2 Adapen raynan mangapon ni Jesus tan saray tumutumbok na. Baꞌyo in et sin sain, naipasrep naynan Dimunyo sa kaisipan na ni Judas nin anak na ni Simon Iscariote a pagtraiduran nayan ipagamet si Jesus konran pupangulo. 3 Tandaꞌ na anaod ni Jesus a nipagamet nayna nin Ama na kona a pakauray sa sarban mangyadiꞌ. Tandaꞌ na et a lamang a si Dios a nangibwatan na tan sya nin lamang a sublian na. 4 Mataman no wanin, sin mampangapon sara, inumdeng ya si Jesus tan linusꞌok nayay kapa na, miꞌsa ya nin niberber nin twalya sa awak. 5 Kaaram, nangwa ya nin ranom sa planggana, baꞌyo na nin tinaranaan nin inuyasan a ayi ran tumutumbok na, miꞌsa pinunasan na nin twalyan nakaberber sa awak na.

6 Ket, sin nako ya kona ni Pedro, wana ni Pedro kona, “Uunuren, ambaleꞌ a siꞌkamo et a manguyas nin ayi ko?”

7 Ket wana ni Jesus, “Kai mo nin mataros sawanin a man-gawꞌen ko baleꞌ, matarusan moyna liꞌ sa adapen.”

8 Konan siin, wana ni Pedro, “Andyak! Kai gapo nin magwaꞌ a uyasan moyoy ayi ko!”

Baleꞌ wana ni Jesus, “No kai kata nin uyasan, kai ka gapo nin makakibiang kongko.”

9 Sin sain, wana ni Pedro, “Uunuren, no wanin edet, amboꞌ tamoꞌ nin say ayi koy uyasan moyo no kai pati say gamet ko tan si ulo ko.”

10 Ket wana ni Jesus, “Si tawo nin naryoꞌ ana, kai nayna nin matkap a maryoꞌ anamana, banaꞌ ta maringgas yayna. Say ayi na tana a matkap nin uyasan. Siꞌkamo, maringgas kamoyna, baleꞌ amboꞌ nin sarba moyo.” 11 Nibaritaꞌ na ni Jesus in si amboꞌ nin sarba ra ket maringgas ana banaꞌ ta tandaꞌ nayna no siꞌno konra a magtraidor kona.

12 Sin nayadiꞌ nayna nin inuyasan ni Jesus a ayi ra, nisulot naya anamana a kapa na tan sinmubliꞌ ya sa lugar nadtaw sa pangnganan. Kaaram, wana konra, “Matarusan moyo para a kayadiꞌ ko tamoꞌ nin ginwaꞌ komoyo? 13 Say tawag moyo kongko ket Maistro tan Uunuren, ket kusto in ta siin ako. 14 Ket, ta siꞌko nin si Uunuren tan Maistro moyo ket inuyasan koy ayi moyo, siꞌkamo, matkap a uyasan moyo anamaet a ayi nin saya tan saya. 15-16 Wanin, kanyaꞌ nin isipen moyoyti nin maong: Si sayay aripen, kai ya nin mas ataꞌgay dyan si amo na; wanin anamaet, si sayay nibakiꞌ, kai ya nin mas ataꞌgay dyan si namakiꞌ kona. Ket ginwaꞌ ko in komoyo nin mudilo nin arigen moyo ta pigaw nin gawꞌen moyo anamaet a wanin konran kalalamoꞌ moyo. 17 Ket sawanin, ta mataros moyoynayti, makarmaꞌ tan maririket kamo no gawꞌen moyo.”

18 “Wanin man, amboꞌ nin sarba moyo a manꞌirgwen ko ta katandaꞌ katamon maong a piniliꞌ ko. Ket, matukid yay mabasa sa Masanton Kasuratan a wana, ‘Si mampakanen ko, nagtraiduran nako.’^a 19 Manꞌibaritaꞌ koyaynayti komoyo sawanin baꞌyo ya et nin matukid ta pigaw nin no natukid yayna nin liso ket mamper kamoyna a ‘Siꞌko yay si Main Anggaynan-angga.’ 20 Isipen moyoyti nin maong: Si mangakoꞌ kona nin si ibakiꞌ ko, inakoꞌ nako, ket inakoꞌ naya anamaet a namakiꞌ kongko.”

