ kodti: Sin saytaw sin si Herodes a adiꞌ sa prubinsyan Judea, main nin sayay padiꞌ a say ngaran na ket Zacarias. Saya yan iti sa grupon pupadiꞌ a nipangaran kona ni Abias. Si asawa na ni Zacarias nin say ngaran na ket Elisabet, puri naya ni Aaron a saya yan lamang anamaet nin padiꞌ sin saytaw. 6 Saraytin mitraasawa ket matunong sara sa pangingikit nan Dios nin mantumbuken ra a sarban gan-gan tan ipatumbok nan Dios. 7 Baleꞌ kasan anak ra banaꞌ ta baog ya si Elisabet. Saya et, sin sain ket masiken tan akulaw sarayna.
8 Niꞌsa, turno nan grupo na ni Zacarias a magsirbin padiꞌ sa Timplo nan Diosc. 9 Sawanin, ugaliꞌ ran pupadiꞌ a mibunutan ta pigaw nin matandaan no siꞌno a lumuob itaw sa Timplo nan Dios nin mamuor nin insinsod, ket si ngaran na ni Zacarias a nabunot. 10 Legꞌan nan mampamuor, sarba radtaw nin mampangrayo ket mandumasal sara sa liwaꞌ. 11 Ket kapingmatan main anan sayay anghil nan Dios a nakaꞌdeng sa pawanan nan altar nin pammuuran nin insinso a pinaꞌkit kona ni Zacarias, 12 ket nabigraꞌ tan naliꞌmwan ya. 13 Wana baleꞌ nin anghil kona, “Andiꞌ ka nin maliꞌmo, Zacarias, ta rinngeꞌ nan Dios a dasal mo. Ket si Elisabet a asawa mo, manganak ya liꞌ nin lalaki! Pangaranan man Juan.
14 Say ikaiyanak na
ket mamaririket tan mamariga liꞌ
komoyo tan konran abaw a tutawo;
15 banaꞌ ta alaki tan impurtanti ya liꞌ nin tawo sa pangingikit nan Dios.
Matkap a kai yaynaod nin minom nin arak o animan nin makapabok.
Magꞌuray yay Ispirito nan Dios kona
mataman itaw ya et sa tyan nan ina na.
16 Pasublien nasara liꞌ a abaw nin Israelita
konan Dios a Uunuren ra.
17 Say pinanakem tan pakayadiꞌ na ket bilang sa nibi nan Ispirito nan Dios
kona ni Elias a prupita nan Dios sin nuꞌnan panaon.
Pasublien na liꞌ a mabistan pisisimbatan nin mangatua tan uaꞌnak. Malakias 4:5-6.
Saray subag konan Dios ket,
gawꞌen nan kipada anay pangingisip ra konran matunong.
Ket muꞌna yayna ta pigaw nin isadyaꞌ nasaray tutawo sa pagꞌuuray nan Uunuren.”
18 Ket, tinepetan naya ni Zacarias a anghil, “Paꞌno ko wadiꞌ nin mapihon mangyadiꞌ in ta siꞌkami nin mitraasawa ket pariho kamin matuntawo ana?” 19 Inumbat yay anghil kona a wana, “Siꞌko si Gabriel a mampagsirbi lawas konan Dios. Si Dios nibakiꞌ nakodti komo ta pigaw nin ikaꞌ koya iparateꞌ ti nin mabistan patandaꞌ komo. 20 Edet, maumel ka legꞌan a siin nin nibaritaꞌ ko komo ket kai ya et nangyadiꞌ banaꞌ ta kai ka nin mamper. Sitin naipatandaꞌ komo ket siguradon mangyadiꞌ liꞌ no rumateꞌ a panaon nin nitandaꞌ nan Dios.”
21 Sin sain, saray tutawo anamaet, itaw sara sa rikor nin Timplo a mantagaꞌnan raya si Zacarias. Makaꞌngap sarayna ta naꞌteng yaynadtaw sa luob. 22 Sin linmiwaꞌ ya ket kai yayna nin makapagꞌirgo no kai sinya-sinyas tanay pitarusan ra ta umel yaynaod ana; kanyaꞌ nin nipaꞌkaꞌ ra a main nin makapakaꞌngap a nipaꞌkit nan Dios konadtaw sa luob. 23 Sin nayadiꞌ anay turno nan grupo na ni Zacarias, sinmubliꞌ yayna sa bali ra.
24 Amboꞌ nin naꞌteng, mabuktot yayna si Elisabet a asawa na, ket pinaipukok yan limay bulan sa bali ra. Wana sa nakem na, 25 “Ay, narateꞌ a lamang! Kinaꞌdwan nakon lamang nin Dios. Ginlat naya a pakabalawan kon kai manganak!”
