3 Itaw ya si Jesus sa Betania sa bali na ni Simon a gindat nin main nin makaparmay nin masakit sa katat. Sin kapresan ran mampangan, main nin babayi nin nako kona ni Jesus a main awit nan sayay pangangwan^b a main nin laman nan pinasyan bili nin puron banglo nin say ngaran ket nardo. Ket simbing naya sa liey a pangangwan miꞌsa na nin nibuꞌboꞌ a laman nan banglo sa ulo na ni Jesus. 4 Baleꞌ masager saray umno nin itaw konan siin ket wanra sa saya tan saya, “Pinirdi nayna in nin banglo! 5 Magwaꞌ yan nalakoꞌ in kumon nin masurok sa matingkapan nin sayay taon miꞌsa nibi et kumon a naglakuan konran pubri.” Talagan masager sara konan babayi.

6 Ket wana ni Jesus, “Pauryan moya! Ambaleꞌ nin kasagran moya? Pinasyan bista nin ginwaꞌ na kongko. 7 Abirno nin ani a udas, isen saray pubri nin makalamoꞌ moyo ket animan a udas nin rabay moyo saran tulungan, matulungan moyo sara. Baleꞌ siꞌko, amboꞌ ana nin maꞌteng nin iti ako et komoyo. 8 Ginwaꞌ nay anggawan nin mababaꞌ nan sitin babayi para kongko. Binanglwan nayayna a lalaman ko nin nisadyaꞌ nayayna para sa tabon ko. 9 Ibaritaꞌ koyti komoyo, adtiman a lugar sa intiron mundo a pakaipatandaan nan si Mabistan Patandaꞌ, say ginwaꞌ nan sitin babayi ket maibari-baritaꞌ liꞌ anamaet nin pammanemtem kona.”

10 Ket si Judas Iscariote a saya konran labinrwan tumutumbok na ni Jesus, nako ya konran Pupangulon Pupadiꞌ ta pigaw nin nikitarusan yan ipagamet naya si Jesus konra. 11 Konan siin maririket sara, ket nipapagketan ran byan rayan kwarta. Anaod, nangibwat ana sin sain, nanirib yayna si Judas nin tyimpon maipagamet naya konra si Jesus.

12 Ket sawanin, sin primiron awro nin Pistan Pangangan nin Tinapay a Kasan Pammakbo, si awron pangmamati nin karniro para sa Pista nin Nipanglabas, wanran tumutumbok na ni Jesus, “Adti a rabay mo nin pangisadyaan min pangapunan tamo para sa Pistan Nipanglabas?”

13 Ket nibakiꞌ nasaray rwan tumutumbok na a wana konra, “Mako kamodtaw sa syudad. Ket main liꞌ nin lalaki nin masnaan moyodtaw a mampangawit yan sampayan ranom. Tumbuken moya 14 angga nin lumuob ya sa sayay bali. Ket wamoyo konan main nin ikon konan bali, ‘Wana ni Maistro tamo, no adti ya kano a kwarto nin kidungwan na komi nin tumutumbok na nin mangapon no Pistan Nipanglabas?’ 15 Ket ipaꞌkit naya komoyoy sayay alawang nin kwarto sa taꞌgay a nasadyaꞌ ana tan kumplito anay agamiren. Ket itaw, manadyaꞌ kamo nin kumanaꞌ kontamo.”

16 Ket nako saraytin tumutumbok na sa syudad tan nadumog rayaytaw si nibaritaꞌ na ni Jesus konra. Ket nisadyaꞌ raynay pangapunan ra sa pista.

17 Ket sin yabi ana, nako yadtaw si Jesus tan saray labinrwan tumutumbok na. 18 Sin kapresan ray mampangan, wana ni Jesus, “Ibaritaꞌ koyti komoyo, saya komoyon kadungo kodti a magtraidor kongko.”

