5 Sin sain, wana ni Tomas, “Uunuren, kai mi nin tandaꞌ no adti a keen moyo, paꞌno miya nin tandaꞌ a dalan ey?”

6 Konan siin wana ni Jesus, “Siꞌko a dalan nin mako konan Dios, ta siꞌko a puon nin katutuꞌwan maipaꞌkaꞌ konan Dios tan si mami nin byay a iti konan Dios. Kasan siꞌnuman nin makakikalamoꞌ konan Ama ko no kai ya yapoꞌ et nin kikalamoꞌ a sayay tawo kongko. 7 No peteg a katandaꞌ moyokoyna, katandaꞌ moyayna anamaet a Ama ko. Mangibwat ana nin sawanin, katandaꞌ moyayna nin peteg tan naꞌkit moyayna.”

8 Ket wana ni Felipe, “Uunuren, ipaꞌkit moya pa edet komi a Ama moyo ket, mapdaꞌ kami ana.”

9 Konan siin wana ni Jesus, “Felipe, naꞌteng rakoyna nin kalamoꞌ ket ambaleꞌ a kai nako et nin katandaꞌ? Si nakaꞌkit ana kongko, naꞌkit nayayna a Ama ko. Ambaleꞌ a wamo et ket ipaꞌkit koya komoyo a Ama ko? 10 Kai ka para nin mamper a iti ako konan Ama ko tan si Ama ko ket iti ya kongko? Say manꞌibari-baritaꞌ ko, kai nin nangibwat sa kaisipan ko nin bukod no kai edet, nangibwat konan Ama ko nin iti kongko ta syan lamang a man-gumwaꞌ sa manꞌipagwaꞌ na kongko. 11 Kanyaꞌ nin mamper kamo sa wangko a iti ako konan Ama ko tan si Ama ko ket iti ya kongko. Ket no kai moyo sukat nin tepren a irgo ko, mamper kamo et a lamang banaꞌ sa makapakaꞌngap a man-gawꞌe-gawꞌen ko.”

12 “Isipen moyoyti nin maong: Si magmatalek kongko, magwaꞌ na anamaet a makapakaꞌngap nin man-gawꞌe-gawꞌen ko, tan mas et liꞌ a magwaꞌ na dyan sayti. Wanin ta mako akoyna konan Ama ko, 13 ket animan a dawaten moyo banaꞌ ta mangingilalaman kamo kongko, gawꞌen ko ta pigaw nin maipataꞌgay ya a Ama ko banaꞌ kongko. 14 Animan anaod a dawaten moyo banaꞌ ta mangingilalaman kamo kongko, gawꞌen ko.

15 No kawaꞌnan rako, tumulok kamo sa gan-gan ko; 16 siꞌko anamaet, dawaten ko konan Ama ko a mamakiꞌ ya nin kasubray ko nin tumulong komoyo, nin miikap ya komoyo anggan-angga. 17 Sya a Ispirito na nin mangyakay komoyo nin katutuꞌwan. Saray nasagyat nin say iti sa mundo, kai raya nin maakoꞌ banaꞌ ta kai raya nin maꞌkit, ni katandaꞌ. Baleꞌ siꞌkamo, katandaꞌ moya, ta kalamoꞌ moyayna tan miikap ya liꞌ komoyo.

18 Kai katamo nin lakwanan a bilang sayay ulila, ta sumubliꞌ ako liꞌ. 19 Sa amboꞌ ana nin maꞌteng, kai rakoyna nin maꞌkit nin saray tutawodti sa mundo. Baleꞌ siꞌkamo, maꞌkit rako liꞌ a lamang. Ket banaꞌ ta mabyay akoynan si peteg nin byay, mabyay kamo liꞌ anamaet. 20 Konan sitaw liꞌ nin panaon, matandaan moyo nin iti ako konan Ama ko. Matandaan moyon lamang a siꞌkamo, iti kamo kongko tan siꞌko, iti ako komoyo.

21 Si tawon mangipasrep nin gugan-gan ko sa kanakman na ta pigaw nin tumulok ya sa sayti, syan diri a mampangadoꞌ kongko, ket si Ama ko, aduen naya tan siꞌko anamaet, inadoꞌ koyayti tan ipadar kon diri a kanakman ko kona.”

22 Konan siin nanepet ya si Judas (amboꞌ ya si Judas Iscariote) a wana, “Uunuren, ani a nangyadiꞌ a paipadar kamo tamoꞌ komi, nin amboꞌ konran sarba ran tutawodti sa mundo?”

23 Ket niꞌbat na ni Jesus, “Oꞌ a ta si mangadoꞌ kongko, tumulok ya sa ibaritaꞌ ko. Sya a aduen nan Ama ko ket, si Ama ko tan siꞌko, mako kami kona tan miikap kami kona. 24 Baleꞌ si kai nin mangawaꞌnan kongko, kai na anamaet nin rengꞌen a ibaritaꞌ ko. Sayti say manꞌibari-baritaꞌ ko, amboꞌ nin nangibwat sa kaisipan ko nin bukod no kai konan Ama ko nin si namakiꞌ kongko.”

25 Nituloy na ni Jesus, “Nibaritaꞌ koynayti nin bubagay komoyo antaran iti ako et komoyo. 26 Baleꞌ, ibakiꞌ naya liꞌ nin Dios komoyo a Ispirito na nin mangingilalaman kongko ta pigaw nin tulungan^a nakamo. Sya a mangyakay komoyo nin sarba, tan sya a mangipapanemtem komoyo nin sarba nin manꞌibari-baritaꞌ ko.

27 Andiꞌ kamo nin aburido tan maliꞌmo, banaꞌ ta byan katamo nin katinekan nin nakem. Say katinekan nin ibi ko komoyo, amboꞌ nin say katinekan a manꞌirgwen ran tutawodti sa mundo no kai edet, say katinekan nin iti kongko. 28 Nibaritaꞌ koyna komoyo a lakwanan katamoyna baleꞌ sumubliꞌ akon lamang. No kawaꞌnan rako, rumiriket kamo banaꞌ ta mako akoyna konan Ama ko a sya ket mas ataꞌgay ya dyan siꞌko. 29 Manꞌibaritaꞌ koynayti sawanin komoyo baꞌyo et nin mangyadiꞌ, ta pigaw nin no sayti ket nangyadiꞌ ana liꞌ ket, mamper kamo sa nibaritaꞌ ko.

30 Kai koyna nin maiyanro et a pakiirgo ko komoyo ta manrumateꞌ yayna si Satanas a syay mampagꞌuray konran tutawodti sa mundo. Kasa nin kapangyadian na kongko. 31 Wanin man, manꞌaburuyan koyti nin mangyadiꞌ ta pigaw nin sarba ran tawo ket matandaan ra a kawaꞌnan koya a Ama ko, kanyaꞌ nin man-gawꞌen kon maong ngaꞌmin a manꞌigan-gan na kongko.

Sigi, pari kamoyna ta mako atamoyna.”