Nipatandaꞌ a Ikaiyanak na ni Jesus
26 Sin aꞌnem a bulan naynan mabuktot ni Elisabet, nibakiꞌ naya anamaet nin Dios si anghil a Gabriel sa Nazaret, sayay babali sa prubinsyan Galilea. 27 Pinako naya konan sayay balasang itaw a say ngaran na ket Maria. Naitandaꞌ yaynan pakasal konan sayay lalaki a say ngaran na ket Jose, a nangibwat ya sa puri na ni adiꞌ a David. 28 Ket nako ya anaod a anghil kona ni Maria tan nangigalang ya kona a wana, “Rumiriket ka, Maria! Si Dios, kinawa-kawaꞌnan naka ket adani ya komo.e” 29 Nabigraꞌ ya si Maria sa nibaritaꞌ nan anghil ket inisip-isip na no ani kadiꞌ a pipaꞌkaan nin inirgo na. 30 Ket wanan anghil kona, “Andiꞌ ka nin masalak, Maria, ta napaririketan yan tuloy a Dios komo. 31 Gumuktot ka tan lalaki yay iyanak mo, ket pangaranan ma liꞌ nin Jesusf.
32 Pinasyan kataꞌgayan liꞌ nin nikatawo na, tan tawagen ya liꞌ nin
Anak nan Sangkataꞌgayan nin Dios.
Si Uunuren a Dios gawꞌen na a siin nin iyanak mo
ket magꞌadiꞌ ya sa lugar nan puon na a si adiꞌ a David.
33 Magꞌuray ya liꞌ konran puri na ni Israelg anggan-angga
tan say pagꞌuuray na ket kasan anggawan.”
“Si Ispirito nan Dios mako ya komo,
ket sa pakayadiꞌ nan Sangkataꞌgayan nin Dios
gumuktot ka;
kanyaꞌ nin si masanton iyanak mo liꞌ, nibakiꞌ nayan Dios ket
tawagen yan Anak nan Dios.
36 Wanin yan lamang si kanayon mon si Elisabet a say tandaꞌ ket baog ya. Ginmuktot ya mataman no akulaw yaynan tuloy. Ikaꞌnem a bulan nayna sawanin, a si iyanak na ket lalaki ya. 37 Anaod, kasan impusibli konan Dios.”
38 Ket wana ni Maria konan anghil, “Siꞌko, aripen nako nin Dios ket sain nin karabayan nan mangyadiꞌ kongko, akuen ko.”
Miꞌsa, nibwat yaynay anghil.
Binisita naya ni Maria si Elisabet
39 Sin sain, nisukbot ya si Maria, tan nangapura yan nako sa sayay babalin itaw sa tutalugtog nin prubinsyan Judea, 40 ta bisitawen nasara si Zacarias tan Elisabet. Sin rinmateꞌ yadtaw konra, nangigalang ya kona ni Elisabet. 41 Sin narngeꞌ naya ni Elisabet si Maria, sinmikwal yay buktot na ni Elisabet tan nagꞌuray yay Ispirito nan Dios kona, 42 ket wanan maksaw, “Peteg a sangkakarmaan ka sa sarban bubbayi tan marayo ya liꞌ anamaet a iyanak mo. 43 Aninaytin kagalangan a nibi nan Dios kongko ta siꞌkan si ina nan Uunuren ko ket mambisitawen nako! 44 Anaod, eteng tuloy tamoꞌ nin narngeꞌ taka ket sinmikwal yay buktot ko sa ririket na. 45 Makarmaꞌ ka, Maria, ta namper kan mangyadiꞌ a nipatandaꞌ nan Dios komo!”
Raywen naya ni Maria a Dios
46 Ket wana ni Maria,
“Manraywen koyan tuloy a Catawan a Dios,
47 tan maririket akon tuloy banaꞌ konan Dios a syay Mangingisalba ko,
48 ta piniliꞌ nako mataman no
ayupaꞌ a kapapaꞌsar ko.
Kanyaꞌ nin, mangibwat sawanin, say sarban tutawo
sabtan rakon makarmaꞌ
49 banaꞌ sa makapakaꞌngap a ginwaꞌ nan Makapangyayadiꞌ a Dios kongko.
Naiduma yan peteg!
50 Mapaingangaꞌdo ya konran sarba ran mangunor kona,
mangibwat ana konran saray nuꞌnan tutawo anggan sawanin.
51 Manꞌipaꞌkit na sa gawaꞌ-gawaꞌ na a alakin kapangyadian na.
Pitayak-tayaken nasaray mampipataꞌgay,
52 main nin galten nay pakayadiꞌ ran saray iti sa uray,
ket itandudoꞌ nasaray maayupaꞌ.
53 Mampabsuyen nasara sa matkap ray mampagkurang,
baleꞌ konran mumayaman paibwaten nasaran kal-la gamet.
