8 Itaw sa rikor nan sitaw a lamang nin babali, main nin mammastor nin itaw sa pammasturan ta mambantayan rasaray kukarniro ra no yabi. 9 Kapingmatan, main anan anghil nan Dios a pinaꞌkit konra, miꞌsa banaꞌ sa kataꞌgayan nan Catawan ket napalawayan sara kanyaꞌ nin sabtan liꞌmo ra. 10 Ket wanan anghil konra, “Andiꞌ kamo nin maliꞌmo ta manꞌiparateꞌ koyay Mabistan Patandaꞌ nin pangibwatan ran rumiriket nin sarban tawo. 11 Sitin yabi itaw sa Betlehem nin babali na ni Adiꞌ a David, naiyanak yay Mangingisalba moyo a sya a Cristo tan sya a Uunuren. 12 Maalilbiꞌ moya ta pinunggos yan nipaidaꞌ sa pangnganan ran uayep.” 13 Bigraꞌ, kalamoꞌ nasaraynan anghil a sabtan kaꞌbawan nin uanghil a ibat sa langit. Manraywen rayay Dios, wanra,

15 Sin nibwat saraynan sumubliꞌ sa langit a uanghil, wanran mammastor sa saya tan saya, “Mako atamoyna sa Betlehem ta keen tamo nin kikiten a nipatandaan nan Dios kontamo.” 16 Kanyaꞌ nin dinaliꞌ-daliꞌ ray nibwat ket nadumog rasara si Jose tan si Maria, tan si abing nin itaw yan nakaidaꞌ sa pangnganan ran uayep. 17 Sin naꞌkit rayaynay abing, nipara-parateꞌ ra konran tutawodtaw a nibaritaꞌ nan sitaw a anghil konra maipaꞌkaꞌ kona, 18 ket sarba ran nakarngeꞌ sa nibari-baritaꞌ ran pupastor ket nakaꞌngap. 19 Si Maria anamaet, iti tanan pirmi sa nakem na tan inisip-isip nay sarban saytin nangyadiꞌ. 20 Saray mammastor anamaet, sinmubliꞌ sara sa mampamasturan ran sirarayo sara konan Dios banaꞌ sa sarban naꞌkit tan narngeꞌ ran maitukoy sa nipatandaꞌ nan anghil konra.

21 Sin waloy awro naynan abing, nipaturiꞌ raya^b tan pinangaranan rayaynaod nin Jesus sigon sa nibaritaꞌ nan anghil kona ni Maria baꞌyo ya et nin niinaw^c.

22 Sawanin, narateꞌ a panaon a matkap ran gawꞌen ni Maria a ritwal sa pakaparinggas mayadiꞌ ya mangabing a sayay babayi. Sigon yayti sa nipatandaan na intaw nin Dios sa Gugan-gan yupaꞌ kona ni Moises. Kanyaꞌ nin niꞌras raya anamaet si Jesus sa Timplo sa Jerusalem ta matkap a italaga ya konan Dios. 23 Naisurat in sa Libron Gugan-gan, “Si lalaki a kakan anak, matkap a italaga ya konan Dios.”^d 24 Ket ipaidaꞌton ra konan padiꞌ a say matkap para sa ritwal sa pakaparinggas. Sayti ket rwa ray kalapati o anak nin palakpak.^e

25 Sin sain, sa Jerusalem, main nin tawon say ngaran na ket Simeon a sya matunong ya tan matulok ya konan Dios. Mantagaꞌnan nay pakatukid nin nipadles a pakaisalba ran puri na ni Israel. Mampagꞌuray yay Ispirito nan Dios kona 26 ket nipatandaan na kona a kai ya nin mati anggan naꞌkit nayaynay Cristo nin nipangakoꞌ nan Dios. 27 Sa nipaninreg nan Ispirito nan Dios, nako ya si Simeon sa sakop nan Timplo. Ket sin niꞌras rayadtaw si Jesus nin mangatua na ta pigaw nin tukiden ray manꞌipagwaꞌ nin Gugan-gan nan Dios, 28 naꞌkit naya ni Simeon ket binibi naya. Ket nikisalamat ya konan Dios nin wana, 29 “Uunuren, tinukid moy pangakoꞌ mo kongkon aripen mo, kanyaꞌ nin kuntinto akoyna tan taman nin kalapen nakoyna sawanin 30 ta naꞌkit koyaynay Mangingisalba 31 nin nigagara mon nibakiꞌ para sa sarban tawo. 32 Baraꞌmo yan tyoꞌ nin mamalaway sa kanakman ran amboꞌ nin Israelita ta pigaw nin matandaan ra no paꞌno sara nin maisalba. Sya anamaet a mamin pakairayo konran Israelita a tutawo mo.”

