Sinmubliꞌ yan Mabyay si Jesus
16
Ket sawanin, sin napalabas anay Awron Painawa, si Maria a taga Magdala, si Salome, tan si Maria nin ina na ni Santiago, nanaliw saran banglo ta pigaw nin banglwan rayay bangkay na ni Jesus. 2 Sin kabubuklas nin Linggo, nako saradtaw sa nanabunan. Legꞌan ran adap itaw, 3 mampiiirgo sara a wanra, “Siꞌno kadiꞌ a mangitulin konan bato nin nisadaꞌ sa nanabunan?” 4 Wanin a wanra banaꞌ ta pinasyan kaalakyan nan sitaw si bato. Baleꞌ sin kinmikit saradtaw sa nanabunan, naꞌkit ran si bato ket naitulin yayna. 5 Ket sinumrep sara tan main nin naꞌkit radtaw nin sayay tumububaꞌyo nin anghil a bakas na nin mantumekreꞌ ya sa pawanan a nisket yan anro tan maputiꞌ. Ket naliꞌmwan sara kona.6 Ket wana konra, “Andiꞌ kamo nin mabigraꞌ. Tandaꞌ kon mantikapen moya si Jesus a taga Nazaret nin nipasak sa kudos. Kasa yaynadti ta sinmubliꞌ yan mabyay. Kikiten moyo. Siti e a lugar nin nangipaidaan kona. 7 Sawanin, mako kamoyna ta ibaritaꞌ moyoyti konran tumutumbok pati kona ni Pedro nin wamoyo, ‘Muꞌna yaynadtaw si Jesus sa Galilea. Itaw ket maꞌkit moya nin bilang sa nibaritaꞌ na komoyo sin saytaw.’ ”
8 Konan siin linmiwaꞌ saradtaw sa nanabunan tan nangred sara ta pinasyan nikabigraꞌ ra. Mangingintar sara sa nikaliꞌmwan ra. Ket banaꞌ ta wanin anay liꞌmo ra, kai sara gapo nin nangibaritaꞌ nin animan sa siꞌnuman.a
Pangngilaꞌpos a Nibaritaꞌ nan si Nanurat
Pinaꞌkit ya si Jesus kona ni Maria Magdalena
9 Ket sawanin, sin sinmubliꞌ yaynan mabyay si Jesus sin masakbay et konan sitaw nin awron Linggo, kona ni Maria a taga Magdala nin namalakwanan nan pito ran uispiriton dukaꞌ a nuꞌnan nipaꞌkitan na. 10 Ket nako yan tampor si Maria konran mabereng tan manꞌumakis a tumutumbok na ni Jesus. Ket nibaritaꞌ na konra a sinmubliꞌ yaynan mabyay. 11 Nibaritaꞌ na et konra a naꞌkit naya, baleꞌ kai rayti nin timper.
Pinaꞌkit ya si Jesus konran Rwan Tumutumbok na
12 Kayadiꞌ nin siti, nipaꞌkit ya nin main nin sakalakon bakas konran rwan tumutumbok na a manlumalakon adap sa baryo. 13 Ket saraytin rwa, sinmubliꞌ sara tan nibaritaꞌ rayti konran raruman tumutumbok baleꞌ kai saraynaet nin namper konra.
Pinaꞌkit ya si Jesus konran Labinsayan Tumutumbok na
14 Sinmunor, pinaipaꞌkit ya konran labinsayan tumutumbok na sin mampangan sara. Nikapuet nasara banaꞌ ta benged sara tan banaꞌ ta kai rasara nin timper a nakaꞌkit kona kayadiꞌ a sinmubliꞌ yaynan mabyay. 15 Wana et konra, “Mako kamo nin ipatandaan moya sa sarban tawo sa sarban lugar iti sa lutaꞌ a Mabistan Patandaꞌ. 16 Si siꞌnuman nin mamper tan mabawtismwan ya ket maisalba ya. Baleꞌ si siꞌnuman nin kai nin mamper ket masintinsyawan yan madusa. 17 Ket sayti a pupakaꞌkitan a magkamain konran magmatalek kongko: Makapalakwan saran uispiriton dukaꞌ yupaꞌ sa pakayadiꞌ ko. Makapagꞌirgo saran saka-sakalakon kai ra nin inadal nin uirgo. 18 Mataman no makagaꞌget saran ulay o makainom saran samal ket kai sara nin mangno. No ipababo ray gamet ra konran mampagmasakit ket umandaꞌ sara.”
Ginawang ya si Jesus sa Langit
19 Sin nayadiꞌ yayna nin nikiirgo si Jesus a Uunuren konran tumutumbok na, niyuliꞌ yayna sa langit ket tinmekreꞌ ya sa pawanan nan Dios. 20 Ket saray tumutumbok na nikaꞌ raya nin nipata-patandaꞌ anaod a Mabistan Patandaꞌ sa sarban lugar. Ket si Uunuren a si Jesus anamaet ket tinulungan nasara tan pinaꞌget nay katutuꞌwan nin manꞌipata-patandaan ra yupaꞌ sa makapakaꞌngap a pupakaꞌkitan nin nipagwaꞌ na konra.