Ket niꞌbat na ni Jesus, “Nairgo moyoyna.”

3 Ket abaw a niparsa-parsa ran Pupangulon Pupadiꞌ kona. 4 Ket sin wanin tinepetan nayaynaet ni Pilato. Wana, “Kasa paran maiꞌbat mo? Narngeꞌ moy abaw a manꞌiparsa ra komo!”

5 Baleꞌ kai yayna gapo nin inumbat et si Jesus. Ket makaꞌngap yan tuloy si Pilato.

6 Sawanin, ugaliꞌ na ni Pilato a mamirdunan mangibulos nin sayay priso tepeꞌ nin Pistan Nipanglabas nin no siꞌno a dawaten ran tutawo. 7 Sin sain, main saray tawon mangkapriso banaꞌ ta nakapati sara sin nagribildi sara sa gubyirno. Saya konran sarayti ket si say ngaran na Barrabas. 8 Ket sin nako sara nin inmadap a kaꞌbawan ran tawo kona ni Pilato ta pigaw nin dawaten ran gawꞌen nay gindat nan man-gawꞌen, 9 wana konra, “Rabay moyo para a bulusan koyayti si Adiꞌ moyon Judio?” 10 Wanin a wana ta tandaꞌ nan peteg a niyadap raya si Jesus kona nin saray Pupangulon Pupadiꞌ banaꞌ ta maimbel sara.

11 Baleꞌ sinugsog rasaran Pupangulon Pupadiꞌ a tutawo nin dawaten ran bulusan naya si Barrabas amboꞌ a si Jesus. 12 Ket wana ni Pilato konra, “No wanin edet ani a gawꞌen ko konan si tawon mantawagen moyon Adiꞌ moyon Judio?”

13 Ket nitaꞌway ran niꞌbat, “Ipasak ma sa kudos!”

14 “Ambaleꞌ?” wana. “Main paran ginwaꞌ nan abas?” Baleꞌ mas maksaw rayna edet nin niburyaw, “Ipasak ma sa kudos!” 15 Ket sin wanin, banaꞌ ta rabay nasaran pagustwan ni Pilato a tutawo, nibulos naya si Barrabas. Ket si Jesus anamaet, nipasanet naya tan sin nayadiꞌ, nipagamet naya konran sundaloꞌ ta pigaw nin ikaꞌ raya nin ipasak sa kudos.

16 Sin sain, niꞌras raya nin sundaloꞌ si Jesus sa luob nan Palasyo nan gubirnador a mantawagen yayti nin Pretorio tan pinididinep rasaray sarba ran sundaloꞌ nin itaw. 17 Kaaram, sinulutan raya nin kulor ubi nin kapa a kano wadiꞌ ket adiꞌ ya. Namalukay saran madiwin wakay nin kuruna kano wadiꞌ tan nikuruna rayayti kona ni Jesus. 18 Miꞌsa kano wadiꞌ ket nangigalang sara kona a wanra, “Viva Adiꞌ ran Judio!” 19 Miꞌsa pinatuk-patok rayay ulo na tan linudaꞌ-ludaan raya tan nanali-talimukod sara sa adapan na nin kano wadiꞌ ket pangingigalang ra kona. 20 Sin sinmawaꞌ saraynan nagpistawan ya, linusꞌok rayaytaw kona si kulor ubin kapa tan nisubliꞌ ran nisulot kona a dirin seket na. Kaaram, niliwaꞌ rayaynan ikaꞌ nin ipasak sa kudos.

21 Sa dalan, main nin sayay lalaki nin nasnaan ra nin mampamunta sa syudad. Siti si Simon a taga Cirene. Syay ama ra ni Alejandro tan Rufo. Ket pinasuet rayan nipabalatay kona a kudos nin mambalatayen na ni Jesus.

22 Ket nikaꞌ rayaynadtaw si Jesus sa lugar a mantawagen nin Golgota a say rabay nan irgwen ket Lugar nin Butꞌol Ulo. 23 Sin itaw sarayna, painumen raya kumon nin arak a linawukan nin pammakdar a mantawagen nin mira baleꞌ kai na nin ininom. 24 Ket nipasak rayayna sa kudos si Jesus. Kayadiꞌ, nibubunutan sara ta pigaw nin mapitawꞌa-tawꞌan ray seket na, a no ani a mako sa barang nin saya. 25 Alas nwibi sa buklas sin nipasak raya si Jesus sa kudos. 26 Nakasurat itaw a nipakasalanan kona a wana:

29 Saray tutawon lumabas itaw, ipeyeng-peyeng ran manuyaꞌ-tuyaꞌ kona ni Jesus. Wanra, “Ya! Siꞌka a wamo intaw ket mababaꞌ man yubaen tan ipaꞌdeng nin uman a Timplo nan Dios sa luob nin tuloy awro, sigi pa edet! 30 Isalba moy lalaman mon diri, gumlat kadsen sa kudos!”