33 Nakaꞌngap sara si Maria tan Jose sa nibaritaꞌ na ni Simeon maipaꞌkaꞌ kona ni Jesus. 34 Ket binindisyunan nasara ni Simeon, miꞌsa wana kona ni Maria a nanay na ni Jesus, “Sitin anak, nitalaga nayan Dios nin magꞌin nin pangibwatan nin pisisyay ran Israelita ket abaw saray masidaꞌ banaꞌ kona tan main saraynamaet a maisalba banaꞌ kona. Sya a mamin pammatalad konra baleꞌ abaw sara a kumuntra kona 35 ket sa wanin, matandaan a iti sa kaararman nin kaisipan ra. Ket siꞌka, Maria, say mangyadiꞌ kona, ikabereng mo nin bilang sinurot yay pusoꞌ mo nin daga.”

36 Sin sain, itaw yan lamang a sayay prupita a say ngaran na ket Ana nin anak naya ni Fanuel a puri na ni Aser. Akulaw yaynan tuloy. Pitoy taon saran nikalamoꞌ nin asawa na baꞌyo ya nabalo. 37 Walumpuloꞌ tan aꞌpat a taon nayna tan pirmi yadtaw sa sakop nan Timplo. Awro tan yabi yadtaw nin mampangigalang konan Dios yupaꞌ sa pagkukulasyon^f tan kadadasal. 38 Ket sin sain, kinmadani ya anamaet konra ket nikisalamatan nayay Dios nin nangibaritaꞌ yan maipaꞌkaꞌ kona ni Jesus konran sarba ran tawon sitataꞌgan sa pangingisalba nan Dios konra.

39 Sin nayadiꞌ rayna a sarba sigon sa Gugan-gan nan Dios, sinmubliꞌ sarayna sa dirin babali ran Nazaret sa prubinsyan Galilea. 40 Si anak inmalaki ya ket mampagꞌin yan magsen, nagꞌin yan madunong tuloy; ket mantulungan naya lawas nin Dios.

41 Tinaon a saray mangatua na ni Jesus ket mako sara kipista sa Pistan Nipanglabas^g sa Jerusalem. 42 Ket, sin labinrway taon nayna ni Jesus, nayi ya nikipista konra. 43 Sin nayadiꞌ anay pista, nibwat saraynan sinmubliꞌ a matua na sa bali ra baleꞌ kai ra tandaꞌ nin nabatiꞌ ya sa Jerusalem si Jesus. 44 Nipaꞌkaꞌ ran nayi yayna konran raruman kalalamoꞌ ra, kanyaꞌ nin nituloy raynay linmalakon nikakaawro miꞌsa tiningkap raya konran kukanayon tan katandaꞌ ra. 45 Ket sin kai raya nadumog, sinubliꞌ rayan tiningkap sa Jerusalem.

46 Ikatlon awroyna sin naꞌkit rayadtaw sa sakop nan Timplo. Nakatekreꞌ yan kalamoꞌ ran mangangakay nin gan-gan, nin mampangrengeꞌ tan mampanepet ya. 47 Sarba ran mampangrengeꞌ kona ket nakaꞌngap sa pakataros tan ubat na. 48 Sin naꞌkit rayan itaw ket nabigraꞌ saray matua na ket wana ni nanay na, “Anak ko, mayin a ginwaꞌ moyti komi? Aburido kami anan tuloy ni tatay mo nin mampaningkap komo.”

49 Ket wana ni Jesus konra, “Mayin a tikapen rako? Ambaleꞌ, kai moyo para tandaꞌ a matkap a iti ako sa Bali na ni Ama ko?” 50 Kai ra baleꞌ natarusan a rabay nan irgwen ni Jesus. 51 Ket nayi yayna konran mangatua nan sinmubliꞌ sa Nazaret. Matulok yan tuloy konra.

Si Maria, iti tanan pirmi sa nakem na tan inisip-isip nay sarban mampangyadiꞌ. 52 Si Jesus anamaet, tinmuloy yan inmalaki tan nagꞌin nin madunong tan makapaririket konan Dios tan konran tutawo.