19 Ket rinmereꞌ sara a tumutumbok na tan say barang saya ket wana kona ni Jesus, “Maibaritaꞌ mo para nin siꞌko?”

20 Ket wana konra, “Si saya anaod komoyon labinrwan tumutumbok ko nin mangkipanawsaw kongko nin tinapay sa yawong. 21 Siꞌkon si Pinaitawo, mati ako nin bilang sa wana sa Kasuratan. Baleꞌ kadoꞌ yayna in si magtraidor kongko! Maong ana kumon a kai ya nin naiyanak.”

22 Sin kapresan ran mampangan, nangalap yan tinapay si Jesus, tan nikisalamat ya konan Dios miꞌsa nin simpi-simping naya tan nitayak na konran tumutumbok na. Wana, “Kalapen moyayti. Siti a lalaman ko.”

23 Kaaram, kinalap nayay baso a main nin arak nin ubas. Nikisalamat ya konan Dios, miꞌsa nibi naya konra ket ninom sara ngaꞌmin konan siti. 24 Ket wana konra, “Sayti a dayaꞌ ko nin mamaꞌget nin kataratwan konan Dios. Tumuroꞌ liꞌ nin mati ako para sa abaw nin tutawo. 25 Ibaritaꞌ koyti komoyo, kai akoyna gapo nin minom nin arak nin ubas anggan konan sitaw si awron minom ako liꞌ nin baꞌyon arak sa Pagꞌadian nan Dios.”

26 Sin nayadiꞌ sara nin nangansyon nin pangrarayo konan Dios, nibwat saran nako sa Talugtog Olibo.

27 Ket wana ni Jesus konra, “Sarba moyo ngaꞌmin ket palaywan rako liꞌ nin bilang sa naisurat sa Kasuratan a wana,

29 Wana nin nagꞌirgo ni Pedro, “Lakwanan rakayna ngaꞌmin, baleꞌ siꞌko ket kai gapo.”

30 Wana ni Jesus kona, “Ibaritaꞌ ko komo, Pedro, baꞌyo main nin tumarangꞌok nin pirwa nin manok konan sitin yabi, mitlo moyna nin nibudiꞌ a katandaꞌ nako.”

31 Baleꞌ wana ni Pedro nin nipatibꞌey, “Mataman et nin kalamoꞌ nako nin patyen ana, kai ko gapo nin ibudiꞌ a katandaꞌ taka.”

Wanin anamaet a lamang a wanra nin saray sarban tumutumbok na.

32 Rinmateꞌ sara si Jesus itaw sa sayay lugar a pinangaranan nin Getsemani. Wana konran tumutumbok na, “Mabatiꞌ kamodti leleg a mandumasal ako.”

33 Niꞌras nasaran kalalamoꞌ na si Pedro, si Santiago tan si Juan. Marereꞌ yan tuloy tan pinasyan byat nin manꞌisipen na. 34 Wana konra, “Pinasyan tuloy nin bereng ko ket ipati koyna layi. Mabatiꞌ kamodti, tan andiꞌ kamo nin maꞌlek.”

35 Kinmadayoꞌ yan bugaꞌ konra, miꞌsa linmukob ya ta pigaw nin idasal na a no magwaꞌ kumon ket kai nayna nin dalanan in si panaon nin pangingirangep na. 36 Wana, “Ama ko! Sa sarban bagay ket main pakayadiꞌ mo nin mangwaꞌ. Andiꞌ moyna kumon nin ipairangep kongko in say dyaꞌdyaꞌ a adapen kon irangep. Wanin man, amboꞌ nin say karabayan ko a masunor, no kai say karabayan mo.”

37 Sin sinmubliꞌ ya konran saray tulon tumutumbok na, naratꞌanan nasaran mangkaꞌlek. Pinukaw nasara tan wana kona ni Pedro, “Simon, mampaꞌlek ka anamain! Kai mo tana para nin magwaꞌ a andiꞌ nin maꞌlek yapoꞌ abirno nin sayay udas tamoꞌ? 38 Andiꞌ kamo nin maꞌlek no kai edet, dumasal kamo ta pigaw nin kai kamo nin madaeg nin tukso, ta sa nakem moyo ket disidido kamon gawꞌen moyoy manepeg baleꞌ mapatapoꞌ kamon kinatawo moyo.”