21 Mayadiꞌ na nin nibaritaꞌ in ni Jesus, maidap nin tuloy a nakem na ket wana nin diritsawan konran tumutumbok na, “Isipen moyoyti nin maong: Saya komoyo a magtraidor kongko.”

22 Ket saray tumutumbok na nipastangan sara, a maguloy isip ra a no siꞌno a wana. 23 Si tumutumbok nan kawaꞌnan na nin maong ni Jesus, syay iti sa dani na. 24 Sininyasan nayayti ni Simon Pedro tan nipatepet na no siꞌno a manꞌirgwen na ni Jesus. 25 Inmirig ya anaod nin inmadap a tumutumbok kona ni Jesus miꞌsa wanan niyanas, “Uunuren, siꞌno ya in si wamoyo?”

26 “Si pamyan ko konan siti si tinapay a manꞌisawit ko, sya,” niyanas nan niꞌbat ni Jesus. Ket nangisawit ya anaod nin tinapay miꞌsa naya nin nibi kona ni Judas nin anak na ni Simon Iscariote. 27 Eteng naya tana nin narisibi ni Judas a tinapay, sinumrep ya si Satanas kona.

Ket wana ni Jesus kona ni Judas, “Gawꞌen moynan tampor a matkap mo nin gawꞌen.” 28 Saray tumutumbok na ni Jesus nin kadungo na, kai ra nin matarusan a rabay na nin irgwen. 29 Ket banaꞌ ta si Judas a mampangaꞌget nin kwarta ra, say wanra no nibakiꞌ naya ni Jesus nin manaliw nin matkap ra no pista, o mako ya nin mami nin kwarta konra nin pubri.

30 Sin naꞌkan nayaynaytaw ni Judas si tinapay, nibwat yayna. Sin sain ket yabi ana.

31 Sin kasa yayna si Judas, wana ni Jesus, “Say amboꞌ ana nin maꞌteng a mangyadiꞌ kongko nin si Pinaitawo, ipadar no ambaleꞌ a nako akodti, tan mangipadar anamaet sa sangkaandaan nin gawaꞌ nan Dios. 32 Ket no naipadar anay kataꞌgayan nan Dios banaꞌ kongko,^b si Dios, ipadar naynamaet a kataꞌgayan ko. Kai na nin paꞌte-paꞌtengen nin gawꞌen ti.

33 Aꞌnak ko, amboꞌ ana nin maꞌteng a kalamoꞌ rako et. Tikapen rako liꞌ, baleꞌ ibaritaꞌ koyti komoyo si nibaritaꞌ ko intaw konran pupangulo ran Judio, a kai kamo nin makapikaꞌ itaw sa keen ko. 34 Ket main nin baꞌyo nin igan-gan ko komoyo: Matkap a kawaꞌnanen moyo a saya tan saya. Say pangangawaꞌnan moyo sa saya tan saya ket matkap a kapada nin pangangawaꞌnan ko komoyo 35 ta, no kawaꞌnan moyo a saya tan saya, mangibwat sa sain, matandaan ran sarban tutawo a tumutumbok katamo.”

36 Nitepet na ni Simon Pedro, “Adti ket a keen moyo, Uunuren?”

Ket niꞌbat na ni Jesus, “Sa keen ko ket kai ka et nin makatumbok sawanin, baleꞌ tumumbok ka liꞌ sa adapen.”

37 Ket wana anamana ni Pedro, “Uunuren, ambaleꞌ a kai ako nin makatumbok sawanin ey? Oꞌ a ta iti ako nin sisasadyaꞌ nin mati para komoyo.”

38 Inumbat ya si Jesus a wana, “Sisasadyaꞌ ka para nin pageꞌ nin mati para kongko? Baleꞌ isipen moyti nin maong: Baꞌyo main nin tumarangꞌok nin manok, nitlo moyna nin nibudiꞌ a katandaꞌ nako.”