31 Wanin ra anamaet nin Pupangulon Pupadiꞌ tan saray Madudunong sa Gugan-gan. Tinuyaꞌ-tuyaꞌ raya si Jesus a wanra sa saya tan saya, “Saray raruman tawo, naisalba nasara kano, baleꞌ say lalaman nan diri, kai! 32 Siin si sya a Cristo nin Adiꞌ nan Israel, makaglat yadsen tana in sa kudos sawanin nin maꞌkit tamon diri, mamper atamoyna kona!”

Mataman nin saray kriminal nin karngan nan nipasak ni Jesus, tinuyaꞌ-tuyaꞌ rayan lamang anamaet.

33 Sin ugtiawro, dinmedlem yay intiron babon lutaꞌ nin narateꞌ a tuloy udas. 34 Ket sin bandan alas tres nin yabina, wanan nitaꞌway ni Jesus, “Eloi, Eloi, lama sabachthani?” a say katarusan ket “Dios ko, Dios ko, ambaleꞌ nin pinauryan nako?”^b

35 Wanran tutawodtaw nin nakarngeꞌ kona, “Rengꞌen moyaytaw e! Mantawagen naya si Elias!” 36 Ket si saya konra nangred yan nako nangipaalepꞌep nin ispungha sa maalsem nin arak nin nikwa naya sa parpar nin bislak ta pigaw nin ipasepsep naya kona ni Jesus. Baꞌyo wana, “A! Pauryan ma! Sawanin, kiten tamo pa no rumateꞌ yan pageꞌ si prupita Elias nin keen naya nin galten isen sa kudos.”

37 Tinmaꞌway yan maksaw si Jesus, kaaram nati yayna.

38 Sin sain a lamang, nabisang yan napikngaꞌ nangibwat sa taꞌgay anggan saroy a kurtina nin salimbeng nan Sangkasantusan nin Lugar sa Timplo.

39 Ket sin naimatunan na nin kapitan ran sundaloꞌ a nakaꞌdeng itaw sa adapan na ni Jesus nin wanin a nipati na, wana, “Pageꞌ a anak nayaytin Dios!”

40 Main anamaet nin bubbayin itaw sa dayoꞌ nin mampamantay. Itaw sara si Maria nin taga Magdala, si Salome, tan si Maria nin ina ra ni Jose tan ni Santiago a anak et. 41 Sin saytaw ket nayi sarayti tan nangasikaso sara kona ni Jesus sin itaw ya sa Galilea. Abaw sara et a raruman bubbayidtaw a nayi kona sin tinmangkar yan nako sa Jerusalem.

42 Ket yumabinayna konan siin a Awron Pananadyaꞌ para sa Awron Painawa ran Judio. 43 Itaw ya si Jose a taga Arimatea, a sayay mapagalang nin myimbro nan Kunsiho ran Judio tan mantumaꞌgan ya sa irarateꞌ nin pagꞌaadiꞌ nan Dios. Banaꞌ ta yabinayna konan siin a awro, pinaksaw nay nakem na ket nako ya kona ni Pilato nin nikidawat yan aburoy a kalapen nayay bangkay na ni Jesus. 44 Nakaꞌngap ya si Pilato nin nakarngeꞌ a nati yaynan nadaliꞌ si Jesus. Kanyaꞌ nin nipakayaban nayay kapitan ran sundaloꞌ ta tinepet na kona no pageꞌ a nati yayna si Jesus. 45 Ket sin natandaan na kona nin kapitan a wanin anaod, inaburuyan naya si Jose nin kalapen nayay bangkay na ni Jesus. 46 Ket nako ya nanaliw si Jose nin mabistan klasin abel a maputiꞌ nin mantawagen nin diilo, miꞌsa nikayupaꞌ nayay bangkay na ni Jesus nangibwat sa kudos tan binarkot naya nin sitin abel. Miꞌsa nipaidaꞌ naya konan sayay pannabunan a kinalin baraꞌmon yukib sa bato, ket nitulin nayan nisadaꞌ sa purta nan pannabunan a sayay alakin bato. 47 Ket si Maria a taga Magdala tan si Maria nin ina na ni Jose, naꞌkit ray nipanabon kona ni Jesus.