39 Kinmadayoꞌ yaynamanaet tan dinmasal yan wantaw lamang sa nuꞌnan dasal na. 40 Sin sinmubliꞌ yaynamanaet sa kamiꞌnan ran tulo nin tumutumbok na ket mampaꞌlek sara anamanaet ta talagan kai ra nin mapukpukan a elek ra. Sin nakaimata sara, kai ra nin tandaꞌ no ani a iꞌbat ra kona.

41 Sin sinmubliꞌ yan pitlo konra wana, “Mangkaꞌlek kamo et! Kustoyna in! Narateꞌ anay udas! Pakandaꞌ kamo! Siꞌkon si Pinaitawo ket maipagamet akoyna konran dukaꞌ a tutawo. 42 Mibangon kamo tan sumnaꞌ atamo! Syayna e a tawon nagtraidor kongko.”

43 Mampagꞌirgo ya et si Jesus ket kapingmatan nin rinmateꞌ ya si Judas a saya konran labinrwan tumutumbok na. Abaw saray tutawon kalamoꞌ na nin nibakiꞌ ran Pupangulon Pupadiꞌ tan saray Madudunong sa Gugan-gan tan saray Mangatuntawo ran Judio. Di-beneng tan di-batutaꞌ sara. 44 Nibaritaꞌ naynan gindat konra ni Judas no paꞌno rayan maipurok si Jesus. Wana, “Si arkan ko, syaytaw nin diri. Dakpen moya. Ket iꞌras moya nin gwardyawan moyan maong.”

45 Sin rinmateꞌ yadtaw si Judas, diri-diritso na kona ni Jesus. Ket wana, “Maistro!” Miꞌsa naya nin inarkan. 46 Ket dinakep rayayna si Jesus. 47 Konan siin, si saya konran itaw a nakaꞌdeng, inuyos nayay beneng na tan tinagaꞌ nayay sayay katulong nan si Sangkataꞌgayan nin Padiꞌ ket naglat yan natagaꞌ a tutulyan na. 48 Ket wana ni Jesus konran tutawo, “Saya ako para nin kriminal ta nakabeneng kamo tan main nin pekpek moyo nin manakep kongko? 49 Inawru-awro kon nangyakay komoyo itaw sa sakop nan Timplo, kai rakoyna nin dinakep itaw! Baleꞌ sayti ket matkap nin mangyadiꞌ kongko ta pigaw nin matukid a naisurat sa Kasuratan.”

50 Ket nagsipalayo sara ngaꞌmin a tumutumbok na tan linakwanan raya si Jesus.

51 Main nin sayay tububaꞌyon tinmumbok kona ni Jesus nin nipunggos ya tamoꞌ nin ules. Ket tinarigmusan raya nin tutawo ta pigaw nin ikidakep raya kumon. 52 Baleꞌ pinaipuslit ya sa punggos nan ules ket palayo nan lusꞌok.

53 Sawanin, nikaꞌ raya si Jesus sa bali nan Sangkataꞌgayan nin Padiꞌ. Itaw nididinep sara a Pupangulon Pupadiꞌ, saray Mangatuntawo ran Judio tan saray Madudunong sa Gugan-gan. 54 Si Pedro, tinmumbu-tumbok ya baleꞌ itaw sa dayoꞌ anggan sa baraybay nin bali nan Sangkataꞌgayan nin Padiꞌ. Miꞌsa nako ya nin nikidupong nin tinmekreꞌ konran gwardya nin pairangrang ya sa apoy. 55 Saray Pupangulon Pupadiꞌ tan sarba ran myimbro nan Kunsiho ran Judio ket naningka-tingkap saran maiparsa ra kona ni Jesus ta pigaw nin masintinsyawan ya nin patiti. Baleꞌ kasan naꞌkit ra 56 ta abirno nin abaw saray nangibaritaꞌ nin bulaꞌ-bulaꞌ nin kuntra kona ket kai anamaet nin mikukumprunta a nibaritaꞌ nin saya sa saya.