54-55 Tinulungan natamon siꞌtamon mampagsirbi kona nin puri na ni Israel.
Anaod, tinukid na a pangakoꞌ na nin
pangingipaꞌkit na kontamo nin ingangaꞌdo nan magnayon anggan-angga
a sigon sa nipangakoꞌ na kona ni puon tamon si Abraham pati konran puri na.”
Sain a wana ni Maria.
56 Ket itaw yan magtulon bulan si Maria konra ni Elisabet, miꞌsa sinmubliꞌ yayna sa bali ra.
Niyanak ya si Juan a Mammawtismo
57 Sawanin ket, narateꞌ anay pangangabing na ni Elisabet. Ket lalaki yaynaod a niyanak na. 58 Sin natandaan ran kabaraybay tan kukanayon ra a maipaꞌkaꞌ sa nipangabing na ni Elisabet, nikiririket sara kona banaꞌ sa alakin ingangaꞌdo nan Dios kona. 59 Ket sin ikawalon awro naynan abing, abaw saray tutawon nakodtaw konra ta turien ya sigon sa kaugalian ran Judio. Pangaranan raya kumon a abing nin Zacarias a bilang sa ngaran na ni tatay na, 60 baleꞌ wanan ina na, “Kai! Juan a ipangaran kona.”
61 Ket wanra anamaet nin saray tutawodtaw, “Ambaleꞌ ey? Kasa anamaet nin kanayon moyon wanin a ngaran!”
62 Kanyaꞌ nin nisinya-sinyas ran tinepet kona ni Zacarias no ani a rabay nan ipangaran konan anak na. 63 Nimustra na ni Zacarias a byan rayan panuratan, ket nisurat na a, “Si ngaran na ket Juan.” Ket sarba ra, nakaꞌngap.
64 Tampor nin makapagꞌirgo yayna si Zacarias ket rinayo nayay Dios. 65 Sarba ran tutawodtaw a nakatandaꞌ sa sain, nakaꞌngap sara. Naibantog ti nin nangyadiꞌ sa intiron babalin itaw sa tutalugtog nin prubinsyan Judea. 66 Ket sarba ran nakarngeꞌ konan sitin nangyadiꞌ, inisip-isip ra no ani liꞌ kadiꞌ a liwaꞌ na no umalaki yaytin anak. Wanin a iti sa nakem ra banaꞌ ta mapala-palaway anaod a say pakayadiꞌ nan Dios ket iti kona.
Say Nipangipadles na ni Zacarias
67 Sin sain, si Zacarias nin tatay na ni Juan ket nagꞌurayan nayan Ispirito nan Dios ket wanti a nibaritaꞌ nan minsahin ibat konan Dios:
68 “Marayo yay Uunuren a Dios tamon puri na ni Israel,
ta rinmateꞌ ya ta pigaw nin isalba natamon tutawo na.
69 Nibakiꞌ naya kontamoy makapangyayadiꞌ nin Mangingisalba
a ibat sa puri na ni adiꞌ David a nagsirbi konan Dios.
70 Siin anamaet a nipangakoꞌ na nin Dios yupaꞌ konran prupita nin naitalaga kona sin nuꞌnan panaon ta wana a
71 isalba natamo konran kalaban tamo
tan konran sarba ran manguraꞌ kontamo.
72 Ket iningangaꞌdo nasaran Dios a pupuon tamo
ta tukiden nayna a masagradon nipangakoꞌ na a
73 sinmamba ya kona ni Abraham nin puon tamo.
74 Isalba natamo konran kalaban tamo
ta pigaw nin makapagsirbi atamo konan Dios nin kasan ikaliꞌmo tamo,
75 ta maparinggas tan mapapteg atamoyna sa pangingikit na leleg tamon mabyay.
76 Ket siꞌka, anak ko, Prupita nan Sangkataꞌgayan nin Dios a tawag liꞌ komo;
ta siꞌkay mangisadyaꞌ konran tutawo sa irarateꞌ nan Catawan.
77 Ipatandaan mo konra a maisalba sara
yupaꞌ sa pammirduna nan kukasalanan ra.
78 Sayti ket magwaꞌ mangibwat sa alakin pangingaꞌdo nan Dios kontamo.
Say mangyadiꞌ ket baraꞌmon manginamar yaynay awro
79 nin sumiraꞌ ya kontamon iti sa kadedleman tan naiketeg nin mati,
ta iyakay na kontamoy pakikituno konan Dios.”
80 Ket, si anak a si Juan, inmalaki ya tan nagꞌin yan manakem. Itaw ya nin niikap nin pinaipurok sa lugar a amboꞌ nin matawo angga sin awron pinaipadar ya nin nitaranaꞌ nayna a nangyakay konran Israelita.