57 Sin wanin, main nin umno ray pinaipadar nin magtistigos nin mibulaꞌ-bulaꞌ nin kuntra kona ni Jesus. Wanra, 58 “Narngeꞌ mi nin wanan siin, ‘Sidaen koyayti si Timplo nin nipaꞌdeng ran tutawo ket sa luob nin tuloy awro, paꞌdengen koyay sakalakon Timplo nin amboꞌ nin gawaꞌ nin tawo.’ ” 59 Ket mataman nin say ibari-baritaꞌ ran sarayti ket kai nin mikukumprunta.

60 Ket sin sain, inumdeng ya a Sangkataꞌgayan nin Padiꞌ sa adapan ra ngaꞌmin ta pigaw nin usisaen naya si Jesus, ket wana, “Ani a maiꞌbat mo sa sain nin manꞌiparsa ra komo?”

61 Baleꞌ kai ya gapo nin nagꞌirgo si Jesus. Ket tinepetan naya anamanan Sangkataꞌgayan nin Padiꞌ a wana, “Siꞌka para a Cristo a si Anak nan Dios a sya ket Marayo ya?”

62 “Oꞌ, siꞌko,” wana ni Jesus. “Ket maꞌkit rako liꞌ nin siꞌkon si Pinaitawo nin nakatekreꞌ iti sa pawanan nan Dios a sya a Makapangyayadiꞌ, nin mangkumayupaꞌ akon iti sa gunem mangibwat sa langit.”^d

63 Sin narngeꞌ nayti nin si Sangkataꞌgayan nin Padiꞌ, rinakyat nay seket na nin pangipaꞌkit nan alakin sager na. Wana, “Matkap et paray tistigos kuntra kona? 64 Narngeꞌ moyoyna nin mismo sawanin a pangunguꞌna-uꞌna na konan Dios! Ani a wamoyo?”

Ket nipapasayawan ra ngaꞌmin a sintinsyawan yan patiti.

65 Ket linudaꞌ-ludaan rayaynan raruma sa rupa si Jesus. Main nin namepet nin mata na tan tinasu-taso raya a wanra, “Prupita ka; ibaritaꞌ mo edet no siꞌnoy nanaso komo!” Ket sin naipagamet yayna konran gwardya, rinampa-rampaꞌ raya.

66 Sawanin, itaw ya si Pedro sa yupaꞌ sa baraybay nan palasyo sin nako yadtaw a sayay alilaꞌ nan babayi nin Sangkataꞌgayan nin Padiꞌ. 67 Ket naꞌkit naya si Pedro nin mampairangrang. Pinastang nayan maong miꞌsa wana, “Saya ka anamaet konran kalalamoꞌ nan sitaw si Jesus a taga Nazaret.”

68 Baleꞌ nibudiꞌ na in ni Pedro a wana, “Kai ko nin tandaꞌ, ni matarusan in say manꞌibaritaꞌ mo!” Ket inmalis yan nako sa purta nan pukok. Ket main nin tinmarangꞌok nin manok.^e

69 Naꞌkit nayaynaet itaw nin si babayi tan nibari-baritaꞌ na konran itaw, “Siin nin tawo ket saya ya konran kalalamoꞌ na!” 70 Baleꞌ nibudiꞌ naynaet ti ni Pedro.

Nainsanan nin bugaꞌ, wanra anamaet nin tutawo nin itaw kona ni Pedro, “Pageꞌ a saya ka konran kalalamoꞌ na ta siꞌka ket taga Galilea kaynamaet.”

71 Ket wana, “Dusawen nakon Dios no amboꞌ nin tutuo a manꞌibaritaꞌ ko. Sambawan ko nin kai koya gapo nin katandaꞌ in si tawon manꞌirgwen moyo!”

72 Kapingmatan, main nin tinmarangꞌok nin manok nin pirwa. Ket napanemtem naytaw ni Pedro say nibaritaꞌ na ni Jesus kona nin wana, “Baꞌyo main nin tumarangꞌok nin manok nin pirwa, nitlo moyna nin nibudiꞌ a katandaꞌ nako.” Ket abet-abet na ni Pedro.